مراتي باعتني عشان الفلوس-الجزء التاني
الجزء الثاني
ردت عليا باستهزاء وسخرية وقالتلي انت عايزني اسكن في بيت عيلة فوق أمك وعايز تشتريلي شقة أي كلام وخلاص وتعملي فرح كده على القد ونعيش من الملاليم الي هتاخدها من شغلك عند صاحب أبوك لا انت لسه لحد دلوقتي مش عارف شروطنا وأنا أهلي وعلى كل حال انت كلامك مش معايا كلامك لازم يكون مع أهلي أنا هبقى اضبطلك معاد معاهم عشان تيجي ويتفاهمو معاك على كل حاجة'' وقامت بكل برود وسابتني من غير ما تستنى ردي وكأنو أمر واقع لازم أرضى بيه حتى لو مش عايز.
روحت يوميها وأنا هموم الدنيا كلها فوق كتافي كنت زعلان قوي ولما أمي شافت حالي ده سألتني مالي حكتلها الي حصل لقتها بتقولي'' بص يا ابني أنا أكبر وأوعى منك وعندي خبرة في الحياة أكتر منك أنا أقدر افهم الناس من كلامهم وطريقة تفكيرهم وعلى حسب الي انت حكيتهولي عن البنت ديه أقدر اجزم انها بنت مادية كل همها الفلوس و بس صدقني يا ابني ديه واحدة طماعة مش فارق معاها حاجة غير جيب الراجل الي هتتجوزو بس مش هامها حاجة تانية عشان كده أنا رأيي انك تبعد عن البنت ديه و تحاول تنساها لأنك هتتعب معاها قوي"
زعقت برفض وانا بقول '' لا يا ماما انا مش ممكن أبعد عن هالة انا بحبها قوي وما قدرش أعيش من غيرها ابدا انا هعملها كل الي هي عايزاه هشتغل ليل نهار واوفرلها كل طلباتها هي وأهلها بس مش هبعد عنها أبدا انا ممكن اموت ولا يجرالي حاجة لو بعدت عنها عشان خاطري يا ماما خالينا نروح نقابل أهلها ونحاول نضبط الوضع معاهم يمكن نقدر نوصل لحل وسط ''
ردت عليا أمي بزعل وقلة حيلة'' ماشي يا ابني نروح نقابل مين عارف يمكن يكونو ناس محترمين ويعرفو يتفاهمو مع بنتهم'' وفعلا رحنا قابلنا أهلها لكن لقيت رد عمري ما توقعتو استغربنا اوي انا وامي لما لقينا ابوها بيقولي'' بص يا ابني هالة ديه بنتي الوحيدة الي مليش غيرها يعني يا افرح بيها كويس واطمن عليها يا لا وانت عارف الأب لازم دايما يغلي بنتو عشان تبقى كبيرة في عينين جوزها واهلو عشان كده انا عايز بنتي تعيش في بيت ملك و تكون شقة فخمة في مكان راقي وعايزلها شبكة ب100 الف جنيه و مهر 250 الف جنيه 100 الف مقدم و 150 الف مؤخر ده غير انو قبل الجواز لازم نعمل قايمة تضمن حقها الكامل و تكون القايمة ديه على كيفنا من غير ما تتدخل فيها ابدا ده غير انو لازم يكون وضعك المادي كويس و يكون عندك شغل ثابت بتقبض مرتب كبير عشان توفر لبنتي كل احتياجاتها و طلباتها واهم حاجة الفرح لازم يتعمل في قاعة فخمة و تشتري لبنتي الفستان الي هي عايزاه لأننا مستحيل نقبل انها تأجر فستان و لازم يكون ماركة و تاخدها عند احسن ماكاب ارتيست في البلد ها هتقدر انت و اهلك على طلباتنا''
بصتلو و انا متنح و مستغرب و امي كانت مستغربة اكتر مني بس حبي لهالة خلاني اتغاضى عن كل ده وقلت'' طبعا يا عمي هنفذ كل الي انتو عايزينو بس انا طالب من حضرتك مهلة كدة سنتين تلاتة على ما اقدر اجهز كل طلباتكو''
رد علي أبو هالة بكل تكبر وغرور وقال بنبرة كلها احتقار
