قصة_ياسمين قصة واقعية نحكيلكم قصتي باه تديو منها العبر

#قصة_ياسمين
الجزء الاول.  
كل منا عندو قصة ممكن سعيدة او تعيسة ...ممكن تكون فيها مزيج بين السعادة والتعاسة ...بالصح كل حكاياتنا فيها عبر وانا ليوم حبيت نحكيلكم قصتي باه تديو منها العبر . ....
انا الطفلة الصغيرة في الدار عندي تلاثة خاوتي (محمد ،ايوب وسيد احمد )وزوج بنات (نسرين وفلة )وانا ياسمين ...كان بابا يتبع النسا وفي دارنا يدير المشاكل ...الشي لي خلا ماما تبعد عليه و كان كاين نفور بيناتهم ،امي كانت ترقد معانا حنا لبنات ...ماما ما طلبتش الطلاق ماعندهاش وين تروح  والديها قالولها نتي ارواحي ولادو مانقبلوهمش ،وبابا ماطلقهاش خايف مالنفقة ،مالا كانو يكملو في حياتهم بصح مايفوتوش اي فرصة تجيهم  باه يبينو لبعضاهم الكره لي في قلبكم ...انا في وسط كل هاذا كنت نحلم نعيش قصة حب كبيرة وتكمل بالزواج نعوض الحرمان العاطفي لي عشتو في دارنا ...كان عندي شروط في زوج المستقبل انو يكون شباب وعندو شوية دراهم باش نقدرو نعيشو مرتاحين ...ملي حليت عينيا على الدنيا وانا في المشاكل مكاش لي يسقسي عليا بما انو والديا كانو لاتيين ببعضاهم ...ماما ديما تندب على زهرها ،وبابا عايش في عالمو الخاص مع النسا كل يوم وحدة ...انا كنت شابة ومرغوب فيا في الحق حتى خواتاتي شابات   نسرين اختي وصلت للباك وزوجها بابا باه يتهنى مالمسؤولية ...فلة كانت شاطرة وفهمت الدنيا تعرفت على واحد وحبو بعض طلبها للزواج وتزوجو ،بقيت انا وخاوتي لولاد ،تعرفو واش معنتها طفلة بين ولاد يعني الانضار كامل ليها ...ماعنديش كامل كيفاش نعشق حتى وانا كنت مطلوبة بزاف ..كنت نحب نروح لدار جدي شوية نصيب راحتي عندهم يسكنو في سطيف حتى حنا نسكنو في نفس الولاية بصح عنهم كنت نريح ماعندهمش مشاكل نتلاقى ببنت خالتي لي كنت نحكيلها كلش عليا  ...كي ربحت شهادة المتوسط ودخلت للثانوية تعرفو عالم جديد حسيت روحي كبرت وكانو يجوني الخطابة ...بابا كان يضغط عليا باه نتزوج غير انا كنت نوخر فيها وقلت مادام نهايتها زواج علاش ماندبرش واحد ونتزوجو عن حب خير وبديت في رحلة البحث على الحبيب هههه...كنت نخاف مع اللول وليت كي نشوف واحد شباب نبادلو غير نضرات الاعجاب بصح هادا ماكفانيش ولات عندي رغبة اني نحكي مع الانسان لي يعجبني اول خطرة هدرت مع واحد يقرى معايا في الليسي عندو باك بقيت معاه سمانة نحكيو مع بعض وقت الساحة ...سمع بيا خويا سيداحمد خرجت مالليسي صبتو يستنى فيا عند الباب صدقوني داني يكركر فيا حتى وصلني للدار  المهم شبعت مخبط من عندهم كامل الا خويا الكبير محمد لي كان يهدر معايا بالشوي بصح لخرين كامل جاو ضدي وديسيداو نبطل قرايا ...وصح بطلت بقيت في الدار ندير الميناج ونعاون ماما الخرجة محرمة عليا غير صحاباتي يجيو يطلو عليا حبيت ندير تكوين ماخلاونيش كانو محرمين عليا كلش وحد النهار ماما وخالاتي تفاهمو يتلاقاو عند ماني وانا حبيت نروح معاها رحت مع كان قلبي معمر لي ضحكلي في الطريق رجعتلو الضحكة حتى ماما ولات تسب فيا ههه...بصح انا كنت نخرج في المكبوتات ...دار جدي مقابلينهم باطيمات كانو فارغين بصح في هديك المرة كانو تعمرو بالسكان ...واش نقولك فيهم غير الزل لخوه ...انا قعدت متسمرة غير في البالكو نطل ،كان كاين واحد كل مايجوز علينا يبقى يشوف لينا ،كنت انا و بنت خالي وبنت خالتي ماعرفناش شكون عجباتو فينا ،بصح انا كنت مصرة اني نفوز بيه ...قعدنا حنا 3ايام ثم وماما قاتلي نوليو للدار ،وخلاتي كانو مازالو قاعدين يعني نخلي البوڨوص للبنات، ماحبيتش نروح مع ماما ولاو خالاتي يقولولها خليها ياك راهي معانا ماعندها ماراح تدير ...بالسيف باه خلاتني وراحت ...ماتعرفوش شحال فرحت بصح فرحتي ماكملتش مع العشية جا خويا سيد احمد التابعة تاعي يديني ،ماعنديش كيفاش نرفض رحت معاه ...بعدها  قاتليوبنت خالتي بلي سقساهم عليا،وياااااااااه هاديك الفرحة حسيت روحي طايرة ،خلاهم في زوج وعجبتو انا ...وليت نحلل في ماما باه نروحو عند جدي ماحبتش وخافت من بابا يديرلها المشاكل مالا خرجتهالها طاي طاي قلتلها راهو كاين وحد الشباب عاجبني لازم نروح ونهدر معاه باه نتزوج بيه، ونهنيها خاطرش الزواج التقليدي انا مانيش مقتنعا بيه ...انا ماكملتش هدرتي وتنوض تندب قاتلي انا منين نصيبها منك ولا من باباك،خرجتي لباباك تاع رجال.. مازلتي تحوسي على التبهديل ،هاد الخطرة والله غيرا ذبحوك خاوتك و والله مانحوس عليك قلتلها خليني ماما عاونيني والله واحد مانخليه يشوفني سكتت وخلاتني بصح ماخلاتنيش نروح لدار جدي ...حتى وحد النهار مرضت ماني وكان لازم نروحو نطلو عليها هههه مصائب قوم عند قوم فوائدووووو...رحنا كامل عندها وطبعا انا قبالا رحت للبالكو نهار كامل مابانش مع العشية جا خويا محمد يدينا للدار قتلو خليني نخدم على ماني راهي مريضة ،ماما ماحبتش بصح خويا قالي اقعدي وعلى ضمانتي يامات نجي نديك ...صح كنت متهلية في ماني ونقوملها بالضياف كي يجو يطلو عليها بصح عيني ما نحيتهاش وانا انطل عليه حتى شفتو جاي حوايجو معمرين نجارة عرفتو بلي كان في الخدمة ...هو ماشافش فيا وخفت الفرصة تضيعلي ،رميت جبة تاع ماني وهبطت نجري باش نجيبها ،هو نتبهلي قعد يستنى كي وصلت للتحت صبتو رافد الجبة ويتبسم ،مدهالي وقالي لباس قتلو الحمد الله خطفتهالو من يدو ورحت نجري ...حسيتو راجل تاع مسؤولية ويااااااه  على هاديك الريحة تاع النجارة لي فيه  ،ومن ثم بدات القصة مع عماد   

قتلكم شفتو بحوايج الخدمة حسيتو انسان مسؤول بلخف وليت نتخيل فيه نهار يجي مالخدمة ويصيبني موجدتلو الدوش وقهوة العشية ..وهو يدخل علينا بضحكة وفي يدو ساشيات و ولادنا يجرو عندو ...هادي الحياة انا ماكتبتليش في دارنا الحاجة لي خلاتني نلسق فيه بلا ماهو يوعدني بحتى حاجا ...كنت ديما مسمرة في البالكون ،ولينا نحكيو مع بعضانا بالشرات بالصح حتى واحد مافاقنا ادمنت عليه بلا مانسمع صوتو وليت نقول لماني ألعبيها مازلتي مريضة وماتخلينيش نروح للدار ،ههه مسكينة هي والفتني كنت مونستها بصح قد مانقعد باينة نروح لدارنا بعتلو النومرو تاع ماني وخليت البورطابل عندي قعد يومين باه عيطلي كنا نهار الخميس اول مرة نهدر معاه حكيتلو كلش عليا وعلى دارنا هو ثان قالي بابا معاود الزواج وسامح فينا والدولة مدتنا هادي السكنة وانا لي مسؤول على دارنا ...قلت هادا هو شابع ميزرية كيما انا باينة راح يحس بيا مع هو انسان مسؤول وبنيت احلام كبيرة عليه كنت كي مانهدرش معاه نبيبيلو باه يفهم بلي راهو في البال بالشوي هو ثان ولا يبينلي اهتمامو وراكم عارفين العلاقة في البداية تاعها شحال تكون حلوة ...هو الصبح كان يروح يخدم بكري وانا نصبح نايضة باه نشوفو  نهارو كامل يجوزو ثم ماكانش عندو وقت يرجع فيه للدار يعني كنت نهار كامل مسمرة ثم باه نشوفو كي يجي كنت نموت كي نشوفو بحوايج الخدمة ..جداتي نتبهتلي قاتلي مضروكش رجليك مالوقفة ،قتلها نبدل جو برك هي ولات مليحة تقدر توقف كي نكون نطل تجي توقف معايا حتى البورطابل كل ما تفليكسي نكملهملها ونقولها تاع جازي سراقين  هههه ...قاتلي وهاداك الطفل واش قصتو كل يوم يشوف لينا ،قتلها ياماني هاداك زوج المستقبل (ماني انسانة متفهمة بصح ماتحبش الغالط وتخاف من بابا وخاوتي بزاف ) قاتلي يابنتي روحي لداركم انا ماخصنيش مشاكل عيطت لدارنا قاتلهم راني مليحة تقدرو تديو ياسمين... حسيتها تضرب فيا بالموس للقلب وانا نقولها يا ماني والله مانسمحلك تحاوزي فيا من بيتك وهي تقولي والله غير كبرت على المشاكل لي فوتو مع خالاتك وخالك بزاف عليا...كملت هاديك الليلة هكاك هدرت معاه في الليل قتلو غدوى نروح لدارنا قالي مانزيدش نشوفك ولا نهدر معاك قتلو في دارنا مانقدرش نضمن كي نصيب كيفاه انا نعيطلك قالي اوكي ديريني في بالك...من غد هاداك جاو يدوني رحت لدارنا قعدت شحال ماهدرتش معاه  شحال توحشتو ،ماما ماعندهاش بورطابل وفي دارنا كثرو المشاكل بابا قرر يعاود الزواج ،ماما ماقبلتش تخليه يجيبها للدار هو يضربها يقولها نجيب لالاك تعفسلك على راسك هي تقولو حاب تتزوج ماعلاباليش بيك بصح لداري ماتدخلهاليش ...المهم المشاكل كبرو خاوتي يدابزو بابا كي يشوفوه يضرب في ماما انا كنت جايبتها بكا  ماما كانت تتقلق غير تشوفو دخل تروح ليه وتبدى تهدر وتعاير فيه وطبعا يبداو المشاكل لي دايما تخلاص بالضرب يدخلو خاوتي وتتخلط الحالة ...بعدها بدا بابا يمارس علينا سياسة الضغط ولا مايقضيش ،نوضو الصبح ما نصيبو والو في الدار خاوتي ماكانوش يخدمو للعلم بابا لاباس بيه قادر يصرف علينا ويعيشنا مستورين بصح الحرام عماه  ولاو خاوتي يخدمو لي جات غير باه يوكلونا انا وماما حتى مدخولهم قليل زاد بابا باه يثقلها عليهم ولا مايخلصش التريسيتي والڨاز ،خاوتي والو متكفلين بكلش وكي يهدرو معاه يقولهم نخرجكم مالدار ...خويا ايوب دخل للعسكر وتقريبا هو ولا اكثر واحد يصرف علينا وكان حنين بزاف حاب يعوضنا الحرمان لي عشناه ،كان يكسينا حتى البورطابل شرانا  واحد طبعا انا اكثر المستفيدين وليت نهدر بزاف مع عماد و تعلقت بيه بزاف ماما كانت علابالها وتضل تزعف عليا بصح انا كنت نريح غير معاه خصوصي كي بابا راح وطول ماسمعنا عليه حتى خبر لمدة تفوت الخمس شهور وانا مانكذبش عليكم كنت نحب بابا ...خرجت كامل هداك الزعاف مع عماد لي عمرو ماقالي اخرحي معايا ولاخصر معايا في الهدرة ...وحد النهار جاو لينا خواتاتي وصابوني لاصقة في البورطابل خصوصي في الليل عماد كانت عندو الميلينيوم و نهدر معاه مالتسعة للفوق قالولي هادا لي راكي معاه واش ناوي ولا راكي تهربي في الخطابة باطل،خدموهالي...
سقسيتو قتلو واش نيتك معايا قالي انا مازالني صغير ومانيش ناوي حتا حاجا معاك و ما وعدتك بوالو صح عجبتيني في العقلية وفي الزين بصح طريقي مازالا طويلة وانا بكثرة نحرڨ مانيش قاعد هنا....ويااااااه شحال جرحني هو يهدر وانا نبكي 😭😭 حسيتو تأثر بصح قالي مانقدرش نخدعك مالا قتلو انا ثان بنيت عليك آمال كبيرة وحبيتك من قلبي ومانقدرش نكمل معاك خلي نحبسو ضرك اتخيلو واش قالي....يتبع