بيت جدتي المرعب
رعب بيت جدتي في ركن في بيت جدتي مكنتش برتاح فيه كل ما اي حد يقرب منه يقول إن فيه ريحة وحشة و قلبه يتقبض و في الأرض في بقعة سودة مش بتطلع مهما تمسح فيه لما سألنا جدتي عنها كانت بتقول معرفش حاجة و بتخاف تقرب من الركن دا
كنا بنعمل زيارة لجدتي كل شهر و في مرات نبات فيه و نقعد باليومين بس بعد ما شوفنا البقعة اللي في الركن دا امي خافت نبات هناك تاني
لكن لحسن حظي في مرة اخويا الصغير كان هيعمل عملية و ابويا و امي لازم يباتوا معاه و مينفعش ابات لوحدي في البيت قرر ابويا أني ابات عند جدتي
خدني و وداني هناك و بعديها مشي كنت ناسي حوار الركن و البقعة اللي في الأرض دي و قعدت في الصالة اتفرج على التلفزيون لحد ما جدتي حضرت الأكل بعد ما جابته قالتلي انها هتدخل تنام كلت و بعديها شلت الاكل و دخلته المطبخ خرجت و دخلت الاوضة اللي هنام فيها نزلت تحت البطانية وغمضت عيني و نمت بس صحيت يومها في نص الليل على صوت حد بيحك حاجة في الأرض!!!
صوت مزعج قمت من سريري و انا فاتح عيني بالعافية لاقيت الصوت جاي من الصالة و لما خرجت لاقيته جاي من الركن الغريب اللي عند جدتي و النور كان خافض اوي كأنه مطفي قربت من الركن عشان اعرف سبب الصوت لاقيت جدتي قاعدة في الأرض و بتحاول تمسح البقعة السودة اللي قولنا عليها كانت مدياني ضهرها و عمالة تمسح الأرض جامد و بتعيط سامع صوت بكاء و معرفش ليه
قربت منها و مديت ايدي على كتفها و انا بقولها
ـ بتعملي ايه يا تيتا
في نفس اللحظة الصوت وقف و حركتها دي وقفت و لفت ليا بحركة بطيئة اوي لحد ما ظهرت قدامي واحدة تانية غير جدتي خالص واحدة وشها مشوه و شعرها فيه فراغات كتير و جلدها مجعد اوي و شكله مش حلو و عليها غضب ربنا وخارج من راسها دخان ابيض
انا لما شوفتها مبقتش عارف اعمل ايه و مش فاهم دي مين بس في نفس اللحظة دي سمعت صوت جدتي بتنده عليا من ورايا بصيت لاقيتها بتقولي :
ـ بتعمل ايه عندك ؟!
لفيت وشي ليها و بعدين بصيت تاني للركن دا ملقتش الست اللي كانت قاعدة اختفت من مكانها مع ظهور جدتي
قربت جدتي مني و شدتني من ايدي و دخلتني الأوضة و حظرتني أخرج الصالة تاني في وقت متأخر أو اقرب من الركن دا
الغريب أنها بعد ما دخلتني الأوضة فضلت اتصنت على اللي بتعمله و سمعتها بتتكلم مع حد بتوجه كلام لشيء انا مش قادر اشوفه و بتقوله
ـ متقربيش من حد تابعي تاني انا حظرتك
قالتها و دخلت الاوضة و اليوم عدى و من ساعتها مقررتش البيات عند جدتي تاني و معرفش هي بتعمل ايه في شقتها و معرفش يومها كانت بتكلم مين و ايه سر الركن دا؟!!
