قصة نورة الطقطاقة تغني في فرح الجن
ايه حكاية نورا الكويتية دى مع زفاف الجن؟
القصة :
نورا الكويتية هى مطربة مشهورة فى الكويت والعالم العربى، وليها فرقة خاصة بالعزف والرقص وكلهم بنات وستات مفيش رجالة خالص معاهم، المهم فى يوم من الأيام جالها اتصال مجهول بيقولها فيه فرح بكرة لزوجين وعايزينك تحيي الفرح ده انتى والفرقة واللى عايزاه هنجيبهولك، قالتلهم ماشى ابعتولى العنوان وهجيلكم وربنا يتمم على خير..
فى نفس اليوم جتلهم الدعوة وفيها العنوان بالتفصيل، اتصلت نورا بالفرقة بتاعتها وجهزتهم كلهم واتجهوا لمكان الفرح، اول ما وصلوا للمكان شافوا بيت كبير جداً وشكله جميل وكله اضاءة افراح وشرايط نور وورد ومكان مبهج جداً، دخلت نورا هى والفرقة البيت ده وأهل البيت استقبلوهم وسلموا عليهم وقعدوهم فى غرفة معينة وقالولهم استنوا هنجيبلكم صاحب الزفاف عشان يتفق معاكم، وهما قاعدين مع بعضهم واحدة منهم قالت حد فيكم لاحظ حاجة؟ كل اللى سلمنا عليهم ملمس ايديهم خشن وكمان وشهم مشعر جدا مع ان كلهم بنات!!
نورا قالتلها متركزيش فى الحاجات دى وخلي الليلة تعدى على خير عشان من اول ما جيت وانا حاسة ان قلبى مقبوض، فبلاش حد يتلكك وخلونا نخلص اليوم ده ونمشى بالحب، قالولها ماشى يلا بينا، المهم جاء شخص واتفق معاهم اتفاق الزفاف وبعدين أخدهم للمكان اللى هيقيموا فيه الزفاف وهو جوه البيت برضو وطلع مكان مليان ناس كتيييييير جداً جداً، قعدوا فى المكان المخصص ليهم وبدأوا الزفة والغناء والرقص والدنيا كانت تمام..
بعد مرور ساعة من الغناء وكل الناس بترقص قدامهم، واحدة من فرقة نورا شافت شيء غريب جداً، شافت واحدة من المعازيم من اللى بيرقصوا عندها رجل حيوان!! بالرغم ان كلهم لابسين فساتين طويلة وبيرقصوا بس البنت لاحظت رجلها بشكل واضح جداً، وأول ماشافت رجل الحيوان دى اغمى عليها فى نفس الثانية، والحفلة شغالة والرقص شغال، نورا راحتلها فى الخباثة من غير ما حد يشوفها وحاولت تفوقها بس هى حكت لنورا كل حاجة ونورا بصت وشافت رجل الحيوان فعلاً، وبدأت الفرقة تاخد بالها وكلهم شافوا الموضوع كويس جداً، وبالتدريج بدأت رجول المعازيم تظهر واتضح ان كلهم أرجلهم رجل حيوانات بس جسم إنسان، نورا قالت للفرقة اصمدوا وكملوا زى ما انتم، لو مشينا دلوقتى مش هيسيبونا فى حالنا وممكن يأذونا، لازم نكمل الزفاف وهنمشى بالطريقة بس جمدوا قلبكم وخلونا نكمل!!
وبالفعل الفرقة كملت الزفاف وهما مرعوبين وخايفين جداً ونورا هى اللى كانت مجمدة قلبهم وبتدعمهم، ومع مرور الوقت بدأت اشكال المعازيم تتغير وصوتهم يخشن اكتر وبدأوا يعملوا حركات مخيفة نتيجة الكحول اللى شربوها وكلهم بقوا سكرانين، والمكان مليان ناس كتير جداً لدرجة انك متقدرش تمشى وسطهم من الزحمة، الفرقة خلاص بتنهار ومش قادرين يكملوا وفجأة وبدون مقدمات النور يقطع فى المكان كله وأصبح المكان سواد داكن، نورا والفرقة استغلت الفرصة وهربوا بسرعة من المكان دة من غير ما حد يشوفهم، وطلعوا على الطريق العمومى برا وهما خايفين وبيجروا بشكل مروع
الصدمة الأكبر بقى انهم لما بصوا على مكان البيت دة وهما برا لقوه اختفى!!
والمكان عبارة عن مبنى مهجور مظلم جداً وشكله مش حلو ، ومفيهوش صوت نهائي، من بعد الموضوع دة نورا قررت انها تعتزل الغناء هى والفرقة بتاعتها بسبب انهم اكتشفوا ان الزفاف دة كان بتاع قبيلة من الجن مش بشر، والموضوع ده كانت بتحكيه لأحد قرايبها لكنها رفضت انها تحكى الكلام دا لأى حد من الصحفيين والاخبار واكتفت بالاعتزال من سكات!
وفي النهاية لا نستطيع أن نجزم بصحة القصة او حقيقتها ولكن نقرأها على سبيل الاستمتاع والتسلية والترف الفكري فحسب. ودا لأننا لم نسمع القصة من صاحبتها مباشرة ولذلك لا نقطع بصحتها وإن كانت منتشرة على مواقع التواصل الاجتماعي
