رواية مودة ورحمة الفصل الرابع

(مودة ورحمة) الحلقة4

في اليوم التالي استيقظ حمزة ولم يكن قد نام جيدًا
حمزة يحدث نفسه :وكمان صاحي متأخر عن كل يوم..كل ده بسببك يا حلا قعدت أفكر طول الليل ومنمتش كويس..وبعدين أنا مالي انا مختلفة عن البنات اللي اعرفهم ولا لا..هي أكيد بتعمل كده عشان تكسب ثقة جدي..إيه اللي أنا بعمله ده انا كده هتأخر أنا أقوم أحسن لحسن بالشكل ده مش هيبقى فيه شغل

في غرفة حلا: يبدو عليها التوتر
حلا بتكلم نفسها:إيه يا حلا هو انتِ أول مرة تشتغلي عادي يعني شغل زي أي شغل..يوه بقى أنا معرفتش أنام وحاسة اني مش مركزة

وفجأة سمعت طرقات على الباب
حلا قامت تفتح:جدو!
الجد بابتسامة:جاهزة يا حلا؟
(وعندما رأى التوتر باديًا عليها)
الجد:إيه يا حبيبتي مالك متوترة كده ليه 
حلا  بابتسامة متوترة:أبدًا يا جدو أنا جهزت خلاص
الجد:طب يلا يا حبيبتي عشان عاملك مفاجأة
وهبط الاثنان إلي الحديقة 
الجد:بتعرفي تسوقي يا حلا
حلا بعدم فهم: أيوه اتعلمت وأنا في فرنسا
الجد:طب بصي قدامك كده
حلا تنظر وبدهشة:ايه ده يا جدو!
(كان الجد قد أحضر لها سيارة على الطراز الحديث)
الجد:ها عجبتك؟
حلا:أيوه بس كده كتير و.....
الجد:هششش ده حقك يا بنتي وبعدين أنا عارف انك مكنتيش هتوافقي تركبي مع حمزة أو آسر..... (لإنها تبقى خلوة)
حلا بابتسامة:ربنا يبارك في عمرك يا جدي
وفجأة 
آسر يصفر:أيوه بقى يا عم العربيات مبروك عليكِ يا حلا
حلا بخجل:الله يبارك فيك
حمزة بوجه جامد:مش يلا بقى عشان منتأخرش
الجد:مع السلامة يا ولاد خدوا بالكم من نفسكم
وانطلق كل واحد منهم بسيارته إلى أن وصلوا شركة القاسم
دلف حمزة وآسر وحلا فكان كل من يرى حمزة يقف احترامًا له ويلقي عليه تحية الصباح
حمزة لحلا:ده مكتبك وده مكتبي وده مكتب آسر عشان لو احتاجتي حاجة في الشغل تبلغينا
ودي غرفة الاجتماعات تجهزي انتِ وآسر وتكونوا موجدين فيها بعد نص ساعة عشان هعمل اجتماع للموظفين واعرفهم بانضمامك معانا في الشركة
آسر وحلا:تمام
ودلف كل منهم إلي مكتبه
أما عن سكرتيرة حمزة: (فكانت ترتدي ملابس تكشف أكثر مما تخفي حتى وجهها لم يخلو من هذه الألوان الصناعية وكأن وجهها لوحة زيتية وللأسف أغلب البنات في هذا الزمان خلعن ثوب العفة و الحياء إلا من رحم ربي.)
ألم يسمعن قول الله تعالى: {يَأَيُّهَا النّبيُّ قُل لأَِّزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِن جَلابِيبِهِنَّ}  وقال تعالى: {وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فَرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ}  وقال تعالى: {وَلَا تَبَرَّجْنَ تَبَرُّجَ الْجَاهِلِيَّةِ}

وقوله صل الله عليه وسلم قال: "صنفان من أمتي من أهل النار، لم أرهما بعد: نساء كاسيات عاريات، مائلات مميلات، على رءوسهن أمثال أسنمة الإبل، لا يدخلن الجنة، ولا يجدن ريحها، ورجال معهم سياط كأذناب البقر، يضربون بها الناس"

السكرتيرة بابتسامة لعوب:أجيب لحضرتك الورق
حمزة:تمام وياريت فنجان قهوة
السكرتيرة(لينا) أمرك يا فندم
حمزة وهو يدخل إلى مكتبه:وبلغي الموظفين إن فيه اجتماع بعد نص ساعة
لينا :تمام حضرتك 
وبعد مرور نصف ساعة وفي غرفة الاجتماعات وبعد أن حضر الجميع
حمزة:أحب أعرفكم حلا القاسم هتكون مسؤولة عن الترجمة والوفود الأجنبية
يعني الأوراق اللي عندك يا لينا هتوديها لحلا الأول تترجمها وبعد كده تجيبهالي أمضيها
وكمان في شركة فرنسية هتعمل معانا ديل وطبعا يا حلا انتِ هتحضري معانا الاجتماع عشان الترجمة
وباقي الموظفين عايز كل واحد يشوف شغله كويس لإن لو الديل ده تم الشركة هتتنقل نقلة تانية
وانتَ يا آسر عايزك تتابع مع الشركة دي وتشوفهم هيوصلوا مصر امتي وانتَ اللي هتكون مسؤول عن إقامتهم في مصر واضح
آسر:تمام
حمزة:مش عايز أي غلطه فاهمين 
الجميع:فاهمين يا فندم
حمزة:كل واحد على مكتبه
ذهب الجميع إلى مكاتبهم إلا مازن(وهو صديق حمزة ويعمل معه في الشركة)
مازن بغمزة:إيه ياحمزة حكاية حلا دي كمان
حمزة:حكاية إيه واتكلم عدل يا مازن
مازن:مالك يا عم قفشت ليه بس بصراحة البت صاروخ
حمزة بعصبية:احترم نفسك يا مازن واتكلم عدل وبلاش حركاتك دي معاها
مازن:إيه يا عم متعصب ليه هي تبعك ولا إيه
حمزة وبعصبية اكتر:ماااااازن دي بنت عمي عارف لو قربت منها هنسفك يا مازن
مازن:إيه يا حمزة أنا كنت بهزر في إيه
حمزة بنفس الأسلوب :لا متهزرش بالأسلوب ده واتفضل على مكتبك

وفي مكتب السكرتيرة ..لينا بتكلم صاحبتها موظفة اسمها سلوى:ومين حلا دي كمان
سلوى: أنا سمعت إنها بنت عمه
لينا:وديه حكايتها إيه بقى أنا أول مره أعرف إن عنده ولاد عم 
سلوى: علمي علمك
لينا:بكره كل حاجة تبان

عند حلا في المكتب يأتي لها اتصال على هاتفها 
حلا بفرحة:بيسو وحشتني
باسل:إيه يابنتي انتِ واقعة كده ليه مش تقولي السلام عليكم الأول
حلا بضحكة:وعليكم السلام يا سيدي ها أخبار موكا وماما وعمو ايه؟
باسل:الكل بخير وبيسلموا عليكي..المهم أول يوم شغل أخباره  معاكي ايه
حلا:اهو لسه هبدأ بس لحد دلوقتي كل حاجه تمام ادعيلي بقى
باسل:ربنا معاكي يا لولو أنا عارف انك أدها اتوكلي انتِ بس على ربنا واعملي اللي عليكي وكل حاجه هتبقى تمام
حلا:بإذن الله ..بجد يا باسل انتَ بترفع من معنوياتي
باسل:ابقي عدي الجمايل بس
حلا:يا عم اتنيل ده انا بثبتك بس 
باسل: ايه يا بنتي كلامك بقى بيئة كده ليه ميبنش عليكي ان انتِ اتربيتي في فرنسا
حلا:اسم الله عليك يا خويا روح شوف نفسك وتعالى اتكلم
باسل:امشي يا حلا أنا غلطان اني معطل شغلي وبطمن عليكي وممكن اترفد بسبب العملة دي وملقيش شغل بقى واتسول في شوارع فرنسا ويبقى ذنبي في رقبتك يا حلا  
حلا:تصدق صعوبت عليا ياحرام.. اقفل يا باسل انتَ ناوي تشلني
باسل:بكرة تندم يا جميل
حلا وهي بتضحك:سلام يا بيسو
وفجأة وجدت حمزة يقف عند باب المكتب يبدو عليه الغضب والشرر يتطاير من عينيه.....
.......................................
ونكمل الحلقة القادمة إن شاء الله 😊