هل حقا يوجد حياة علي الكواكب الأخري ؟! ماذا عن الفضائيين؟؟
36,400,000 بيقولوا إن ده عدد الحضارات العاقلة اللي عايشة في الكون بتاعنا ، الكلام ده وفقا لمعادلة درايك الشهيرة .
خلال أخر 78 سنة كنا بنبث كل حاجة عننا للفضاء الخارجي من برامج الراديو بتاعتنا ، برامج التليفيزيون ، تاريخنا و أعظم اختراعتنا .كنا بنبث كل حاجة للفضاء الخارجي بإنتظام و كأن الكوكب بتاعنا واقف في الفضاء بيصرخ بكل قوته و بيقول كل المعلومات عنه و مستني اي حد بس يسمعه و مستني يلاقي رد يدل عالحياة في مكان تاني خارج الكوكب .
التساؤل الأهم اللي كان مسيطر علينا هو هل إحنا في الكون لوحدنا ؟ …… معادلة درايك بتكون انهم اكتر من 36 مليون حضارة !
و علي الرغم من اننا بقالنا قرن تقريبا بنبث كل حاجة عننا إلا اننا مسمعناش رد من أي حد ده معناه اننا في الكون لوحدنا .
الكلام ده كان حقيقي لحد من خمس دقايق بس …
جالي إشارة من شوية !……. ايوة إشارة متناسقة و منسقة بشكل ميخليش فيه أي شك .
في البداية كنت شاكك إنه نوع من الإنتقال الثنائي .. قست 1679 نبضة تقريبا في دقيقة الواحدة بس اللي كان ناقل الحركة شغال فيها ، بعد كدة إستمر الصمت تاني .
الأرقام مكانش ليها أي معني في البداية ، مجرد خليط عشوائي من الدوشة و الضوضاء . بس النبضات كانت موحدة تماما !
البث ده لازم يكون من مصدر صناعي ، بدأت ادور عالبث مرة تانية .. و فورا لاحظت حاجة خلت قلبي يوقف لثواني من الرعب !!
1679 ده نفس طول رسالة أريسبو اللي وصلت لينا من 40 سنة عبر الفضاء الخارجي بردو ؟!!
بكل حماس بدأت احط الأرقام اللي في المستطيل الشهير المكون من 73 خانة بالطول و 73 خانة بالعرض ، و قبل ما أوصل لنص المستطيل تأكدت من حاجة مهمة : الأرقام اللي وصلت هي الأرقام الزوجية ما بين 0 و 10 و هي نفسها الأرقام الذرية للعناصر المسؤولة عن الحياة البشرية .
هل ده معناه ان فيه حد كان بيسمعنا طول الوقت ده ؟!
حد كان بيسمعنا طول الوقت ده و عاوزنا نعرف إنه كان بيسمعنا و موجود !
بعدها جالي فكرة .. الرسالة الأصلية اللي وصلت كوكب الأرض من 40 سنة … ده معناه إن فيه حياة بتحاول تتواصل معانا من علي بعد 20 سنة ضوئية تقريبا ……….. وجود حضارة علي بعد زي ده طفرة علمية هتهز كيان الكوكب كله .
ده هيعمل ثورة في كل حاجة علي الأرض خصوصا في علم الأحياء الفلكية .
الرسالة بتتكرر تاني ..!!
المرة دي بتوصلني ببطء…ببطء متعمد …. المرة دي إستمرت حوالي 5 دقايق ….. بالطبع خليت جهاز الكمبيوتر يسجلها المرة دي
.. لما خلصت الرسالة و الصمت حل مرة تانية.. بدأت أكتب الرسالة تاني براحة .
0•0•1•1•0•1•0
فورا عرفت إن مش دي نفس الرسالة اللي وصلتني قبل كدة . عقلي كان هينفجر .. عارفين ده معناه إيه ؟!!
فيه حضارتين مختلفتين بيحاولو يتواصلوا معانا في وقت قليل جدا … البث المرة دي كان 248 نبضة بس .. يعني 248 رقم !
المرة دي كنت متأكد انها رسالة لازم اترجمها و اعرف معناها …. الموضوع كان غريب .. ايه هي الرسالة القصيرة بالشكل ده و جاية لينا من حضارة تانية بتتواصل معانا ؟
علي الكمبيوتر عادًة الرسائل القصيرة بالشكل ده بتكون نص .. نص كتابي !
معقول!…
بيبعتو لينا رسالة بلغة من لغاتنا !
موضوع إنهم يعرفو اللغة دي مكانش هيبقا مفاجئ لو فعلا حد بيسمع البث بتاعنا … إحنا بنبث أحد لغات كوكبنا بقالنا أكتر من 70 سنة …. طب لو حد بيسمعنا طول المدة دي ليه محاولش يتواصل معانا غير دلوقت ؟
بدأت احاول اترجم الرسالة بلغة الترميز الأولي اللي بتعتمد علي ال 0 و ال 1 …. خصلت ترجمة النبضات و تحويلها لحروف بعد وقت قصير …. الرسالة اللي ظهرت قدامي كانت أكتر حاجة مخيفة شوفتها في حياتي …. الرسالة كانت بتقول
《اسكتوا ….. و إلا هيحددوا مكانكوا》
ملحوظة : الموضوع ده كتبه واحد بيقول إنه شغال في مشروع مهم في شركة (ناسا) للبحث و التواصل مع الحضارات التانية اللي ممكن تكون موجودة في المجرة
