"ليلة سقوط روما" _ الجزء ٤
*«لـيـلـة سـقـوطـ رومـا».*
*الـجـزء الـرابـع.*
تاني يوم
وقف السيارة قدام بوابة الميتم .. اخد نظرة سريعة من الشباك على المبنى .. افكار وذكريات كتيرة اجتاحت راسو .. اخد نفس عميق وزفرو بقوة
نزل من السيارة ودخل للميتم ..
صادف وحدة من المربيات ..: المديرة نعمة موجودة
المربية: اهلا استاذ .. موجودة ..
كريم: بدي قابلها ضروري
المربية: حالياً هي بجولة تفقدية للصفوف
كريم: رح انطرها بالمكتب
المربية: تفضل معي
دخلتو عالمكتب وطلعت بسرعة
توجهت لعند المديرة ..: انسة نعمة .. انسة نعمة
نعمة: شبك شو في؟
المربية: في واحد ناطرك بالمكتب .. شكلو واحد مهم كتير
نعمة: مين .. شو اسمو
المربية: اسمو ما بعرف .. من هيبتو نسيت اسألو عن اسمو ..
توجهت المديرة ومعها المربية للمكتب .. دخلت وتمسمرت محلها بعد ما شافت كريم قاعد ورا مكتبها
إصفر وجهها ..؛ اتركينا لحالنا ..
كريم ببرود ..: ما بدك تشربيني شي؟
اطلعت على المربية ..: جبيلنا تنين قهوة بسرعة
طلعت المربية بسرعة ورجعت بعد دقايق .. قدمت القهوة وطلعت
كريم: رح تبقي واقفة هيك مكانك .. خلص ما في داعي للخوف ..
نعمة: شو اللي ذكرك فينا
كريم: في غيرها !!
نعمة: قلتلك ملاك انتحرت بعد ما طلعت انت من الميتم باربع سنين .. لقيناها شانقة حالها بالغرفة
قام من ورا المكتب وتوجه لعندها بخطوات بطيئة .. دفشها على الباب وحاوطها بإيده .. وبحركة سريعة قفل الباب بالمفتاح
كريم ببرود ..: وانت متخيلة اني رح صدق متل زمان ؟
رجفو رجليها ودقات قلبها تسارعت من الخوف ومن نظرات عيونو ..: سلمتك كل اوراقها
كريم: واذا بقلك اني لقيتها ! وطلعت عايشة
توسعت عيونها بعد ما سمعت شو حكى…: لقيتها .. مو معقول ..
مسكها من ايدها وجرها لعند الكنبة .. دفشها عالكنبة .. جاب الكرسي وقعد مقابلها ..: بدي اسمع شو اللي صار من لحظة ما طلعت من هون للحظة تزوير اورق موتها ..
تلبكت نعمة وما عرفت شو تحكي
كريم بصراخ ..: إحكـــــي
نعمة بخوف..: هربت ..
صدح صوت ضحكة كريم بكل المكتب ..: ضحكتيني وانا ما اللي نفس اضحك ..
اطلعت عليه لإستغراب ..: شو المضحك؟
كريم : اخترتي اسهل جواب.. هربت .. وانا رح صدق صح !!
نعمة: هاي الحقيقة
رجع ظهرو بالكرسي لورا ..: انت بتعرفي انا شو بشتغل صح..
هزت راسها بخوف
كريم : لا شكلك ما بتعرفي .. بس رح عرفك عن حالي .. الظاهر نسيتي .. انا المقدم كريم الراوي .. بشتغل بفرع مكافحة المخدرات .. يعني بجرة قلم مني بسحبك لورا الشمس .. بلفقلك الف تهمة وكل تهمة بجيبها على مقاسك بالزبط .. مع اني ما بحب هالاساليب بس انت رح تخليني استخدمهن .. لهيك احكي كل شي وبلاها هالفوتة ..
هزت راسها بخوف ..: رح احكي .. رح احكي ..
كريم: ايــــه هـــا هدا الحكي اللي بنسمع
فـــــلاش بـــــــاك
بيوم كانت ملاك قاعدة بغرفة الاكل شافت واحد من الاولاد وبحاول يوخد من ولد صغير وجبتو غصب عنو
كزت على اسنانها وشدت على قبضة ايدها
بعد ما خلصو اكل طلعوا كل الاولاد عالباحة
بهدوء قربت من الولد وهمست بإدنو ..: جاسم عاوزتك .. لقيت مكانن نهرب منو
ابتسم جاسم ..: روحي وانا وراكي
ملاك: لا تخلي حدا يشتلق عليك .. تعال بهدوء وراي بس تشوفني رحت لعند البوابة الرئيسية
جاسم: ماشي
بعدت عنو وراحت ووقفت بعيد.. عين تراقف بالمساعدات والعين التانية تراقب شباك مكتب المديرة
بس شافت المساعدات فاتو لجوا تسحبت شوي شوي لعند البوابة ولحقها جاسم
تخبت ورا الحيط وبإيدها عصا خشب كبيرة
جاسم: وينك ملاااك
طلعت فجأة من ورا الحيط ضربتو على ركبتو ضربة قوية خلتو يقع عالارض ونزلت في ضرب على وين بوجعك
بالرغم من حجم جاسم الكبير وحجمها الصغير مقارنة بحجمو الا انو ما قدر يتحرك من الضرب
قربت عليه وهمست بإدنو ..: اذا كمان مرة بتحاول تمد ايدك على شي مو الك يا ويلك مني يا جاسم
تفت عليه ومشت خطوتين ورجعتو ..: واذا عرفت انك خبرت المديرة عن اللي عم فيك هيك كمان ما تلوم إلا حالك .. حيوان
تسحبت شوي شوي ورجعت للباحة وكأنو ما في شي
خلصت وقت الاستراحة ورجعو الاولاد يوخدو دروس
___
بغرفة التدريس لاحظت وحدة من المساعدات انو جاسم مو موجود بين الاولاد .. سألت عنو وما كان في جواب
المساعدة : ملاك روحي نادي عالمديرة
راحت ملاك لعند المديرة .. دقت عالباب بعد ما لبست وجه الملاك .. كان في ضيووف عند المديرة
المديرة : خير ملاك شو في؟
ملاك: انسة نعمة طلبت مني الانسة سعاد خبرك انك تيجي عالصف ضروري
نعمة: اكيد عملتي شي ست ملاك
ملاك ببراءة ..: لا انسة ابداً
نعمة : لكن شو في
اطلعت ملاك بالرجال يلي قاعد عالكرسي مقابل المديرة ..: احكي انسة
نعمة: احكي خلصيني
ملاك: جاسم مختفي ومحدا بعرف وين هو
نعمة : انت شو بتخبصي
ملاك: هدا يلي صار
قامت المديرة بسرعة ..: اسفة آسر بيك ثواني ورح كون مع حضرتك
طلعت المديرة من المكتب وكانت ملاك بدها تلحقها بس شدها آسر لعندو
رفعت ملاك ايدها احتى تضربو بس مسكها من ايدها التانية
ملاك: شو بدك ؟
آسر: حلو وجه الملاك يلي لابستي .. بقتل القتيل وبمشي بجنازتو
توترت ملاك شوي بس حافظت على ملامحها ..: شو قصدك !؟
آسر: شفتك وانت تضربي فيه للولد بالعصا ورا الباحة
بلش التوتر يزيد عند ملاك
آسر : عجبتيني على فكرة .. لااا عجبتيني كتير
ملاك: شو بدك مني انت؟
آسر: ما بدي شي .. يلا روحي
ترك آسر ايدها وبعيونو نظرة خباثة
طلعت ملاك ركض من الغرفة وقلبها مرعوب .. اول مرة بتخاف هيك حست في شي غلط
راحت مع الاولاد تفتش على جاسم ولا كأنو عاملة شي .. وكل هدا وعيون آسر عليها
بعد ما لاقو جاسم مكوم تحت الشجرة وعلامات الضرب على جسمو .. حاولت المديرة تستجوب الاولاد بس محدا جاوب .. حتى جاسم نفسو
رجعت لغرفتها وكان آسر بإنتظارها
نعمة: انا بعتذر آسر بيك بس شفت يلي صار
آسر : هاي البنت ملاك شو قصتها
نعمة: ازعجت حضرتك بشي
آسر: لا ابداً .. بس عجبتني كتير
نعمة : نعم !
آسر : ضربت الولد وراحت معكو تفتش عليه بكل دم بارد
نعمة: انت شو بتحكي؟؟
كانت بدها تقوم بس وقفها آسر
آسر : ما بتعمليلها شي .. هاي البنت بدي ياها بدي تنتبهي عليها منيح .. قدي عمرها
نعمة: ١٢ سنة
ضحك آسر بصوت عالي..: داهية هالبنت .. شفتي وجهها لما اجت وخبرتك .. هدا طلبي
نعمة: بس البنت صغيرة
آسر: بكرا بتكبر .. بس انت انتبهي عليها منيح .. وما بدي حدا يأذيها .. بدي ارجع اخدها من هون تكون اقوى من الاول
نعمة: بس..
آسر: بدون بس .. متل ما قلت بتعملي .. واذا بعرف انك فتحتي معها موضوع الولد رح ازعل منك كتير .. وانت بتعرفي زعلي وحش
نعمة بخوف ..: حاضر حاضر .. بس شو مع الاولاد يلي طلبتن
آسر: لا خلص سكريلي عالموضوع ما بدي شي غير ملاك
نعمة : حاضر
قام آسر وطلع من المكتب
__
بعد مرور خمس سنين
وصل اسر للميتم
قامت المديرة بسرعة بإستقبالو ..: اهلا وسهلا آسر بيك نور الميتم
قعد آسر عالكرسي ..: جاهزة ؟
قعدت المديرة مقابلو ..: آسر بيك والله طلبك صعب .. انت كل عمرك بتوخد اولاد صبيان وبتساعدهن بالجامعة .. بس بحياتك ما اخدت بنت
آسر: قلتلك عجبتني .. وبعدين شو اختلف بالموضوع .. مبارح ولد واليوم بنت اذا المبدئ نفسو
نعمة: يا آسر بيك .. لو الاوراق رسمية انا ما عندي مانع .. بس ما في اوراق رسمية ابداً .. اذا صارت مُسائ انا بروح فيها
ضرب آسر عالطاولة ..: انت عم تجادليني .. البنت جاهزة ؟
نعمة: انا عندي حل .. خلينا ننطر كمان سنة البنت بتصير ١٨ سنة وساعتها انا بقنعها تطلع لحالها .. كأنها بدها تطلع عمسؤوليتها
سكت آسر شوي
نعمة : شو قلت ؟
آسر : موافق ..بس ناديلها بدي احكي معها جوز كلام
نعمة : حاضر حاضر
طلعت نعمة تسب حالها وتسب ملاك وقت فاتت عالغرفة وهو موجود
كانت نعمة تحب بنات واولاد الميتم متل اولادها بالزبط .. وملاك خاصةً صحيح كانت تشاغب وتعمل مشاكل بس الها غلاوة خاصة بقلب نعمة وكان صعب تفرط فيها لا بل كان مستحيل .. بس آسر شخص عنيد واذا حط شي براسو لازم يعملو .. وكانت خايف كتير من مخططات آسر وخاصةً انو بدو هالشي بشكل سري تام وبدون اوراق او معاملات
طلعت لعند ملاك وشافتها بتراجع بكتاب الجغرافيا
شافتها ملاك واقفة عند الباب متوترة
ملاك: خير انسة .. بس ما كون عملت مصيبة وانا مو حاسة
نعمة: حبيبتي ملاك
ملاك بإستغراب..: حبيبتي؟؟
قربت نعمة لعندها وقعدت عالتخت ..:بدي اطلب منك طلب ويا ريت ما تسأليني لي طلبتو
ملاك: خير انسة ؟
نعمة: من كم سنة فتي عندي عالمكتب وكان في رجال عندي .. يوم حادثة جاسم ، متذكرة
ملاك: ايه؟
نعمة: هدا الرجال طلب مني طلب .. بدو يوخدك من هون
ملاك بفرح ..: جد بتحكي!؟ هدا نفسو الرجال يلي بصرف على رفقاتي بس يفوتو عالجامعة ؟
نعمة: يا ريت بدو يوخدك لحتى تدخلي جامعة ويتكفل بمصاريفك
ملاك: لكن؟
نعمة: ما بعرف حاسة بشي غلط عم يصير .. بدو يوخدك بدون معاملات ولا اوراق .. وهلق طالب يشوفك بمكتبي .. بدي منك ما توافقي على اي شي بطلبو منك ..
ملاك: ما عم بفهم شي !!
نعمة: انت بس ردي عليي وانا بعدها بفهمك وبلاقي طريقة اساعدك فيها وابعدك عن الشر .. يلا قومي معي بدو يحكي معك كلمتين بالمكتب
ملاك: حاضر
نعمة : ملاك ما بدي وصيكي
ملاك: لا تخافي انا ملاك
نزلت ملاك لمكتب المديرة ووراها نعمة يلي كان قلبها برجف من الخوف وهي حاسة انها بتسلم بنتها للموت
فاتت ملاك ووراها نعمة عالمكتب
آسر: نعمة انطرينا برا
نعمة : حاضر حاضر
طلعت نعمة وسكرت وراها الباب
التفتت ملاك لآسر ..: نعم
قرب آسر عليها وعيونو بعيونها ..: فعلاً ملاااك
ملاك: شو بدك مني
آسر: كل خير .. بدي تكوني معي بشغل
ملاك بإستهزاء..: شغل قلتلي .. شغل شو .. شغل يلي بالي بالك .. لا يا معلم انا مو تاعت هالشغلات ..< قربت عليه وحطتت ايدها عصدرو وعيونها وبعيونو >.. لا يا حبيبي اسأل عني منيح وبس تعرف مين ملاك ارجع
آسر: بتعجبيني .. وبعجبني تفكيرك .. بس لا ما زبطت معك هالمرة ..
ملاك: ..
آسر: شغلي بعيد كل البعد عن يلي براسك .. ولانك عجبتيني رح خبرك عن شغلي
قرب عليها وهمس بإدنها ..: واذا في وحدة حلوة متلك ما رح بيعها لحدا .. ما تخافي
ملاك : لكن شو الشغل
آسر: اعطيني موافقتك الاولى ورح خبرك كل شي .. بس لحتى تكوني عارفة .. موافقتك النهائية مقابل حياتك .. يعني اذا ما نفذتي شو رح اطلب منك رح يكون اخر يوم بحياتك
شدت ملاك على ايدها ..: وصلت للعنوان الغلط .. انا لقيطة ولا عندي اب ولا ام .. وما عندي شي اخسرو .. يلي بطلع بإيدك اعملو ماني سائلة عشي ابداً .. مو ملاك يلي بتتهدد يا معلم
حملت حالها وطلعت من المكتب ووجهها ما بيتفسر
شافتها نعمة وقلبها وجعها عليها
دخلت لعند آسر بسرعة ..: شو صار ؟
آسر بغضب ..: ما رح انطر لسنة .. معك يومين بس اذا ما بتقنعيها تيجي معي .. هدا المبنى بصير رماد باللي فيه .. فاهمة
طلع من الغرفة وطرق الباب وراه
طلعت نعمة وركبها بتقصف لغرفة ملاك
نعمة : شو كان بدو منك
ملاك: بدو اشتغل معو
ضربت نعمة عصدرها ..: يا مصيبتي
ملاك: لا هو كان واضح كتير .. مو الشغل ياللي ببالك .. بس ما بعرف شغل شو بالزبط
نعمة: هددني بحرق الميتم باللي فيه اذا ما رحتي معو
ابتسمت ملاك ابتسامة جانبية ..: رح روح لا تخافي عليي .. باخدو عالبحر وبرجعو عطشان
نعمة: متأكدة
ملاك: انا حسيت انو واضح وصريح .. ولو بدو شي تاني كان تمادى معي ونحنا لحالنا .. رح روح شوف شو بدو بالزبط .. واذا شغل غلط رح اهرب .. وانت بتعرفيني منيح .. لا تخافي رح حافظ على حالي منيح
قربت عليها نعمة وحضنتها ..: سامحيني يا بنتي ما عرفت حافظ عليكي
دفشتها ملاك بخفة ..: يااااا انسة بتعرفيني ما بحب التلزيق .. خلص خلص مسامحتك
ضحكت نعمة عليها ..: ما بتتغيري يا بنت
ملاك: روحي اتصلي فيه قوليلو موافقة بلا ما يعمل شي
بــــــــاك
مسحت دموعها بإديها ..: الاستاذ أسر الهاشم طلع اوراق الوفاة لملاك وزبط كل شي
رجع ظهرو لورا وابتسامة عريضة على وجههو ..: أسر الهاشم
نعمة : شو رح تعمل ؟
كريم : ما الك دخل .. الكلام اللي دار بينا ما بدي مخلوق يعرفو..
وقف وحمل اغراضو..: لا تفكري اني رح انسى المصيبة اللي عملتيها .. بس كل شي بوقتو حلو .. واذا بعرف انك وصلتي خبر لآسر باللي عرفتو او حتى اني سألت عنها حسابك رح يكون عسير ..
لف حالو وطلع من المكتب ومن الميتم كلو
ركب سيارتو وفي شي قابض نفسو .. دقات قلبو سريعة بس في شي بداخلو واجعو .. قهر كبير بقلبو .. غصة ما عم يقدر يفسر معناها .. لي هالقد موجوع من اللي سمعو .. احاسيس متناقضة بداخلو .. في فرحة بقلبو انو ملاك بعدها عايشة .. بس الغصة انها عايشة مع اكبر تاجر مخدرات ورئيس عصابة بالبلد .. الرجال اللي كان سبب بموت اللواء نزار وكتير ناس
وقفت افكاره عند نقطة وحدة .. لي ملاك عم تتقرب منو .. هل ملاك بتعرف مين هو ولا عم تتقرب منو بأوامر من آسر (دون) .. لشو عم بخططو .. واللي عملتو لما سلمته صبري
مسح على وجههو بقهر وبعدها ابتسم ابتسامة صفرا وخباثة وتمتم ..: رح نلعب … لي لأ!!
شغل السيارة وانطلق ..
___
بعد يومين
صحي من النوم بكير اخد دوش .. لبس تيابو وطلع من البيت
وصل للكافية .. دخل وطلب قهوة
مسك تلفونو وطلب رقم ..: صباح الفل .. لازم شوفك اليوم ضروري .. لا ما في شي .. اوك ناطرك بنفس المكان
توجه لعند النادل وطلب كعكة صغيرة وشمعة
اخد طلبو وتوجه للشط اللي كانو فيه من يومين
نزل من السيارة وقعد على المقعد قدام الشط .. مشاعر مخربة .. غضب وفرح ..ما عارف يحدد احساسه .. بس ضميرو لسا صاحي وعارف شو رح يعمل ليرضي ضميرو
سمع صوت الماتور اعلن عن وصولها
قام من مكانو وتوجه للسيارة ..: تعالي اركبي ما في وقت
روما: وقت لشو ؟
كريم : محضرلك مفاجئة .. اركبي
ابتسمت وركبت بالسيارة.. وانطلق
بعد مشي بالسيارة ربع ساعة .
روما: لوين رايحين
وقف كريم السيارة على جنب الطريق ..: قلتلك مفاجئة .. ولا تحاولي ما رح احرقها
روما: لي وقفت لكن؟
نزل من السيارة وتوجه لعندها .. فتح الباب وقرب منها بشكل كبير لدرجة انفاسن اختلطت ببعض .. طلع ربطة سودا وحطها على عيونها ..: ما بدي تشيليها ابداً .. نحنا تقريباً وصلنا
ابتسمت روما بحب وقالت بداخلها ( ههه خربطلك عقلك حضرة المقدم لدرجة صرت تتوتر من قربي )
ركب بالسيارة وانطلق
وقف السيارة بعد خمس دقايق عند مبنى مهجور نسيياً
كريم: وصلنا .. ما تشيلي الربطة
روما بفرح..: حاضر
نزل من السيارة ولف لعندها .. مسك ايديها ونزلها .. وبدون ما تحس ربط ايديها بقطعة بلاستيك وشد عليهن
تسارعت دقات روما من الخوف..: شو عم تعمل ؟
قرب من ادنها وهمس ..: هـــش لا تنزعي المفاجئة
مسكها من ايدها ومشاها ..
سيطر الخوف على قلبها وشكت للحظة انو كشفها وكشف خطتها واخدها للفرع .. بس كان هدوء وما في اصوات لاشخاص او اصوات سيارات الشرطة
حاولت تهدي حالها وما تظهر خوفها
دخلها للمبنى واخدها لوحدة من الغرف الفاضية .. قعدها عالكرسي الموجود بنص الغرفة .. وما اكتفى .. طلع قطعة بلاستك تانية وربط رجليها
بطلت تسيطر على حالها وصرخت فيه ..: كريم .. شو عن تعمل ..
قرب منها وشال الربطة عن عيونها وهمس..: كريــــم .. ما بذكرك هالاسم بشي ؟؟
اطلعت بعيونو بإستغراب وبعدها اطلعت حوليها .. اطلعت من الشباك وشافت اخر منظر كانت متخيلة ترجع تشوفو بحياتها ….مبنى الميتم ..
رجعت تطلع بعيونه ..: مين انت ؟؟
طلع كريم الكعكة والشمعة وشعلها .. : قبل مين انا .. لازم تحتفلي معي بعيد ميلادي هون متل ما كنا نعمل قبل ١٥ سنة .. كنا نيجي لهون لنحتفل بعيد ميلادي .. كنا نهرب من المديرة والمربيات ونيجي لهون ..
اطلعت بعيونو ..: انت..
قاطعها ..: انا .. صح حزرتي .. بس كأنو متأخر شوي ..
تسارعت دقات قلبها ..: وشو بدك مني !!!!
كريم: لالا ما حبيتها منك .. ما بدك نطفي الشمعة مع بعض؟
صارت تتحرك بعشوائية على الكرسي ..: فكني احسنلك
كريم: لسا متل ما انت .. لا ما رح فكك .. في حساب بينا ولازم نصفي
روما بصراخ ..: عم قلك فكني يا حيوان
حط ايده على وجهها وشد عليه …: لا تكبري بالكلام معي .. وحاولي تحافظي على هدوئك لانو مشوارنا مع بعض طويل
لاول مرة بحياتها بتحس بالخوف .. وهالمرة الخوف مسيطر على مشارعها مع الذكريات اللي عم تحاول تمحاها من حياتها
قرب كريم الكرسي وقعد مقابلها ..: حلو .. اهدي هيك وتعالي احكيلي .. ما اشتقتيلي ؟
اطلعت بعيونو وضحكت ..: عم تمزح مو ؟
كريم: لي المزح .. شايفتيني عم امزح شي؟
ضحكت روما بصوت عالي ..: مو لاكون متذكرتك اساساً
كريم ببرود ..: انا بذكرك
قرب منها ولمس الجرح اللي على رقبتها ..: انا الوحيد اللي كنتي ضعيفة بين ايديه .. انا الوحيد اللي كنتي متل النسمة معا بعد ما تكوني عاصفة بكل الميتم .. ناسية .. بتحبي ذكرك ..
غمضت عيونها ورجعت بذاكرتها لبعيد
فـــــــــلاش بـــــاك
قاعدين بغرفة الدرس ووحدة من المربيات عم تعطي درس اللغة العربية
بخلسة قام واحد من الاولاد ورمى شغلة على راس ملاك
اطلعت عليه ملاك بغضب وتمتمت ..: اعمل وكثر يا رواد .. اخرتي امسكك
ابتسملها رواد بمسخرة ..: اسف .. بالغلط
ملاك: عادي
خلص الدرس وطلعوا كل الاولاد للباحة
وقفت ملاك عند الشجرة وحاطة ايدها بجيبتها ..
شافت رواد طالع من البوابة ومعو شلتو ..: رواد .. حبيب تعا شوي
توجه رواد وشلتو ..: خير حسن صبي
مسكتو من ياقة البلوزة وضربتو بإجرها خلتو يوقع عالارض ..: انت قد اللي عملتو اليوم
قام رواد عن الارض ..: رح ندّمك عليي عملتي يا حيوانة
بحركة سريعة طلع قطعة قزاز من جيبتو وجرحها برقبتها
تحملت الوجع وهجمت علي ونزلت فيه ضرب على جنب وطرف .. بلشت تحس انه قطع النفس
قامت عنو ووقفت ..: هاي لحتى تعرف مع مين عم تتعامل تاني مرة .. واحد حيوان
دخلت عالمبنى وشافها كريم والدم مغرق رقبتها وبلوزتها
ركض لعندها ..: شبك شو صاير
ضربتو على صدرو بقوة ..: إجمد .. ما في شي جرح بسيط
على صوتها طلعت المديرة ..: شو هدا ملاك ؟؟
ملاك بغضب ..: اووووو علينا .. خلص اجتمعوا كلكن لحتى خبركن
المديرة: ملاك .. احترمي حالك
ملاك: رواد تهجم عليي وضربني بشقفة قزاز .. بس لا تخافي علمت عليه .. روحوا شيلو من الباحة
المديرة: يخرب بيتك يا ملاك ..
ملاك: شو يخرب بيتي .. مو شايفة دمي .. يلا الدنيا حظوظ
تركتهن وراحت للحمام
دخل وراها كريم ومعو علبة اسعافات ..: لحظة رح ساعدك
اطلع عالجرح وطلع قطنة ومعقم ..: لا بسيطة جرح براني
هديت ملامح ملاك قلبت متل القطة الاليفة بين ايده
خلص تعقيم ومسح الدم .. حطلها شاشة عالجرح ولفها ..: هيك خلصنا .. سلامتك ملاك
تخلصت من هدوئها بسرعة ورجعت متل القطة البرية ..: قلتلك إجمد
تحركت من قدامو بدها تطلع من الحمام .. بس رجعت لعندو بسرعة
ابتسملها ابتسامة دافية
بس تفاجئ ببوكس على بطنو
ملاك: اذا تاني مرة بتسمح لحالك تلمسني اعرف وقتها انو رح يكون اخر يوم بحياتك
تركتو مصدوم وطلعت من الحمام
حط ايده مكان البوكس ..: الله لا يوفقك يا ملاك .. هاي جزاتي
بـــــــاك
تسارعت دقات قلبها بس حاولت تتحرك لحتى ما تحسسو بتوترها من لمساتو .. وصرخت ..: بعد ايدك عني بلا ما خليك تشتقلها
كريم ببرود ..: لا تحاولي .. دقات قلبك سامعها منيح
روما بغضب ..: رح ندّمك على فعلتك هاي .. واذا حاسب حالك رجال فكني وواجهني متل ما لازم .. لا تتقاوى عليي وانا مربوطة
ضحك كريم بصوت عالي ..: كل عمرك غبية .. مفكرة انك بقوتك فيكي تعملي اي شي .. بس غبية مو بإيدك ..
صرخت بكل صوتها … :فكني عم قلك
كريم: لي افكك .. كتير مبسوط وانا شايفك ضعيفة بين ايدي
صرخت بكل صوتها ..: اهــــــــه
كريم: لا تصرخي وتتعبي حالك .. ما رح يسمعك حدا .. انت هلق تحت رحمتي
سكتت وبطلت تعرف بشو ترد وشو تعمل .. هي فعلياً تحت رحمتو
كريم: ايـه هيك اسمعي كلامي متل كل مرة .. ما قلتلك غبية .. قال شو بدها تسحرني بعيونها .. غبية .. عيونك محفورين هون ..< اشر على عقلو >.. وهون ..< واشر على قلبو >.. انت كلك محفورة بقلبي
روما:…
رجع ظهرو لورا ..: هلق نيجي للفقرة اللي مستنيها .. دون لشو بعتك لعندي ؟
وقعت هالكلمتين علي مسامعها متل الصاعقة .. فتحت عيونها عالاخر من الصدمة
ضحك كريم بصوت عالي ..: سربرايــــــز … كيف وانا كاشفك من الاول ..
روما: ..
كريم: يا ربي غبية .. غبية .. صدقتي لما قلك انك فيكي تسحريني بعيونك صح ..
استغربت كلامو وكيف كاشفها من اول لقاء
كريم: سلاحك وقعك بقبضتي .. نسيتي اني بشتغل بالشرطة وبقدر جيب اي معلومة لو من ١٠٠ سنة.. كنت شاكك انك من طرف حدا عدو لصبري من اول يوم .. بس لما شفت عيونك وسمعت ذكرياتك الكذابة كان لازم اتأكد انك نفسها البنت اللي قالولي انها اتنحرت من عشر سنين .. وهوب .. تكون الضربة القاضية انك هربتي مع دون .. وااااااو .. احلى خبر سمعتو بحياتي
قام عن الكرسي وضربو برجلو بقوة .. وصرخ ..: غبـــــية
نزلت راسها بعد ما تأكدت انها نكشفت وما في داعي للمقاومة ..: لا هالمرة مو غبية .. كنت عارفة اني رح انكشف .. من اول يوم .. لما قلي عن مهمتي الجديدة كنت عارفة انها مهمة انتحارية ..
صرخ فيها ..: لــــيش .. ليش تعملي هيك شي من الاول .. لي تكوني معو .. لي توسخي حالك
اطلعت فيه ..: لانو ببساطة انا مو متلك .. انا حشرة من اول ما خلقت .. غلطة .. بنت حرام .. جابوني لهالدنيا مشان اتعذب .. مو متلك خلقت وانت بتمك معلقة ذهب .. من اول يوم جابوك للميتم والكل يعاملك معاملة خاصة .. ليش .. لانو اللك ظهر .. فيه اللك حدا بسأل فيك .. ..< ضحكت بمسخرة>.. حتى انا .. كنت اضرب كل ولاد وبنات الميتم عدا انت .. كنت خاف اتعدى عليك او اضربك متل الباقي .. وجاي تسألني لي .. دون كان طاقة القدر اللي انفتحتلي بالوقت اللي كنت خايفة من مصيري بعد ما طبق ال ١٨ سنة.. ما كان حدا رح يتكفل فيي او يعلمي .. اجى هو ونشلني من هالقرف ..
صرخ فيها بوجع ..: مقتنعة بكلامك .. نشلك من القرف وحطك بمستقع وساخة .. صرتي لعبة بين ايده وبحركك متل ما بدو .. واكيد اخد غرضو منك واشبع غريزتو ورماكي .. شو بدو منك اساساً .. ما عدتي تنفعي لشي .. خلصتي مهمتك واخد شرفك ورماكي متل الكلبة .. انت رخيصة بالنسبة اله
ضرب بكلماتو على الوتر الحساس .. عم يتهمها بشرفها .. وهي كل عمرها محافظة عليه حتى من دون
شدت بكل قوتها على ايدها ورجليها وتحملت الوجع القوي وقطعت البلاستك وقامت متل الوحش الهايج .. مسكتو من رقبتو ودفشتو عالحيط بكل قوتها
روما: حافظ على كلامك معي .. انا اشرف منك ومن كل واحد متل دون .. مو انا اللي حدا ببيع وبشتري بشرفي او بياخد مني شي وبرميني
تسارعت دقات قلبو .. اطلع بعيونها بتركيز ..:بحياتي ما نسيتك .. وصورتك لسا موجودة معي .. ملاك انا بحبك
تخدرت من نظراتو وكلماتو .. رجعت كل ذكرياتها معو تمرق قدام عيونها .. تسارعت دقات قلبها .. صادق هي ضعيفة قدامو ..نزلت ايدها عنو بهدوء .. بعدت عنو وكانت رح تمشي بس وقفها كلامو
كريم: ما رح تحاولي تكوني حدا منيح لمرة وحدة وبس ..
وقفت مكانها ..: انا خلقت لكون وسخة .. صعب كون حدا نظيف
قرب منها ومسكها من ايدها وهي لسا معطيتو ظهرها ..: ورح ترجعي للي باعك بالرخيص مشان يمشي مصالحو
روما: لا .. رح ارجع اخد روحو .. وبعدها ارجع لمكاني الاصلي .. الشارع
كريم: حطي ايدك بإيدي ورح حافظ عليكي
روما: رح تعمل متل الباقي .. توصل لغايتك وترمني بالسجن
كريم: ما رح خليكي تبعدي عني ابداً هالمرة
روما: متل الوعد اللي وعدتني ياه زمان
فـــــــلاش بـــــــاك
بيوم دخل رجال ومعو زوجتو .. طلبو يقابلو المديرة
استقبلتن المديرة
نعمة: اهلاً وسهلاً .. تفضلوا .. كيف فيني اخدمكن
..: انا كاظم الراوي عمو لكريم يلي موجود عندك هون بالميتم وهاي زوجتي
نعمة : يا مية اهلا وسهلا .. كريم لما وصل عنا قال انو اله عم باميركا بس تواصلنا مع زوجتك واعطتنا اوامر انو يبقى عنا هون لتتحسن حالتك
اطلع كاظم على زوجتو نظرة غضب ... فعلاً وضعي الصحي ما كان يسمح .. وانا جاي اليوم لحتى استلم الامانة
نعمة: لحظة رح نادي عليه
طلعت نعمة وطلبت من المساعدة تستدعي كريم حالاً
فات كريم عالغرفة وشاف عمو يلي تقريباً ما تغير فيو شي
قام كاظم واخدو بحضنو وصار يطبع بوسات متفرقة على وجههو وكأنو قطعة من قلبو
كاظم: يا روحي .. والله انا اسف بس ما كنت اعرف باللي صار .. سامحني يا عمري
كريم: اشتقتلك عمو
كاظم : وانا اكتر يا عيوني .. خلص من اليوم ما رح نفترق.. وانا جاي اليوم لحتى اخدك ونرجع على اميركا وتبلش تعليمك هناك ..< اطلع عليه>.. كل عمرك نفسك تصير محامي صح
هز كريم راسو بدون ما يجاوب
كاظم : يلا روح جهز اغراضك وانا بكون خلصت معاملة استلامك
حس كريم بغصة بقلبو .. هز راسو وطلع من المكتب وتوجه لعند الشجرة وقعد تحتها
..: راح تتركني ؟؟
رفع راسو وشاف ملاك واقفة قدامو ونظرة كسرة بعيونها
وقف وراح لعندها .. حط ايده على خدودها ومسح دموعها
اطلع على عيونها وركز فيهن
ولاول مرة من وقت ما عرفها ودخلت قلبو .. من وقت ما وصل عالميتم وشافها متميزة عن كل البنات .. لاول مرة بتشجع وبحضنها .. اخدها بحضنو بدون اي رفض منها وكأنها بحاجة هالحضن اكتر منو
بعد عنها ومسك وجهها ..: رح ارجع اخدك ونروح
رجع يطلع بعيونها الساحرات .. وبعدها يطلع على كل نقطة بوجهها لحتى تبقى صورة وجهها محفورة بذاكرتو
ملاك من بين دموعها ..: رح اشتقلك .. لا تطول الغيبة عليي
بعدت عنو وركضت لغرفة النوم الخاصة بالبنات وراحت تحت التخت .. ما بدها حدا يشوفها وهي ضعيفة .. قلبها تعلق بكريم كتير والوحيد يلي بتكون ضعيفة قدامو وبتتحول لوحدة تانية غير الوحش الموجود بين بنات واولاد الميتم ..و برغم صُغر سنها وسنو إلا انو كان امان بالنسبة الها .. كانت تحس حالها طايرة وهو معها وبحكيلها عن حياتو قبل ما يدخل الميتم .. كانت تحب تسمع قصصو مع اهلو وحياتو قبل ما يتوفو ..
بعد ساعة كانت معاملة استلام كريم خالصة
مسك كاظم بإيد كريم وتوجهو للسيارة
وقبل ما يطلع كريم عالسيارة اطلع اخر نظرة عالشباك التابع لغرفة البنات وشاف ملاك ووجهها غرقان بالدموع .. بس هالمرة ما كان فيه يمسح دموعها
طلع عالسيارة وانطلقو
بــــــاك
كريم : هالمرة انا غير .. انا ..
لفت عليه واطلعت بعيونو وقاطعتو ..: حتى لو عرفت اني انا اللي قتلت اللواء نزار ..
احمروا عيونو بعد ما سمع شو قالت ..: انت!!!
ركز على كلامها فعلاً دون معو وحدة واللي كانت تقتل كانت تترك وراها دليل على انها وحدة ست
روما: شفت .. صعب عليك تتقبل ماضيي المليان بالوساخة .. بس بوعدك .. وعد مو متل اللي وعدتني ياه لما طلعت من الميتم .. وعد بحق .. رح اخد روح دون وارجعلك سلم حالي
حاول يمتص غضبو ..: لا .. بدي تبقي معي وتسلميني دون وبعدها رح اغفرلك كل اخطائك وسامحك ونبلش من جديد مع بعض
روما: بعرف انك عم تكذب عليي .. بس رح صدقك
فجأة وبدون مقدمات سحبها من ايدها واخدها بحضنو
دفنت حالها بحضنو وصارت تبكي بحرقة على حالها ..
#يتبع
