قربان إبليس الجزء الثالث والرابع
*قصة قربان ابليس3-4 *
"قربان ابليس" الجزء الثالث
قطع كلامي معاه صوت رنه تليفوني والرقم كان رقم دكتوره امل
-ايوه يا دكتوره خير
انت فين يا دكتور
-انا في مشوار بره المستشفي
طيب تعالي بسرعه في حاجه لازم تشوفها بنفسك
-طيب حاجه ايه
مش هينفع في التليفون ولكن انا عرفت الوشم اللي علي ج*ثه البنت يرمز لأيه ولازم تشوف بنفسك
نزلت من العماره بسرعه وركبت عربيتي واخدت طريقي للمستشفي
نص ساعه وكنت علي باب المستشقي وبمجرد ما دخلت المستشفي اتصادفت بدكتوره امل جايه عليا
اتقدمت ناحيتها وانا بسألها في ايه يا دكتوره.؟!!
امل:انا عرفت الوشم اللي علي جسم البنت يرمز لأيه يا دكتور
-يرمز لايه يا دكتوره.؟؟!!
امل: مش هينفع نتكلم هنا من الافضل نطلع المكتب
طلعت مع امل وانا بدات اسأل نفسي هي تقصد اي وبدأت اشعر ببعض القلق
دخلنا المكتب وانا قلت بعفويه: ايه يا دكتوره في ايه قلقتيني
امل: البنت دي كانت متورطه بحاجه تخص عب*دة الشيطان والطقوس الروحانيه والوشم دا خاص بأستدعاء شيطان معين، والناس اللي بتؤمن بالحاجات دي عندهم اقتناع انه قادر يحقق ليهم كل احلامهم
ولكن الغريب هو ايه اللي جاب الوشم دا علي جسم ملك وليه اتق*تلت من الاساس وايه سبب وجود الوشم علي جسمها هي بالتحديد
رديت وقلت: قصدك ان البنت دي ما*تت بسبب السحر والشعوذه
امل: انا متأكده ان البنت كان ليها في السكه دي واعتقد وبنسبه كبيره ان دا سبب مو*تها
فتحت امل تليفونها وشغلت ليا فديوهات لناس بتشرح معني الوشم ووقتها انا اترعبت وحسيت ان المره دي انا قدام قضية مختلفه تماماً عن اي قضيه اشتغلت عليها قبل كدا
طلبت من امل تبعت ليا الفديوهات واي صور تخص الموضوع دا، وطلبت منها تكتب تقرير مفصل عن الموضوع وامل وافقت واستأذنت ومشيت وسابتني قاعد علي كرسي المكتب وانا مشتت وبسأل نفسي وبقول: ايه علاقه الوشم دا باللي حصل للبنت
السابعه مساءاً "قسم شرطة المندره"
باب مكتب المقدم ايمن يخبط ويدخل منه هاشم
هاشم: مساء الخير يا فندم حضرتك دا كشف بكل المعلومات اللي طلبتها عن العيال بتوع قضية ملك المنيري
العيال دول 3 اولاد وبنت وهم كالاتي
1/▪︎احمد عيد عبد الرحمن،21 سنه بيدرس في كليه اللغات والترجمه، بالسنه الثالثه بجامعه خاصه من جامعات الاسكتدريه، الاب متو*في والام متزوجه وعايشه مع زوجها في القاهره وسايبه شقتها في الاسكندريه لابنها يعيش فيها، وطبعاً هو قالب الشقه مكان للسهر وإقامة الحفلات وما شابه
2/▪︎عمر زكريا منصور 21 سنه بيدرس في السنه الثالثه في كليه اللغات والترجمه بنفس الجامعه اللي بيدرس فيها احمد، عمر ابن لأسره ميسوره الحال ابوه زكريا منصور صاحب مصانع الحديد والصلب اللي في اسكندريه كلها وراجل ليه معارفه، وطبعا مش عايز اقولك ان الولد متاسبله السايب في السايب وبيعمل كل حاجه من غير ما حد يحاسبه مهو ابن زكريا منصور بقي، وكمان يافندم في بعض الناس قالوا انهم كانوا بيشوفوا عمر اوقات كتير قاعد مع المجني عليها وبيتقابلوا كتير
3/▪︎يوسف احمد الدمرداش 22 سنه بيدرس في الفرقه الرابعه في نفس الكليه وهي كليه اللغات والترجمه، ابن لاسره متوسطه الحال ابوه محاسب في احدي الشركات وامه مديره مدرسه، وهو وحيد ابوه وامه، وعيل كدا تحسه بايظ بيشرب وديما سك*ران ومش بيكون في وعيه ابداً
3/▪︎مريم احمد عبد القدوس، 21 سنه بتدرس في السنه الثالثه بكلية اللغات والترجمه ابنه وحيده مرفهه لاسره من محافظه القاهره، بعتوا بنتهم تدرس في الاسكندريه وطبعاً البنت اجرت شقه وسكنت فيها وكل اللي بتطلبه من اهلها بيتبعت ليها فوراً
الاربعه دول صحاب من زمان تقريبا من بداية دراستهم في الجامعه دي، ومن ساعتها وهما اتصاحبوا وبقوا بيقعدوا مع بعض معظم الوقت في الكليه وحتي بعد الكليه فكانوا بيسهروا مع بعض في شقه احمد، ولكن....!؟
ايمن: ولكن ايه
العيال دول كان تفكيرهم غريب يعني تقدر تقول عيال بيسخروا من اي حد ومن اي حاجه دول شبه بيسخروا من الاد*يان والطبيعه والحياه عموماً
ايمن: قصدك عيال تبع الناس اللي بيقولوا متن*ورين
هاشم: حاجه زي كدا ، الغريب بقي هي تصرفاتهم لبسهم كمية الوشوم اللي بيعملوها علي جسمهم طريقة كلامهم انطو*ائهم عن اي حد ميعرفهوش كل دا خلي اصحابهم في الجامعه يبعدوا عنهم
ومن حوالي 4 شهور كدا اتصاحبت مريم علي ملك وعرفتها علي صحابها واللي هما احمد وعمر ويوسف وفعلاً ميعديش وقت كبير وملك تبقي صحبتهم وبتقعد معاهم وبتخرج وبتسهر معاهم
اعتدل ايمن في قعدته وو*لع سيجاره وهو بيقول: طيب عيال زي دول بمستواهم الاجتماعي وحالتهم الماديه الجيده دي ليه يتصاحبوا علي بنت من اسره اقل من متوسطه بنت بتاخد مصروف يومي من ابوها يعني لا معاها تصرف علي نفسها ولا عليهم يبقي اي اللي شدهم للبنت دي خصوصاً انك بتقول انهم كانوا انطو*ائيين ومش بيتصاحبوا علي حد يبقي اشمعنا ملك.؟؟!!
هاشم: انا هقول لحضرتك: العيال دول كان ليهم في الرموز والطلاسم السحريه او زي ما هما بيقولوا عليها رموز الطاقه الروحانيه، فأظن انهم مختلفين في كل حاجه ولكن اجتمع تفكيرهم علي شى واحد وهو الطريق دا وشدوا ليه ملك واللي بالفعل كان واضح ان عندها مي*ول للفكره دي، ولكن اشمعنا ملك بالذات دا اللي لسه موصلناش ليه
ايمن: هتوصله يا هاشم هنوصله، اطلبلي العيال دي يجوا بكره قدامي لأخذ اقوالهم، الصبح عايزهم علي مكتبي يا هاشم
هاشم: امرك يافندم
متعديش لحظات وباب المكتب يخبط ويدخل عسكري ويقول في حد بره بيقول انه من المعمل الجنائي يافندم
ايمن: دخله يابني
دخل شاب وادي التحيه العسكريه وقال: انا عمر رسلان يا فندم دكتور من المعمل الجنائي ودا تقرير بنتيجة البحث اللي تم في قضية "ملك احمد المنيري"
ايمن: اهلا بيك يا اهلا دكتور اتفضل
عمر: حضرتك بعد البحث الجنائي توصلنا لكام حاجه
▪︎اولاً تم العثور علي بصمات ترجع لي 6 اشخاص في مسرح الجر*يمه وقدرنا نتوصل لصاحب البصمه الاولي ودا هي المج*ني عليها ولكن باقي البصمات لم يتم العثور علي اصحابهم لعدم وجود مشتبه بهم لمطابقة البصمات
ثانياً تم العثور علي زجاجة خم*ره ودي عليها بصمتين بصمه تخص المج*ني عليها وبصمه مبهمه وللعلم نوع الخ*مر دا بالذات خ*مر مركز قوي المفعول ودي الزجاجه الوحيده المركزه اللي تم العثور عليها
ثالثاً لاحظها وجود حاجه غريبه يا فندم
ايمن يطفي سجارته ويو*لع سيجاره تانيه وهو بيقول حاجه ايه
عمر: لاحظنا وجود بعض المواد الكميائيه في الحمام المتواجد في الشقه اللي حصلت فيها الجر*يمه، مواد كميائيه زي حمض "الهيدروفلوريك" وحمض
"النتريك" وحمض "هيدروكسيد الصوديوم"
هاشم: ودا معناه ايه
عمر: الاحماض دي قادره علي اذابه جمل في ساعه ونص يعني حضرتك لو جبت جمل وفضيت عليه المواد دي بمعدل لتر لكل 10 كيلوا جرام فالجمل دا في حدود ساعه ونص هيكون شويه عضم ولو اضفت حمض "النتريك" وحمض "هيدروكسيد البوتاسيوم" فأنت بكدا تقدر كمان تذيب العظم يعني بتحط المجني عليه وبتفضي عليه المواد دي وبعد ساعه ونص بيكون عباره عن شويه رواسب تقدر تتخلص منها بكل سهوله
ايمن وهاشم مكنوش مستوعبين الكلام اللي بيتقال وسأل هاشم سؤال مهم وقال: طيب لو كان اللي عمل كدا في البنت كان مجهز كل حاجه ليه محطهاش في المواد دي وخلص من الج*ثه
عمر: معرفش ايه اللي عطله عن الخطوه دي ولكن دي كل حاجه قدرنا نوصل ليها ودا التقرير استأذن انا
ايمن: تقدر تتفضل شكراً يا دكتور
خرج دكتور عمر وساب ايمن وهو بيقول: في حاجه غريبه يا هاشم، الدكتور بيقول انهم وجدوا بصمات 6 اشخاص في مسرح الج*ريمه، منهم بصمة ملك وبكدا فاضل 5 بصمات نطلع منهم بصمات الاربعه المشتبه فيهم وهما احمد وعمر ويوسف ومريم كدا اتبقي بصمه، السؤال بقي يا هلشم مين صاحب البصمه دي.؟!!
هاشم: معرفش يا فندم طيب حضرتك تؤمر بأيه وانا انفذ
ايمن: انا عايز العيال دول بكره يا هاشم الصبح يكونوا علي مكتبي ولكن مش عايز حد منهم يشوف التاني عايز اتكلم مع كل واحد لوحده
هاشم: امرك يا فندم اي اوامر تانيه
ايمن: لا يا هاشم اتفضل انت
وبمجرد ما خرج هاشم تليفون ايمن يرن وكان المتصل هو دكتور علي
علي: ايمن بيه انا وصلت لمعني الوشم اللي علي جسد ملك
ايمن: وانا وصلت لبلاويا يا علي انت فين دلوقتي
علي: موجود في المستشفي
ايمن: خلاص هعدي عليك اتكلم معاك شويه في حاجات تخص المعمل الجنائي اللي بحث في القضيه مسافة السكه وهكون عندك
اخد ايمن تقرير المعمل الجنائي والتقرير اللي هاشم جابه بخصوص صحاب ملك من علي المكتب وخرج في طريقه لمستشفي اسكندريه العام
العاشره مساءاً "مستشفي اسكندريه العام" الدور الثاني مكتب دكتور علي الطيب
كنت قاعد في مكتبي لما دخلت هدير وهي بتقولي في ظابط بيسأل عني بره اسمه ايمن بدران
-دخليه يا هدير
ايمن: مساء الخير يا دكتور
-مساء النور يا سيادة المقدم اتفضل اقعد تشرب ايه
ايمن: قهوه ساده ان امكن
رفعت سماعة التليفون وقلت: لو سمحت اتنين قهوه ساده
-ها يا ايمن بيه خير
ايمن: قدرنا نوصل للعيال اللي كانت مصحباهم المج*ني عليها ودول هما المشتبه فيهم في القضيه دي ودا تقرير فيه كل المعلومات عنهم
مسكت التقرير وبدأت اقرأه وبعد دقايق سبته وانا بقول: دا كلهم من طبقه اجتماعيه عاليه ايه اللي هيخليهم يصاحبوا ملك يعني نقدر نقول ان ملك اتشدت ليهم لأنهم من طبقه اعلي منها وخروجاتهم وهزارهم شدها وحبت تجرب ولكن السؤال الاهم هنا هو ايه اللي شدهم هما لملك يعني ايه المميز اللي في ملك يخلي العيال دول يقبلوا بيها وسطهم.؟؟!
ايمن: دا اللي هنوصله قريب جدا، كمان دا تقرير بخصوص المعمل الجنائي وبما انك دكتور فأظن انك هتجاوبني علي اسألتي بخصوصه
-مسكت التقرير وانا بقراه بأستغراب وبعدها سبته وانا بو*لع سيجاره وبقدم سيجاره لأيمن وكمان القهوه وصلت
ايمن: هو اي موضوع الاحماض دي يا دكتور وهل فعلا قادره علي انها تذيب بني ادم لحم وعظم
اخدت نفس من سيحارتي وقلت: للاسف ايوه في مواد تقدر تعمل كدا بكل سهوله، تحط بني ادم وتفضي عليه المواد دي وتسيبه يغلي لحد ما يسيح ويبقي شويه عضم متك*سرين تماماً ولو خليت تركيز المواد دي اقوي حتي العضم بيذوب وبكده يبقي سهل جداً التخلص من الج*ثه بدون اي لفت نظر وشوشره
ايمن: فريق البحث لقوا المواد دي في الحمام طيب طالما الج*اني مجهز كل حاجه كدا ليه منفذش وقت ما قت*ل البنت ليه استني.؟؟!
وقتها قلت: في سؤال اهم يا ايمن بيه وهو وقت هج*وم القوه علي الشقه اللي حصلت فيها الجر*يمه الج*اني كان فين وراح فين اصلا خصوصاً انه مجهز كل المواد وجاهز ينهي الموضوع اللي بدأه
ايمن: واضح ان القضيه دي ليها علاقه بالناس بتوع العلوم الروحانيه والحاجات دي وشغل الطلاسم والعفاريت
قلت وانا بطفي السيجاره: بس مفيش عفريت يمسك سك*ينه ويد*بح ويق*تل يا ايمن بيه
ايمن: بس يقدر يعمل كدا من خلال وسيط
سكت لحظات بعدها قلت: انا وصلت لمعني الرمز اللي علي جسم البنت
الرمز دا هو طلسم استدعاء لأحد مردة الجن يقال انه وقت استدعائه بيكون للي استدعاه ميزه انه يطلب اي طلب وهيتنفذ مهما كان، ولكن دا طبعاً بعد ما ينفذ كل الاوامر الخاصه بالاستدعاء وكمان يقال ان لازم لأتمام طقس الاستدعاء يكون فيه قر*بان يقدم للشيطان دا علشان يحضر ودي فديوهات لصور تشرح الكلام دا
مسك ايمن التليفون وكان بيتفرج وهو مستغرب كل حرف بيتقال
قفل التليفون وقال: قصدك ان البنت دي كانت هي القربان اللي اتقدم للشيطان.!؟؟
- اظن كدا
سكت ايمن وقال: انا هتكلم بكره مع العيال المشتبه فيهم وهشوف اخرهم ايه اسيبك انا دلوقتي سلام
اخد ايمن التقارير واتحرك وخرج من المكتب
فضلت قاعد في المكتب لحد ما لقيت هدير داخله المكتب عليا وهي بتقول
الحق يا دكتور عم محمود حارس المش*رحه واقع علي الارض ومش بينطق
طلعت اجري ورا هدير لحد ما وصلت للمش*رحه تحت وانا بقول لهدير هو قال انه مش هينزل للمش*رحه بالليل وهيفضل في سكن الممرضين ايه اللي نزله بس
هدير: معرفش يا دكتور احنا فجأه شوفناه خارج ونازل وكنا بنكلمه مش بيرد
وصلت للمش*رحه ولقيت عم محمود واقع علي الارض ومش بينطق
بدأ الممرضين يشيلوه واتحركنا علي الاستقبال
وقتها بدأت افوق فيه ولكن مش بينطق ومفيش نفس وحتي النبض ضعيف وشبه منقطع وغير مستقر
قررت اني هفوقه بجهاز الصدمات الكهربابئيه وطلبت انهم يقصوا القميص اللي لابسه وبدات اعمله اكتر من صدمه لدرجه انه اخد 8 صدمات وبرضوا مش بيفوق
وقتها مكنش قدامي غير حلين يا اما اركز مفعول وقوه الصدمه واخاطر بحياته ويا فاق يا ما*ت يا اما اسيبه يم*وت لأن لو سبته ف في اقل من دقيقه هيم*وت
وقتها ضاعفت مفعول الصدمه وبكل قوه صدمته وفجأه سمعت صوت النبض بيرجع تاني
سبت الجهاز وبدات الدكاتره للمتخصصين يجو وهما بدوا يشوفوا شغلهم وانا من التعب قعدت علي الارض في زاويه الغرفه وانا بحاول التقط نفسي
ولكن سمعت حد من الاطباء بيقول هي ايه العلامات اللي علي رقبته دي .؟!!
قمت وبصيت الغريبه انها كانت هي هي نفس العلامات اللي ظهرت علب رقبته لما اشتكي ان البنت دي ها*جمته والمرعب هو انها هي هي نفس العلامات اللي بتظهر علي رقبتي بعد ما بحلم الحلم اللي بشوف فيه ملك
معني كدا ان عم محمود البنت دي ظهرت ليه تاني طيب دا معقول.؟!!
سبت كل حاجه من ايدي واخدت مفاتيح المش*رحه من جيب عم محمود وطلعت علي المشرحه وفتحت الدرج الي فيه ج*ثه ملك وناديت احد الممرضين علشان يساعدني في تنزيل الج*ثه ووضعها علي السرير، وبعد ما نزلنا الج*ثه طلبت من الممرض يساعدني بحيث يقرب ليا ادوات التش*ريح وما شابه
وبالفعل جاب الممرض ادوات التش*ريح من التعقيم وبدأت اتفحص كل مكان في جسد البنت
وانا بسأل نفسي ايه معني اللي حصل لعم محمود وهل ممكن نفس اللي حصله يحصلي.؟!!
كنت متوتر جداً ولكن بصعوبه بدأت اركز في كل حاجه
لحد ما وصلت لأيد البنت ووقتها بدات ابص تحت اظافرها وبالفعل وجدت بقايا لجلد تحت الاظافر
وقتها قصيت الاظافر دي واخدت الجلد وحطيتهم في كيس صغير وكمان لاحظت وجود بصمات علي جسد البنت ووقتها بعت الممرض وقلتله عايزك فوراً تجيب ليا دكتور طه من المعمل ومتجيش من غيره
وبالفعل متعديش كام دقيقه وكان الممرض جاي ووراه دكتور طه
طه: خير يا دكتور في حد يعمل كدا برضو
قرب يا طه مش وقت كلامك دا قرب وبص معايا كدا
طه: ابص علي ايه
مسكت نضاره طه ومسحتها في البالطوا بتاعي وانا بقوله اديني مسحتلك النضاره اللي ممكن تكون مشبره هاا بص شايف كدا
طه: طيب شاورلي علي المنطقه اللي اركز فيها يا دكتور
قلت: بص كدا في بصمات هنا علي صدر البنت شايفها.؟؟!!
وفي بصمات هنا علي منطقه الفخذ وبصمات علي منطقه الوجه بالقرب من الفم
طه: اه ملاحظ دا
-طيب لو سمحت يا دكتور عايزك ترفعلي البصمات دي وتفحصها
طه: طيب ياخي خليها الصبح حرام عليك احنا في نص الليل وسط مش*رحه والج*ثث محاوطانا من كل مكان هنتلبس كدا اقسم بالله
-مش وقت الكلام دا يا دكتور بالله عليك ركز
سكت طه وتقدم علي طاوله الادوات ولبس جوانتي وبدأ يشتغل وعدت ربع ساعه وكان طه بيقولي تمام انا خلصت
مديت ايدي بالكيس واللي كان فيه عينة الاظافر وقلت كمان الاظافر دي تحتها اثار جلد عايزك تعرفلي هل دا جلد خاص بالمج*ني عليها ولا لا
طه: تمام 24 ساعه وهتوصلك النتائج بعد اذنك بقي امشي من المكان ده
اتحرك طه وخرج من المش*رحه وانا معاه
طه: هو اي اللي حصل لعم محمود سمعت انهم لقيوه قا*طع النفس
-معرفش بس ربنا كتبله عمر جديد، المهم يا طه متتأخرش عليا في النتائج
سبت طه ودخلت مكتبي وانا جسمي خلاص شبه ان*هار من التعب
القيت بجسدي علي الكنبه ورحت في النوم....
التاسعه صباحا قسم شرطه المندره
المقدم ايمن بيدخل للقسم ويلاقي في وشه الملازم هاشم وهو بيقول: كل اللي امرت بيه يا فندم جاهز وتم استدعاء العيال اللي طلبتهم وكل واحد في مكان لوحده محدش منهم شاف التاني
ايمن: عادي يا هاشم ما لو كانوا بيتواصل ببعض وليهم يد في اللي حصل ف اكيد كل واحد قال للتاني ان في استدعاء من النيابه وصله عموما دخلهملي واحد واحد
دخل ايمن مكتبه ودقائق ودخل هاشم ومعاه واحد من العيال دول
ايمن: اسمك وسنك.؟!
-︎عمر زكريا منصور 21 سنه
ايمن: كنت فين يوم الثلاثاء اللي فات في الفتره ما بين السابعه مساءاً الي العاشره مساءاً
عمر: كنت قاعد في البيت
ايمن: قاعد في البيت اه طيب انت ايه علاقتك بملك احمد المنيري
عمر: انا معرفش حد بالاسم دا
ايمن: طيب بص يا عمر من اولها كدا انت لو هتلف وتدور عليا هزعلك مني فأنصحك تيجي كدا دوغري وتقولي ايه علاقتك بالبنت دي
عمر: قلتلك معرفش حاجه عنها
ايمن بعصبيه: انت هتستعبط يلا كل الناس بتقول انهم ديما بيشوفوكم مع بعض وبتتقابلوا باستمرار، ازاي بقي بتقول دلوقتي انك متعرفهاش.؟!
رد عمر ببرود وقال: اللي يقول يقول حضرتك انا بقولك معرفهاش بعدين انت ازاي تكلمني كده انت متعرفش انا ابن مين
ايمن: لا عارف انت ابن مين كويس وانا مبتهددش واديني بقولك اقسم بشرفي لو ليك علاقه باللي حصل للبنت دي لهجيبك انت وابوك وارميكم في الانفرادي
بعدها قال ايمن: اتقضل تقدر تمشي
خرج عمر وبعدها دخل هاشم ومعاه احمد وبعدها دخل يوسف وبعدها دخلت مريم والتلاته كلامهم متطابق بشده كلهم بينفوا معرفتهم بالم*جني عليها من الاساس ودا ثبت عليهم التهمه اكتر لأن كل التحريات بتقول ان الم*جني عليها اتصاحبت عليهم فتره تعدي ال 4 شهور فأزاي هما بينفوا معرفتهم بيها.!!؟
ايمن: الاربعه كلامهم هو هو وهو انهم بينكروا معرفتهم بملك
هاشم: واضح انه لما وصلهم الاستدعاء كلموا بعض واتفقوا هيقولوا ايه، بس مش كان من الافضل يا ايمن بيه تحتجزهم كام يوم لحد ما نشوف اخرتها معاهم كدا بما انهم خرجوا فممكن يتفقوا ويا عالم هيعملوا ايه
ايمن: لا يا هاشم بخروجهم دا انا اكدت ليهم اني مصدقهم وانهم غير متهمين بحاجه فهيخرجوا وهيتصرفوا بطبيعتهم وهما فاكرين ان الاسندعاء دا مجرد اخذ اقوال مش اكتر وانهم مش متهمين بحاجه ووقتها هنعرف نوصل للدليل اللي يدينهم اهم حاجه دلوقتي تحطلي عينك عليهم ميغبوش عن عينك يا هاشم حطهم تحت المراقبه المشدده
كمان عايزك تروح تقابل بواب العماره اتكلم معاه حاسس ان الراجل دا هيوصلنا لحاجه
هاشم: امرك يا فندم
"مستشفي إسكندريه العام"
باب المكتب يخبط
-ادخل
هدير: عم محمود فاق يا دكتور وعايز يتكلم معاك ضروري
بسرعه طفيت سيجارتي وطلعت ورا هدير وانا بسأل نفسي يا تري عايزني في ايه..؟!!
يتبع.…
انتظروا الجزء الرابع
بس كدا وانتظروا الجزء الرابع من القصه قريباً سلام ❤❤
"قربان ابليس" الجزء الرابع
مستشفي إسكندريه العام"
باب المكتب يخبط
-ادخل
هدير: عم محمود فاق يا دكتور وعايز يتكلم معاك ضروري
بسرعه طفيت سيجارتي وطلعت ورا هدير وانا بسأل نفسي يا تري عايزني في ايه..؟!!
وبعد شويه وصلت للغرفه اللي فيها عم محمود واللي كان نايم علي السرير سلمت عليه وجبت كرسي وقعدت جنبه
-قلقتنا عليك يا عم محمود امبارح طمني عليك عامل ايه دلوقتي
محمود: الحمد لله يابني
-هدير قالتلي انك عايزني خير ان شاء الله
محمود: عايز اعرف حصلي ايه يا دكتور عايز اعرف تفسير اللي حصل معايا اي
-انا اللي المفروض اسألك ايه اللي حصل معاك وايه سببه، احنا لقناك واقع علي الارض فاقد الوعي
محمود: انا شوفتها، شوفتها تاني، والمره دي كانت هتقت*لني يا دكتور
-شوفت مين وتقت*لك ايه انا مش فاهم حاجه
محمود: شوفت ملك
-ملك مين
محمود: صاحبه الج*ثه اللي وصلت من كام يوم
-اديك بتقول ج*ثه ياعم محمود تبقي شوفتها ازاي وكانت هتق*تلك ازاي
محمود: بقولك ظهرتلي وكانت هتمو*تني انت ليه مش مصدقني
-طيب احكيلي اللي حصل بالتفصيل يمكن افهم وافهمك
محمود: معرفش يابني، بس اللي انا فاكره هو اني كنت قاعد في استراحه الممرضين ومكنتش عايز ابات في المش*رحه من ساعة اللي حصلي فيه وقتها تليفوني كان هيفصل شحن فقررت انزل اجيب الشاحن بتاعي من المش*رحه لأني نسيته تحت
نزلت عادي ولكن بمجرد ما دخلت اوضتي سمعت صوت خبطه جايه من التلاجه اللي بنحط فيها الج*ثث
كانت خبطه جامده كأن حد بيك*سر الدرج بتاع التلاجه، وقتها قررت اروح ابص واشوف في ايه ولكن ملحقتش اوصل لمكان التلاجه لأن النور قط*ع والمكان بقي ضلمه
لكن استغربت لما عيني جات علي الشباك اللي بيطل لخارج المش*رحه، لاحظت ان النور شغال عادي، قلت في بالي ممكن مشكله في الكهربا هنا ولكن الغريب هو ان في محولات في المستشفي المفروض بتشتغل بمجرد النور ما يق*طع، المرعب ان المحولات دي مشتغلتش طيب دا معناه ايه، .؟؟
وقتها الخوف شبه تمكن مني والرعب زاد اكتر لما بدأت اسمع صوت كأن درجه من ادراج التلاجه اتفتح، وسمعت صوت انين، كان صوت كأن حد بيت*ألم، بس مكنتش شايف اي حاجه من الضلمه
كنت بحس ان في خطوات جنبي، كأن في حد بيمشي جنبي بالظبط بس هو مين معرفش
فجأه النور رجع وبمجرد ما النور رجع بصيت علي ادراج التلاجه لقيتهم كلهم مقفولين، ولسه بلف وشي الناحيه التانيه شوفت منظر مرعب
شوفت بنت واقفه بضهرها، مكنتش شايف غير ضهرها، فضلت اقولها انتي مين انتي مين بس محدش بيرد، بدأت اتقدم ناحيتها ببطئ وبمجرد ما قربت منها لقتيها التفتت ليا وكانت هي هي ملك، ملك البنت اللي جث*تها وصلت من كام يوم
كان شكلها مرعب ومخيف وفجأه مدت ايديها وبدأت تخ*نق فيا بكل قوه كنت هم*وع في ايدها وانا بص*رخ بس مفيش اي فايده
ومحستش بنفسي غير وانا بقع علي الارض ومحستش بحاجه بعد كدا
-الكلام دا غريب ياعم محمود وانت اكيد اعصابك بايظه من ضغط الشغل انا همضيلك علي اجازه اسبوع هدي فيهم اعصابك
محمود: انا اعصابي مش بايظه ولا انا بيتهيألي يا دكتور انا متأكد من اللي عيني شافته، بقولك شوفتها ولمستني وكانت هتمو*تني، بص كدا
رفع عم محمود رقبته وفعلا في علامات خن*ق ظاهره وبوضوح علي رقبته وكأن فعلا كان فيه حد بيخ*نقه
سكت ومتكلمتش ولكن عم محمود قط*ع الصمت دا وقال: البنت دي بتظهرلك زي ما ظهرتلي صح.؟!!
-سكت وبعدين قلتله ايوه
رد وقالي: سيب القضيه دي يابني البنت دي مش هتسيبنا في حالنا، واضح ان في حاجه محاوطه البنت دي ومش عايزه سرها يتكشف سيبها لحالها وملكش دعوه بيها انت زي ابني وعلشان كدا خايف عليك، خلي اي دكتور تاني غيرك يشتغل عليها وبلاش انت يابني
استغربت كلام عم محمود وقلت في حزم: هو انت تعرف عني اني بخاف ولا بته*دد ياعم محمود القضيه دي بتاعتي ومش هسيبها وهخلصها ومهما يحصل مش هسيبها
محمود: اللي يريحك يابني بس افتكر اني حذرتك
وقفت من مكاني وقلت: بعد اذنك علشان ورايا شغل
سبت عم محمود وانا مخي بيجيب ويودي وبفكر ازاي البنت دي بتظهرلنا طيب هو طبيعي تظهر ليا ولعم محمود، طيب لو مثلا دي تهيؤات طيب هو طبيعي التهيؤات تحصلي انا وعم محمود مع بعض، ولو حتي دي تهيؤات طيب ايه العلامات اللي البنت بتسيبهاعلي جسم اللي بتلمسه، مكنتش فاهم ولا عارف افسر حاجه ولكن اللي اعرفه ومتأكد منه هو اني مش هسيب القضيه دي مهما حصل
الرابعه عصراً "موقع الجر*يمه"
امام العماره اللي وقعت فيها الجر*يمه ينزل هاشم من عربيته وبدأ يتقدم ناحية طلعت البواب واللي كان قاعد بيشرب معسل علي دكه محطوطه قدام باب العماره
طلعت: خير يا افندي اقدر اساعدك في حاجه
هاشم طلع من جيبه كارنيه وقال: مباحث
رمي طلعت لي الشيشه من ايده وهو بيقول يا مرحب يا بيه خير في ايه
هاشم: انت بواب العماره دي.؟!
طلعت:ايوه يابيه
هاشم: عايز اكلمك عن الجر*يمه اللي حصلت هنا من كام يوم
طلعت: هتكلم في ايه يا بيه منا قلت كل حاجه للباشا اللي كان هنا ساعة ما طبت علينا الشرطه
هاشم: نتكلم تاني ايه عندك اعتراض.؟!
طلعت: لا معنديش يا بيه تحت امرك
هاشم: كنت فين ساعة اللي حصل
طلعت: كنت قاعد هنا مكاني
هاشم: وايه اللي حصل احكيلي
طلعت: الشقه اللي حصلت فيها المصيبه السوده دي كانت بتطلع منها اصوات موسيقي عاليه وخبط ورزع واهل العماره طلبوا مني اروح للناس اللي مأجره الشقه واقولهم ميصحش كدا وفي جيران بتشتكي، ووقتها رحت وخبطت بس محدش عبرني ولا رد عليا فنزلت تاني بعد ما قلت للسكان ان محدش بيرد، وواحد من السكان بلغ الشرطه، حتي انا كنت قاعد مكاني واتخضيت لما لقيتهم طابين عليا ومكنتش فاهم حاجه وطلعوا ولقوا المصيبه اللي فوق دي
واضح ان كلام طلعت مكنش داخل دماغ هاشم وكان باين علي طلعت الارتباك خصوصاً لما هاشم سأله وقاله: بما انك قاعد هنا مبتتحركش فأكيد تعرف اللي طلعوا للشقه وتقدر تتعرف عليهم
وقتها طلعت ارتبك وقال: ايوه اتعرف يا بيه بس الله يرضي عنك خليني انا بعيد عن الموضوع دا
هاشم: لا بعيد ايه بس دا انت قريب وقريب اوي كمان
هاشم كان بيبص حواليه وفجأه عينه جات علي كاميرا تخص صيداليه قصاد العماره وواضح ان الكاميرا دي كاشفه مدخل العماره بالكامل
هاشم: طيب هرجعلك تاني يا طلعت احنا لسه مخلصناش كلامنا
اتحرك هاشم ناحيه الصيداليه
هاشم: مساء الخير
-مساء النور اتفضل اقدر اساعدك أيه
طلع هاشم الكارنيه وقال: هاشم توفيق مباحث
-خير يا فندم
هي الكاميرا الموجوده دي شغاله صح
-ايوه
هاشم: انت اكيد سمعت بالجر*يمه اللي حصلت في العماره اللي قصادك من كام يوم ومحتاجين نفرغ الكاميرا اللي عندك ونشوف صورت ايه يوم الحادثه
-اوي اوي هجيب لحضرتك نسخه بتسجيل الكاميرا اخر اسبوع
هاشم: اكون شاكر جداً
وبالفعل ربع ساعه وكان هاشم في ايده فلاشه عليها التسجيل وشكر الدكتور وخرج
كان طلعت قاعد قدام العماره لما هاشم نادي عليه
قرب طلعت من هاشم وقتها هاشم قاله تعالي معايا
طلعت: علي فين يا بيه
هاشم: علي القسم هتركب بنفسك ولا اجي اركبك بطريقتي.؟!
طلعت: لا وعلي ايه يا بيه اركب لما نشوف اخرتها
السادسه مساءاً "مستفي إسكندريه العام"
كنت قاعد في مكتبي لما الباب خبط ودخل طه
-خير يا طه طمني
طه: انا من ساعة ما اخدت العينات وانا سهران عليها ومنمتش لحد ما خلصتها
-طيب طمني ايه النتيجه
طه: اطلبلي الاول شاي وبقسماط علشان جعان
-يادي الاكل اللي مفيش في دماغك غيره
-ماشي يا سيدي، رفعت سماعة التليفون وطلبت واحد قهوه ساده وواحد شاي ومعاه بقسماط
-هاا قول ايه النتيجه
طه: اولا اثار الجلد اللي كانت تحت ضوافر البنت لا تعود ليها دي اثار لحد تاني واظن دا هو الجا*ني
-معني كدا ان المج*ني عليها كانت بتق*اوم مش مستس*لمه بالعكس دي كانت بتتشبث بأي طرف من اطراف النجاه
طه: بالظبط كدا يا دكتور، كمان البنت تم الاعت*داء عليها جن*سياً والاثار اللي كانت علي جسمها كانت علي مناطق حسا*سه زي الصدر والفخذ واكتشفت ان البصمات دي كلها ترجع لشخص واحد بس ولما طابقت البصمات دي بأثار الجلد لاحظت ان في تطابق بينهم
دخلت هدير بالشاي والقهوه، وعلطول مد طه ايده واخد من البقسماط وبدأ يشرب شاي بنهم وكأنه ليه يومين مأكلش حاجه
كملت الكلام انا وقلت: معني كدا ان اللي اعت،دي علي البنت هو هو صاحب الجلد وبكدا الجا*ني واحد
طه: لا يا دكتور الجاني مش واحد علشان انا لاحظت وجود بصمه غريبه لا تتطابق مع البصمات السابقه ودا معناه ان كان في شخص تاني
قلت: بس انا لما شوفت التقربر الخاص بالمباحث عرفت ان كان في اكتر من بصمه في المكان وبكده احتمالية ان يكون الجاني واحد تم استبعادها
مسكت تليفوني وكلمت المقدم ايمن
-ايمن بيه: في عينه لأثار جلد انا لقيتها تحت اظافر البنت وكمان في بصمات علي الج*ثه وانا حللتها في المعمل هنا واكتشفت ان البنت تم الاعت*داء عليها جن*سياً والبصمات دي تعود للجا*ني ولما طابقنا بين عينه الجلد والبصمات اكتشفنا انها تعود لنفس الشخص ولكن في بصمه مبهمه محدش عارف صاحبها، فلو سمحت ابعتلنا اي حد من عندك ياخد العينات علشان بتوع المعمل الجن*ائي يطابقوها مع البصمات اللي لقيوها في مسرح الجر*يمه ونشوف هيحصل ايه
ايمن: تمام هبعتلك حد دلوقتي يا دكتور
قفلت مع المقدم ايمن وكملت كلامي مع طه وقلت: القضيه دي بدأت خيوطها تفك واتمني تكمل علي خير
لكن لاحظت ان طه بدأ يسيب الشاي والبقسماط وكأنه افتكر حاجه وكمان بدأ يعدل نضارته ودي حركه بيعملها لما بيتوتر وقال: بس في حاجه غريبه لاحظتها يا دكتور
-حاجة ايه.؟!
طه: لما كنت قاعد سهران وبشتغل علي العينات كانت في حاجه غريبه بتحصل زي ان كنت بسمع اصوات خبط في المعمل مع العلم ان مفيش حد موجود غيري، كمان كنت بسمع خبطات واصوات ولما كنت بتحرك وبدور علي مصدر الاصوات دي مكنتش بلاقي حاجه لحد ما كنت قاعد شغال عادي وفجأه لاحظت خيال لحد معدي قدام باب الحمام والخيال دا كان لبنت بشعر طويل، انا مشوفتش غير ضهرها، قمت بسرعه علشان ابص في ايه ومين البنت دي وازاي تدخل هنا، كنت بتحرك وانا مرعوب ولكن المرعب اكتر هو اني ملقتش اي حاجه في الحمام مع اني متأكد من اللي عيني شافته
سكت لحظات بعدها قلت لطه: انت اكيد مجهد من السهر والشغل وبيتهيألك
طه:بقولك مكنش بيتهيألي يا دكتور انا شوفت بعيني وواثق من اللي شوفته
-متركزش يا دكتور وكمل شغلك وشكرا علشان سهرت وخلصت الشغل بدري عن معاده
طه: يعني خلاص كدا امشي.؟!!
-اه خلاص
طه: طيب هاخد الشاي والبقسماط معايا
-ابتسمت وانا بقوله ماشي
واتحرك طه وخرج من المكتب وسابني وانا بفكر في اللي قاله طه عن اللي شافه، منكرش اني كنت بطمن طه بس الصراحه انا كنت مصدق كل كلمه بيقولها وانا نفسي كنت خايف، وفي مخي بيدور سؤال واحد وبس وهو انا وعم محمود وطه بتظهر لينا نفس البنت ليه..؟!!
قسم شرطه المندره مكتب المقدم ايمن بدران
تليفون ايمن يرن
ايمن: الو، ايوه يا هاشم خير.؟!!
هاشم: ايمن بيه انا وصلت لحاجه مهمه جداً
ايمن: حاجة ايه.؟؟!
هاشم: انا وصلت لكاميرا كانت في صيداليه في مدخل العماره اللي حصلت فيها الجر*يمه ومش هتتخيل انا شوفت ايه هتعرف بنفسك لما تشوفها انا ساعة زمن وهكون عندك
ايمن: طيب دي حاجه تخص مين.؟
هاشم: العيال يا باشا العيال اللي كنا بنستجوبهم شكلهم هما اللي عملوها
ايمن: تعالي بسرعه يا هاشم انا مستنيك
باب المكتب يخبط فجأه ويدخل امين شرطه
امين الشرطه يأدي التحيه العسكريه
ايمن: خير يابني
امين الشرطه: العيال اللي حضرتك طلبت مني اعين قدام كل بيت واحد فيهم مخبر يرا*قب تحركاته
ايمن: مالهم اخلص
جاتني اخباريه من المخبرين اللي بيراق*بوهم ان العيال دول كلهم اتحركوا من بيوتهم وراحوا لبيت واحد منهم وحالياً هما موجودين فيه وكان معاهم شنط شكلهم مسافرين
قام ايمن مفزوع من مكانه وهو بيقول اجمعلي قوه دلوقتي حالا هنروح نجيبهم
امين الشرطه: امرك يافندم
اتحرك ايمن ومعاه عربيتين شرطه وقوه كبيره واتحرك في طريقه للقبض علي المشتبه فيهم والتحفظ عليهم
يتبع…
انتظروا الجزء الاخير قريباً يامرعبين
فمتنساش تعمل متابعه وتقولي رايك ❤👌🏻
بس كدا وانتظروا الجزء الاخير من القصه قريباً سلام يامرعبين❤❤
