سيدة القصر ( ج/ 1 )

بسم الله نبدأ....
هذه قصه حقيقيه حدثت بالفعل
اسمي محمد عندي 30 سنه انا ساكن في احسن مكان في العالم....... هتعرفوا فين بس في الاخر..
حكايتي بدأت من ساعة ولادتي... أنا وحيد ابويا وامي .. مفيش غيري وهما بالمناسبة اغنية جداً والفلوس معاهم ملهاش عدد.. 
سمعكم بتقولوا يعني انت مولود وفي بوقك معلقه دهب؟؟
لأ بالعكس جدا .... حياتي معاهم كانت صعبه جدا حاسس دايما بالاتهاض ..عارفين لو كانوا مربيين كلب .. كانوا هيعملوه احسن مني
جات مرحلة الثانوية العامة وبقيت في ٣ثانوي وانا دلوقتي مستني النتيجه.. اه أصلا ابويا وامي مش مهتمين يعني مش هتفرق معاهم اني انجح أو لأ
ظهرت النتيجه وجبت درجه متوسطه يعني في السبعينات قولت الحمد لله طبعاً على كل حال وخصوصا انا كنت عامل اللي عليا... فكرت ادخل كلية ايه..
طبعا ابويا مش هيديني فلوس ادخل جامعة خاصة ولا هيسأل فيا دانا بشوفه أصلا مره كل اسبوع..
طيب وامي ... امي دي بقا قافله على نفسها اوضتها ومشغله بخور ودخان وشغاله تقول كلام غريب وبتقعد بالايام مش بشوفها برضو...
المهم .. دخلت كلية آداب ولقيت إن مصاريف الكلية كتير
ومحدش من ابويا وامي هيديني فلوس ولو عطوني قرش هيزلوني  بيه.. فقولت انا اشتغل أثناء الدراسة واجيب مصاريف الكليه
ولحسن حظي كان في دكتور بيحب الطلبه جداً وبيعاملنا زي اخواته. اسمه د/ عبد المهيمن . روحتله مكتبه وقولتله علي ظروفي و فعلاً الراجل متأخرش معايا قالي خد العنوان ده.. وروح لمدام ثرية وانا هتصلك بيها... 
وبالفعل روحت العنوان ... لقيت بسم الله ما شاء الله قصر كبير عايشه فيه .. المهم طلعلي البواب وقولته انا جاي علشان شغل .. بصلي كدا وقالي يابني شغل ايه ...احنا مفيش عندنا مكان للشغل الفتره دي 
قولتله طيب انا عايز اقابل مدام ثريه.. انا جاي من طرف الدكتور عبد المهيمن..
اول ما سمع الاسم ده وشه اتغير ونظرته ليا كانت نظره غريبه.. بس قالي اتفضل
دخلت القصر ده وجواها تحف وانتيكات انا اول مره اشوفها بجد لحد ما سمعت صوت بيقول...
تعالى يا محمد.... 
لفيت وشي لقيت ست كبيره في السن وقاعده على كرسي متحرك .. ماكدبش عليكم أنا خوفت لما شوفتها.
عرفتها بنفسي ... وبعديها قالتلي .. انت عارف جاي تشتغل ايه معانا؟؟ 
قولتلها اي حاجه ... انا بعرف اسوق ومعايا رخصة ممكن اشتغل سواق.
قالتلي بس انا عندي سواقين كتير ومش محتاجه سواق
بس عشان انت جاي من طرف الدكتور عبد المهيمن وده عزيز عليا زمقدرس ارفضله طلب فأنت برضو هتكون معايا هنا.... وبعديها قالت طيب تتوقع اديلك كام مرتب؟؟
قولت ٧٠٠ او ٨٠٠ وكان بالنسبالي مبلغ كبير.
فقالت لأ .. انا هديلك ٢٢٠٠ جنيه غير كل يوم ١٠٠ جنيه مصاريف.بس شغلك هيكون بالليل من الساعة ١٠ لحد الساعه ٥ الصبح .
قولتلها طيب اي هي طبيعة الشغل؟؟
قالت روح دلوقتي وتعالى في الميعاد وهتعرف.
بالفعل روحت ومقولتش اي حاجه لابويا أو امي.. كدا كدا هما مش بيسألوا عليا ولا هيسألوا ولا مهتمين أصلا..
قبل الميعاد بشويه رحت القصر.. وندهت عليا الست  وقالت: مواعيدك مظبوطه يا محمد بدايه مبشره..
تعالى قرب.. 
قربت عليها وقالت لي بص يا محمد 
دول ٣ شنط مترقمين من ١ ل٣ 
الشنطه رقم ١ دي توديها للشيخ عتمان وتجيب منه ٢٠٠ ألف جنيه وعدهم كويس.. والشنطه رقم ٢  توديها للشيخ عرفان وتجيب منه ٢٠٠ ألف جنيه وعدهم كويس برضو ..
سكتت....
قولتلها والشنطه التالته دي ؟؟؟
قالت: في السكه وانت رايح للشيخ عرفان في مقابر.. ترمي الشنطه فيها...    ونفذ الكلام من غير أسئلة.
بالفعل عملت اللي قالت عليه ورجعتلها بالفلوس واعطتني ١٠٠ جنيه وكنت مبسوط جدا...  وعدا يوم ورا التاني والشغل ماشي تمام ... لحد اليوم اللي عمري مش هنساه.. 
رحت القصر زي كل يوم واخدت ال ٣ شنط ونفذت المطلوب بس بعد ما رميت الشنطه ومشيت اكتشفت إن الساعه بتاعتي وقعدت مني...
يا ترى وقعت فين ؟؟ اكيد في المقابر.. بس الجو ليل ومرعب... مفيش فايدة انا ارجع ادور عليها.. ورجعت فعلا
.... بس شوفت حاجه غريبا جدا..  شوفت اللي عمري ما هنساه….. 

شوفت عربية سوده واقفه وفي راجل نزل منها واخذ الشنطه اللي انا رمتها..
أنا شايفه كويس.. 
مش معقول ده ابويا................
انتظروا الجزء الثاني من القصة