هل الجن العاشق يقدر يخطف بني ادم

《هل الجن العاشق يقدر يخطف بني ادم؟؟》

مساء الفل يمرعبين وحشتوني جدا يارب تكونوا بخير..

عمرك في مره حسيت ان في حد جمبك نايم وانت اصلا في غرفتك لوحدك طيب عمرك في مره حسيت بسخونه وفي حد بيتنفس  جمبك؟؟

طيب عمرك سمعت عن حد الجن خطفه ؟؟

في المقال ده هنتكلم عن قصص لبنات الجن العاشق خطفهم وفيهم الي رجع وفيهم الي رجع بردوا بس جثه

بس قبل ما نبدا في روايه القصص خليني في الاول اوضحلك ايه هو الجن العاشق؟؟

بصوا يمرعبين من فتره كده نزلت مقال اتكلمت فيه عن الجن العاشق وعن اعراضه والوقايه منه وتجنب ما يجذبه واتكلمت عن كل كبيره وصغيره تخص الموضوع ده

والمره دي تعالوا اقولكم ايه هو الجن العاشق بأختصار ..

الجن العاشق هو نوع من انواع الجن السفلي ويعد اقذر انواع الجن وهم اقوياء جدا لأبعد الحدود

والي مخليهم بالقوه دي ان ملهمش كبير هما فوق القانون عند العالم السفلي يعني متمردين 
مفيش قانون بيحكمهم لانهم مطرودين من قبائلهم  وكمان هما متجمعين من كل حدب وصوب وكونوا قبيله اسمها (العواشق)

وكل مهمه النوع دا من الجن هو عشق البشر ذكور كانوا ان اناث والاستمتاع بهم وتعذ/يبهم والاستحواذ عليهم

طيب دا تعريف بسيط للعواشق طيب ايه الاعراض الي لما تظهر اعرف اني ممسوس من جن عاشق؟؟؟

الاعراض كتيره بس اهمها/ الارق /الخوف الشديد من اتفهه الاسباب/ انك تحس بنفس حد جمبك خصوصا وانت علي سريرك بتنام / انك تشم ريحه حلوه في غرفتك والريحه ملهاش اي مصدر/ان الشخص يكون انطوائي / الكوابيس / الاحلام الجن*سيه وانك تحلم بأنك بتمارس علاقه ولما بتصحي بتحس انها كانت حقيقيه وساعات بتكون مع حد انت مش شايفه وممكن يكون حيوان وممكن يتمثل الشئ ده في حد من محارمك / سقوط الشعر من علامات المس العاشق/ الهالات السوده تحت العيون / وجود اثار لضرب وعلامات علي الجسم / البعد عن ربنا وعن الصلاه والعباده واعراض تانيه كتيره....

طيب ايه الي بيجذب الجن العاشق للبشر

بص يصديقي معاير الجمال في العالم ده بتختلف عن عالمنا ف البنت كل ما كانت قصيره ونحيفه فهي جميله عند الجن وكمان الشعر الاسود والعيون الواسعه السوداء والاهداب الطويله والشعر يكون خشن مش ناعم دي علامات الجمال عند الجن وبتجذب الجن العاشق

اما عند الرجال بيجذبهم الدمامه والصلع ودي من علامات جمال الرجل عندهم

وخليني اقولك يصديقي ان اكبر سبب لأستدعاء الجن العاشق ويخليك تجذبه ليكك من غير ما تعرف هو وقوفك امام المرايه بشكل مستمر والتغزل في جسدك ده بيخلي الجن العاشق يقرب منك وممكن يأذيك

طيب دي نبذه مختصره عن الجن العاشق

تعالي بقي لقصتنا بس قبل ما احكي كبايه الشاي الرايقه وطفي النور واركز معايا

في سنه 2014 في مصر تحديدا في محافظه سوهاج
تحديدا مركز البلينا

كان في بنت اسمها رباب جلال البنت دي سنها 19 سنه وكانت متعلمه وعلي قدر من الجمال البنت دي كان ابوها مدلعها جدا وكان بيحبها جدا حتي العرسان الي كانوا بيتقدموا ليها كان بيرفضهم بحجه انه مستخسر بنته فيهم وان مفيش حد شايفه يليق ببنته

المهم يعزيزي البنت بدأت تحصل معاها حاجات غريبه وبتظهر عليها علامات اغرب

بدأ اهلها يلاحظوا انها بطلت تتكلم معاهم وبطلت تقعد معاهم وتهزر وتتكلم كعادتها

كمان لاحظوا ان في هالات سوده تحت عنيها

كمان رباب بدأت توري امها ان في علامات ضرب بتبان في جسمها وتقولها انها مش بتنام وكل ما بتنام بتصحي علي كابوس مرعب

اهل رباب بدأؤا يودوها لدكاتره كتير لكن مكنش في تشخيص واضح والبنت بدأت تتعب اكتر

البنت بدأت تحكي لأمها ان في الاول كانت بتحس ان في حد نايم جنبها علي السرير وانها بتحس بأنفاسه وبتشم ريحته

كمان بدأت تحكي لأمها وتقولها انها بتحلم ان في حد معاها في الحلم وبيعتدي عليها ولما بتصحي بتحس ان كل حاجه كانت كأنها حقيقه وان ديما بتحس ان في كلاب بتجري وراها وحيونات وكمان بتحلم انها في اماكن غريبه وسط مخلوقات مرعبه

امها علطول راحت لأبوا البنت وقالتله لازم تشوف شيخ البنت معمولها سحر

وبالفعل الاب شاف شيخ كويس ومعروف انه معالج وليه في الكلام ده

وخليني اقولك يعزيزي ان بمجرد ما الشيخ ده دخل البيت الي فيه رباب وقف علي عتبه الباب وفضل يقسم ويتمتم بكلام محدش فاهمه وبعدين دخل

واول ما شاف البنت وحالتها قالهم ان دا مش سحر ولا حتي مس عادي دا مس عاشق وقالهم انه مش هيقدر يساعدهم وخرج ومشي ورفض حتي ياخد اجر الجلسه الي عملها

بعدها بكام يوم خال البنت عرف ان في
(قسيس نصراني) ليه في الكلام ده ويقدر انه يخرج الجن دا من رباب

وبالفعل اتفقوا معاه والقسيس جي البيت واول ما دخل فضل يتمتم قبل ما يدخل البيت ذي ما عمل الشيخ بالظبط

وبعدين جابوا البنت وفضل يقرأ عليها وبعدين قالهم ان دا مس عاشق والجن ده مش اي جن وخلاص لا دا امير من الجن وقالهم انا مش هقدر اساعدكم ورفض يكمل ومشي وقالهم انا لو كملت هتأذي

فضل اهل البنت يدورا علي حد يساعدهم لحد ما عرفوا شيخ وراحو ليه وحكو ليه الحكايه والشيخ دا وافق يساعدهم وراح للبيت وبدأ الجلسه مع البنت وبدأ في القرأه

ابو البنت بيقول ان بنته كانت بتتلوي وبتترعش بشكل مرعب وكانت بتنزل حاجات من فمها شكلها غريب

وفجأه الشيخ صرخ في الي موجودين وطلب منهم يكتفوا البنت

وبالغعل كتفوها وبدأ الشيخ يقرأ علي البنت بيقول ابوا البنت بدأت رباب تتكلم بس دا مكنش صوتها دا كان صوت مرعب وخشن وكان بيضحك

الشيخ سأله : انت مين ؟؟

الصوت : انا نازين

الشيخ انت عايز ايه من رباب ؟؟

الصوت سكت ومفيش رد

كرر الشيخ السؤال بس مفيش رد

لحد ما الصوت رجع وقاله بحذرك من انك تكمل امشي زي ما الي قبلك مشي والا هأذيك

لكن الشيخ كمل ورفض ينهي الجلسه وفضل يقرأ لحد ما البنت هديت وبطلت صريخ

في الوقت دا افتكر الشيخ والي موجودين ان الجن خرج من البنت والشيخ مشي وكل حاجه تمام

لكن الصبح اهل المنطقه يصحوا علي صريخ جاي من بيت الشيخ دا وعرفوا بعد كده ان الشيخ دا ما/ت!!

والمرعب يعزيزي ان بيت رباب كان بيخرج منه صريخ والي حصل ان رباب اختفت من البيت وملهاش اي اثر

ابو البنت قال انه وهو نايم في الليله دي جاته رباب وقالتله : الحقني يا بابا دا بيشدني وعايز ياخدني اليمن؟؟؟

لكن الاب افتكر ان دا مجرد حلم وكمل نوم ولما صحي صحي علي صريخ مراته وهي بتقول ان البنت اختفت

فضلوا يلفوا علي الشيوخ وكل الشيوخ قالولهم ان الجن خطفها ذي عاده الجن العاشق لما بيحس بخطر بيخطف ضحيته وان الشيخ الي ما/ت احتمال كبير يكون الجن هو الي اذاه

خليني اقولك يعزيزي ان البنت فضلت مختفيه لسنه واربع شهور وفي 18/اغسطس / 2015 يلقوا جثه بنت مرميه قدام بيت اهل رباب والبنت دي كانت هي رباب بس كانت م/يته وعلي وشها اشد انواع الرعب والخوف وعلي جسمها اقسي انواع الت/عذيب

وانتهت قصه رباب وتعالي احكيلك قصه تانيه بس المره دي مش في مصر لكن في السعوديه

في يوم 23/يونيو/2006 منطقه الباحه في السعوديه صحيت علي خبر غريب وهو اختفاء 
(زهور الحارثي) من بيت اهلها

زهور هي طالبه ثانويه وعندها 17 سنه وكان معروف عنها انها انطوائيه ومش بتحتك بأي حد ومع نفسها تماما
حتي في بيتها فهي لا بتخرج من غرفتها ولا ليها علاقه بحد

بيقول عبد الرحمن اخو زهور : انها قبل ما تختفي كانت بتشتكي من حاجات غريبه ذي انها بتشوف احلام غريبه وانها بتحس ان في حد معاها في غرفتها

كمان ام زهور بتقول انها بتحكيلها ان في حد بيكون معاها في حلمها وانه بيعتدي عليها وهي مش شيفاه

وكانت بتشتكي ان ديما بتحس ان في حد نايم جنبها علي السرير بس هي مش شيفاه وكمان بتحس انه بيلمسها

ومن كتر ما هي بتشتكي من الاعراض دي اهلها قرروا يودوها لشيخ يشوف مالها وفيها ايه

لكن في اليوم الي قرروا يودوها لشيخ يصحوا الصبح ميلقوش البنت في البيت دا مكنش ليها اي اثر من الاساس

كل عائله البنت وشباب القريه اجتمعوا وبدأؤا يدوروا عليها في كل شبر في المنطقه

وبعد 3 ايام من البحث اتفاجئوا ان البنت موجوده جنب باب بيتها ومحدش يعرف هي جات اذاي ومش دي المشكله

المشكله يمرعب انها مكنتش فاكره اي حاجه حصلت معاها خالص ...

والبنت بدأت انها يغمي عليها كتير وكل مره بيغمي عليها فيها كانت بتلاقي نفسها في مكان شكل مره في جبل مره تلقي نفسها في كهف وبعدين تصحي وكل شئ ينتهي

حرفيا محدش كان فاهم ايه الي بيحصل مع البنت دي لحد ما في بعض الشيوخ قال لأبوا البنت ان بنته عندها مس عاشق وطلب منه يسيب البيت وينقل لبيت تاني يمكن الي بيحصل دا يخلص

وحذروه انه ميعملش اي جلسه طرد للبنت لأن واضح ان الجن دا قوي ولو حاولوا يخرجوه ممكن البنت تروح فيها..

لكن الاب مكنش معاه فلوس تقدر تخليه ينقل من بيت لتاني وفضل في البيت والحال كما هو

وميعديش غير 3 شهور ويصحوا الصبح ميلقوش البنت في البيت

المشكله يعزيزي ان البنت مرجعتش زي كل مره بعد كام يوم دي فضلت سنتين كاملين مختفيه ومحدش.يعرف اي حاجه عنها وطول السنتين اهلها بيدوروا عليها لكن بدون اي فايده

وبعد سنتين من اختفائها  يتفاجأه اهلها ان زهور نايمه علي سريرها في غرفتها طيب هي كانت فين سنتين واذاي جات كده ودخلت غرفتها من غير ما حد يشوفهاا؟؟

يعزيزي ايوه البنت رجعت للبيت لكن رجعت فاقده حاجات كتير رجعت فاقده عقلها وفاقد النطق حرفيا اتجننت ومكنتش بتتكلم ولا كلمه..

تفتكرا ان بس هي دي القصص الي حصلت لا يعزيزي

خليني اقولك ان سنه 2015 السعوديه اتهزت بخبر فكر الناس بحكايه زهور والخبر هو اختفاء البنت (فاطمه)
والامر الي قلب الرائ العام وقتها واتعرف بأسم
(اختفاء فتاه نجران)

الي حصل مع فاطمه يعتبر تقريبا هو هو الي حصل مع زهور

خليني اقولك يعزيزي ان فاطمه كانت بتعاني من كل اعراض الجن العاشق والبنت كانت بتتلقي اقسي انواع العذا/ب علي ايد الجن ده وعلي ايد اهلها

علي ايد الجن لأنه بيأذيها جسديا ونفسيا

وعلي ايد اهلها علشان مكنوش مصدقينها وكانوا حبسينها في غرفتها وكانوا بيسبوها تعاني بمفردها

وفي يوم اهل البنت صحيوا الصبح ملقوش فاطمه في البيت

واول ما خبر اختفائها انتشر الناس افتكرت قصه زهور

وهنا اهل البنت وجرانهم اجتمعوا وقرروا يدورا علي البنت وقسموا نفسهم لمجموعات وكل مجموعه تدور في مكان

يعزيزي الغريب ان وهما بيدوروا عليها في اكتر من مجموعه قالوا انهم شافوا البنت في اماكن مختلفه وكانوا يمشوا وراها واول ما يقربوا منها تختفي

وفي مجموعه منهم شافوا البنت وهي بتجري وبتدخل لبيت مهجور واول ما جريوا وراها علشان يجبوها 
الباب اتقفل لوحده وحرفيا مكنوش عارفين حتي يفتحوه وفضلوا يحاولوا وبصعوبه فتحوا الباب ولما دخلوا البيت ملقوش اي اثر للبنت

وهنا يعزيزي الناس كانوا دوروا في كل مكان ومكنش فاضل غير مكان واحد بس مدوروش فيه وهو

جبل نجران : وبالفعل مجموعه كبيره منهم طلعت للجبل لكن تعرضوا لهجوم شرس من الثعابين وكمان حصلت عاصفه شديده جدا كانت بتمنع المجموعه من التقدم اكثر داخل الجبل

وبعد 3 من البحث جوه الجبل قدروا يعثروا علي البنت فاطمه

لقوها مغمي عليها جوه كهف من كهوف الجبل

وفاطمه رجعت البيت بس كالعاده كانت ناسيه كل حاجه

لا مش ناسيه الي حصل معاها اثناء اختفائها بس لا دي كانت ناسيه كل حاجه حرفيا تقدر تقول فاقده للذاكره

ومحدش عارف ايه الي خطف البنت وهي شافت ايه خلي حالتها بقت كده؟؟

دي يمرعبين كانت بعض قصص الاختفاء الي بيقال انها بسبب الجن العاشق

القصص كتيره جدا ولو حكيت اكتر من كده لا مقال ولا اتنين هيكفو

لكن يبقي السؤال يمرعبين تفتكروا فعلا الجن قادر علي خطف الانسان؟؟؟

طيب لما بيخطفه بيوديه فين وايه الي البني ادم بيشوفه يخليه يرجع بالحاله دي؟؟؟