آخر نداء من السفينة كان بداية الرعب
سفينة الموت
“ كل اللى على السفينة مات .. طاقم السفينة مات .. أنا بموت .. ”
دا الكلام اللى لقطه جهاز اللاسلكي من سفينة مجاورة .. كان أغرب نداء استغاثة أسمعه في حياتي، ومعرفش ليه حسيت ان في حاجة غلط، وشعور جوايا بيقولى بلاش تقرب من السفينة دى، لكن القبطان مسمعش كلامي، وعلى الفور حددنا موقع السفينة من الاحداثيات اللى لقطناها، وتوجهنا فوراً لهناك، كل دا بيحصل وأنا أعصابي مشدودة، ومن غير سبب كنت مقتنع ان السفينة دى لعنة والمفروض منقربش منها .
لمّا وصلنا المكان، لقينا السفينة كإنها مهجورة من سنين، البحر كان هادي أوى، مفيش طيور في السما، المكان مريب وغريب، واللى شوفناه على السفينة دى كان أغرب!
كل اللى على السفينة ميت! والهوا كان فيه ريحة غريبة، يمكن كان ريحة الموت اللى مالى المكان بجثث مرمية في كل حتة، لكن في حاجة لفتت انتباهنا كلنا، وهي إن وشوش الجثث كلها مرعوبة، ودا خلّاني اتساءل: ايه اللى هما شافوه قبل موتهم، يخليهم بالرعب دا؟
توجهت أنا والقبطان ناحية غرفة القيادة اللى جاتلنا منها نداء الاستغاثة، لقينا القبطان ميت ومعاه ظابط وكلب ..كلهم ميتين، كلهم مرعوبين، الوضع غريب، والأغرب كان دفتر مذكرات الظابط اللى لقيته مرمي جنبه، واللى واضح جداً جداً انه كان بيكتب فيه لحد آخر نفس ..
مسكت الدفتر وبدأت أقرأ
ـــــــــــــــــــــــــــــــــــــــــــــ
* اليوم الأول على السفينة :
دوار البحر مبهدلني، دى أول رحلة ليا في البحر، كل زملائي بيقولوا اني هتعود، بس الوضع كان بيسوء، لدرجة اني أغلب وقتي بقضيه في كابينتي .
* اليوم التاني على السفينة: في ريحة غريبة في الجو، الكلاب اللى على السفينة مش بتبطل نباح ليل ونهار، معرفش في ايه مخليهم متحفزين كدا، هل هما شايفين حاجة احنا مش شايفينها؟
* اليوم الثالث على السفينة:
كنت نايم وصحيت على خبط جامد على باب كابينتي، وظابط زميلى بيبلغني انهم لقيوا واحد من العمال ميت، وجاري التحقيق في الموضوع.
* اليوم الرابع على السفينة:
عدد الجثث بيزيد، ومحدش عارف ايه السبب، كل الجثث مشتركة في حاجة واحدة، ان كلهم ميتين موتة طبيعية، مفيش دم، مفيش كدمات، مفيش أي حاجة تدل على انها جرايم قتل، لكن علامات الرعب المرسومة على وشوش الجثث قبل موتهم، خليتنا كلنا نتأكد ان في حاجة مرعبة شافوها قبل موتهم مباشرة .. أنا بدأت أخاف .
* اليوم الخامس على السفينة:
أنا محبوس في غرفة القيادة مع القبطان والكلب بتاعه ( الكلب الوحيد المتبقي ) , القبطان بيحاول يرسل نداء استغاثة، والكلب مش بيبطل نباح، وأنا مش قادر أبطل كتابة، أنا دلوقتي في قمة رعبي وأنا شايف القبطان بينادي وبيقول " ان كل الطاقم مات .. كلهم ماتوا .. احنا بنموت "
والكلب بيقرب على الباب وبينبح بصوت أعلى وأعلى ..
أنا قلبي بيدق بسرعة، خايف ومفيش في ايدي حاجة أعملها غير الكتابة .
الكلب نباحه بيزيد .. بيقرب أكتر على الباب ، كإنّه بينبهنا ان في حاجة واقفة وراء الباب بتحاول تدخل، لحظات من الرعب بتعدي عليا وأنا شايف باب الغرفة بدأ يتفتح ببطء .. الكلب نباحه بيزيد .. الباب بيتفتح أكتر .. القبطان بينادي لآخر مرة
" كل اللى على السفينة مات .. طاقم السفينة كله مات ..
أنا بموت ! " …
ـــــــــــــــــــــــــــــــــــــــــــــــ
📌 القصة الأصلية :
القصة مستوحاه من قصة السفينة الهولندية
" اورانج ميدان "…
السفينة دى غرقت بالقرب من السواحل الإندونيسية، و لكن قبل غرقها، وصلت للسفن القريبة منها نداءات استغاثة غريبة" كافة الضباط على متن السفينة قد ماتوا...كافة افراد طاقم السفينة قد ماتوا....مات القائد...انا سأموت "…
في سفينة امريكية كانت قريبة من الموقع، و بالفعل قدروا يحددوا موقع السفينة و وصلوا، و لكن كان الوقت اتأخر، كل اللى كان على متن السفينة مات...حتى الكلاب و الطيور اللى كانت بتحوم فوق السفينة، اللى كانوا هناك قالوا ان رائحة الموت كانت منتشرة في المكان و شكل الجثث كانت مخيفة، و تعابير الوجوه كانت مرعبة و كإنهم شافوا شيء مرعب قبل ما يموتوا، و فجأة السفينة غرقت و بدون اى مقدمات و فضلت قصة السفينة دى لغز ليومنا ده، فيه اللى قال انهم قراصنة و فيه اللى قال انهم اشباح.
لكن التفسير العلمي اللى قاله المحقق البريطاني روي بينتون انه بسبب رائحة الكبريت اللى اتسربت من البراميل و لكن هيفضل السؤال المستمر:
“ليه تعابير الفزع و الخوف كانت مرسومة في وجوههم ساعة الموت!؟”
