صغيرتي التي ليس لها مثيل
هو انتي لابسة دبلة في اخر صورة منزلاها ؟
ضحكت علي اخر مسج صراحة وصلتلي....واتضايقت برضوا ، مهتمتش ارد علي المسج الحقيقي ... وقررت اقفل الاكونت واخليه برايفت او اي صورة أو شئ خاص هيكون برايفت.... الحقيقة الاكونت بتاعي لترشيح الكتب ودا مخلي بعض البنات عندي .... بحب جدا القراءة وبشوف اننا محتاجين ليها ، وكل الشعوب الراقية بتشوف القراءة اهم جزء من يومها وشئ ضروري.... وانا بخاف وبحب الإنسان المثقف ، الفاهم في كل حاجة ...بس مش بيهبد وخلاص ، احنا شعب بيخاف يقول لا معرفش ، وبدل من كده بيهبد .... ودا سبب كرهي للتعامل مع الناس. ....
- وانتي هتشتغلي امتي بقي ؟
", اي دا هو لازم اشتغل؟"
نفسي بس افهم مين اللي قال إننا لازم نشتغل ، ياسيدي انا عايزة اعيش عبء علي البلد ...وعايزاهم يصرفوا عليا ... اشتغل ايه بس اتقوا الله ، انا واحدة فرهودة اصلا. ....
عفاف : شايفة بنت خالك بتشتغل وهي بتدرس مش زيك قاعدة جنبي
" يا حبيبتي ببساطة هي محتاجة فلوس وعندها هدف معين ، وانا عندي هدف برضوا بس مختلف عنها ، هي عايزة يكون عندها براند خاص بيها وتتعب ويكون ليها اسم في السوق وانا عايزة اتجوز واخلف واربي عيالي كويس واتعلم عشانهم ... ودا ببساطة الفرق بينا ... والأهم هي غصب عنها مضطرة تتشتغل هي تصرف علي نفسها ، انا بقي بابا حبيبي بيديني مصروفي كل شهر ، ليه بقي أفرهد نفسي "
- طول عمرك عنيدة
واحدة بتفكيري يعتبر طفرة دلوقتي في المجتمع ، ولو فيمنست سمعتي خططي واهدافي احتمال تقيم عليا الحد ، ببساطة انا مش عايزة اشتغل انا عايزة ادلع وبس .... بشوف الشغل والتعب دا خاص بالرجال وبس ... هما يتعبوا عشانا احنا .... عشان نكون احنا مرتاحين ...واحنا بنتعب في البيت عشانهم ... عشان هما يكونوا مرتاحين .... وبعدين مين قالي اني معنديش هدف....طيب والله ظلم ، دا انا عندي اصعب هدف في الدنيا ....هدف ، مش هقدر اجني ثماره غير بعد أعوام....... انا عايزة اكون ام ...ام صالحة ، اربي عيالي كويس جدا ، واديهم كل الحب اللي في الدنيا ....انا عايزة قلبي يفضل دافئ كدا ، مش عايزة انزل اتعامل مع الناس واختلط واتعب نفسي واتعلم ازاي اكون قاسية .... انا عايزة افضل بضحك ومبسوطة وقادرة ادي عايلتي الحب الكافي .... ببساطة عايزة اكون الركن الدافئ في عايلتي....
عفاف: انتي صاحية ليه بدري؟
" ياماما ماانا بصحي علطول الفجر ، الفكرة اني قررت انضف الشقة واظبط الدنيا وانتي ترتاحي....من النهاردة انا اللي ههتم بكل امور البيت "
بحب فكرة البيت ...اني اصحي الفجر ، اتوضا وفي نفس الوقت اقرا الاذكار ....واصلي بعدها ... وبعدها اشتغل قران بصوت الشيخ الحصري والصوت يكون واطي شوية ... افطر فطار كويس لاني لازم اهتم بصحتي ....واقرا بعدها ورد القران وممكن ابدا تنضيف أو اذاكر من اي كتاب شرعي عندي وادرس محاضرات دينية أو بعض الدورات الدينية....اخلص كل حاجة علي الساعة ٨ واجهز الفطار لبابا واخويا وماما واختي وبعدها كل واحد يروح شغله أو جامعته وافضل انا في البيت ....لاني الوحيدة الخريجة ....اتخرجت من سنة ، وأخي اكبر مني بس بيشتغل من صغره ، واختي بتدرس في كلية صيدلية ، وبابا مدرس وماما برضوا ....عايلة عايشة في شقة في مكان هادئ وبسيط... مستوانا المادي متوسط ... كل واحد فينا فكره وحلمه مختلف بس قادرين نتفاهم ونحب بعض ...
- ياااه ... ريحة الاكل بتاعك عرفتها من اول الشارع ...ايه الجمدان دا ...
وحقيقي تعب اليوم كله في المطبخ بيختفي قصاد كلمة واحدة من بابا أو اخويا ، بالله نفسي افهم كل الرجالة يكونوا معسولين وكلامهم حلو بدل مالسانهم عايز قطعه ....ليه ميشكروش زوجاتهم أو ماماتهم أو اختهم أو بنتهم .... ليه ببسكتوا عن المدح.....
رؤي: الواحد مبسوط بأن البيت والأوضة علطول نضاف وريحة البيت حلوة ، ما تيجي نعمل مسك ؟!
" اشطا "
اللي بستغربه اني في بنات بيحسوا الملل في البيت ، بالله ازاي وانا وقتي كله بضيعه في الماسكات....هو مش بيعمل نتيجة بس لازم اعمله برضوا...
عفاف : ربنا يباركلي فيكي والله ، كنت برجع من الشغل وورايا هم كتير من طبيخ وغسيل.....
" يا ست الكل نحن هنا لا تقلقي"
صدقا بكره اي حد يقلل من شغلي أو اهتماتي أو تعبي .... وبشوف شغل البيت أو كوني ربة منزل ألطف واجمل واهدأ واصعب شي في نفس الوقت ....تخيل انك علطول شغال ومفيش مقابل سواء مادي أو معنوي ، بس بالآخرة عند ربنا في حاجات كتيرة. حلوة .... دايما الشيخ اياد في سلسلة المرأة في الإسلام بيعرفنا مكانة المرأة وواجباتها وحقوقها وكل حاجة ..... وحقيقي الواحد بيشكر ربنا أنه عنده الفرصة أنه يمحي الجهل عنه. ... ولو بمقدار ذرة ....
عفاف : تعالي معايا يا زهرة ؟
" ماما انتي عارفة اني مش بحب اروح بيت جدي عشان بيغلسوا عليا ...خدي رؤي"
- احنا هنقعد ١٥ يوم عشان فرح خالك ومش هينفع تقعدي لوحدك
" طيب ما بابا هنا "
- لا ... ابوكي بيخلص متأخر وبرضوا مش هينفع لازم تيجي معانا ....
' حاضر ياماما "
مش بحب اكون في مكان بيتعب نفسيتي ولو بشيء بسيط ، الكل بيقولي أني شخصية حساسة جدا وهادية وخجول وانطوائية ومفيش حد هيحب شخصيتي ، ومحدش هيتقبلني سواء صديقة أو زوج أو أسرة....الكل بيقول اني مملة ، بس انا مش بيهمني لاني عندي الثقة الكافية اني اتقبل نفسي واحب شخصيتي .... اني هادية جدا ودا ميزة اني مش مصدر إزعاج ومش بتكلم كتير ، وبحب الوحدة ودا سبب كافي اني اقدر اعرف نفسي واتعلم ... وخجولة وعندي حياء يخليني مميزة بين الكل .... انا زهرة ... البنت اللي بتحب نفسها وبتشوف أن مشاغبتها وجنانها وجرءاتها بس من حق راجل واحد .... وبعدين هو في حد يطول اكون في حياته ....اصلا !!!!!
" طيب انتوا اطبخوا واهتموا بكل حاجة وسيبوني مع الاطفال "
بحب الاطفال جدا جدا ومهما طلعوا عنيا بشوفهم احباب الله ....
" كل واحد ياخد بونبوني ...ما تيجوا نقعد مع بعض واحكيلكم حكاية حلوة "
اسماء: لا. ...انا عايزة العب
", اها....انتي اسمك ايه وعندك كام سنة ؟"
- اسمي اسماء وعندي ٨ سنين....
الحقيقة دول اخوالي وخالاتي وولاد الجيران وممكن حوالي ٧ اطفال ...سنهم متقارب ما بين اعدادي لا ابتداىي...مش اطفال اوي الصراحة....دول شياطين ...بس برضوا بحبهم ....
" طيب تحبي احكيلك قصة واحدة اسمها اسماء زيك"
ابتسمت علي ابتسامتها ...ضحكت وقعدت جنب الاطفال .... اتنفست بهدوء وبدأت أفكر في احب النساء لقلبي ومصدر شجاعتي وقدوتي في الصبر ..... أسماء بنت أبي بكر ....
" النهاردة هحكيلكم عن أسماء بنت أبي بكر .... صحابية معروفة أنها بنت حسب ونسب ...ابوها وجدها وزوجها وابنها كلهم صحابين واختها السيدة عائشة زوجة رسول الله صلى الله عليه وسلم .... يعني واحدة معروفة وأنها من عايلة ومن نسب يشرف .... تعرفوا ايه لقبها؟
عمرو: لا ياطنط ....
" تلقب بذات النطاقين.... لانها شقت النطاق بتاعها عشان تربط بيه الاكل والشراب وتوديهم لأبيها ' ابو بكر الصديق ' والرسول صلى الله عليه وسلم.... رغم حرارة الجو وطول المسافة بس هي قدرت تعمل كدا ... والرسول دعي ربنا يبدلها الله نطاقا في الجنة .... طيب تعرفوا اتعرفت بأيه؟
وسيم : لا يا خالتو
" اتعرفت أنها شخصية صبورة وحكيمة وقوية الشخصية ومش بتخاف من حد ... وعندها عزة نفس والأهم معروفة بكرمها....لدرجة اني كانت بتتصدق أول بأول ومش بتخلي حاجة عندها في البيت.... تخيلوا تقابلوا حد قوي وشجاع ويدعمكم .... انا بحب السيدة أسماء بنت أبي بكر جدا جدا ...وهحكيلكم النهاردة عن أقرب موقف لقلبي .....
أسماء: وايه الموقف دا ؟!
" طبعا كل واحد فيكم بيحب شخص جدا ...مثلا باباه ... اخوه...مامته....صحبه ... وهكذا ، تخيلوا بقي لو جيت انا قولتلكم الشخص دا اتقتل ، ومش بس كدا ...اتمثل بجثته ...معني كلمة اتمثل دي ، يعني بعد ما مات بدأوا يقطعوا أيديه ورجله أو قطعوا رأسه وبدأوا يطلعوا امعاؤه.... الموقف صعب جدا صح ؟! .... السيدة أسماء بنت أبي بكر ، كان عندها ابنها عبد الله بن الزبير ... اقوي الرجال وقتها واشجعهم وليه لا ....وهو ابن الزبير بن عزام واسماء بنت ابي بكر ...ولكل منهما شأن وشخصية قوية ودور قوي في الاسلام..... ... الحكاية بدأت ... أن عبد الله بن الزبير كان في حرب ضد الحجاج بن يوسف...ودا كان معروف بظلمه في الأرض وأن الكل بيخاف منه .... وقتها بدأت المعركة بس اللي حصل أن أغلب الناس اتخلوا عن عبد الله بن الزبير...وخاصة أهله وأقاربه .... ووقفوا مع الحجاج وبقي معاه عدد قليل جدا ضد الحجاج ...وقتها هو جري بسرعة لبيت والدته ... وطلب منها النصيحة. وأنه يكمل الحرب ضد الحجاج بس مش هيقدر يصمد قدامه ويتقتل أو يستسلم قصاد الحجاج ووقتها هيديه أموال كتير جدا ...عارفين هي ردت عليه بأيه؟! ... ايه رايكم اقراها من الكتاب ...صح الكتاب اللي في أيدي اسمه " صور من حياة الصحابيات"..... يلا نقرأ..
عمرو : ياريت بسرعة عشان عايزين نعرف الباقي
ابتسمت بهدوء وبدأت اقرأ....
" قالت : الشأن شأنك ياعبد الله ... وأنت أعلم بنفسك... فإن كنت تعتقد أنك علي حق؛ وتدعو إلي حق ؛ فاصبر وجالد كما صبر اصحابك الذين قتلوا تحت رايتك.....
وان كنت إنما أردت الدنيا فلبئس العبد انت.... اهلكت نفسك ...واهلكت رجالك... "
عمرو: ورد قال ايه ؟
" تخيل أنه بس رده ... قال إني مقتول اليوم لا محالة واخاف أن يمثلوا بي. ....يعني هو مش خايف من القتل لا ...هو خايف من اللي هيتعمل في جثته ....وقتها السيدة أسماء ردت ردة قوي وغريب "
أسماء: اي هو ؟
ابتسمت" ليس بعد القتل ما يخافه المرء ... فالشاة المذبوحة لا يؤلمها السلخ ..... وبالفعل اتقتل واتمثل بجثته ....وأمه خدت جثته بنفسه. ... صبرها كان قوي وغريب ... عاشت ١٠٠ سنة ، وماتت بعد موت ابنها ... بحب قصص الصحابة ... لأنهم عايشين الدنيا بغرض الفوز بالآخرة....عكسنا احنا ... عايشين الدنيا للدنيا وبس والفوز بيها .... واللي نتعلمه اننا متخافش من حد. خالص ... ونحب ربنا اكتر حاجة ....وان الشخص الشجاع هو اللي بيواجه مش بيهرب....وان الموت بشجاعة أفضل من الحياة بجبن وخوف .... ويلا كل واحد ياخد بوسة وحضن وأجروا علي الصلاة بسرعة "
بستغرب اللي بيضرب طفل أو يتعصب عليه ،هو في اطفال فعلا تجلط بس مهما كان الواحد عاقل كفاية أنه يسيطر علي عصبيته قدامهم ....
عمرو : ممكن اقولك حاجة ؟
" اتفضل ...انتي عمرو صح ؟"
- اه انا عمرو في سنة خامسة ، جيران ، ... انا ....
استغربت تردده ، قربت منه " انت ايه ؟"
- مش بصلي ، بعرف اصلي بس دلوقتي مش بصلي ولا حد يبصلي ...فممكن كل مرة تحكيلي حاجة زي النهاردة ، انا مش بحب القراية وبحب اللعب جدا والكل بيقول اني جرئ ووقح زي عمي و...اني فاشل '
ابتسمت ....عمرو فعلا واضح أنه جرئ جدا ودا واضح من كلامه ووقفته ونظراته كمان ....
" طيب احكيلك حاجة لوحدك ...انت حبيت شجاعة وقوة عبد الله بن الزبير صح ؟"
-اه
" بس تعرف انك شبهه .."
- انا ... ازاي ؟
", انك جرئ ومش بتخاف... طيب عارف ان سيدنا عمر بن الخطاب الناس كلها كانت بتخاف منه جدا وتترعب حتي تشوفه ، وفي يوم كان في اطفال بتلعب في الشارع وطبعا كل الاطفال خافوا لما عرفوا أني سيدنا عمر هيمر دلوقتي الا مين ؟"
- مين ؟
" عبد الله بن الزبير....هو الوحيد اللي متحركش بالعكس فضل واقف قدامه.... وسيدنا عمر استغربه وقعد قصاده وسأله ليه مخافش ولا هرب زي باقي الاطفال....تفتكر رد قال ايه باعمرو؟"
- قال ايه بسرعة ؟
ضحكت علي حماسته " يا أمير المؤمنين ليست الطريق ضيقة حتى أوسعها لك ولست جانيًا حتى أخاف منك ..."
- قال كدا بجد ؟
" اه بجد.... وطبعا دا مش غريب ، لانه زي ما قالنا أبوه وأمه معروفين بقوتهم وشجاعتهم بس عارف المميز ايه يا عمرو ....رغم كل شجاعتهم دي إلا أنهم بيخافوا من ربنا جدا ....انت تعرف أنه معروف بخشوعه في الصلاة وحبه لله ... عن عمرو بن دينار : (ما رأيت مصليًا قط أحسن صلاة من عبدالله بن الزبير).... وعشان كدا احنا لو بنحب حد نقلده .... انت بتحب عبد الله بن الزبير ؟"
- اه بحبه جدا
" واللي بيحب حد يقلده.... يبقي من النهاردة تحافظ علي الصلاة ، ولو صليت اليوم كله ليك عندي هدية حلوة خالص "
- بس انا عايز اكون زي خالو وهو برضوا مش بيصلي
" امم....طيب ما تاخده معاك وانا هديك هديتين .. بس دا سر بينا "
- اشطا ...
-----------
ثريا: قوم قبل ما ابوك ييجي وتتخانقوا
" اعمله ايه يعني ... وبعدين انا ورايا ايه اعمله؟"
ثريا: اتكلم كويس عن ابوك يا حازم
" ماما انا مش فايق للخناق انا طالع برا "
ايه الحياة المقرفة دي ، الواحد نفسه يطلع علي وش الدنيا ويركب احدث عربية ويعيش حياة احلي من دي ، بدل ما كل شوية يقوم علي صوت خناق ابويا معايا ونفس اسطوانة كل يوم .... الواحد كره البيت اصلا....
- البيه صحي ولا لسه نايم زي الحامل ؟
وادي الخناقة بدأت....بابا بيحب الخناق بدون سبب ...انا خلصت اول سنة في حاسبات ومعلومات وواخد إجازة ، اعمل ايه يعني في الإجازة...اطير يعني عشان أعجبه .... وحقيقي وجوده في البيت عاملي مشكلة ودايما خناق علي اتفه الأسباب .... لدرجة اخر خناقة علي غطا الازازة اللي وقع .... هي دي حياة اصلا !!!!!
عمرو : عمو حازم عايزك تيجي معايا ممكن ؟
" طلباتك اوامر يا بطل ..."
عمرو ابن اخويا الكبير ....بالمناسبة انا اصغر واحد في البيت.... عمرو دا شبهي جدا ، جرئ عنيد ذكي وراجل من صغره ....بس بيقولوا مش متربي زيي برضوا وعشان كدا بحبه ....
" هنروح فين يا معلم ؟"
- نصلي المغرب مع بعض واحكيلك حكاية
" حكاية وصلاة ؟"
- معلش تعال معايا ... انت وعدت تسمع كلامي ...
" حاضر يا عمرو ... ايه الحكاية بقي يا سي عمرو ؟"
- تعرف سيدنا عبد الله بن الزبير وأمه اسماء بنت ابي بكر ؟ طيب تعرف مين والده ؟
اتحرجت من اسئلته رغم اني عارف أسماء بنت أبي بكر بس حبيت اسمعه
" ما تحكيلي مين دول يا بطل ؟"
- اشطا نصلي الاول وبعدها اقولك....
كنت بسمعه وشايف الحماس في عنيه ... نبرته وهو مبسوط ومتاثر ... وطريقته في الشرح....كنت مستغرب ازاي عارف كل المعلومات دي .... والحقيقة لاول مرة اكون فخور جدا بيه كدا.... ويومها عملنا اتفق كل يوم انزل اصلي معاه وهو هيحكيلي جزء بسيط ....
- اتفقنا كدا
" اتفقنا ...وهي الميس بتاعتك كبيرة ؟"
- اه كبيرة جدا جدا وحلوة وكمان بتدينا حلوة وحضن كلنا
" حلو "
لاول مرة اصلي العشا والمغرب كمان ودا بسبب إصرار عمرو.... مرت ٣ ايام وكل يوم بنصلي الصلوات مع بعض ، وانا بنتظر يحكيلي الحكاية .... مستغرب نفسي الصراحة... واني بنتظر اسمعه ....
- انت عارف ميس زهرة وهي بتحكيلنا عن سيدنا كعب بن مالك عيطت كتير اوي اوي ...وكل شوية امسحلها دموعها وهي تعيط تاني
" وهي بتعيط ليه ؟"
- عشان هي بتحبه ...حازم ما تيجي تسمع معايا مرة
" مش هينفع....بس عندي فكرة ؟"
- اي هي ....
قررت اديه الموبيل وافتح مكالمه ... وعالجنب التاني كنت بسمع الصوت.... كان الأول الاطفال بس واضح وبيتخانقوا مين هيحضنها الاول ....مؤكد هي جدة أو عندها ٥٠ سنة عالاقل معتقدش اصغر من كدا ... الحقيقة مكنتش مهتم خالص بأني اسمع كلامها او اي حاجة بس مش عايز احبط عمرو واقوله اني مش مهتم بكلامه ....
زهرة : والنهاردة بقي هنتكلم عن... نبي ولا صحابي ولا صحابية ؟ ولا عايزين نحكي ايه ؟
عمرو : انا عايز اعرف الواحد يعمل ايه لو كره باباه ؟
زهرة : كره باباه ؟ ... طيب تيجي الاول نحكي عن فضل بر الوالدين ونحكي عن يحيي بن زكريا و إسماعيل بن ابراهيم عليهم جميعا السلام .... نبدا ...يلا نصلي علي النبي عشر مرات الاول ونحمده عشر ونكبره. ...عشر ...وادعولي دعوة حلوة ولنفسكن عشان الدعوة دي باذن الله هتتحقق..."
بدأت تحكي وانا من اول ما سمعت صوتها وقفت مكاني ....حسيت قلبي وقف اصلا ، صوتها رقيق جدا وهادئ....سبحان الله...ازاي اصلا صوتها حلو ورقيق كدا ... لما كانت بتتكلم وقتها تلقائي دعيت أني أشوفها وبس .... مر ساعتين كاملين ومعرفش اصلنا مروا ازاي ... لأول مرة اركز من حوار حد بالشكل دا ، واسمع مناقشات العيال معاهم وردها وضحكتها.... كل ما تضحك اتخيلها قدامي.... وكلامها اثر فيا علطول لدرجة اني كرهت نفسي اني بعلي صوتي علي بابا .... واخدت قرار انه مهما استفزني هرضيه واسمع كلامه ...وليا الاجر والثواب..... يالله ... هي معقول تكون صغيرة ؟ لا مستحيل ممكن تكون متجوزة...دا مؤكد اصلا ...
- ايه رايك ؟
" من النهاردة ليك عندي هدية كل يوم ...بس اوعي تقول لحد انك بتاخد الموبيل ....تعرف ممكن اديك خمسين جنيه لو عملت حاجة معينة"
اصريت اني هشوفها...وقدرت اجمع عنها معلومات ...وأنها جاية ضيقة هنا ، ودا بيت جدها ....وانا اعرف أهلها كويس جدا.... واتفقنا أن عمرو هيقعد معاها هو والعيال في الجنينة...ويمثل أنه تعبان وبعدها يرن عليا وبكدا اقدر أشوفها.....ودا اللي حصل... دقايق والموبايل رن ....وجريت اشوفها ...
" معرفش حصله ايه ؟ هو مرة واحدة تعب وقعد يعيط ...طيب هو كل حاجة من الشارع.... ياااا ... انت ، انت تقربله ايه ؟"
طلعت صغيرة...... ومش لابسة دبلة ، بس ... ممكن تكون اصغر مني ؟ .... حتي ملامحها هادية... ركزت جدا في ملامحها.... بشرتها... ورموشها الطويلة ، عينيها... نظرة الاستغراب والقلق في عينيها... عصبيتها ...صوتها ...هيئتها نفسها ...هي جميلة جدا وعجبتني.....
" انت ..... "
- انا عمه ...متقلقيش هو هيكون كويس عن اذنك
خدته ومشيت... وطول الطريق بفكر ازاي اخليها حبيبتي....
عمرو : طيب ودلوقتي مين هقولي علي الحكاية الجديدة ؟
..........
عمرو: يا حازم ... ياعم خد الفلوس وانا هرجع اقعد معاها
- لا تعال هنا ...ووعد هخليها تحكيهالك تاني
"والله لو خلفت بوعدك هقولها كل حاجة "
- ماشي ياعم ...
تاني يوم اصريت اروح معاه واقولها فعلا تحكيله نفس الحكاية .... وهي شغلت بالي اوي ودا كان سبب اني اطنش اسبوع كامل للبنت اللي بكلمها وكمان بالي كان مشغول بيها بعيدا عن خناقات ابويا ونفس النقاش علي فيديوهات التيك توك....مجرد التفكير فيها غيرني كدا .... لو هي في حياتي فعلا ...هيكون شكل حياتي ازاي .....
زهرة : عمرو حبيبي انت كويس ؟
" اه يا ميس كويس ..."
حازم : هو ممكن طلب ؟
" اتفضل"
استغربت أنها متجنبة تبصلي ونبرة صوتها غليظة ....
حازم: ممكن تحكيله حكاية امبارح ؟
" ان شاء الله يافندم عن اذنك"
في ثواني نهت الحوار ... كلامها علي القد ... اصريت اعرف عنها اكتر والصدمة أنها اكبر مني ب٤ سنين ... ٤ سنين كاملين ... وبعدين حب ايه ؟ انا لسه داخل ٢ كلية ومعنديش استعداد للشغل دا ... ارتباط ماشي غير كدا لا .... بس دي ,، هي غير الكل فعلا ...وانا منجذب لوجودها جدا ...
" انتوا يا شباب تتعلموا تشتغلوا وانتو صغيرين عشان تعتمدوا علي نفسكم .... والرجولة مش باازعاق والضرب والصوت العالي والأوامر....بالعكس هي ازاي تحب وتحتوي وتهتم بأمور بيتك .... لما تكبروا شوية هفهمكم كلامي دا "
حازم: ولو انا عايزة افهم الكلام دا ؟
اتضايقت جدا من وجود عم عمرو المفاجئ ....
" لو سمحت غلط كدا لازم تستأذن ، وبعيدا انا قاعدة مع العيال الصغيرة ، عايز تعرف حاجة تقدر تبحث ، والأهم من كل دا غلط انك تتجسس علي حوار حد وتخضني كدا "
- انا اسف .... مش هتتكرر
" طيب عن اذنك"
- طيب سؤال ؟...من غير ما تتعصبي اخر سؤال
" اتفضل يا فندم "
- لو بحب واحدة اكبر مني ب ٥ سنين مثلا وهي مش شبهي وعكسي اعمل ايه ؟ هي حلم اي راجل اصلا"
" انا مش أسامة منير يا فندم ...وبعدين لو عايزاها اتقدملها الموضوع بسيط ، مش شبهها ، لو فيك حاجة غلط محتاجة تتعدل غيرها....ببساطة لأنها زي ما قولت حلم اي راجل ودا معناها أنها فيها صفات كتير حلوة ... انت عندك ايه صفات تخليها تقبلك ...لو عايز تتجوز واحدة مثقفة عالاقل خليك مثقف ...الجواز نصيب بس لازم يكون عندك مؤهلات تخلي شريكك دا يتقبلك .... والأهم السن مش معضلة ... عن اذنك ، وعندك شيوخ تسألهم "
رغم قلة ذوقها واني ملقتش فرصة اني اتكلم معاها بس شوفتها خط احمر ... ومستحيل أتجاوز الكلام معاها ....
" عمرو ماله ...؟"
ثريا: يا حازم تعال شوفه ....بيعيط من الصبح ومهما نحايل فيه مش بيسكت ولا راضي يأكل
استغربت من عياط عمرو لانه شبهي ومش بيعيط بسهولة ....
" حصل ايه لدا كله ... اجمد كدا وقولي"
- ميس زهرة مشت ... سافرت ومش هتيجي تاني ....
معرفتش فعلا وقتها اواسيه ولا اواسي نفسي ....انا مش هسمح برضوا ان الحكاية تخلص بالشكل دا .... ولو حصل ايه ...
" بابا انا هنزل اشتغل في الورشة تحت "
الكل كان مصدوم ...حازم اللي لابسه اخر شياكة وماركة وبتاع بنات واهم حاجة عنده الشكل ....قرر ينزل يعتمد علي نفسه .... الحقيقة أنا معرفش والله حصل ايه ؟بس انا مش شايف ولا عايز غيرها .... ومستعد اتغير عشانها وعارف أن دا اصعب طويل ....
جمال : انت متأكد من القرار دا ؟
" بابا دي اجازة وانا هشتغل وهاخد كورسات في مجالي "
٤ سنين مروا بسرعة .... ٤ سنين وانا طالع عنيا صبح وليل ، إجازة ودراسة ، بشتغل اليوم كله ، واحوش فلوس عشان ابني الشقة ، وفي نفس الوقت باخد كورسات في مجالي عشان اقدر اشتغل وانا لسه طالب .... والأنسان اللس بيسعي ربنا هيكرمه ....وفعلا ربنا كرمني... في ٤ كلية كنت بشتغل اونلاين مع شركات أجنبية ومن البرمجة قدرت اجمع مبلغ ضخم وحلو عملت منه الشقة وفي نفس الوقت قدرت فعلا احس بقيمتي ....والأهم من دا كله ... بحاول اتقي ربنا في نفسي وأهلي واعمل لاخرتي ..... وبدأت اخد خطوة كل شهر جديدة ...سواء تطبيق سنة أو تعلم شي جديد في الفقه ....واكتر شي ساعدني هو اكاديمىة زاد ... وحفظ القرآن بالتدبر ..... اصلا معرفش حياتي اتغيرت كدا بس افتكرت مقولة الشيخ حازم شومان ' من سار على الدرب وصل '....ولو عايز من كل قلبي اتقرب من ربنا ومشيت في الطريق دا هوصل .... بس يا تري اللي عايزاها تكون شريكتي في نفس الدرب دا .... اخبارها ايه دلوقتي ؟.....!
---------------
- يابنتي وافقي بقي
مرت اربع سنين وحياتي واقفة ...كانت حلوة في الأولي بس الايام بتمر بسرعة ودا سببلي مشكلة كبنت ...وكبرت في السن وفي نظر الكل خلاص بقيت عانس ..... معرفش ازاي وانا عندي بس ٢٨ سنة ...لسه هكلمها السنادي .... الكل بيبصلي بشفقة ...الكل بيعاملني كأني فعلا معيبوبة ...ومفيش حد بيتقدملي اصلا .... ولأول مرة أفقد الأمل والصبر ....وان حلمي مستحيل يتحقق .... أن عارفة أن المرء يبتلئ في اعز ما يتعلق به قلبه .....بس الابتلاء صعب اوي اوي المرادي .... انا كلام الناس ببتعبني .... نظرات الشفقة والخناق والعصبية كل دا بيتعيني..... ضغط الأهل والمجتمع وكلام الناس اني اتحرك واتجوز كاني معايا عصايا سحرية..... اني حاسة اني مش مرغوبة ودا بيجرح كرامتي وانوتثي. ...احنا كبنات البنت بتحب أنها تكون مطلوبة اكتر ويتقدملها كتير... وبكدا انا في نظر الكل بشعه وفي عيب ومحدش طالبني .... واخر ابتلاء أن الحلم اللي نفسي فيه ممكن يفضل حلم ومستحيل يتحقق رغم أنه ابسط الاحلام وبيتحقق للكل .... وانا لا..... ٤ سنين مروا وانا كل فترة الكلام بيجرحني اكتر واتاذي اكتر .... ماما غصب عنها بتعيط ....وبابا شايف أنه نصيب ... والكل شايف اني دا مشكلتي واني لو بطلع كان ممكن حد يشوفني ويتقدملي ....بالله ايه الهبل دا ....الجواز رزق أصلا....وانا رزقي هاخده لو موجودة فين ... بس مين يفهم الكلام دا .....
" يا ماما انا مستعدة اخد لقب عانس ولا اتجوز واحد مش مناسب "
- انتي فعلا خدتي اللقب يا ختي ...اختك التانية هيقف حالها بسببك
ورغم مدي أذية الكلام بس لا بأس... هيعدي وربنا كريم هيدهشني بعطاءه
------
- قاعدة ليه لوحدك؟
" بابا يعني صاحي ؟"
- قومت اشرب مية وانتِ؟
" منتظرة الفجر يأذن"
- متضايقيش نفسك ....الجواز رزق
" مش متضايقة يا بابا بس .... صعبانة غلي نفسي... انا عارفة اني دا غلط واني كدا مش راضية ، بس يابابا انا فيا عيب ايه ؟ الكل قالي اني شخصية حلوة ومن عايلة وجميلة ومفيش فيا عيب ...اعمل ايه طيب ؟"
- تصبري ... انتي من صغرك مميزة بعقلك وحكمتك ...رغم انك بنتي بس دايما بتشجعيني وتديني طاقة اني اكمل واصبر واتحمل اصعب الامور ... انتِ مش دايما بتقولي أن كل إنسان ُمُبتلي صح ... وكل واحد. ابتلاءه مختلف ...ودا ابتلاءك يا بنتي .... بصي معرفش الحياة فيها ايه ؟ بس انتي خليكي راضية ، انا عارفة دا اصعب طلب ، بس انتي تقدري تحقيقه صح '
ابتسمت " صح يابابا ببساطة لانها دنيا ... وكمان سمعت والله اعلم أن المرأة التي لا تتزوج شهيدة بس صدقا مش عارفة المعلومة دي صح ولا لا "
- انا بقي سمعت حاجة احلي....انتي عارفة أن الجنة مش هيكون فيها أبدا حد اعزب ... ومعني كدا الكل هيتجوز حتي لو متجوزش في الدنيا.... اقري دي كدا ...
فأما المرأة التي ماتت قبل أن تتزوج فهذه يزوجها الله – عزوجل – في الجنة من رجل من أهل الدنيا لقوله صل الله عليه وسلم : ( ما في الجنة أعزب ) – أخرجه مسلم – قال الشيخ ابن عثيمين : إذا لم تتزوج – أي المرأة – في الدنيا فإن الله تعالى يزوجها ما تقر بها عينها في الجنة .. فالنعيم في الجنة ليس مقصورا على الذكور وإنما هو للذكور والإناث ومن جملة النعيم : الزواج .
" يا خواتي علي القمر ....خلاص انا قررت هتجوز مين في الجنة....انا مش هتجوز في الأرض خلاص "
- ايوا تعاليلي بقي عايزة تتجوزي مين ؟
" لا ياحاج بقي دا سر "
ضحكت وهو حضني وضحك ...... انا مبسوطة دلوقتي وقلبي راضي ومرتاح ...دايما بحاول اذكر نفسي أنها دنيا... وابتلائي صعب جدا جدا ومش هين اصلا اني اعيش من غير جواز واصبر علي اذي الناس والوحدة واذي نفسي ....بس باذن الله ربنا هيكافىني في الآخرة علي صبري بالجنة .... باذن الله
وبكدا قدرت اتقبل اكبر مشكلة في حياتي ...بس ماما مقدرتش تتقبلها. ... وخصوصا بعد ما اصريت علي بابا ان اختي تتجوز قبلي ..... لاني رضيت بوضعي دا. ...
عفاف : اسمعي ، انا سبتك براحتك كتير بس هنعمل الفرح في بيت خالك وهناك هتعملي اللي عايزاه من غير مناقشة
كانت متعصبة لدرجة مقدرتش ارفض .... اختي رؤي هتتجوز ابن خالي ... وبكدا هنرجع نتجمع في بيت العايلة تاني ... واخيرا وصلت المكان وافتكرت تجمعي مع الأطفال هنا ...مؤكد الاولاد والبنات كبروا دلوقتي ومش هقدر اتجمع معاهم .....
أسماء: مس زهرة وحشيني
ضحكت لما البنات شافوني وحضنوني ....كنت مبسوطة جدا بحضنهم وكم الحب اللي شوفته ... كبروا وبقوا حلوين خالص .... وأصروا اننا نتجمع زي زمان بس الشباب كانوا اطول مني ....بالله ازاي العمر عدا بسرعة كدا ..... واخيرا وصلنا لحل وسط وهو اننا نتقابل علي برنامج زوم وبكدا اتعامل براحتي. ....
----------
عمرو : يا زيزو ...يا معلم
" يالا احترم اني عمك ومعلمك وشيخك كمان "
- الله يرحم يا معلم ايام ال...
" هاجي اديك بالقلم والله ....يلا اطلع برا كدا عشان ورايا شغل"
- انت ازاي بتشتغل في البرمجيات وفاتح سلسلة مطاعم وعقارات
" عشان اشغل فلوسي .... ايوا انت عايز ايه دلوقتي ؟ وايه سر الفرحة دي ؟"
حط ايده علي قلبه بحركة غريبة...' اكتر واحدة بحبها في حياتي رجعت '
خوفت يكون بيطلق بصره ويعاكس البنات....هو شبهي بطريقة غريبة ...نفس الكلام والملامح ونفس كل حاجة ...يعتبره ابني اصلا ...بس مش عايزاه يكون صايع ... وبفضل الله لما اتغيرت بدأت انا اللي احكيله قصص الصحابة والسلف .... وبدأت احفظه القران بعد ما ختمته بفضل ...وفعلا بقيت شيخه وعلمت كل اولاد الشارع بس هو في منزلة خاصة في قلبي .... هو صحبي فعلا ومش بيقولي ياعمي ولا بيحترمني اوقات بس برضوا ... صحبي
" بنت مين يالا ... انطق كدا اقسم بالله اربطك هنا واربيك من جديد ؟"
- يا معلم روق شوية ... انت عارف انا بتكلم على مين ؟ لو عرفتها انت كمان هتفرح .
" ما تخلص يا ولا "
- هات ٥٠٠ جنيه
", انطق والا ..."
- براحتك....مش هقول
" خد ال٥٠٠ اهي ...بس والله لو طلع حد مش مهم هخد ال٥٠٠ "
- ... لا هي تستحق...دا انت خليتيني اتجسس عليها مرة ....
كان بيتكلم ببرود ...اذبل حاجة انك تلاقي نسخة لئيمة زيك وبتتعامل بنفس الاعيبك....وعمرو هو انا بالظبط
" هي صح ؟"
- ايوا يا معلم ...جت وشوفتها ....استني رايح فين ؟ ودورس غض البصر يا شيخ حازم
معرفش ازاي كنت رايح أشوفها...وقفت ورجعت تاني وانا محبط.....
" عمرو معلش سيبني لوحدي"
طلع بهدوء وانا اتوضيت وصليت ..... انا طول السنين دي بدعي تكون من نصيبي بس اخر سنة فقدت الأمل ومحاولتش حتي اتقدم .... وخصوصا اني مش عارف حتي اتواصل لاي حاجة خاصة بيها ...غريب صح ؟! بس انا قررت متبعش اخبارها لأني ضعيف جدا وعارف اني بكدا هفتح باب جديد للشيطان .....
جمال: عمرو قالي أنها وصلت ... وانا سمعت أن دا فرح بنت جلال .... يعني ....
" يعني ....؟"
جمال : هي ... هتتجوز ابن خالها ، ... انا كنت معاك خطوة بخطوة وشاهد علي كل حاجة ، وعارف كويس انك تعبت جدا وسهرك الليل كله ونفس الدعوة ....وشوفت بفضل الله ثم هي ابني بقي واحد تاني ازاي.... بس يا بني هي مش نصيبك ، مش انت بتقول الحاجة لو مكتوبلك هتكون من نصيبك لو حصل ايه ؟....
" طيب والحب اللي في قلبي ناحيتها دا ؟...مؤكد ربنا مش هيخيلني احبها بالشكل دا وبعدها اتحرم منها ...مش عايز حبها يكون حجيمي"
- انت حبيتها بارداتك واتعلقت بيها ... وأنت مؤمن كفاية لتتحمل صح ؟! ، حبها سبب انك تعرف ربنا وتحبه ... وأنت دايما بتقول اني هحاول بكل طاقتي احب ربنا اكتر من اي شي في الدنيا.... واعتقد يالابتلاء دا انت تقدر تاخد الخطوة دي .... صعب عارف يا اابني ...ويعز عليا شكلك وحالتك دي دلوقتي .... بس اصعب المعارك لأقوي الجنود ....والله المستعان
حضنته جامد وانا دموعي متجمعة وصوتي بيترجف ...حضنته واتعلقت بحضنه .... وانا بردد بكل وجع وصبر ...." الله المستعان.... صبرنا.... اللهم اربط علي قلبي....اللهم هون عليا .... ارحم قلبي وضعفي ياالله ... ارحم عبدك الضعيف واغفر له "
معرفش ازاي فضلت حاضن ابويا ورغم اني راجل عاقل وناضج بس مقدرتش اتحمل لوحدي وطلبت العون من الله اولا ثم بابا ....وكان كعادته نعم الصاحب والعون والسند .... رغم دموعي اللي نزلت بس هو ما زال معايا وبيقرألي قران..... ونمت اخيرا .... وعلي بالي كلمات خوات " نمت في موضع لم ينم فيها أحداً"....واحد مفطور قلبه بينام بكل بساطة كدا ....كنت مستغرب بس كنت واثقة أنها رحمة ربنا بيا ....
------
" جاهزين ابدأ؟"
اتجمعت معاهم تاني ... البنات قدامي في الواقع بس الاولاد علي تطبيق زوم مسموح ليهم بس أنهم يسمعوني .... وصدمتي واعجابي كانت بكلام عمرو وكم المعلومات عنده ...وان كل الاولاد خاتمين القرآن.... والجميل أنهم فعلا جنتل كلهم محترمين وزوق جدا ودا عكس توقعي الصراحة.....
عمرو: يا معلمة ...انا ممكن أتأكد من معلومة ، انا مش بشكك في راي حضرتك بس اعتقد قراتها غير كدا ....
" منتظراك طبعا اتفضل"
اخيرا خلصت ودلوقتي عمرو بس اللي عنده بعض الملاحظات.... انتظرته بس ... سمعت صوت .... وسبحان الله ...كان سبب أن قلبي يدق... بطريقة غريبة جدا ... لدرجة اني خوفت ...حسيت أن الصوت فعلا خطفني ...أو زي ما بنقول انتشلني وسحرني .... كان صوت غريب بس جميل والكلمات والدندنة مميزة ..... رغم نبرة الحزن في صوت صاحبها .... واعتقد الكلمات كمان كانت عتاب
- وأسأل نفسي لماذا أحبكِ
رغم اعترافي بأن هوانا محال.... محال
ورَغمَ اعتِرافي بأنَّكِ وَهمٌ
وأنكِ صُبحٌ سَريعُ الزَّوالْ
ورغمَ اعترافي بأنكِ طَيفٌ
وأنكِ في العِشقِ بعضُ الخَيالْ
ورغمَ اعتِرافي بأنكِ حُلمٌ
أُطارِدُ فيهِ ..
وليسَ يُطالْ
وأسألُ نفسي لماذا أحبُّكْ
إذا كنتِ شيئًا بعيدَ المنالْ
لماذا أحبُّكِ في كلِّ حالْ
لماذا أُحبكِ أنهارَ شَوقٍ
وواحاتِ عِشقٍ
نَمَتْ في عُروقي وأضحَتْ ظِلالْ
وأسألُ نَفسي كثيرًا . كثيرًا
وحينَ أجَبتُ
وَجدتُ الإجابةَ نَفسَ السؤالْ
لِماذا أُحبُّكْ ؟! " " 
الصوت والنبرة والكلمات اخدوا قلبي لدرجة اني خوفت وقفلت اللاب بسرعة من الخوف.... خوفي من اني اقع ...وانا مش ممسوح ليا بالوقوع ....
عمرو: انت بتنشد لمين يا معلم ؟
" مفيش ..."
- والله خير ...كله هيكون خير متقلقش ...
" باذن الله"
سبته ومشيت.... وبحكم الجيرة بابا واخويا أصروا اني اقف مع الرجالة في الغدا الخاص بالفرح ... وفعلا اليوم كله واقف وشغال معاهم بس بصلي وارجع اكمل معاهم ... لدرجة أن الحنة خلصت بس انا اعتذرت وطلعت وقفت مع الطباخ اساعده انا وعمرو .... بس لاحظت واحدة بتعيط في الدور اللي فوق وعنيا وقعت عليها بالغلط....قلبي وقف لما شوفتها بس ....كانت متبرجة بشكل غريب ... واللبس ضيق جدا جدا ...وخصلات شعرها ظاهرة .... مستحيل تكون هي...... مشيت بسرعة وانا حاسس اني عقربة قرصتني .... لا مستحيل تكون هي..... وازاي هي العروسة وموجودة في البيت لوحدها مش في مكان الحنة مع الناس .... بس ...
"يارب.... انا مستعد اخسرها بس بلاش هي تخسر أو تضل عن الطريق الصح ...هي ساعدتني يارب بفضلك....ساعدها "
رجلي خدتني لجامع دعيت ربنا كتير ...دعيت عشانها كتير.... دعيت من كل قلبي ... وطلعت كل اللي معايا صدقة.... انا مستعد اخسرها في الدنيا والآخرة كمان بس بلاش هي تخسر الآخرة.....
-----
" الو يابابا.... انا بعتلك صورة ... لا يابابا... انا عاملة زي اللعبة ....انا وافقت اسمع كلامها بس مش هطلع ولا هسمح راجل يشوفني بالشكل دا .... يابابا مش عايزة ترخصوني بالشكل دا بالله ... انا حاسة جسمي كله ظاهر ...انا مش عايزة اتجوز خلاص ارجوكم كفاية ضغط علي اعصابي .... حرام بقي .... انا مش سلعة هتعرضوني واللي أعجبه يتقدملي ....بابا ...ارجوك كلم ماما وقولها كفاية كدا ...سيبوني في حالي .... وأقسم بالله ما هسمح بحد يشوفني بالشكل دا "
قفلت المكالمة وكملت عياط....حسيت نفسي قلبي هيقف من كتر العياط.... بس حمدت ربنا أن محدش شافني بالشكل دا ... والله الرقاصة محترمة عني .... غيرت ولبست لبس شيك بس محترم ... وسلمت علي أختي وفرحتلها رغم خناقي مع ماما علي تبديل اللبس ....لو الجواز اني اعمل كدا ...فانا مش عايزة اتجوز.... واصلا انا قمر وخسارة في أي حد ...اصلا !!!
-----
جمال : حازم كنت فين من امبارح وقافل الموبيل ليه ؟
" كنت في الجامع"
- عندي ليك خبر حلو.... البنت طلعت مش العروسة دي اختها ... والحمد لله ... بس دقيقة انت طلع قصدك علي اللي اكبر منك مش في سنك؟
" قصدك ايه يابابا ؟"
- انت قولتلي بتحب زهرة وانا فكرت أن العروسة هي اللي في سنك اسمها زهرة ...بس طلعت اللي تقصدها اكبر منك ب٤ سنين صح '
فرحت " ايوا...هي فعلا اكبر مني ....بس دقيقة هي متجوزة ولا ؟"
- لا ... خالها كلمني وكان بيتكلم عن. الموضوع دا أنها رغم أنها حلوة وكويسة مفيش حد بيتقدملها
ضحكت بصوت" لأني طلبت من ربنا يعمي الكل عنها. ... ويجعلها ليا وبس.... الحمد لله...بابا حددلي ميعاد النهاردة بالله "
ضحك علي جناني.... حسيت بتردد لما افتكرت اخر حاجة ...معقولة تكون اتغيرت ...انا هصلي استخارة....بس انا اصلا حاسس اني مرتاح بس برضوا هصلي ...وبعدين باذن الله ربنا هيصلحها لأنها صالحة من الأساس. ... وباذن الله ربنا هيراضي قلبي ..... وبابا اخيرا بعد زن كبير اتقدمتلها بعد ٣ ايام ودا مستعجل كمان عشان هما مشغولين في فرح الاخت الصغيرة .....
---------
كنت مصدومة أن في واحد اتقدملي....لا وكمان اصغر مني ب٤ سنين....والفكرة أنه حلو شكلا وسمعت أنه بني نفسه بنفسه وغني جدا لدرجة أن جوز رؤي شغال مدير في مطعم من المطاعم الخاصة بيه ....هو دا ممكن يتقدملي انا ؟! لا مؤكد غلط .... ممكن ... ربنا هيراضيني بيه ... يارب ... ريح قلبي وساعدني .... صليت استخارة كتير وارتحت .... وجه يوم الرؤية ....دا شبه عمرو ليه جدا ؟!!! ...بس بسم الله ماشاء الله ... جميل جدا وذكي وكمان شيك وواضح الكل هنا فرحان بيه... بس معلوماته الدينية اقوي مني ....بالله نفخني اسئلة...وانا اللي فاكرة اني انا اللي هنفخه .... بس حقيقي مبسوطة جدا جدا ....
- انا بس عندي سؤال ... وبعتذر أنه ممكن يضايقك
اتوترت لاني خوفت ميكونش عارف اني اكبر منه " انا فعلا اكبر منك ب٤ سنين"
استغربت هجومها في الكلام ' انا عارف بس مش دا السؤال .... انتِ دا نظام لبسك ؟اقصد بتحطي ميك أو تظهري شعرك وكدا ؟'
اتعصبت " لا طبعا مستحيل اعمل كدا ولا عايزة واحدة كدا يبقي طلبك مرفوض...عن اذنك"
ضحكت علي عصبيتها ...' يا بنتي طول عمرك بتعامليني كدا ... عالعموم انا عايزاكِ انتي وبس "
احم ...اي دا أن شاء الله هو انا اعرفه عشان اعامله كدا .... وبعدين قابلته امتي دا قبل كدا ؟ وايه عايزاكِ انتِ دا
عرفت أنه شافني يوم الحنة بمنظري الغريب دا وضحتله كل حاجة والحمد لله انه تفهم الموضوع رغم غيرته الشديدة.... والصدمة أنه طلع عم عمرو .... الشخص الفاشل اللي كنت شايفاه عيل.... سبحان الله دلوقتي مش شايفة راجل غيره .... لو كنت اعرف ان العوض بعد الصبر هيكون كدا ....مكنتش نزلت دمعة أو زعلت للحظة واحدة ...تخيلت وقتها لو متجوزتش في الدنيا واتجوزت في الآخرة من راجل مثلا من الصحابة أو يكفيني اصلا اني دخلت الجنة.... سعادتي وفرحتي بحازم مكنتش هتساوي مقدار ذرة قدام الفرحة الحقيقة في الجنة....فالحمد لله علي نعمة الاسلام.... وكفي بها نعمة .....
والحمد لله خطوبة ٦ شهور وبعدها كتب كتاب بعمرة وسيشن بفستان فرح ووسط لمة الكل في أجواء هادية وبسيطة....
وشعور اني اخيرا قلبي ارتاح....والحمد لله اني بقيت مراته لاني بحبه وبموت فيه اصلا!!!!!!
واخيرا بقيت في بيته ...حط ايده علي راسي ... قرأ قرآن الاول وبعدها دعا وسمعته بيقول
" الحمدلله الذي جمع شلمنا.... اللهم بارك لنا وعلينا.... اللهم اسعد حياتنا ...وارزقنا ذرية طيبة ....الحمد لله انك رزقتني إياها زوجة في الدنيا.... اللهم اني اريدها أيضا زوجة في الآخرة "
ابتسمت من مدي لطف وصدق وجمال كلامه....
- انا بحبك ...بس الكلام سهل ...فاتمني اني ربنا يوفقني اني اثبتلك الكلمة دي ....بس يعلم الله اني حبك كبير في قلبي
ابتسمت ووقتها بس كان في رد واحد في بالي
سأُفني لأجلك قلباً وعمراً
