عبدة الشيطان والفيلا الملعونه الجزء الرابع

3 دواير جنب بعض وكل دايره جواها مثلث وكل مثلث فيه رموز عند كل زاويه من زوايا المثلث وبين كل دايره والتانيه رسمه شبه رسومات راس الشيطان ورجع النور الاحمر يظهر تاني ويتسلط علي الحيطه الموضوع ده ماخدش اكتر من ثواني وكل حاجه رجعت زي ما هيه تليفوني رن ولقيت سراج الفراش هو البيتصل  

رديت عليه لقيته بينهج جامد وبياخد نفسه بالعافيه وقالي فيه حاجات غريبه بتحصل جوا المدرسه فيه اصوات كتير محدش يقدر يتحملها مكنتش بتحصل قبل كده من ساعة ما انت جيت والدنيا باظت انا خايف اخرج من الاوضه وبعدها السكه اتقفلت حاولت اتصل بيه تاني بس تليفونه كان مقفول الحقيقه انا كنت ناوي اقوله خليك جوا الاوضه ومتخرجش لحد ما الفجر ياذن

طبعا هتقوله عليا جبان كان المفروض اني اروحله انا مفيش حاجه بيني وبينه تخليني اخاطر بحياتي في حاجه زي كده مكنش عندي حاجه اقدر اساعده بيها اذا كان هو العايش هناك مش عارف يحل لنفسه المصيبه دي بدات افكر واسال نفسي ليه كل ده بيحصل دلوقتي وليه اتكرر مع دخولي المدرسه

وايه الصوت الانا سمعته وقالي ان انا الوحيد المخوفتش هل عدم خوفي كان سبب لظهور البنت دي هل البنت دي وراها سر بتحاول تقوله لحد عنده الشغف والجراه انه يكمل ورا العلامات والرموز دي اكيد فيه اسرار كتير في الموضوع ده ولازم اعرفها ولا يمكن يكون كل ده متهيالي اتصلت بعلاء صاحبي

كان لسه صاحي سالته عن المدرسه وسالته عن اصل وجودها وحكيتله كل الحصل رد عليا وقالي الاعرفه يا عماد ان المدرسه دي كانت فعلا فيلا زمان واتهدت من 10 سنين لما كتر الكلام عليها انها مسكونه انا لا بقتنع بالكلام ده ولا بصدقه بيقولو الارض بتاعتها فضلت فاضيه مده كبيره

ومن سنتين لقينا الدوله بدات تبني علي الارض المدرسه دي قولتله الكلام الانت بتقوله ده مش ده الكلام الانا عاوز اسمعه قالي سيبني اكمل للاخر وهفهمك البسمعه من زمان لاني من سكان المنطقه دي وانت عارف ان الفيلا دي كانت بتاعت مجموعة شباب والله اعلم كان بيتقال انهم كانو بيمارسو فيها عبادة الشيطان

وسمعت كمان ان سكان المنطقه كانو بيسمعو اغاني بصوت عالي ومزعجه طالعه من الفيلا بليل واكتر من مره الناس تشوف مجموعة الشباب دي يتتحرك حوالين الفيلا لبسهم كان غريب واشكالهم كانت غريبه ودقونهم طويله اوي وملامحهم مش باينه من كتر ما مطولين شعرهم وكان بيتقال عن المكان ده ان كان ريحته وحشه اوي 

كانه مقلب زباله ومستحيل ان اي حد يتحمل الريحه دي وسمعت ان في مره واحد من الكانو بيلمو الزباله وعلب الكرتون دخل الفيلا لما دخل الفيلا لقي دم سايل علي رسومات مرسومه علي الارض والناس كانت بتتنقل الكلام من حد لحد والكلام في الاخر اتقال انه تخاريف سالته هي الرسومات دي كانت عباره عن ايه

قالي الناس كانت بتقول انها دواير ومثلثات وحروف مش مفهومه قولتله وانت سيبتني اروح المكان ده وانت سامع الكلام الغريب ده عن الفيلا دي افرض كان حصلي اي حاجه او اي مصيبه قالي بقي انا غلطان اني شوفتلك مكان تحل بيه مشكلتك كنت هفكر ساعتها المكان مسكون ولا مش مسكون

وبعدين عيب عليك انك تصدق في الكلام ده وانت راجل متعلم قولتله طب كملي الانت تعرفه عن الفيلا دي قالي انا بحاول افتكر لان الكلام ده من زمان اوي وانا كنت صغير بعدها الناس قالت الشباب دي اختفت تماما وبعدها الشرطه اتدخلت وبدات تحقق في الموضوع ده وكان فيه هوجه كبيره ايامها عن اماكن كتير بيمارسو فيها عبادة الشيطان