النباتات ضد الزومبي
الفصل الثالث: “الاستعدادات”
- بعد مرور 20 سنة! "سيف" في الجراج مع السيارة "بيني"!
بيني (السيارة تم تعديلها في الـ20 سنة وعادت لوعيها):
“واثق من الخطوة دي؟”
سيف (لأول مرة يتحدث بغموض):
“لا... بس هعملها!”
بيني:
“هو قرار حلو، لأن نهايته هتخلي العوالم كلها أمان من خطر الزومبي، بس... صعبة علي بشري لسه موصلش لمرحلة الزومبي الخارق!”
سيف:
“مفيش حاجة صعبة طالما ربنا معايا.”
بيني:
“براحتك... انا كدا كدا مؤيدة القرار لو انت قده!”
سيف (داخل عقله):
“مش مصدق إن عدى 20 سنة بالسرعة دي... بالأبطال... سابوا لي شوية حاجات هتفيدني بعدين... وحالياً انا لوحدي بحارب الزومبي... مع إن مروان معايا، بس هو لسه نايم... نفسي يخرج من الغيبوبة دي شوية ويبقى معايا!”
*لأول مرة نعرف حقيقة مروان: مروان في غيبوبة منذ فترة طويلة، ولكن لم نعرف السبب بعد!*
سيف (داخل عقله):
“هي مش غيبوبة اكتر من إنه عالق داخل نومه الطويل... ودي حالة شبه مستحيل إنها تحصل غير لواحد في كل قرن تقريباً... شيء غريب!”
بيني:
“طب صحيح سؤال، هو مروان ليه نايم ده كله؟”
سيف:
“مروان عنده حالة نادرة إسمها 'متلازمة النوم الأبدي'.”
بيني (مصدومة):
“يعني هيفضل نايم ول حياته؟!”
سيف:
“لا... ده مجرد اسم، هو بينام لفترة طويلة ممكن توصل لسنين.”
بيني:
“طب هي جاتله كدا ليه وامتى؟”
سيف:
“ابوه أصلاً كان متوفي... وبعدها توفت امه واخوه في حادثة وهو ده السبب الرئيسي إنه خلاه يدخل في المتلازمة دي!”
*وأخيراً... عرفنا تفاصيل الحقيقة الكاملة!*
بيني (حزينة):
“أوه!... انا آسفة لقولك كدا!”
سيف:
“متتأسفيش، مش بإيدك... كل واحد ليه عمره... ومروان بس فقد عيلته بدري بدري... وده اللي أثر كدا، زي ما انتي شايفة!”
(انتهى سيف من تجهيز الحاجة داخل السيارة بيني):
“خلاص كدا... انتهيت من الحاجة!”
بيشوتر صغير (يتحدث) *هو أثر من البطل بيشوتر*:
“أخيراً خلصت... وهنتحرك امتى؟”
سيف:
“مش دلوقتي... لما مروان يفوق.”
كاكتوس صغير:
“انت عارف هيقوم امتى؟”
سيف:
“لا.”
تشومبر صغير:
“انا جعان.”
بيني:
“مش وقتك يا تشومبر خالص!”
عباد الشمس صغيرة:
“خليكم عندكم أمل... الأمل جميل.”
تشومبر صغير:
“أمل ماتت يا عباد الشمس.”
سيف (مصدوم):
“أمل ماتت!... وانت عرفت الجملة دي منين؟”
بيشوتر صغير:
“احنا معاك يا سيف بقالنا 20 سنة.”
سيف:
“آه، فهمت.”
تشومبر صغير:
“انا جعاااان!”
عباد الشمس صغيرة:
“انت مش بتشبع يا تشومبر؟”
تشومبر صغير:
“لا.”
سيف:
“بقالي 20 سنة بدور له علي حل... ولسه مش لاقي!”
تشومبر صغير:
“ولا هتلاقي.”
سيف:
“شكراً علي التفائل.”
كاكتوس صغير:
“شكلك فعلاً مش هتلاقي حل!”
بيشوتر صغير:
“لكل مشكلة حل يا مشوك.”
سيف (بابتسامة جانبية، بصوت خافت):
“مشوك!”
عباد الشمس صغيرة (تنظر ناحية الطريق العمومي):
“سيف... دول رجعوا تاني!”
- ينظر "سيف" من النافذة علي الطريق العمومي.
سيف (بسعادة):
“أخيراً... كنت بدأت أحس بالملل... يلا نخرج!”
كاكتوس صغير (بحماس):
“هاهاهااااا... أخيراً، عدى زمن عليهم!”
بيشوتر صغير:
“انت كنت خامل من ثواني!”
كاكتوس صغير (بنظرة قاتلة):
“بحب القتال!”
عباد الشمس صغيرة:
“تشومبر، بص!”
تشومبر صغير (ينظر علي الزومبي من النافذة):
“أكل... انا عايز آكل!”
بيشوتر صغير:
“انت كمان كنت بارد من ثواني!”
تشومبر صغير:
“انا جعان! يلا يا سيف نخرج.”
سيف (ينادي علي كلبه):
“روك... هات الـAKM من جوا!”
عباد الشمس الصغيرة (متحمسة):
“ايوه... عايزك أشوفك وانت بتحاربهم بالرشاش!”
بيشوتر (مصدوم):
“انتي كمان!!!... طب اشمعنا انا مش متحمس؟!”
سيف:
“انت غريب بصراحة.”
- وصل الكلب "روك" وهو يجُر الرشاش معه!
سيف (يمسك بالرشاش):
“يلا نحرك اجسامنا!”
- يخرج "سيف" ومعه الكلب "روك" والنباتات!
- يهجم "سيف" بالرشاش، و "تشومبر صغير" يأكل الزومبي بشراهة! و "كاكتوس صغير" يضرب بكل علي الزومبي... و "بيشوتر صغير" يضرب وهو يقف بجانب "عباد الشمس الصغيرة"…
عباد الشمس الصغيرة:
“إضربهم بالبازلاء يا بازلاء!”
بيشوتر صغير:
“حاسسها إهانة!”
سيف (يقترب من النباتات):
“مش وقته إهانة... إضرب!”
- يطلق "بيشوتر صغير" حبات البازلاء من فمه بسرعة كبيرة!
- الأرض تتحرك بشكل غريب، ثم يخرج من تحت قدمي الزومبي "تشومبر صغير" ويبتلع الزومبي بالكامل…
تشومبر صغير (سعيد):
“لذيذ!”
سيف (بيكلم كلبه):
“روك... ساعد كاكتوس!”
- ينبح الكلب "روك" بسعادة، ثم يتحرك!
- "كاكتوس صغير" مُحاصر من اتنين زومبي وحاسس بالخوف، وفجأة يظهر الكلب "روك" وهو يقفز علي الاتنين زومبي ويأكلهم بشراسة…
كاكتوس صغير (قلبه ينبض بسرعة):
“ايوه يا روك، اقتلهم... مش مصدق، انا لسه عايش!”
- فجأة!... تتحرك الكاميرا وتخرج من شاشة بطريقة غريبة، كأننا داخل عرض تلفزيوني!…
- ولكن... نرى شاشات كثيرة وليست واحدة، ونرى شخص قصير القامة ولديه عقل كبير جالس يُشاهد القتال في صمت!
الشخص الصغير (نبرته كلها شر):
“بلاش الاستعدادات دي كلها، علشان انا... بظهر فجأة!”
- ويتضح أن هذا الشخص هو... زعيم الزومبي "زومبوس"!
*نهاية الفصل الثالث*
الفصل الرابع: “زعيم الزومبي”
« يعود بنا المشهد الي أرض المعركة، بعد فوز "سيف" والنباتات، ومقتل موجة الزومبي بالكامل »
- "كاكتوس صغير" سعيد بالكلب "روك" وإنقاذه له!
- "عباد الشمس صغيرة" جالسة مع "بيشوتر صغير" تتمسخر عليه بسبب مشاركته في القتال متأخر!
- "تشومبر صغير" في قمة سعادته، بقاله 20 سنة مش بياكل لحم الزومبي... رايح، جاي عمال ياكل في جثث الزومبي!
تشومبر صغير:
“انا فرحان... بس جعان!”
- و "سيف"... جالس بجانب منزله، ويضع رأسه علي الحائط، ونام من الإرهاق!
- تلاحظ "عباد الشمس صغيرة" "تشومبر صغير" وهو يأكل جثث الزومبي بشراهة…
عباد الشمس صغيرة:
“كُل علي الهادي يا تشومبر!”
تشومبر صغير (يُحدق في عينيها بقوة):
“جعان!”
- ثم يعود "تشومبر صغير" لأكل جثث الزومبي!
عباد الشمس صغيرة:
“انا زهقت من الكلمة بجد!”
- "كاكتوس صغير" يقترب من "سيف" ويجلس بجانبه.
كاكتوس صغير:
“انا حاسس بيك... الواحد عايش حياته كلها عشان يحارب الزومبي... وفي الآخر... مش لاقيين نهاية للكائنات دي، ولا حتى لاقيين حد يسمعنا ويسمع مشاكلنا... صح يا سيف؟”
- ينصدم "كاكتوس صغير" من منظر "سيف"، ولكن "سيف" نائم نوم عميق وكأنه في غيبوبة!
كاكتوس صغير (بابتسامة خبيثة):
“كويس... حتى انت مبتسمعش... بس حلو! أحكيلك كل مصايبي ومش هتقول لحد!”
سيف (يرد وهو مغمض عينيه):
“قول مصايبك ومش هقول لحد متقلقش.”
كاكتوس صغير (مصدوم):
“انت عايش؟!”
سيف (يفتح عينيه):
“اومال ميت!... انا عايش، بس كنت فارد ضهري شوية... متقلقش.”
- ينتقل المشهد الي داخل الأرض ما وراء الكوبري، وهناك نرى الأرض مليئة بدخان بنفسجي أسود، وهناك يوجد مئات المقابر، وفجأة الأرض تهتز ثم تهدأ، تهتز وتهدأ، تهتز وتهدأ... ما سبب ذلك؟ ولكن نرى قدم شيء عملاق تدب علي الأرض، ونعرف أن هذا هو الآلي العملاق الخاص بـ"زومبوس"!
- تدخل الكاميرا داخل رأس الآلي، ونرى بداخله "زومبوس" وهو مبتسم ابتسامته الشهيرة!
زومبوس (طريقة كلامه مجنونة):
“أوووه يا سيف! انا بحسب إنكم مستعدين بجد... بس انا مش شايف أي استعدادات... شكل المعركة هتخيب ظني! ولكن... أحب أقولكم إن الفجأة... وصلت!”
- تتحرك الكاميرا أمام المقابر والدخان يزداد قوة!
زومبوس:
“قوموا يا أطفالي... كُلوا كل شيء حي ودمروا أي شيء غير حي!”
- تبدأ أيادي الزومبي تخرج من المقابر بطريقة ضبابية مرعبة!
زومبوس:
“أخرجوا يا أطفالي وانطلقوا في طريقهم، وقوموا بمهمتكم الحياتية... القضاء علي النباتات والبشر!”
- يخرجوا الزومبي من المقابر بشكل كثيف ومخيف!
- "زومبوس" يضحك ضحكته الشريرة والمريبة!
- تقترب الكاميرا بشدة من وجهه، ثم ينقطع المشهد علي ضحكته الشريرة!
- يعود المشهد الي منزل "سيف".
كاكتوس صغير:
“سيف، عندي سؤال.”
سيف:
“إسأل.”
كاكتوس صغير:
“هو ايه اللي حصل لعائلتك؟”
- يحزن "سيف" قليلاً، ولكن يخفي حزنه!
كاكتوس صغير:
“انا عارف إنه سؤال صعب ورخم، بس انا عندي فضول.”
سيف:
“مش سؤال رخم... بس هو صعب عليا ذات نفسي... هو لغز كبير وعميق... مش لاقيله حل.”
كاكتوس صغير:
“ازاي؟ مش هما ماتوا؟”
سيف:
“معرفش... وانا في سن الـ13 صحيت لاقيت نفسي في البيت ده والجيش موجود معايا... بس اللي قبل اليوم ده، يعتبر لغز وسر ليا... وللجيش!”
كاكتوس صغير (مصدوم):
“الجيش ذات نفسه ميعرفش أهلك فين؟!”
سيف:
“هو ده اللي إتقال قدامي، واللي انا شوفته بنفسي.”
كاكتوس صغير (يشعر بالحزن):
“انا آسف علي المأساة دي، بس لو عايزني معاك في البحث عن سر عائلتك... انا معاك عادي... لأني يعتبر زيك.”
سيف:
“زيي ازاي؟”
كاكتوس صغير:
“مش انا لوحدي، بس... كل النباتات الصغيرة دي ملهاش أهل حقيقيين... هما بس تم زرعهم وصُنعُهُم من النباتات الأبطال.”
سيف (مستغرب الحكاية):
“انا اول مرة اعرف بصراحة... انا آسفلك بردو لقولك كدا!”
كاكتوس صغير:
“لا يا سيف، الأسف مبيعملش حاجة... وانت عارف كدا كويس.”
سيف (وهو يضع رأسه علي الحائط مجدداً):
“عندك حق... عندك حق.”
- نذهب الي "عباد الشمس صغيرة" و "بيشوتر صغير".
عباد الشمس صغيرة (تلاحظ دخان ضخم قادم من وراء الكوبري):
“ايه ده؟”
بيشوتر صغير:
“شوفتي ايه؟”
عباد الشمس صغيرة:
“انت مش شايف الدخان؟”
بيشوتر صغير:
“دخان! فين ده...”
- يرى "بيشوتر صغير" الدخان الضخم وهو قادم!
بيشوتر صغير:
“احنا لازم نقول لسيف.”
- يذهبون الي "سيف".
عباد الشمس صغيرة (بصوت عالي):
“سيف، يا سيف!”
سيف:
“في ايه؟”
بيشوتر صغير:
“في موجة ظلام جاية ناحيتنا!”
- يركضوا ناحية الطريق العمومي!
سيف (مستغرب من شكل الظلام القادم):
“لو دي كانت موجة زومبي... ف اعتقد إنها الأخيرة!”
كاكتوس صغير:
“يا جماعة انتوا نسيتوا حكاية أبطال النباتات، لما كانوا بيحكوا لينا اول مقابلة بينهم وبين زعيم الزومبي؟”
بيشوتر صغير:
“آه صحيح، حصل فعلاً.”
عباد الشمس صغيرة:
“حصل ايه! انت مكنتش معانا اصلا!”
بيشوتر صغير (مصدوم):
“بجد؟!”
سيف:
“انت ازاي عارف حاجة زي دي، وانتوا اصلا عبارة عن أثر باقي من أبطال النباتات؟”
كاكتوس صغير:
“ما احنا كنا جزء منهم، وفي اجزاء من أبطال النباتات بيخرجوا ويحاربوا معاهم، وفي أجزاء عمرها ما دخلت معركة، فهمت؟”
- يهز "سيف" رأسه بأنه “فاهم”!
عباد الشمس صغيرة:
“قالوا ايه وقتها يا كاكتوس؟”
كاكتوس صغير:
“وقت ظهور زومبوس زعيم الزومبي، كان قبلها ظهرت موجة غيوم وضباب كبيرة، شبه دي كدا.”
سيف:
“انا حسيت بردو إنها النهاية.”
بيشوتر صغير:
“مش لازم... مش بعد السنين دي كلها، نطلع مش مستعدين لمواجهة زعيم العدو... مش معقولة!”
- ينظر "سيف" الي موجة الظلام بنظرة قوة وقلق!
- يخرج "تشومبر صغير" من تحت الأرض، وينظر الي الموجة الظلامية.
تشومبر صغير (مبتهج):
“أكل!!!!”
سيف (زهق من موضوع الجوع):
“ياعم بقى ريحنا وإشبع مرة!”
عباد الشمس صغيرة:
“والعمل دلوقتي؟”
سيف:
“احنا نسأل حد قديم في الكلام ده.”
بيشوتر صغير:
“مين؟”
سيف (بعد دقيقة صمت):
“بيني.”
- ينتقل المشهد الي داخل جراچ المنزل، عند السيارة "بيني".
سيف (بصوت عالي):
“بيني!!!”
بيني (تستيقظ من نومها):
“ايه؟ ايه؟ في ايه؟!”
- بعد تأكيد السيارة "بيني" علي انه فعلاً هو "زومبوس" زعيم الزومبي، قررت أن تخرج وتحارب مع "سيف" والنباتات الصغيرة، والكلب "روك" بدأ بالنباح ويهز ذيله كأنه يريد القتال أيضاً!
تشومبر صغير (يقترب من الكلب روك):
“انت حبيت طعم لحم الزومبي، صح؟”
- ينبح الكلب "روك" نبحة بسعادة!
تشومبر صغير:
“كنت عارف.”
سيف:
“طب يلا يا جماعة، خليكم جاهزين للحظة وصول زعيم الزومبي... وانتي يا عباد الشمس انتي وروك... عايزك تقعدي جنب مروان وتحاولي تصحيه بأي طريقة ممكنة... عشان محتاجينه أكتر من أي وقت عدى.”
عباد الشمس صغيرة:
“تمام يا فندم.”
سيف (ينظر للنباتات):
“والباقي ورايا.”
- يخرج "سيف" يقف أمام منزله ومعه رشاشين في يده، ويقف بجانبه بيني ومعها باقي النباتات الصغيرة، جاهزين للقتال!
سيف (نبرة صوت قائد):
“يا جنود الأرض... لازم نحارب عدونا بكل شراسة... وأي هفوة... تقابلها فورة بحالها... انتوا فاهمين؟... لازم نحارب بكل قوة، وبكل عزم، وبكل روح قتالية... ولازم تكونوا عارفين إننا مش بنحارب عشان نفسنا بس... احنا بنحارب عشان اللي جنبنا، وعشان نفسنا، وعشان الأرض اللي عيشنا عليها 20 سنة... جاهزين يا أبطال!!!”
النباتات الصغيرة (بكل حماس):
“جاهزين!!!”
بيني:
“جاهزين!”
سيف (ينظر ناحية موجة الظلام):
“انا مستنيك يا زومبوس...”
- الشاشة تنقسم قسمين، قسم أيسر يوجد فيه "سيف" وهو يتحدث…
- قسم أيمن يوجد فيه "زومبوس" وهو يتحرك بالآلي العملاق ومبتسم ابتسامته الشريرة والمرعبة!
زومبوس:
“انا جايلك يا سيف...”
سيف (بكل قوة):
“وانا عارف إنك مش سامعني دلوقتي...”
زومبوس:
“بس أحب أقولك إني...”
سيف و زومبوس (في نفس الوقت):
“هحاربك... حتى الموت!”
- ينقطع المشهد بالأسود!
*نهاية الفصل الرابع*
