القرين الاسود _ قصص رعب horror
سيف صديق الطفولة اللي غاب لمدة تزيد عن 13 سنة من وقت ما سافر .. الأول كان بينا إتصال على فترات نقدر نقول طويلة لإن وقتها لسه مكنش في نت و الكارت الدولي كان الدقيقة فيها ممكن سعرها يعدي الـ 10 جنية .. و بعد سنتين من سفره إنقطعت أخباره خالص .. و صراحة أنا كمان إنشغلت في تحضيري للخطوبة بعدين سحلة الجواز و الخلفة .. و بعد سنين طويلة لقيت شخص باعتلي إضافة على الفيسبوك بإسم سيف الزاهد .. قولت نفسي معقولة ! قبلته على طول و دخلت كلمته و لو يرجع بيا الزمن لا كنت قبلت إضافته ولا كلمته ..
المحادثة دارت بينا كالأتي ..
- أنا : ولا يا سيف يخربيت سنينك إنت لسه عايش !!! عامل إيه و إختفيت فين كل السنين دي
- سيف : إختفيت ؟ إنت إتجننت يابني ؟ انا لسه سايبك من كام ساعة
- ( أنا في لحظة توتر و تفكير لا منطقية بعدها رديت ) هاهاها .. وحشتني خفة دمك اللي محدش بيطيقها والله .. لأ بجد .. إنت اختفيت فين كل الفترة دي ده انا حاولت أوصل لأهلك لكن كل ما اعدي ما الاقيش حد بعدين قولت خلاص يبقى عزلوا من هنا
- سيف : سامر مش ملاحظ إن هزارك سخيف شويه ؟ إنت عارف إن سيرة الموضوع نفسه بتضايقني ف تروح مزودها و تهزر فيه ؟
- انا مش فاهم حاجة هم كويسين ؟
- سامر بابا و ماما إتوفوا من سنتين في الحادثة اللي عملناها هو إنت شارب حاجة ؟
طبعا انا حسيت بالرعب و اللغبطة في نفس الوقت .. لإن واضح من طريقة كلامه إنه بيتكلم بجد .. و واضح في حاجة انا غافل عنها .. لكن إيه هى انا مش قادر أعرف .. سيف اللي أخر مرة شوفته من 13 سنة انا كنت معاه إمبارح إزاي ؟ و أهله إيه اللي اتوفوا في حادثة ؟ و انا هعرف ده منين انا مش فاهم حاجة ؟
بدأت افكر مع نفسي واحدة واحدة .. هل انا اعرف حد تاني بـ إسم سيف و إختلط عليا الأمر ؟ بس لوهلة حسيت بشعور غريب .. حسيت إني مش فاكر حاجة .. مش على سيف بس لأ .. أنا مش فاكر أي حاجة عموما .. قومت أبص على مراتي اكلمها عشان .. مش عارف عشان إيه .. بس انا شايف البيت فاضي .. لأ ده مش بيتي أصلا !! .. أنا في مكان معرفوش بس صورتي موجودة فيه .. صورتي موجودة مع واحدة معرفهاش و شايل بنت صغيرة في إيدي .. شكلنا يقول إننا عيلة بس انا معرفهمش ! .. و في اللحظة دي حاولت أفتكر زوجتي اللي اعرفها و أولادي بس إتفاجئت إني مش فاكر أي حاجة عنهم .. حتى ملامح الوش و الأسماء إختفت من دماغي .. كل اللي في فاكره إني كنت متجوز و مخلف و بس!!، ملقيتش غير إني أرجع أكلم سيف تاني بس هكلمه أقوله إيه ؟ أقوله انا مش فاهم حاجة و إني مش عارف انا مين ؟
و أثناء بحر الأفكار اللي انا سايح فيها دي سمعت باب الشقة بيفتح ف جريت إستخبيت تحت السرير .. سمعت صوت أنثوى بينادي عليا .. ساامر .. ساااامر إنت خرجت ولا هنا ؟
و قدرت ألمح وشها .. دي الست اللي انا لسه شايفها معايا في الصورة .. بس أول ما دخلت الأوضة لقيتها اتفزعت و الشنطة اللي في إيديها وقعت .. لقيتها بتكلم حد .. معرفش كانت بتكلم مين اللي انا فاهمه من الكلام إنها بتتكلم عني .. قالت : ياسر الحقني انا لقيت الدوا بتاع سامر على الكومودينو زي ما هو و شكله كده نسي ياخده و فاق .. و بدور عليه مش لاقياه في الشقة مصيبة ليكون إفتكر حاجة و راح لأهله ولا حد من صحابه اللي كان يعرفهم
انا لوهلة حسيت إنه هفقد الوعي من اللي سمعته .. كمية التخبط و التوتر و الخوف اللي انا فيها مش قادر اوصفها ..
و لما بصيت تجاه الشنطة اللي وقعت من إيدها الدم نشف في عروقي، شوفت دم خارج منها .. و في حاجة شبه الراس .. أيوه انا شايف صح .. دي راااس إنسان !!!
انا مش قادر أستوعب الموقف اللي انا فيه او إيه اللي بيحصل .. لكن الأكيد إني في وضع مريب و في حد مسيطر عليا من سنين بحبوب أو ب حاجة انا معرفهاش .. لكن الأكيد و اللي اعرفه إني لو خرجت دلوقتي من تحت السرير ف حياتي هتبقى في خطر
