قصة عهد تميم
.وبعدين ياعمي. هنفضل واقفين نفرج كده وكل 3 ايام واحد بيموت.
.وعايزنا نعمل ايه اديك شايف البلد بقت شبه مهجوره الناس كلها بقت خايفه ونص البلد هربت. مبقاش فاضل غير الناس الكبيره اللي مش بتخاف. لكن شكلنا هنموت كلنا لأن مفيش حل اللي بيحصل.
بس انا بقا عندي حل. هروح مشوار وإنشاء الله مش هرجع غير بالحل
سلام: سلام عليك يامولانه.
الشبخ عابد: وعليكم السلام. ازيك يا سلام وازي عمك.
سلام: مش خير خالص ياشيخنا. انا جيتلك بعد ماكل البيبان اتقفلت. انت، الوحيد اللي واثق انه هيقدر يساعدنا.
_سلام كان بيتكلم بطريقه تبشر ان في مصيبه.قلتله اقعد ياسلام وقولي في ايه.
سلام: هحكيلك يا شيخ عابد. بس عشان خاطري تساعدنا انا عارف انك هتقدر انا جيتلك لأنك كنت صاحب ابويا الله يرحمه وعارف انك بتاع ربنا وعندك بركات.
الشيخ عابد: متقلقش لو في ايدي حاجه اعملها هعملها بس انت احكيلي ايه اللي حصل.
سلام: انت عارف ياشيخ عابد ان البلد بتاعتنا هاديه وجميله وكل ناسها طيبين. لكن كل اتغير من حوالي شهرين. لما دخل البلد واحد غريب اسمه كارم. كنا فاكرين انه راجل كويس. كان بيصلي وبيعمل خير واول ماتشوف دقنه الكبيره تقول ده شيخ علي طول. كارم اشتري بيت من الحاج مصطفي. قعد في البيت كام يوم وبعدها بدأنا نسمع اصوات خبط كل يوم بليل خارجه من جوه البيت. ولما كنا بنخبط عليه ونسأله كان بيقول انه لسه مشتري البيت وبيوضب فيه. الناس سابته. لحد مافي يوم يامولانه.الصوت زاد اوي. ومش الصوت بس ده البيت كله ولع. البلد كلها كانت متجمعه وبتحاول تتطفي البيت لكن النار كانت، بتزيد مش بتقل. فضلنا نحاول نطفيها اكتر من ساعه وفي الأخر النار اتطفت لوحدها. الكل بقا يضرد كف علي كف من اللي شايفه. دخلنا البيت. البيت من جوه ميقولش انه كان لسه مولع من دقايق. كل حاجه كانت طبيعيه العفش والستاير كل حاجه سليمه. الا حاجه واحده. كارم هو الوحيد اللي اتحرق مبقاش باقي منه. غير العضم تقريبا. كان منظر مرعب وغريب. الأرض كان مرسوم عليها نجمه لونها احمر وفي شمع محطوط حوليها. وكمان في كتب غريبه جدا. واحد مسكها وحاول يقرا اللي فيها لكنه مفهمش منها حاجه. لكن اللي عرفناه ان الكتب دي كتب سحر. واضح ان كارم ده كان دجال وحاول يعمل سحر في البلد او عمل. ومن بعدها والبد خربت. الكهربه قطعت ومجتش تاني. المياه لونها بقت غريب تقرف حتا تغسل وشك منها مش تشرب. وكل 3 ايام واحد من البلد بيموت. اللي بيقع من فوق السطح. اللي بيغرق في الترعه. حجات كتير. بس يامولانه وبقالنا كتير علي الحال ده. لدرجة ان نص البلد مشيت من، كتر الخوف. عشان كده انا جتلك وعارف انك هتساعدنا. قلت ايه ياشيخ عابد.
_فكرت شويه في اللي هو قاله. كنت بحاول استوعب انا اول مره اشوف حاجه زاي كده. ومش عارف ان كنت هقدر اعمل حاجه ولا لا. انا اه ربنا مديني قدره اني اساعد حد ملبوس حد محسود. والشفاء ده بتاع الله. لكن مش عارف الموضوع ده هقدر اساعد فيه ولا لا. لكني قلتله
الشيخ عابد: ماشي ياسلام انا هاجي معاك. وهحاول افهم ايه اللي حصل في البلد. لكن لو مقدرتش اعرف السبب. يبقا سامحني.
سلام: انشاء الله هتقدر ياشيخ عابد قوم انت بس معايا عشان نلحق الطريق قبل الليل مايليل. لحسن البد بليل مش بنقدر نمشي فيها.
الشيخ عابد: ربك هو الحارس. انا هقوم اجيب حجات من جوه ونمشي علي طول.
_ خرجت من البيت وسلام معايا. روحنا الموقف عشان ناخد عربيه توصلنا لحد البلد. وصلنا البلد لكن المكان ضلمه. السواق قال
السواق: هي البلد دي ضلمه كده ليه. هي مهجوره ولا ايه
_سلام كان عمال يقرا قرأن وهو خايف. وده خله السواق هو كمان يخاف
الشيخ عابد: لا يابني متخفش. في مشكله بس في الكهربا.
السواق : طيب احنا هنفضل ماشين كده وخلاص هنروح فين، تاني.
_ ندهت علي سالم اللي مركز في الطريق كأنه مستني حاجه تطلع تموته دلوقتي.
الشيخ عابد: سلام. ياسلام.
سلام : ايوه. ايوه ياشيخ عابد.
الشيخ عابد : ماتهدا كده مالك. فاضل قد ايه عشان نوصل بيت عمك.
سلام : خلاص قربنا نوصل.
_ السواق داس فرامر فجأه وكان علي وشه ان في مصيبه حصلت
الشيخ عابد: في ايه يابني وقفت ليه.
السواق : انا خبط حد.
سلام: يانهار اسود. قلتلك ياشيخ عابد مينفع نمشي في البلد بليل. انا قلتلك.
الشيخ عابد : ممكن تسكت انت شويه. يابني حد مين بس اللي خبطه. يعني انت لو كنت خبط حد. كنا هنشوفه.
السواق: مش عارف انا فجأه شوفت حد واقف قدام العربيه واختفا مره واحده. انا هنزل اشوف.
سلام: لا لا بلاش تنزل. انت تلف العربيه وتخرجنا من البلد والصبح نرجع.
السواق : هو في انا مش فاهم حاجه.
الشيخ عابد: مفيش حاجه. خليك انت انا هنزل اشوف في ايه.
_نزلت من العربيه. الدنيا ضلمه. كان في هوا سخن بيخبط فيا. قربت قدام العربيه وبصيت في الأرض. لكن مفيش حاجه. بصيلهم عشان اقلهم ان مفيش حاجه. لكن شوفت حاجه خلتني اسكت. شخص واقف في ضهر العربيه. كل اللي بيان منه عنيه. اللي لونها احمر زاي الدم. اما باقي جسمه فهو اسود من السواد. كان واقف باصصلي ومبرق. اتكلم بصوت مش طالع. يعني بيحرك شفايفه بس. لكن الغريبه ان سمعت صوته في وداني. كأنه واقف جمبي وبيوشوشني. كان بيقول جمله واحده. (الملك تميم. الملك. تميم. الملك تميم.)
_حسيت بخوف شديد مكنتش عارف اتصرف ازاي. لكني بدأت اقرا قرأن بصوت عالي. حسيت ان الشخص ده. او الكائن اللي قصادي. اتضايق. كانت الجمله اللي بيقولها عماله تتردد في ودني. وانا فضلت اقرا قرآن بصوت اعلي. لحد ما لا اراديا غمضت عنيا. او بمعني اصح. حسيت اني فقدت الوعي. فتحت عيني علي صوت سلام وهو بيقول.
سلام : شيخ عابد. اصحي يا شيخ احنا وصلنا.
_ فتحت عيني وبصبت حوليا. ايه ده ازاي احنا لسه في العربيه. يعني ايه كل ده كان حلم.
الشيخ عابد: هو ايه اللي حصل ياسلام
سلام: محصلش حاجه ياشيخ انا لقيتك نمت فجأه. قلت اسيبك لحد مانوصل. يلا احنا وصلنا. بيت عمي ضياء.
_ حاجه جوايا بتقول ان اللي انا شوفته ده مكنش حلم. ده كان حقيقه. في حاجه عايزه توصلي حاجه. في سر في اسم تميم اللي كان بيقوله الكائن ده. نزلنا من العربيه ووقفنا قدام بيت. ضياء. يااااااه بقالي سنين ماجيتش هنا. من ساعت ماسعد ابو سلام توفي. ضياء دلوقتي يعتبر هو كبير البلد. لأن عيلته كبيره في البلد وليها واسمها من زمان. دخلنا البيت. كان في ناس كتير قاعدين وفي وسطهم ضياء.
الشيخ عابد: سلام عليكم.
_ كله رد السلام. وضياء قام وقرب مني وقال
ضياء وعليكم السلام يامولانه. والله انت جيت في وقتك. اتفضل يامولانه اتفضل
_ دخلت وقعدت علي دكه والناس كلها قاعده قدامي. سلام: شوفتو بقا. قلتلكم انا مش هرجع غير ومعايا الحل اللي هيخلصنا من الهم اللي حنا فيه ده.
الشيخ عابد : سلام حكالي علي كل اللي حصل. بس انا عايز اسأل علي حاجه. في حد في البلد هنا اسمه تميم.
ضيا: تميم. تميم اه. الواد تميم.
سلام : تميم مين ياعمي. مفيش حد في البلد اسمه كده.
ضياء: لا فيه. تميم ابن ام تميم. مرات الحج توفيق الله يرحمه.
سلام: ايوه صح. لكن ماله تميم ده يامولانه
الشيخ عابد: عايز اشوفه. دلوقتي
سلام: لكن دلوقتي الوقت متأخر. خلينا في النهار.
ضياء: الشيخ عابد قال دلوقتي يبقا دلوقتي. واد يا علي. روح علي بيت عمك توفيق الزناتي. قول ل ام تميم عم ضياء بيقلك تجيبي تميم وتيجي دلوقتي. وتفضل واقف لحد ماتجيبهم وتيجي. سترك يارب. ايه يا مصطفى ساكت يعني. مش عايز تقول حاجه.
مصطفي : عايزني اقول ايه ياضياء منا زاي زيكم
ضياء لا ياشيخ. ومين سبب العكه اللي احنا فيها دي مش انت. مش انت اللي بيعت بيتك للدجال اللي عمل فينا كده. وطمعت في الفلوس اللي ادهالك
مصطفى : يعني انا كنت هعرف انت كل ده هيحصل
ضياء:تعرف ولا متعرفش اهو اللي حصل حصل
_قطعت الخناقه والزعيق اللي مابينهم وقلت.
الشيخ عابد: جرا ايه انت وهو انتو جاين تتعاركو دلوقتي في المصيبه اللي انتو فيها.
ضياء: حقك عليا يامولانا بس هو غلطان برضه
مصطفى :غلطان في ايه بس طيب احضرنا يامولانا
_ المرادي اللي سكتهم. لما دخل البيت ست كبيره وطفل عنده حوالي 11 سنه. الست كان باين عليها الخوف.
ام تميم: هو فيه ايه الواد تميم. عمل حاجه.
ضياء :، اهدي ياخاله ام تميم واقعدي متخافيش. الشيخ ده جاي عشان يساعدنا في اللي احنا، فيه وطلب يشوف تميم.
ام تميم: طلب يشوفه ليه هو عمل ايه بس
_الولد كان في حاجه مش طبيعيه. كان باصص عليا بنظره انا عارفها كويس. دي نظرت الكائن اللي كان واقف ورا العربيه. لكن المرادي انا واثق اني مش بحلم
الشيخ عابد: قرب ياتميم متخافش
_الولد قرب عليا وفي عينه نفس النظره اللي تقريبا محدش شايفها غيري. اول ماوقف قدامي. حطيت ايدي علي دماغه وبدأت اقرا قرآن. واللي توقعته لقيته. الولد بدأ يصرخ ويتشنج لكن الرجاله اللي قاعدين قاموا من مكانهم وثبتو كويس. امه. فضلت تزعق وتقول. سيبوه هو ملوش ذنب. انا السبب انا السبب. سيبت الولد وركزت مع كلامها. لكن الصدمه ان الولد مسك دماغي جامد وقرب من ودني وقال. خاتم الملك تميم خاتم الملك تميم. الرجاله فضلو يشدو فيه. لحد ماوقع علي الارض وفقد الوعي. وانا رجعت لورا وانا باخد نفسي بالعافيه. شويه والولد فاق. امه خدته وكنت هتمشي لكن افتكرت الكلام اللي كانت بتقوله.
الشيخ عابد: استني ياست انتي.
ام تميم: عايز ايه تاني مش كفايا كنت هتموت الواد.
الشيخ عابد: عايز اعرف ايه الكلام اللي انتي كنتي بتقوليه. انتي السبب في ايه
ام تميم: كلام. كلام ايه انا مقلتش حاجه.
_ضياء شخط فيها
ضياء: بقلك ايه مش عايزين كدب. انتي هتقولي ولا..
الشيخ عابد: استني يا ضياء. علي فكره ياست ابنك ملبوس عارفه يعني ايه ولا اعرفك. يعني في كائن شرير جواه وهو اللي بيتحكم فيه. يعني انتي وابنك في خطر مش القريه بس. يعي لازم تقولي اللي تعرفيه.
ام تميم: انا هقلك علي اللي اعرفه. انا ياعم الشيخ كنت كل ما خلف عيل يموت. لحد ماخلفت تميم. الوحيد اللي عاش الحمد لله. من فتره جالي واحد غريب اسمه كارم. قالي انه عايزني اساعده في حاجه وهيديني فلوس كتير. قلتله ايه هي الحاجه دي. قالي ادور في البلد كلها علي بيت عليه رسمت غراب. لفيت البلد كلها لحد مالقيت الرسمه في بيت عم مصطفي. قلتله. قالي اروحله كل شويه واقنعه ان بيته في. اللهم احفظنا عفاريت. قلتله لا. مش هعمل كده. لكنه خوفني وقالي ان ممكن تميم يموت لو معملتش كدا.
_ مصطفي قطع كلامهاوقال
مصطفي: يعني انتي بقا يا فتحيه كنتي كل يوم تجيلي وانا ادخلك بيتي وتفضلي تشتغليني لحد ماخلتيني ابيع البيت.
ضياء قله وهو متعصب
ضياء: ياسلام وانت لسه فاكر كده دلوقتي. انت ياجدع انت مقلتش كده ليه من الاول.
مصطفى : هقلك ايه. اقلك اني بيعت البيت عشان فيه عفاريت. عشان تضحكو عليا.
ام تميم: دي حقيقه. هو كان فاكر ان فيه عفاريت. لكن اللي ميعرفوش. ان كارم هو اللي كان بيعمل كده في البيت عشان تسيبه. ولما جالك وقالك اشتريه بعتهوله علي طول. ومن ساعتها يا عم الشيخ وابني مش عارفه ايه اللي صابه. والمصيبه اللي حلت علينا كمان ان ابوه كان اول واحد يموت في البلد بعد اللعنه اللي حصلت.
_ الست خدت ابنها ومشيت وانا قعدت كام دقيقه كده استوعب اللي حصل ومعني كلمة خاتم الملك تميم. اللي قالها الولد الصغير. في حاجه بتشدني ناحية الحكايه. حاجه عايزاني اكتشف السر اللي موجود. قمت وقفت وقلت. انا عايز ادخل بيت الدجال دلوقتي. بمجرد ماقلت كده كله قام وقف. وفضلو يقنعوني انه مينفعش ادخل البيت دلوقتي.
سلام: ياشيخ عابد مش هينفع. ده احنا بنخاف نمشي في البلد بليل. نقوم ندخل البيت اللي كان السبب في كل اللي احنا فيه.
ضياء: لو مصمم يامولانا خليها بالنهار يبقا امان.
الشيخ عابد: انا قلت دلوقتي يعني دلوقتي. كل يوم بيعدي بيبقا خطر عليكم. ولو خايفين انا هدخل لوحدي
ضياء: ودي تيجي برضه نسيبك تدخل لوحدك. يلا ياسلام انت ومصطفي.
مصطفي: وانا مالي ياضياء.
ضياء: عشان انت السبب في العكه دي. وانت اكتر واحد عارف البيت.
_ الساعه كانت كانت داخله 12 بليل. خرجنا من بيت ضياء ومشينا في البلد. الكل ماشي وهو بيترعش من الخوف. وسط محنا ماشين. سلام صرخ ووقع علي الارض وفضل يزحف لورا كأن في حاجه قدامه. جرينا عليه وقلتله.
الشيخ عابد: مالك ياسلام. ايه اللي حصل
سلام: شوفتها. شوفتها يامولانا شوفتها.
الشيخ عابد: هي مين دي اللي شوفتها.
سلام: كانت واقفه قدامي دلوقتي. قالتلي الدور عليك. انا مش عايز اموت. مش عايز اموت.
_ حاولت اهديه لكن مفيش فايده. سلام بقا في حالة صدمه من اللي شافه.
الشخ عابد: مصطفي. هتاخد سلام وترجع بيه بيت ضياء.ومحدش يخرج من بيته النهارده. ادعو بس الليله دي تعدي علي خير. يلا بينا ياضياء.
_ وصلنا قدام البيت وكل واحد في ايه كلوب منور بيه. البيت مكون من، دور واحد. قدامه في ترعه كبيره. قلت لضياء انت هتستنا هنا وانا هدخل.
ضياء: لا ياشيخ عابد انا لازم ادخل معاك.
الشيخ عابد: اسمع كلامي. انا محصن نفسي وداخل البيت ونيتي خير. يعني بأمر الله مفيش حاجه هتأذيني. لكن انت لو دخلت معايا. ممكن اوي متخرجش.
_ خدت الكلوب ووقفت قدام باب البيت سميت الله ودخلت. المكان ضلمه. في صوت زاي همسات حد. اعوذ بكلمات الله التامات من شر ما خلق اعوذ بكلمات الله التامات من شر ما خلق. دخلت اوضه في البيت وعلي حسب وصفهم الأوضه دي هي اللي لقو فيها الدجال ميت. كان في اثر لدم علي الأرض. وطيت عشان اتفحص اكتر. واكتشفت ان في حفره صغيره في الأرض. حطيت ايدي عليها. وغمضت عيني. ولما فتحتها تاني. لقيتني واقف في مكان مختلف. واقف صحره الدنيا ليل وقدامي في كذا خيمه. في واحده عدت من جمبي. كان شكلها غريب. لبسها قديم جدا. كانت شايله حاجه صغيره في ايديها. وقفت قدام خيمه كان في اتنين. قدام الخيمه بيحرسوها وماسكين سيوف في ايديهم. واحد منهم دخل الخيمه وبعدها خرج والست دي دخلت. اتحركت ودخلت وراها. الظاهر ان محدش شايفني. الست دي كانت قاعده علي ركبتها وقدامها كان واقف شخص. برضه لبسه كان غريب لكنه مش لابس حاجه في النص جسمه اللي فوق. واضح ان دي تقاليدهم. الست مدت ايديها وقال.
الست: اتفضل يا مولاي. دي الهديه اللي وعدتك بيها
_ الملك ده خد منها الحاجه اللي كانت في ايديها ولما ركزت اكتر اكتشفت انه خاتم. لكن شكله كبير وبيلمع بشكل مش طبيعي. مسك ايدها وقومها وفضل يبص للخاتم وقتل
: اخيرا. دلوقتي محدش هيقدر يقف قصادي. دلوقتي هبقا انا الملك الحقيقي لوادي الجبل. لازم الكل يعرف ان اللي هيفكر يقف قصاد الملك تميم الغول. مصيره هيكون الموت.
_ الملك تميم لبس الخاتم. وفي لحظه المشهد اتغير كنت واقف في ارض صحراويه بالنهار. علي يميني جنود كتير وعلي شمالي جنود اكتر. بوق الهجوم اتضرب. وبدات المعركه وانا في النص. غمضت عيني. وفتحها بعدها بثواني عشان الاقي نفسي واقف بليل قدام خيمة الملك تميم. كان قاعد قدامه علي الارض 3 اشخاص. الملك تميم كان واقف والدم مغطي جسمه. واتباعه واقفين حواليه. واحد من اللي كانو علي الارض اتكلم وقال.
: اوعا تفتكر انك عشان فوزت في المعركه يبقا انت الملك لوادي الجبل. انت عارف ان انا الوريث الشرعي الوحيد بعد. ابوك الملك الغول.
الملك تميم: ده كان زمان. لكن دلوقتي قدامك حل من اتنين. يأما تركع قدامي. وتعترف ان انا الملك الوحيد. وقتها ممكن اسيبك تعيش. انت ومعاون الملك. ومستشار الوادي. او ترفض وتموتو كلكم.
: وانا مش هعترف ان انت الملك. لأن انا عارف انت هتعمل ايه لو انا اعترفت. وادي الجبل هيبقا عباره عن موت ودم. بسببك.
الملك تميم: شكلك مش واخد بالك انا كده كده بقيت الملك خلاص. وانت مش هتفيدني بحاجه والكلمه اللي انت مش عايز تعترف بيها لسكان الوادي. انا هخليهم يصدقوها. بالدم.
_ الملك تميم امر الجنود يقتلوهم ويدفنوهم بعيد علي القبيله. بعدها المشهد اتغير. كنت واقف في نفس المكان. والست اللي اهدت الخاتم للملك تميم كانت واقفه وواقف جمبها شاب. قدامهم حفره كبيره. جواها الملك تميم وهو ميت. وجمبه حاجه بتلمع. الخاتم. الست مسكت كتاب وفضلت تقول كلام غريب وبعدها ردمو الحفره. في الوقت ده حسيت بوجع شديد في دماغي. فتحت عيني. ولاقيتني واقع علي الارض في بيت الدجال. وكل حاجه زاي ماهي. لكن الغريب انه كان واقف قدامي. الملك تميم. قمت وقفت وفضلت اقرا قرآن كتير. حسيت انه بدأ يغضب. اتكلم وقال.
الملك تميم: اسكت عشان اقدر اساعدك.
_ وقفت قرايه وقلتله.
الشيخ عابد: تساعدني ازاي
الملك تميم: اولا انا مش الملك تميم. انا حارس الخاتم. كل اللي انت شوفته ده انا اللي ورتهولك عشان تعرف الحقيقيه. واللغه اللي كانو بيتكلمو بيها انا ترجمتها للغتك عشان تقدر تفهم. لكن في اجزاء نقصه.
المكان ده من سنين طويله. كان وادي كبير. اسمه وادي الجبل. الوادي ده. كان في 6 قبايل. كل قبيله ليها ملك بيحكمها. الا قبيله واحده. قبيله الملك الغول. الملك الغول كان بيحكم كل القبايل. الملك الغول كان عنده ولدين. تميم. وساكن. بعد موت الملك الغول. كان الوريث الشرعي هو الأبن الأكبر ساكن. لكن تميم رفض ده. خرج من القبيله. وعاش سنين في الجبل. عمل قبيله لوحده. وجمع فيها اشخاص كتير من المطاريد واللصوص والقتله. حاول يقتل اخوه اكتر من مره. لكنه كان بيفشل. لحد ما قابل. سليله. كانت ساحره كبيره. قلها انه عاوز حاجه تخليه قوي. يقدر بيها ياخد الملك من اخوه. الساحره سليله. صنعتله خاتم. مصنوع في عالم الجن.
الخاتم ده اللي بيلبسه بيبقا عنده قوه وملك وكل مايتمناه. الملك تميم لبس الخاتم وهزم الملك ساكن في ارض المعركه. بعدها قتله. لكن الناس في الوادي مكانوش معترفين ان هو الملك. عشان كده بقا يقتل اي شخص يرفض ده. عدت سنين طويله. سنين من الموت والجشع والدم. لحد ماظهر شاب قوي. اسمه سراج. سراج كان ابن الملك ساكن. لكن تميم مكنش يعرف. سراج هرب. من القبيله. واتربه وكبر مع واحد من الفرسان. الساحره راحت لسراج واتفقو انهم يقتلو الملك تميم. لأن ظلمه زاد. وأدي مهله للساحره انها تعمله سحر يخليه يعيش للأبد. والا هيمومتها. سراج وسليله قتلو تميم. وسليله عملت تعويذه علي الخاتم ودفنته معاه. سخرت كائن يحرس الخاتم واي حد ينبش في المقبره هتصيبه لعنه هو وكل اللي حوليه. لحد. الدجال كارم ماوصل هنا ونبش في المقبره. وقتها اللعنه حلت، علي البلد كلها. انا اللي سحبت كارم لحد هنا. عشان انت تيجي.
الشيخ عابد: يعني ايه عشان انا اجي وانت تعرفني منين
حارس الخاتم: انا لازم اتحرر من القبره ومن العهد اللي عليا. لكن عشان التعويذه تتفك. مفيش غير حل واحد ان يلبس الخاتم حد قلبه صافي. مفيش في غل ولا كره. ولا يستخدمه في الشر والقتل. انا كنت بشوفك من زمان طويله. واتأكدت انك هتيجي هنا. لأن انت الشخص الوحيد اللي هيفك العهد ويحررني. ويستخدم الخاتم في الخير. مد ايدك يا عابد البس الخاتم.
_ مكنتش عارف اتصرف ازاي. لكن في حاجه جوايا بتشدني اني اخد الخاتم. فضلت احفر ب ايدي في الحفره اللي في الأرض. لحد ماظهر قدامي. مسكته ولبسته. حسيت بشعور غريب. مكنتش عارف اميز انا حاسس ب ايه. لكني خدت عهد علي نفسب اني مش هستخدم الخاتم غير في الخير وبس. بعدها البلد رجعت طبيعيه زاي الاول وكل حاجه اتنهت وانا رجعت لحياتي تاني. لكني عمري ماهنسي التجربه اللي عيشتها. هو صحيح اللعنه انتهت في البلد. لكن ابتدت معايا انا. بمغامرات مكنتش اتخيلها.
