قصة الفتاة الشيطان

في يوم من الأيام كان فيه شاب بسيط كان كل همه من الحياة إنه لما يتخرج يلاقي شغل لإنه كان فقير جدًا مُعدَم زي ما بيقولوا

الشاب ده كان في كلية الطب ومكانش أي حد من زمايله يعرف عنه إنه فقير يعني لإنه كان ماشي بمبدأ أحمد ذكي لما قال  "إني لا أكذب ولكني أتجمل" كان مخبي على كل دفعته إنه فقير وكان ااشاب ده بيشتغل بعد الضهر في ورشة تصليح عربيات صاحب الشغل كان مبسوط منه جدًا جدًا لإنه رغم إنه كان طالب في كلية الطب إلا إن إيده في صنعة الميكانيكا تتلف في حرير زي ما بيقولوا وعشان كده كان دايمًا يمن عليها بفلوس أكتر من مكسب إيده الحقيقي ودايمًا كان يقول له أنا بعاملك زي ابني وتأكد إن أنا لو كان عندي ابن مكنتش هحبه أدك وكان متمسك بيه جدًا جدًا

لكنه دايمًا كان بيفكر ايه اللي هيحصل لورشته لما الشاب يتخرج من كلية الطب ويفتح عيادته الخاصة وفي يوم من الأيام الراجل العجوز صارح الشاب باللي في قلبه وقال له أنا مش عارف هعمل ايه من غيرك لما تتخرج وتمشي وتسيبني ده الزباين مش بيجوا غير عشانك وكمان بيطلبوك بالإسم وطبعًا الشاب كان بيصعب عليه الراجل العجوز جدًا وبيبقى مش عارف يطمنه ازاي لكنه قال له اطمن أنا حتى لو اتخرجت هشتغل هنا بعد الضهر برده لإني معنديش فلوس أعمل عيادة خاصة وأخري هشتغل في مستشفى حكومي بفتافيت الفلوس في يوم من الأيام الراجل العجوز ساب الشاب وروح يرتاح زي كل يوم لكنه مكانش يوم عادي بالنسبة له لإنه جاله تليفون إن أخوه اللي مقاطعه من سنين مات في حريق هو ومراته وولاده ومفيش حد نجا من الحريق ده غير بنته الكبيرة لإنها كانت في شغلها وقت انفجار أنبوبة البوتجاز وإنه لازم يحضر جنازته وبالفعل تاني يوم سافر الراجل العجوز وحضر الجنازة وطبعًا بما إنه عايش لوحده بعد موت مراته فهو أحوج الناس لونس يونسه في وحدته وعشان كده عرض على بنت أخوه اللي بقت عروسة إنه ياخدها تعيش معاه وربما يجيها نصيبها في بلده وتتجوز بدل ما تعيش وحيدة في مكانها ده غير إن مبقاش ليها مكان تعيش فيه بعد الحريق.

وبالفعل راحت البنت تعيش مع عمها ومن هنا بدأت حكاية جديدة كل يوم كانت البنت بتروح بالأكل لورشة عمها والبيت بتاعه اتغير حاله 48 درجة بقى نضيف وجميل ومُرتّب وتمر الأيام وتنشأ شرارة حب بين البنت وبين الدكتور