الظل: غموض و إثارة - الحلقة التاسعة
النقيب محمد يستمع لبعض التسجيلات لجلسات علاج نور
- اللي حصل ليلتها عمري ماهنساه ....
= حصل إيه؟؟
- شوفتها.
= هي مين ؟!....
- أنا .... شوفت نفسي .... صدقني .. صدقني يا دكتور.
= أهدي يا نور .. أهدي و واحدة واحدة بس عشان أفهمك صح .. عايزة تقولي إن في واحدة شبهك بتظهرلك؟؟؟!!!
- اه .... بشوفها و تشوفني ... بكلمها و تكلمني .... زي ما احنا قاعدين شايفين بعض و بنتكلم كدة بالظبط .... ساعتها صرخت بأعلي صوت .. ماما و بابا دخلوا عليا الأوضة ... كان مغمي عليا .. وكانت هي.... إختفت ....
فص ملح وداب .. بصيت في عينهم لقتني ....
صعبت عليهم ......
= و الموقف ده اتكرر كتير ؟
- علي مدار سنة كاملة اتكرر حوالي خمس أو ست مرات .. الكلام كتر علينا في المنطقة .. ما هونتش علي أبويا و أمي يشوفوني علي سرير في مستشفي المجانين .... حالتي بتسوء و كل يوم كوابيس .. تعبت .. كتر خيرهم مستحملني .. بس أنا في قمة الألم .. بتحسر علي الحالة اللي أنا فيها .. دكتور أنا مستوعبة كل حاجة و فاهمة و لو حضرتك ماساعدتنيش أنا هنهار أكتر وأكتر .... محتاجة بس حد يصدقني.
___________________________________________
" - أنا مش عارفة انتوا عايزين مني إيه بالظبط .. ماتسيبوني بقي أنا خلاص كرهتكم و كرهت البيت و كرهت عيشتي كلها حرام عليكم بقي...
= حرمت عليكي عيشتك يا شيخة .. من بكرة مفيش نزول، مفيش شغل، مفيش خروج من الأوضة دي فاهمة و لا لأ .... أنا هفرجك ييجي بس أبوكي من الشغل ...
- يارب الرحمة من عندك بقي أنا إتخنقت إنتم إستحالة تكونوا أهلي إستحالة بجد ... يارب خدني عشان أرتاح... إيه ... إيه عايزة مني إيه بقي ... بتضربيني ليه ........ ليه...... ليييييييييييييييييييييه" ......
- إيه .. إيه يا روحي مالك؟ مالك ؟ أهدي بس.
= كابوس كل ليلة .. تعبت بجد .. هو أنا هفضل طول عمري عايشة في الكوابيس دى؟ .... من كتر الدموع قربت أتعمي ....
- خدي إشربي شوية مية بس وأهدي كدة .... معلش .... ورغم كدة عايزة ترجعي تاني ها ....
= من خوفي يا خالد .. من خوفي إننا نفضل عايشين طول عمرنا هربانين إفهمني بقي ....
____________________________________________
- أخيرا ً هرتاح شوية .. الرحلة كانت مرهقة و أنا مش نايمة كويس و....
= "حمد لله علي السلامة يا مي ....."
- ها ....... إنتا؟! .
= هههههههههههههه اه .. أنا! .... مالك طلعلك عفريت ولا إيه ........لأ امسكي نفسك كدة ها .... إنتي العاقلة الوحيدة اللي عمرك ماصدقتي حرف من الكلام ده.....
- مش كدة ....بس .... ما توقعتش أول ما أوصل ألاقيك قصادي بالسرعة دي.
= جاية تشوفيها صح؟
- مفكر إن طريقتك وأسلوبك دول ممكن يخلوني أخاف مثلا ً؟!.... عارفة إنك مختل وتعمل أي حاجة بس مش هتحرك فيا شعرة ....
= عندك حق .. بس طلقة واحدة في دماغك دلوقتي تنسفك من الوجود و إنتي حشرة أساسا ً ولا حد هيسأل عنك.
- فين نور؟
= ههههههههههههههههه.
- نور فين يا خالد .. هي كلمتني وقالتلي إنها هنا ... و أنا مترددتش ... و مفكرتش مرتين .... و جيت علي طول.
= بتقلبي في القديم ها؟ .... ضميرك صحي تاني .... يعني المبلغ الخيالي اللي أخدتيه فشل إنه يخلي ضميرك يهدا و يرتاح .... هههههههههههههههههههه غريبة مع إنه وقتها كان نايم...........
" اللي حصل وقتها كان لازم يحصل .... إتقابلنا مرة .... و التانية .. واتكررت المقابلات بينا .... إتقرب مني في الأول كأصحاب .... كان دايما ً سيرة نور بتكون محور الحديث بينا عشان هي صاحبتي الوحيدة .... و كونه ظابط أمن دولة كان بالنسبالي انبهار .... له طريقة بيعرف بيها كل حاجة بمنتهي السلاسة و.............."
= سرحتي في إيه؟؟؟ .... سيرة الفلوس لفت دماغك ها .. كنت فاكرك عاقلة .. كنت عارف إنك ذكية .. عرفتي كتير بس المبلغ اللي أخدتيه مقابل اللي عرفتيه مش شوية طبعاًً، مع إني كان ممكن أقتلك عادي خالص و جريمة من اتنين مش هتفرق .... بس محبتش .. لكن عرفت إنك بتدوري وبتنبشي في القديم .... هههههههههههههه، صاحبتك طلعت عايشة أهو و واحدة تانية اتقتلت و اندفنت مكانها و محدش عرف حاجة .. معاكي فلوس عمر أهلك ماشافوها عايزة إيه تاني؟ .... صحيح الإنسان ده طماع....
- نور فين يا خالد؟....
