نباش القبور جزئين

قصة رعب النباش الجزء الأول

عمري مفكرت اني هييجي يوم واحكي فيه اللي حصلي انا شغال شغلانه هي بتتحدد اول مبتولد وزي موالدي وافق بيها كان لازم انا كمان اوافق بيها ( اهي شغلانه الحمدلله والسلام) ايه الشغلانه اللي بتتحدد من قبل متولد.. انا شغال تربي بس ايه....... تربي ابا عن جد متجوز ومخلف ربيع وزي منا مكانش ليا راي في الدراسه قررت اني هعلمه واخليه يطلع معاه شهاده كبيره بس هو محبش العلام وطلع منه وقرر انه يشتغل شغلانه ابوه.

فيوم كنا قاعدين انا وام ربيع وربيع عالساعه 2.30 بالليل مره واحده سمعنا الباب بيخبط بس الخبطه كانت شديده شويتين قومت بسرعه وبقول مين اللي جاي دلوقتي يمكن حد عايزني افتح التربه عشان فيه دفنه الصبح لقيت مراتي بتقولي خير خير فتحت الباب وشوفت شخص كان لابس شيك جدا وكان معاه ناس كتيروكلهم كانو واقفين زي صف بس..... ورا الراجل اللي لابس شيك وفي تابوت قدامهم لقيته بيقول تربه جلال قولتله مالها قالي هنزل فيها الامانه ديه 

 

قولتله ازاي محدش اتصل بيا من كام ساعه عشان افتح التربه وتتهوي قالي مفيش حد كان معاه رقمك طلبت اشوف التصريح بتاع الدفن لكنه حط ايده في جيبه وطلع رزمه فلوس كتير اوي وقالي احنا عينينا ليك بس نخلص النهارده والحاجه تنزل سكت # الصراحه منظر الفلوس يخلي الجبل يتحرك.

 

 

روحت عند التربه اللي قال عليها وفتحتها وطلبت منهم انهم يستنوا عقبال منزل انضف التربه من اي عضم.... وانا نازل سالت هي الجثه راجل ولا حرمه بس ملاقيتش حد من اللي واقفين معاه رد لقيته بيقول راجل نزلت عند عين الرجاله وابتديت انضف خلصت وطلعت عشان ننزل الجثه ساعدوني ونزلناها المفروض اول مبتنزل بنرخي الكفن عند منطقه الراس لكن وانا بعمل كده كلهم سابوني وطلعو فكيت الكفن بسرعه وطلعت عشان احاسبهم وبعد كده انزل اكمل توضيب الجثه 

لكن لما طلعت ملاقيتش ولا واحد المكان كان هوس هوس ولا كأن كان فيه اكتر من عشرين واحد دلوقتي لقيتني بقول ولاد الكلب كلو عليا حق الدفنه بس هعرف اخد حقي ازاي نزلت تاني التربه وطلعت الكشاف وروحت عند الجثه بقيت اشوف صوابعها لابسه خاتم لقيت خاتم شكله فخم جدا كان معصلج جدا قعدت.. اخبط بالكشاف علي ايده لحد مالخاتم ابتدا يطلع من صباعه وانا بمش الكشاف علي وشه لقيت في حاجه بتلمع لما رجعت الكشاف لقيت حاجه غريبه اوي سنتين دهب كانو السنتين الاماميين طلعت الظرديه من جيبي (الظرديه بتكون معانا علي طول واحنا رايحين نفتح تربه عشان لو القفل كان معصلج نكسره ) 

 

وبقيت اشد في السنان لحد مطلعو كانو اتنين وبعد كده قولت كده كفايه سنتين دهب وخاتم شكلو غالي جدا وقررت اني هاخد الكفن برضه عشان هبيعه خلصت وخرجت من التربه وقفلتها وبعد كده....روحت لما روحت خبيت الحاجه في اوضه الضيوف اول مخرجت من الاوضه  لقيت مراتي كانت مستنياني قالتلي اتأخرت ليه قولتلها ولاد الكلب مشيو من غير ميحاسبوني كان الوقت ساعتها داخل في 4.30 قررت اني انام عشان اليوم فعلا كان طويل جدا لما صحيت تاني يوم قعدت افكر في الحاجات اللي انا خدتها وقعدت اقول ان الخاتم ده شكله غريب جدا مع انه فخم اوي بس الخاتم ده خساره يتفرط فيها لكن السنان مسيرها تتسيح وتبقي حاجه تانيه 

 

 

وقررت ان بالليل هطلع اسيح حتتين الدهب اللي معايا لحد اما يبقوا كتله وابقي اوديهم عند السايغ عشان لو روحت بيهم دلوقتي هتقفش اني بس#رق فهخش في سين وجيم وفعلا استنيت بليل واحنا بنتعشي الباب خبط# قومت جري افتكرت ان الناس بتوع امبارح رجعو تاني.. مراتي قالتلي تلاقيهم افتكرو انهم نسيو يحاسبوك فتحت الباب ملاقيتش  حاجه قفلت الباب ورجعت اكمل اكل بعد مخلصنا العشا نفس الخبط حصل تاني مراتي كانت اقرب للباب ففتحت هي لكن لما فتحت لقت قطه قعده قدام الباب لقيت مراتي دخلت في هدوء المطبخ وجابت كام لقمه متبقيين من العشا وحطيتهم قدامها  

وقالت شكلها شمت ريحه العشا كل ده والقطه مبتبصش غير عليا روحت قايم هششها وقفلت الباب واستنيتهم لحد اما نامو وخرجت بالسنتين والكشاف في ايدي وولعت البوتجاز الصغير اللي بعمل عليه شاي وحطيت السنتين في طبق صغير عشان يسيحو قعدت شويه بس  ابتديت اسمع  صوت خطوات#(صوت خطوات) وانا قاعد في مكاني قعدت اقول مين وشغلت الكشاف وقعدت احركه يمين وشمال لحد اما لاقيت في حاجه بتلمع لما رجعتلها بسرعه لقيتها القطه ابتدت تطلع صوت غريب (صوت)وهي بتعمل الصوت ده فتحت بقها لقيت السنتين الدهب# بصيت عالطبق اللي قدامي اللي كانت السنان عليه لقيته فاضي 

 

قومت بسرعه اجري ناحيه القطه لكن اول مقومت من مكاني القطه بدأت في الجري قعدت اجري وراها بس هي كانت عارفه بتجري رايحه فين.... راحت عند التربه المشئومه اللي ابتدت الحكايه عندها..... كانت مفتوحه نورت بالكشاف جوا لكن ملاقيتش فيها حاجه ملفته للنظر بس لوهله كده حاجه عدت بسرعه جوا التربه قررت ان هنزل.... عشان اشوف ايه موضوع الحاجه ديه  اللي طلع مره واحده لكن اول منزلت لقيت الكشاف اللي في ايدي فصل مره واحده جيت اطلع باب التربه اتقفل في وشي.

انتظروا الجزء الثالث …..