احلام نرجس بين الحقيقه و الخيال | رعب
انا نرجس عندي 19 سنه الناس بتقول عني جميله و ده رأيهم من صغري و انا بحب ارسم و خصوصا من خيالي كان في المدرسه استاذه دايما بتحفزني على الرسم ف كبر عندي حب الرسم اكتر المهم مش هطول عليكوا انا رسماتي بتتحقق هقولكوا ازاي ممكن مش تصدقوني ممكن تقولوا انه تخاريف بس انا حبيت اشارك تجربتي
انا و اهلي اتنقلنا عشان نعيش في الريف من قريب والدي بيقول انه لاقى بيت بسعر كويس و بالفعل راح اشترى البيت و سافرنا نعيش فيه كان بيت جميل بجنينه واسعه و فيه اوض كتيرة ف ده حسسني بأرتياح ان كل حد فينا انا و اخواتي هيبقا ليه اوضه عدى علينا فترة و كل اهل البلد عرفونا ده غير ان اختي الكبيرة اتقدملها عريس و اتجوزت و اخويا دايما بين الشغل و بين البيت ف انا معظم الوقت لوحدي فالبيت مع بابا و ماما كان في عرسان كتير بيتقدمولي و عينهم عليا بس انا كنت برفض بسبب مستوى الجهل العالي فالقرية دي انا مش بعيب فيهم بس انا برضو يحقلي اني اختار الي هعيش معاه المهم
كنت مرة قاعده برسم و سرحت بخيالي ف رسمت راجل وسيم لابس قميص اسود و بنطلون اسود و قاعد ف حاجه زي صاله مش عارفه ليه حاولت ارسم الصاله بتاعتنا بالظبط و معاه ست كبيرة قاعده خلصت الرسمه كانت الساعه 2 الضهر و علقتها على حيطة الاوضه عدا ساعتين و لاقيت ماما بتنده عليا روحتلها و قولتلها نعم يا ماما لاقيتها بتقولي انها مش ندهت اصلا بس بالمرة طالما جيتي انتي جايلك عريس جديد انهارده هترفضيه من برة برة زي الباقي ولا اي الفضول خلاني اسألها عنو لاقيتها بتقولي انه متخرج من كلية و متعلم و بيشتغل محاسب في بنك و بينزل لاهله اجازة كل فترة ف قولتلها طيب ماشي هقابله
جت الساعه 7 بليل و لاقيناه بيخبط على الباب هو و والدته بابا طلع فتح و دخلهم اوضة الضيوف انا طبعا كأي جوازة مصريه هدخلهم الي هيشربوه هو طلب قهوة ساده و دخلت لوالدته حاجه ساقعه و اتفزعت لما دخلت عليهم
لاقيت انه نفس الشخص الي رسمته فالرسمه الي متعلقه ف اوضتي و والدته نفس الست الكبيرة حاولت اعدي الموضوع لحد ما اليوم خلص و هما مشيو و انا دخلت اوضتي بسرعه و دي كانت تاني صدمه ليا لاني لاقيت الرسمه بقت عباره عن الصاله بس و الي كنت راسماهم اختفوا
حاولت اتمالك نفسي و اعمل اني مش واخده بالي و خدت الرسمه من على الحيطه و قطعتها و قولت ممكن اكون مش مركزه او حاجه
عدا يومين و طلعت ارسم فالجنينه لاقيت نفسي تلقائيا برسم الشجرة الي فالجنينه و سرحت و انا برسم و فوقت و انا راسمه الجنينه و الشجرة و والدي و هو بيسقي الزرع بس في حاجه !!! كان في حاجه زي جثه بنت مشنوقه فالشجرة ف استغربت و طلعت الاستيكه و بمسح البنت دي مش بتتمسح الرسمه كلها بتتمسح الا البنت دي انا خوفت و قومت مقطعه الرسمه ساعتها سمعت صرخه والدي لانه داس على مسمار بالغلط و هو بيتحرك فالجنينه رميت اللوحه بعد ما اتقطعت و سندت بابا و دخلته جوة و طلعت الجنينه تاني لاقيت بابا داس عالرسمه بالغلط و بقت كلها دم كملت تقطيع فاللوحه و انا قلبي بيتنفض من الرعب يوميها بالليل اتطمنت على بابا و دخلت نمت
حلمت اني فالجنينه و كنا بالليل و كان في جثه مشنوقه بشكل بشع فالشجرة بتاعت الجنينه زي الرسمه الي كنت راسمها قربت منها براحه و انا خايفه لحد ما شوفت ملامحها كانت بنت من سني تقريبا و مبرقه اووي و كأن عنيها خارجه لبرة كانت لابسه فستان اسود و في رمز محفور على رجلها بمد ايدي عشان المسه لاقيتها وقعت عليا انا وقعت عالارض و الجثه فوقي و مش قادرة اتحرك و مرعوبه مش قادرة اخد نفسي و عماله اعيط لحد ما فجأة الجثه اتحركت و لاقيتها بترفع راسها و بتبصلي و بتحط عينها ف عيني و بتقول جملة واحده
رجعيني تاني يا نرجس
لاقيت ماما بتصحيني من النوم و انا عماله اصوت و اعيط و هي عماله تهدي فيا لحد ما هديت و نمت و في اليوم التاني لاقيت ايمان صديقتي جيالي تقعد معايا شوية حكيتلها على الي بيحصلي و مان ردها غريب اوي قالت ان ده حاجه من الاتنين يا اما جن عاشق او حد عاملي عمل انا استغربت و قولتلها انها ازاي بتأمن بالحاجات دي هي فضلت تتكلم و تقول ان الجن و السحر مذكورين فالقرأن و عادي اي حد ممكن يتعرض لكده و قالت ان في راجل بركة ف البلد الناس كلها بتروحلوا عشان تتعالج عنده و ان ليه كارامات اسمه الشيخ ابو ورده ف انا ضحكت و قولت اي الاسم ده لاقيتها بتقولي انه كان عنده بنت اسمها ورده و لاقوها مقتوله و مرميه فالترعه و اسمه الحقيقي الشيخ منصور المهم فضلت تزن عليا عشان نروحلوا ف انا وافقت و روحت انا و هي
كنت متوقعه اشوف دجال زي الي فالافلام و بخور و نار و اوضه كئيبه بس مش القيت كدا لاقيت راجل عادي مربي دقنه و قاعد على مكتب و قداموا ورق عجيب كده روحت قعدت معاه لاقيتو بيقولي ازيك يا نرجس ف انا ضحكت و قولتلوا طبعا خدمك هما الي قالولك اسمي قبل ما ادخل لاقيته بيقولي انا عارفك من اول ما جيتي البلد يا نرجس ده غير ان نبويه مش بتظهر لاي حد انا استغربت من الاسم و قولتله مين دي قالي الي انتحرت و شنقت نفسها فالشجرة بتاعت الجنينه الي ف بيتكوا انا اتخضيت من كلامو و بدأت اخاف لاقيته بيكمل و بيقول ان عوضين الي ابويا اشترى منه البيت اكيد مش قالنا عالحكايه بتاعت البيت و راح الشيخ منصور مكمل ان كان في راجل و بنته جم يعيشوا فالبلد بعد ما مراته ماتتو بنته كانت جميله زيك كدا بالظبط لحد ما الراجل ف مرة طلع الارض و ساب بنته فالبيت ق جه واحد ابن حرام اغتصبها و البنت من خوفها من ابوها شنقت نفسها و من ساعتها روحه بتحوم فالبيت و عايزة حقها بيتقال ان روحها قتلت اخو الي اغتصبها عشان عاند مع اهل البلد و بات فالبيت ليله لوحدوا و انا اقدر اخلصك منها بس تسمعي كلامي ساعتها من غير تفكير قولتلوا قول لاقيتو مديني ازازه ماية و قالي استحمي بيها و بعدها كتب كلام غريب على ورقه و طبقها و رسم عليها و قالي اعلق الورقه دي ف رقبتي و لو نبويه ظهرت تاني اعلقها ف رقبتها خلصنا كلام معاه و كنا قايمين نمشي لاقيت صورة للشب الي جه اتقدملي على مكتبه سألته بأستغراب مين ده لاقيته بيقول ان ده اخوه الصغير اتقتل من خمس سنين بطريقه بشعه و مش رضي يكمل عشان لاقيناه بيعيط اعتذرتله و مشينا و سمعت كلامه و استحميت بالميه دي و علقت الورقه ف رقبتي و نمت حلمت نفس الحلم بتاع المرة الي فاتت بس كان في حاجه متغيرة ان نبويه كانت واقفه ف نص الجنينه و بنت تانيه الي مشنوقه ركزت شويه لاقيت انها ناا ايوة انا الي مشنوقه و لاقيت نبويه بتبصلي و بتعيط و لاقيت الشيخ منصور واقف وراها و بيضحك ف قربت من الجثه الي مشنوقه لاقيت على رجليها نفس العلامه الي كانت على رجل نبويه انا استغربت و روحت مقربه من نبويه و رميت الورقه و علقتها ف رقبتها ساعتها صرخت و مسكتني من رقبتي و لاقتها بتقول
انتي غبيه . انتي الي هتخليه يهرب . انتي الي هتخليه ينفذ العهد .
لاقيت ساعتها نار بتظهر من كل حته و بتبلع المكان انا صحيت من الرعب لاقيت الورقه الي كانت ف رقبتي اختفت قولت خلاص كده انا نهيت الموضوع بقوم من على السرير و بنزل اتجمدت مكاني من الرعب لاني شوفت على رجلي نفس العلامه الي كانت على رجل نبويه ساعتها عرفت حاجه انا دخلت ف قصه اكبر من ان شبح بيطاردني .
