على هامش العقل
على هامش العقل
لم أكن أؤمن بما يُسمّى بما وراء الطبيعة
ولا بالأرواح
ولا باللعنات
ولا بالقصص التي تبدأ بجملة
صدقني ما حصل حقيقي
أنا طبيب
والأطباء لا يصدقون إلا ما يمكن قياسه
ضغط
نبض
تحليل دم
وهذا بالتحديد ما جعل الأمر مزعجًا
لأن المريض الذي جلس أمامي
لم يكن لديه نبض
أقصد
كان حيًا
يتكلم
يتنفس
لكن جهاز قياس النبض
أصرّ على الصمت
قال لي بهدوء
دكتور هو هييجي النهارده
سألته
مين
ابتسم
وقال
اللي واقف وراك
لم ألتفت
لأن الأطباء لا يلتفتون لمثل هذه الجمل
لكن الزجاج خلفي
كان يعكس شيئًا
لم يكن أنا
خرج المريض
وبقيت وحدي
وفي تلك الليلة
فتحت دفتر الملاحظات
وكتبت لأول مرة
جملة لم أكن أظن أنني سأكتبها
هناك أشياء
لا تهتم برأيك العلمي
في الصباح حاولت أقنع نفسي إن اللي حصل وهم
قلة نوم
إرهاق
ضغط شغل
الأطباء بارعين في الكذب على أنفسهم
لكن المشكلة إن الكذبة ما بتكمّلاش
وصلت العيادة لقيت السكرتيرة بتقول
في مريضة مستنياك من بدري
قالت اسمها
سعاد
دخلت
ست كبيرة في السن
لبسها أسود
وابتسامتها زيادة عن اللزوم
قعدت
وقالت قبل ما أتكلم
دكتور أنا مش تعبانة
أنا جايالك عشان اللي ورايا
ضحكت ضحكة مهنية
وقلت
مفيش حد وراكي
قالت
ما هو ده اللي مضايقني
رفعت عيني بالغلط للمراية
اللي وراها
كرسيها كان فاضي
لكن في المراية
كان في ظل
واقف
سألتها
بتشوفيه امتى
قالت
دايمًا
إلا في المرايات
سكت
وده كان غلطي
قربت
وقالت بصوت واطي
هو بيكره المرايات
بتفكره بحقيقته
سألتها
مين هو
بصتلي نظرة شفقة
وقالت
زي ما انت شايفني كده
أنا جاية أودعك
قامت
ومشيت
فضلت باصص للمراية
الظل اختفى
بس الإحساس
لا
بعدها بيوم
عرفت إن الست
ماتت من عشر سنين
ومن ساعتها
بدأت أفهم
إن الحالات مش بتيجي صدفة
وإن في حد
أو حاجة
بتختارني
وفي آخر الصفحة في دفتري
كتبت
جملة واحدة
أسوأ أنواع الرعب
إنك تفضل عاقل
وسط حاجات مستحيل تكون موجودة
بدأت أكره الليل
ليس لأنه مظلم
بل لأنه صريح
في الليل
الأشياء لا تحاول أن تبدو طبيعية
كنت أراجع ملف مريض جديد
شاب في العشرينات
دخل العيادة من غير ما يخبط
قال
انت اتأخرت
قلت بهدوء مصطنع
اتأخرت عن ايه
قال
عن سماع الصوت
سألته
صوت ايه
ابتسم
وقال
اللي بينادي عليك كل ليلة
سكت
والصمت كان تقيل
قلت
انت تعرفني منين
قال
مش لازم أعرفك
هو يعرفك
قرب
وقال
بيحاول من امبارح
بس انت بتقفل ودانك
سألته
بينادي يقول ايه
قال
اسمك
بس مش بالطريقة اللي متعود عليها
سألته
طريقة ايه
قال
كأنه بينده على حاجة ضايعة
قمت
فتحت الباب
قلت
الجلسة خلصت
قبل ما يطلع
لف
وقال
خلي بالك
لما يبتدي ينادي باسم حد غيرك
يبقى الدور عليك خلص
خرج
قفلت الباب
وقعدت
وفي اللحظة دي
سمعت الصوت
جاي من جوه دماغي
مش عالي
مش واطي
هادئ
عارف
وبيقول اسمي
كأننا أصحاب من زمان
فتحت الدفتر
إيدي بترتعش
وكتبت
لو كان الجنون صوت
فهو أهدى مما توقعت
وفي آخر الصفحة
لقيت جملة
مش بخطي
لا تقلق
نحن لم نبدأ بعد
قفلت الدفتر
والنور طفى
ومن ورا الضلمة
سمعت نفس الصوت
بس أقرب
قضيت الليلة صاحي
النور كله مولّع
والشباك مقفول
كأني لو سبت فتحة
هييجي
الصوت ما رجعش
وده كان أسوأ
الصمت لما يطوّل
يبقى في حاجة بتستعد
تاني يوم دخلت العيادة
لقيت ملف على المكتب
أنا ما فتحتهوش
اسمي مكتوب عليه
بخط مش خطي
فتحت
لقيت ملاحظات
جلسات
تواريخ
كلها عني
حالات ما افتكرش إنها حصلت
أحلام
نوبات هلع
جُمل قلتها
وأنا لوحدي
في آخر الصفحة
كان في اسم
مكتوب ومتشطب عليه
كأنه اتحاول يتنسي
كل ما بصيتله
عيني تزغلل
سمعت خبطة خفيفة
من ورايا
المراية
اتشرخت
مش اتكسرت
اتشرخت
وكأن حد ضغط عليها من جوه
وفي الانعكاس
شافته
مش كيان
ولا شبح
نسخة
مني
بس عينيه فاضية
وابتسامته ثابتة زيادة
فتح بقه
بس الصوت ما طلعش
طلع في دماغي
وقال
افتكرت إنك لما درست العقل
بقيت بعيد عننا
قرب
من جوه المراية
وقال
اسمك كان أول باب
وانا اللي فتحته
رجعت لورا
المراية انفجرت
والصورة اختفت
وقفت ألهث
إيدي بتنزف
بس الدم ما كانش أحمر
كان غامق
تقيل
وكأنه قديم
قعدت
وكتبت آخر سطر في الصفحة
وأنا متأكد إني بكتب الحقيقة
لأول مرة
بعض الأسماء
لما تتقال
ما بترجعش أصحابها تاني
ومن تحت السطر
ظهر سؤال
لوحده
فاكر الاسم التاني؟
ما كنتش ناوي أدور
بس الفضول لما يبقى خوف
بيبقى أقوى
الاسم المتشطب
فضل في دماغي
زي شوكة
نزلت دار الكتب
طلبت سجلات قديمة
ملفات اتقفلت من سنين
الراجل العجوز بصلي
وقال
الاسم ده؟
حد لسه بيسأل عنه
سألته
يعني ايه
قال
يعني اللي بيسأل
بيكون اتشاف
فتح ملف
ورقة صفرا
حبر باهت
وقرالي
من غير ما ينطق الاسم
قال
زمان كان في اعتقاد
إن في أسماء
مش بتوصف الحاجة
لكن بتستدعيها
الاسم ده
كان بيتقال على طفل
اتولد
ومات
وعاش
كل اللي نطقوه
بدأوا يسمعوا نفس الصوت
وبعدين
يبقوا هو
سألته
يعني ايه يبقوا هو
قفل الملف
وقال
يعني يفضلوا فاكرين نفسهم
لحد ما يختفوا
رجعت البيت
والليل كان تقيل
لقيت الورقة على الترابيزة
الاسم
مكتوب كامل
من غير شطب
قريته في سري
غلط
غلط فادح
النور رعش
الحيطان قربت
والصوت
اتكلم
مش باسمي
بالاسم التاني
قال
أخيرًا
افتكرت
المراية اشتغلت لوحدها
وشوفت الطفولة
مشاعري
أفكاري
كلها
مش بتاعتي
قال
اللعنة مش إنك تموت
اللعنة إنك تفضل فاكر
إنك إنسان
قرب
مش بجسم
بذكرى
وقال
كل مرة حد بينطق الاسم
أنا بقرب
وأنت
كنت أقربهم
وقتها بس فهمت
إن المرضى
مش جايين يتعالجوا
كانوا جايين
يسلّموني
كتبت آخر سطر
وإيدي بتترعش
الاسم الحقيقي
مش بيتقال
الاسم الحقيقي
بيتورّث
وسمعت الصوت
ورا ودني
بيقول بهمس
دورك تسيبه لمين
من بعد الليلة دي
بطّلت أسمع الصوت
وده خوّفني أكتر
لأن الكيان لما يسكت
يبقى بيقرّب
ابتديت ألاحظ حاجات صغيرة
تفاصيل محدش ياخد باله منها
غير اللي مستني المصيبة
المرضى بقوا يدخلوا العيادة
ويبصوا لي
نفس البصّة
كأنهم عارفين حاجة
وأنا آخر واحد يعرف
طفل عنده سبع سنين
قعد قدامي
رجليه ما بتوصلش الأرض
قال
دكتور هو هيمشي امتى
قلت
مين
قال
اللي ساكن فيك
قفلت الملف
وقلت
إنت تعرف ايه عن الكلام ده
ضحك
ضحكة مش بتاعة طفل
وقال
مش لازم أعرف
هو اللي بيبص من ورا عيني
في المراية
شفت الحركة
مش صورتي
حركة وراها
كأن حد بيتعوّد على جسمي
رجعت البيت
لقيت صور قديمة
أنا مش فاكر إني اتصورتها
طفولتي
بس دايمًا في حد واقف بعيد
وشه مطموس
وفي صورة
كنت باصص للكاميرا
وعيني
مش بتاعتي
لقيت ورقة تحت الصورة
بخط طفولي
لو قريت ده
يبقى أنا سبتك خلاص
افتكرت الطفل
افتكرت الست
افتكرت الشاب
كلهم كانوا مرحلة
مش حالات
فهمت الحقيقة
مش في الاسم
ولا في النطق
اللعنة
بتعيش لما حد
يحاول يفهمها
وانا
فهمت زيادة
في آخر الليل
النور قطع
والشقة بقت ضلمة تقيلة
سمعت النفس
قريب
قوي
وقال
مش محتاجين نبدّل
إحنا خلاص واحد
وفي اللحظة دي
الموبايل نور
رسالة جديدة
من رقم مش متسجل
محتواها كلمة واحدة
باب
بصّيت على باب الشقة
وهو
ابتدى يتفتح
لوحده
وقتها عرفت
إن في حد جاي
مش عشان ينقذني
عشان يستلم
العدّ وقف
بس السكون
كان أسوأ
حسّيت بالأرض بتهتز
مش زلزال
نبض
نبض مش بتاعي
الحيطان اتحركت
مش وقعت
اتنيّت
كأن المكان نفسه بيهرب
سمعت صريخ
مش جاي من برا
جاي من ذكرياتي
كل موقف عدّى في حياتي
كان بيعيد نفسه
بس نهاية مختلفة
دايمًا أنا
اللي بخسر
جريت
مش عارف من إيه
ولا لفين
الممر فتح
باب
بابين
عشرة
وكل باب
ورا واحد
شبهّي
لابس حياتي
عايش مكاني
واحد منهم رفع راسه
وقال
مش مهم مين يفضل
المهم
مين يطلع
النور ضرب فجأة
ضربة واحدة
قوية
لقيت نفسي واقف
في الشارع
الناس ماشية
طبيعي
هدومي سليمة
نفسي هادي
قلت
خلصت
بس في انعكاس الإزاز
شفت الحركة
مش انعكاسي
حركة متأخرة نص ثانية
الموبايل اهتز
آخر رسالة
القصة ما خلصتش
هي بس خرجت
سمعت حد ينادي باسمي
من ورايا
الصوت
كان صوتي
لفّيت
والسطر
وقف هنا
