قصه رعب حقيقيه

انا اول مره احكي لحد ..انا كنت بحاول اخبي الموضوع ده على اد ما اقدر ..انا ***** 
من حوالي ٦ اسابيع امي قررت اني لازم اخطب و اختارتلي بنتين واحده من العيله والتانيه جارتنا ..
بصراحه انا كنت متحمس للخطوبه وكنت ميال لجارتنا اكتر..
امي كلمت امها وحدولنا يوم نقعد نتكلم ونتعرف على بعض ..
انا زيي زي اي شاب معرفش بنت قبل كده ف حياته كنت خجول وكنت متوتر..
اول مره قعدت معاها بدأنا نتكلم وفي وسط كلامنا النور قطع وسمعنا صوت عراك قطط بس كنا سامعينه جوا الشقه..
مركزناش لان النور جه بعدها على طول بس حسيت وانا قاعد ان في زي جرح في دراعي تحت كم القميص واستأذنت ودخلت الحمام ولقيت خربوش طويل في دراعي من تحت كم القميص ...
انا مفهمتش ايه ده وكنت هتجنن وافهم انا اتخربشت ازاي !!!
المهم طلعت قعدت معاها شويه وبعد كده مشيت ..
حكيت لأمي لما روحت قالتلي تلاقيك اتخربشت من اي حاجه من غير ما تحس..
خلال اليوم ده كان قلبي مقبوض بطريقه غريبه وحاسس اني مش مركز وتايه ..
لما نمت حلمت بان خطيبتي او الي هتبقى خطيبتي بتخونني مع ابويا وكنت مصدوم وخلص الحلم ده حلمت بان في كلب اسود كبير اوي بيجري ورايا وبيحاول يعضني لكنه مقدرش بس خربشني بظوافره في رجلي .. وحلمت تاني بعدها ان البنت الي اتقدمتلها عجوزه اوي وشكلها عجوز ومخيف ..كل الاحلام دي ورا بعض.
قمت من النوم على صوت امي بتسمي الله طبعا كنت قايم مفزوع وحاسس بخنقه وحاسس بان رجلي مجروحه فعلا .. وحصل ولقيت رجلي مجروحه زي ما شفتها في الحلم 😱
انا مكنتش فاهم.. امي قالتلي انا جيت على صوتك وانت بتإن وبتزوم ومش قادر تتكلم..
لما حكيت لامي عن الاحلام الي شفتها ورا بعض شكت في الموضوع وكان ليها صاحبتها اسمها صباح وصباح كانت عرافه وبتفتح المندل وكانت بتعزنا اوي لانها كانت جارتنا ١٠ سنين لكن باعت بيتها وانتقلت لمكان في الصحرا تقريبا في المنطقه مفيش غير بيتها وبيتين كمان.
امي سألتها قالتلها انها طالبه تشوفني..
رحنا انا وامي بعد كام يوم واول ما دخلت لقيت صباح سلمت عليا وبدأت تسألني حصل حاجه وانا قاعد مع البنت ؟؟
حكيتلها على النور لما قطع وصوت القطط وحكيت عن احلامي لقيتها طلبت اسم ام البنت وامي قالتهولها..
اول ما قلنا الاسم صباح وشها اتقلب وكشرت اوي وراحت مزعقالي بنفس الطريقه كده "ايااااك تيجي ناحية البت دي وابعد عنها وانساها خالص"
صباح عينيها كانت بتدمع وهي بتقولي كده وكان صوتها متغير وكانت بتغمض عنيها كتير ..انا خفت منها..وتقريبا حست اني خفت ف قالتلي انت خفت ؟؟
طب عاوز تخاف فعلا..
.."البت الي انت عاوزها معاها ملك من ملوك الجن اسمه ******وم ومعاه خدم مش هيسيبوك في حالك هيأذوك ويدمروك ويقلبولك مخك ويخلوك تكرها وتشوفها وحشه ابعد يابني احسنلك"
..
مكنتش مستوعب كلام صباح ولا مستوعب دموعها ونبرة صوتها وهي بتحذرني..
بس بقيت بفكر في جارتي كتير في الايام دي جالها دور سخونيه فضل معاها حوالي ١٠ ايام ورحنالهم انا وامي ..
انا كنت شايفها عجوزه ..مكنتش مصدق عيني ان دي هتبقى مراتي وحاسس بصداع غريب وازاي انا شايفها بالشكل ده وشايف نظراتها قويه ومخيفه وعلي وشها علامات غضب .. انا مقدرتش اكمل ٥ دقايق كمان لاني طول ما انا قاعد سامع في ودني صوت صباح ..
انا كان لازم امشي ..روحت البيت نمت لاني كنت حاسس اني تعبان جدا ولما نمت حلمت بردو انها بتخونني بس سيناريو الحلم كان زباله كنت قايم من النوم دمي فاير وغضبان جدا ..كنت شايفها بتخونني مع حد تاني وبيضحكولي هما الاتنين كانهم بيغيظوني..وحلمت بصباح قاعده في الارض ومرمي عليها ملايه سوده كلها دم وفي قط رصاصي بيتَبول عليها
صحيت من نومي قلت لامي هنتصل بصباح علشان نفهم والمشكله اننا لما اتصلنا رد علينا جيرانها وقالولنا 
صباح ماتت
كل تفكيري في الوقت ده هو ازاي صباح ماتت وليه انا حلمت بيها وليه لاقيت خرابيش تاني في جسمي ؟؟
امي قررت اننا هنروح لشيخ جامع يقرا عليا لاني كنت يوميا بحلم بيها بتخونني وبلاقي خرابيش وبحلم بعقارب وعناكب وكلاب بتهاجمني وبتأذيني
الشيخ الي كلموه طلب انه يرقيني انا والبنت سوا وبدأ بيا طلب مني انام وافرد جسمي عالارض وجاب مياه كبها على وشي ..رحت مزعق فيه وبقوله يا عم الميه سخنه حرام عليك متجيب ميه من الحنفيه حرقت وشي ..
كانوا بيبصولي بصات استغراب ..انا محستش بحاجه وغبت عن الوعي بس صحيت شفت فيديو اغرب من الخيال..مساعد الشيخ صوره مخصوص علشان اشوفه..
شفت الشيخ بيقرأ عليا وانا صوتي متغير وبرد عليه بكلام غريب وبقوله ان في ملك بيحب البنت وحارسها بخدامه واني واحد من خدامه
وكنت بقوله يبعد عن الموضوع بلهجة تحذير علشان ميحصلش صباح الي افشت سر الملك بتاعهم.
وحتى الآن انا مش عارف اعيش ولا عارف اتعالج وتقريبا اصبحت انسان مهمش لا في شيخ قادر يرقيني والبنت جارتي ما زلت مش عارفه تعيش انها هي كمان شافت حاجات بعد ما الشيخ رقاني ..
......
تم
بقلمى 
يحيي عدنان