زواج الجن من الإنس في الميزان
هو ممكن جن يتجوز من انسية؟
أو جنية تتجوز من رجل من الإنس؟ ولو حصل الزواج ده هينتج عنه أطفال؟!
قبل ما اجاوبكم خلينا الاول نعرف ايه هو الجن؟
الجن عشائر وفصائل.. كل فصيلة عندها قدرات خاصة بيها؟ يعني مقسمين ع كذا نوع؟ منهم الترابي ومنهم الناري ومنهم الهوائي! ف جن مسلم وجن مسيحي وجن مجوسي وجن ملحد!..
عالم الجن عالم كبير جدا.. عشائر وقبائل كبيرة.. كل قبيلة من الجن ليهم حاكم بيحكمهم... عالم كبير زي عالمنا بس احنا مبنقدرش نشوفهم بس هما بيشوفونا!...
ف من الجن اللي بيحب البشر وف منهم اللي ملوش علاقة بينا ولا بيحبنا ولا بيكرهنا.. هتلاقيه فى حالة مش بيدخل ف حياتنا خالص.... وف منهم اللي بيكرهونا جدا ودايما بيدوروا ع اي شيء يهاجمونا بيه!...
ربنا خلق الجن من النار وخلقنا من طين...
خلينا بقى نجاوب ع سوالنا هو ممكن يحصل زواج بين الجن والإنس؟!
ف اللي بيجزم ان فعلا بيحصل زواج بين الإنس والجن.. وف اللي قال ان ده مستحيل يحصل نظرا ان الجن مخلوق ع طبيعة مختلفا عننا وهي النار! ف مستحيل يتم الزواج بين الجن والبشر لان خلقتنا مختلفه!...
بس اللي بيؤمن بان ف زواج بين الإنس والجن قالوا إن الجن بيتجسد ع هيئات كتير زي انه ممكن يتجسد ع قط او كلب او تعبان او حتى ف حالات كتير ع بشر! فده كان دليلهم أن الزواج بيحصل لما الجن لما يتجسد للبشري ع هيئة زيه بيحصل الزواج هنا!...
خليني اقولكم لما انثى من الجن تتجسد على هيئة بشرية وتظهر للراجل بتظهر مع هيئة جسدية كاملة وملموسة... وهنا بيحصل الزواج بينهم بيتم المعاشرة بينهم! وده بيكون مس عاشق! لكن لو الجن ذكر هيتجسد برضه ف جسد كذكر من الإنس! وهنا يتحصل العلاقة بين الإنسي والجني!
طب لو افترضنا ان ده حصل! هل هيكون في إنجاب من الزواج ده؟ ايوه هيكون في إنجاب بس ده بيحصل في حالات معينة وبتكون بأسباب خاصة؟!.. لو انثى الجن كانت من فصيلة جنيات ( الرياح) الجن الهوائي يعني... النوع ده من الجنيات عندها القدرة انها تنجب طفل بشري بس بيكون مختلف تماما عن البشر؟ يعني الطفل ده مبيكونش زي أطفال البشر بيكون عنده قدرات خاصة جدا! ممكن يظهر فيه التنبؤ بالمستقبل والحاسة السادسة والاستبصار التخاطر و حاجات تانية كتير! هيبقى الطفل ده طفل من أب بشري وام جنية!..
طب لو كان الأب من الجن؟ هنا بيحصل الحمل للإنسية بس هيكون حمل كاذب! هيكون عندها نفس اعراض الحمل بس مش هتنجب طفل! هي هتحس بكل الحمل المعروفة وهتحس كمان بألم الولادة كأنها بتولد فعلا.. بس ف الاخر مش هتشوف الطفل!...
الإمام القرطبي ذكر أن أم بلقيس ملكة سبأ كانت من الجن؟! أبو بلقيس تكبر ع فتيات عشيرته فزوجوه امرأة من الجن وكان اسمها ( ريحانة بنت السكن) وخلف منها بلقيس! بلقيس كانت جميلة جدا ومختلفة في صفات كتير من البشر!....
سيدنا سليمان نفسه كان بيتجسد له جيوش كاملة من الجن! وكان بيأمرهم بأي أمر فينفذوه في الحال...
تعالو احكيلكم حكاية اتذكرت في الأثر عن زواج الجن من الأنس؟!
زمان أعرابي كان قاعد ف خيمة في الصحراء.. في ليلة وهو نايم دخلت عليه بنت جميلة جدا وكان معاها راجل وست! عرضو ع الاعرابي انه يتجوز بنتهم... الاعرابي مكانش حلته حاجة بس اهل البنت قالوله انهم هيتكفلوه بكل حاجة.. يعني ميحملش هم الأكل والشرب والعيشة... وافق الأعرابي فعلا واتجوز من البنت دي... الأعرابي كان عنده أغنام كان بيرعاها وبيشرب من لبنها وكان عايش ع كده.... اغنام الأعرابي كانت بتعمل حاجة غريبة جدا؟! مكانتش بتقرب خالص من البنت! أول ما كانوا يشوفوها كانو بيجرو من قدامها وتصيبهم حالة جنون!...
الأعرابي كان ملاحظ حاجة غريبة وهي أنه كان بيلاقي اكل قدام الخيمة. كل يوم مكانش عارف الاكل ده بيجي منين؟! الاكل ده كان خبز ولحم مشوي.. والبنت كانت مطيعة جدا مبتعملش مشاكل وبتقول له حاضر ع كل حاجة بيقولها....
عاشوا حياتهم عادي لحد ما مراته حملت منه وأنجبت لسه ولد وبعدها انجبت بنت.. الاولاد كبروا... أولاده لما كانوا يقربوا من الأغنام كانت بتنفر منهم! اول ما يقربو يجرو!.. بعد ما مر سبع سنين ع زواج الاعرابي من البنت وخلف منها ولد وبنت جه للأعرابي الراجل والست فجأة! وطلبوا منه انه يطلق بنتهم عشان هترجع معاهم! الاعرابي رفض وقالهم دي مراتي وام عيالي وانا بحبها! هنا الراجل والست غضبوا منه غضب شديد ومشيو من المكان... بس بعد اليوم ده بدأ يشوف مراته بعين واحدة! وجسمها مشعر بشكل مفزع! اللاعرابي شاف المنظر ده اتفزع! البنت قالت له لازم تطلقني حالا انا اخدت منك اللي عايزاه وهما اولادي! انا جنية! الراجل مكنش عنده خيار تاني غير انه يطلقها! طلقها فعلا وجت امها وابوها واخدو البنت والاولاد ومشيو ومن يومها ماشفهاش تاني ولا شاف عياله!...
ف حكاية كمان حصلت في عهد عمر بن الخطاب.. كان في ست بلغت عن ان جوزها اختفى.. الناس بدأوا يدوروا عليه في كل مكان من غير فايده.. لحد ما بعد شهور طويلة ظهر الراجل فجأة وقال انه كان مخطوف تحت الارض من الجن واتجوز من بنات الجن وأنجب منها! وده حصل لما كان ف الصحراء طلع عليه قوم اسروه وخدوه في كهف تحت الأرض!
ف علامات هتلاقيها ودي هتقولك انت او انتي عندك جنية عاشقة او عندك جن عاشق؟! تعالو اقولكم ايه هي العلامات دي؟!
عند الراجل دايما بيتكرر معاه احلام جنسية هيتخيل أنه في معاشرة كاملة مع امرأة! أو كثرة الاحتلام! أو النفور من أي امرأة انسية! يعني رافض الزواج تماما! او لو اتجوز هيكون عنده تخيل لحظة العلاقة بست تانية غير مراته! يعني هيتخيل أنه يعاشر ست تانية! او انه يعمل حاجات محرمة لحظة العلاقة!....
وف الست نفس الحكاية بتحلم انها مع رجل في منامها ورفضه الزواج! ونفس اللي قلته فوق بتحس بيه!...
اخر حاجة هحكيلكم قصة من اغرب القصص عن المس العاشق! معالج كان بيعالج بنت كانت دايما بتتكلم مع كائنات مش موجودة وبتقول انهم ولادي! ابوها وامها تعبوا معاها جدا ولجأوا لمعالج بالقرآن...
المعالج ده بيحكي وبيقول انها ة انت مسحوره واتحول السحر ده لمس عاشق! لأن الخادم اللي اتسلط عليها حبها! البنت دي وافقت ع العلاقه دي واتجوزت من الحن ده وكانت بتحصل العلاقة بيهم أثناء النوم.. وانجبت منه!المعالج بيقول ان المفروض يكون الحمل ده كاذب... بس الحمل طلع حقيقي! هي بس اللي كانت بتشوف الأطفال دول وكانت بتكلمهم! الاطفال دول كانوا بيعملوا حاجات تخوف أسرتها زي صوت ضحكات ويكسروا حاجات لحد ما حولوا حياة الاب والاب والبنت للجحيم! اصوات ضحكات يسمعوها.. حنفيات تتفتح... حاجات تقع.. وغيرها كتير من الحاجات اللي ترعب اي حد!...
البنت كانت بتزعق فى اولادها عشان تسكتهم وتقول ( اسكتو بقى كفاية لعب وتكسير) البنت بتتعامل حرفيا ان دول اولادها بس أسرتها مش شايفه حاجة ومفكرنها مجنونة!...
الشيخ بدأ يعالج البنت.. وقالها ان ده حرام.. ومينفعش تتعامل ان ده حلال وان الزواج ده طبيعي يحصل! وقالها انتي بتظلمي نفسك انتي لازم تسيبي الجن ده حالا وتدخلي في علاقة مع حد من طينتك عشان الجن ده يسيبك ويمشي!... البنت اقتنعت ف الاخر والمعالج قدر أنه يعالج البنت والجن ده اختفى واخد الاطفال معا لتحت الأرض لان الاطفال دول مش هينفع يعيشوا مع الاب عادي!...
كده انا خلصت... عايزين رأيي في الموضوع ده؟ صعب يحصل زواج بين انس وجن! الجن مخلوق من نار واحنا من طين يعني الطبيعة مش واحده! ربنا قال وخلقنا لكم من انفسكم ازواجا لتسكنوا اليها وجعل بينكم مودة ورحمة ... يعني من انفسكم.. منكم من بني انسكم مش من الجن! اه ربنا قال ان الجن بيشاركنا في الأموال والأولاد ويستمتعو؟ بس المشاركة هنا بتحصل ف وقت المعاشرة لو المعاشرة فيها محرمات وتخيلات شاذة هنا الجن يحضر ويشارك الزوج بس مش هياخد مكانه!..
يعني علميا ودينيا صعب ده يحصل
