الكابوس قصه حقيقية
قمت من النوم مفزوعه ساعتها مكنتش عارفه انا لسه في الكابوس ولا انا قمت خلاص
مش هتتخيلوا حصلي ايه ولا ايه اللي انا شفته في الكابوس دة وهل انا كنت نايمه اصلا ولا دة كان مجرد كابوس وخلاص بس اللي فهمته بعد كدة خلاني اكتشف انها كانت علامه من ربنا لحاجة كبيرة اوي كان لازم اعرفها ...
من لما كنت في اعدادي وانا بدأت احلم بكوابيس تقريباً ٥ مرات في الاسبوع كانت كوابيس مش مفهومه اوي بس اللي كنت بحسه اني صاحيه مش نايمه وكأن في زلزال في الاوضه اللي انا فيها بس مش عارفه اتحرك ولا اتقلب
لدرجه ان مره صحيت لاقيت نفسي مش عارفه اتحرك ولا يمين ولا شمال وعيني مفتحه وعايزة اقوم من علي السرير كنت نايمه علي جنبي اليمين وكنت حاسه ان في حد واقف ناحيه ضهري وكان واقف بيتكلم كلام غريب معرفتش افهمه حتي وفضلت اقرأ قرآن في سري لان شفايفي كانت متمسمره وكل جسمي حتي مش قادرة احرك صبعي
وفجأة لاقيت نفسي صحيت استغربت جداً وقتها
ازاي؟؟
انا اصلا كنت صاحيه صحيت تاني ازاي ؟
هو دة كابوس.؟ بس معقول الإنسان يكون في كابوس بس حاسس انه ف الحقيقه اوي كدة ؟
وفضلت علي الوضع دة لحد ما كبرت واتخرجت
طول الفترة بيجيلي كوابيس من النوع دة غريبة جدا لحد في مره ما جالي الكابوس الكبير اللي من بعدها عرفت فيه ايه اللي بيحصلي .......
كنت نايمه في اوضه وكانت الاوضه فيها سريرين وكنت عاطيه ضهري للسرير الفاضي وكنت خلاص في بدايه اني بفوق من النوم وهبدأ استوعب الدنيا مره واحدة لاقيت نفسي فتحت عيني وكالعادة متمسمره يعني مش قادرة اتحرك وخايفه جدا وعايزة اقوم مش عارفه وانا نايمه دايما بغطي وشي فكنت عايزة اشيل من علي وشي الغطا حتي مش عارفه وانا كنت متأكدة اني صاحيه زي ما انت حالياً متأكد انك صاحي وبتقري القصه كدة بالظبط
وعايزة احرك ايدي ومش عارفه فجأة الاقيت نفسي كنت بحلم وصحيت وقولت الحمدلله دة كان كابوس زي كل مره وفعلاً المرادي حركت ايدي بتقل وببطئ شديد وشيلت الغطا من علي وشي بس لما جيت اتقلب ناحيه السرير الفاضي معرفتش !!!!!
فجأة لاقيت نفسي صحيت تاني قولت وبعدين؟؟؟ يعني انا بحلم اني بحلم اني في كابوس؟
المهم المرادي صحيت وشيلت الغطا من علي وشي ولفيت ناحيه السرير وقمت بس اول ما قمت من علي السرير بدأت اتحرك لا إرادياً واتجهت ناحيه مرايه طويلة عند الدولاب وفضلت باصه علي نفسي في المرايه كتير لحد ما جت صاحبه ممتي اللي معرفش اصلا انها كانت عندنا جاتلي وحطت ايديها علي كتفي وقالتلي (مالك يا بنتي انتي كويسه؟ وشك مخضوض كدة ليه اجبلك كوباية مايه ؟؟!) ياريت كلنا واحنا بنقرا نفضل فاكرين الجمله دي كويس اوي اللي صاحبه امي قالتهالي .
فجأة
لاقيت نفسي صحيت للمره التالته وفهمت هنا اني ف دايرة ف الكابوس ومش قادرة اخرج منها بس المرادي كانت غريبة جدا ومخيفه جدا ساعتها شيلت الغطا من علي وشي ولفيت ناحيه السرير الفاضي بس مقمتش انا لاقيت علي السرير الفاضي قطه بيضه القطه دي كان حجمها متوسط مش كبيرة ومش صغيرة كانت بتنونو جامد لدرجه ان فكها اتفح جامد وطلعت من بنت !!!!
بنت كانت لابسه عباية بيضه وشعرها كان طويل جدا ولونه اسود اوووووي وخليكوا فاكرين بردوا اني اول مره كنت اشوف البنت دي ملامحها كانت جديدة عليا لان الجزء دة يدل علي شئ هقولهلكم في نهايه قصتي
البنت دي ساعتها مسكتني وربطت ايدي علي ورا وجه وقف قدامي واحد شكله مش بني ادم اصلا شكله غريب جدا كان ماسك ف ايده زي مثلث وبيحاول يحطهولي في بوقي وانا كنت قافله بوقي ساعتها مرضتش آخده وكانت البنت اللي ماسكاني مكتفاني بتقول كلام وبتردده كانت ساعتها بتقول بالمرض ، بوقف الحال ، بالتعب ، بالعطله ، ويطلع في عيالك ..... وكانت بتكررهم كتير جدا
كل دة وانا عماله في سري اقول يارب حد يدخل الاوضه دلوقتي يصحيني واخرج من الحلقه المغلقه اللي مش عارفه اطلع منها دي
كنت كل ما اصحي الاقي نفسي لسه في الكابوس مكنتش بفكر ف حاجة غير ان حد يدخل الاوضه يصحيني فعلا
وفجأة لاقيت نفسي صحيت بس المرادي طلعت اجري برا الاوضه خالص ورحت لامي وانا بنهج جامد واقولها انا صاحيه؟ انا صاحيه يا ماما؟ ووشي مخضوض وشفايفي لونها ابيض وعماله اقولها انتي مصحتنيش ليه انتي سيباني ف الاوضه مش عارفه اطلع كل دة ليه ؟؟؟؟
ومره واحدة لاقيت صاحبه امي اللي جاتلي في الكابوس قالتلي انتي كويسه؟
تخيلوا حصل ايه؟؟ جت حطت ايديها علي كتفي فعلاً وقالتلي (مالك يابنتي انتي كويسه؟ وشك مخضوض كدة ليه ؟ اجبلك كوباية مايه؟ )
لكم ان تتخيلوا انا حسيت ب ايه ؟؟؟؟؟
هو ازاي تقول نفس الكلمه بالنص كدة زي اللي في الكابوس ؟؟؟
قولتلها اه عايزة كوباية مايه قولتها وانا مصدومه
امي ساعتها قالتلي انا كنت داخله الاوضه اصحيكي عشان عارفه انك بتحلمي ساعات بكوابيس وجيت لحد باب الاوضه وفي حاجة رجعتني تاني
حكيت لامي علي اللي شفته وقالتلي متفسريش حاجة وخير ان شاء الله مفيش حاجة بعديها بكام يوم بالظبط لاقيت مفسرين وانا بقلب علي مواقع التواصل في جروب دخلت جروب منهم وبعت لمفسره علي الخاص عن الكابوس دة
ولما قالتلي تفسيره الحقيقه اتخضيت جدا قالتلي ان في حد عاملي عمل او سحر بوقف الحال في الجواز والشغل وكل حاجة حتي قربي من ربنا والعمل دة انا
أكلاه سألتني المفسره قالتلي انتي عارفه شكل البنت اللي كانت في الكابوس اللي طلعت من القطه البيضه قولتلها اه كان شعرها اسود وطويل وكانت لابسه عباية قصيرة بيضه قالتلي وشها مألوف بالنسبالك ولا كان أول مره تشوفيها
قولتلها الحقيقه كانت أول مره اشوفها وشكلها مش مألوف بالنسبالي
قالي كدة معناه ان اللي آذيكي وعاملك السحر دة أنتي مأذتهوش في حاجة وهو مش بيحبك بدون ما تأذيه
قالتلي حصني نفسك واقري سورة البقرة كل يوم والاذكار وواصبي علي الصلاه
قولت يمكن عندها حق انا شاكه من زمان ان في حاجة مش طبيعيه كل ما اروح شغل فعلاً بمشي منه وبتخنق ومش بستحمل وكل ما يتقدملي عريس ارفضه وكل ما احاول اني اصلي كانت الصلاه بتكون تقيلة عليا فعلاً
ساعتها كنا داخلين علي شهر رمضان والحقيقه اللي مبحبش اقوله عشان محدش يفهمني غلط ان دة اكتر شهر بكرهه في حياتي وبيكون تقيل عليا جدا ومش بيعدي وببقي مخنوقه في كأن حد ماسك رقبتي جه شهر رمضان بصوم وكل حاجة بس الصلاه بتكون تقيلة عليا جدا فضلت اجاهد في نفسي لحد ال ١٠ الأواخر من رمضان وهنا حقيقي اتغير كل حاجة وحياتي اتبدلت تماماً وبدأ يحصل معايا معجزات بمعني الكلمه
كلنا عارفين ان ليلة القدر مش معروفه امتي بالظبط في العشرة الاواخر بس بتكون ليله فردية وقفت في بلكونه بيتنا في يوم ٢٧ رمضان بليل ودعيت لربنا
طلبت منه بكرمه انه يقربني ليه ويحببني في الصلاه وفي العبادة ويرزقني ويبطل السحر وفضلت الح في الدعاء من كل قلبي ودخلت نمت صحيت تاني يوم الصبح صحيت دخلت اتوضيت وصليت ولبست انا وامي واختي عشان نروح لجدتي في الارياف نفطر معاها رحنا لجدتي وكنت طول اليوم الصلاه خفيفه علي قلبي جدا وكنت لاول مره بستني الأذان يأذن وعشان اصلي وطول اليوم بستغفر ربنا ومواظبه علؤ الاذكار بتاعت الصباح والمساء وكنت برقي نفسي وكنت بسبح طول اليوم مش ببطل بمعني الكلمه كنت مستغربة نفسي جدا وفي نفس الوقت مبسوطة جدا
ازاي؟ انا اللي كنت ببقي متوضيه والصلاه تقيله عليا جدا كدة بقيت بستني الأذان عشان اصلي؟؟؟
يوميها بعد ما خلصنا فطار كنا قاعدين مع جدتي وخالاتي كلنا متجمعين وصدفه فتحنا موضوع الاحلام وقولتلهم علي اللي انا حلمت بيه وان في واحدة مفسره فسرتهولي وقالتلي انه سحر بوقف الحال
لاقيت جدتي بتقولي احنا عندنا هنا في الحاره واحدة اسمه الشيخ محمود دة كباره ومبروك وبيرقي اي حد بيعرف هو كان في ايه
وفعلاً اتصلوا بيه وجالنا وقتها انا كنت بصلي وحط ايده علي راس اختي الكبيرة وقال الرقيه الشرعيه وقالها انتي محسودة بس مفيش حاجة متقلقيش ولعي بخور واقري سورة البقرة وان شاء الله العين والحسد هيزولوا
وقتها خلصت صلاه وهو مكنش يعرف هو جي لمين حتي ولا اي حاجة اول ما دخلت لاقيت راجل وشه ابيض كأن طالع منه نور وشكله مبروك جدا وبتاع ربنا بصلي وقالي اقعدي يا بنتي وشاورلي اقعد جنبه حط ايده علي راسي وبدأ يقول الرقيه الشرعيه واول ما خلص............
انا ذات نفسي اتخضيت من رد فعله لانه مش من الشخصيات الهواله اللي بتكبر المواضيع وبيحاول انه يبسط الامور وميكبرهاش بس رد فعله كلنا استغربناها
اول ما خلص حط ايده الاتنين علي وشه وفضل منزل راسه تحت لمده دقيقتين وفضل يقرا قرآن ويقول لا حول ولا قوة الا بالله
قولتله خير يا شيخ في ايه؟!؟!
قالي خير ان شاء الله طول ما انتي قريبه من ربنا خير
وقالي حاجة استغربتها جدا قالي انا عارف انك الفترة دي بتجاهدي نفسك وبتقربي من ربنا وخلي بالك دة في صالحك طول ما انتي قريبة مفيش حاجة هتأذيكي استغربت هو اصلا عرف منين اني فعلاً الفترة دي قريبة اتأكدت ان الراجل دة مبروك فعلاً
قالي انتي معمولك عمل مأكول من واحدة انتي مأذتهاش وللأسف في خادم سحر مسخر ليكي بييجي يحطلك كل معاد معين السحر في الاكل تاني عشان يتجدد بس انتي حالياً بتحرقيه ادعي ربنا لو عايزة تعرفي مين اللي عملك السحر دة وان شاء الله تعرفي
انا ساعتها اتأكدت من كلام المفسره لانه كان نفس الكلام بالظبط وقولت خلاص بدل انا قريبة من ربنا انا متحصنه مفيش حاجة هتأثر فيا بإذن الله ونمت عادي وعدي ٣ ايام وافتكرت ان الشيخ قالي ادعي ربنا يبينلك مين اللي عملك السحر .........
فتحت النت وبحثت عن ادعيه تبينلي مين عاملي السحر ودعيت من قلبي لربنا دعوة مظلوم وكان عندي ثقه في ربنا كبيرة اوي
انه هيسمع دعائي زي ما تقبله ليلة القدر
وفعلا بعديها بيومين بالظبط جالي في الحلم مين اللي عملي السحر وحقيقي مش هتصدقوا لانها الانسانه الوحيده اللي مجتش في بالي حتي شكيت في ناس كتير واصدقاء مقربين كتير الا هي
الحلم كان عبارة عن اني كنت واقفه في البيت وجرس الشقه رن وفتحت الباب
دخل واحد لابس لبس صياد معاه هدية وقالي انا لاقيت دة في البحر واداني الهدية قولتله ايه دة؟ قالي دة سحر قولتله مين قالك انه بتاعي لاقيته طلعلي ورقه شهادة ميلادي وشاورلي علي اسمي وعنواني وقالي هو دة اسمك ؟؟؟ قولتله اه قالي ودة عنوانك؟؟؟ قولتله اه قالي الورقه دي كانت مع السحر
انا اديتك الحاجة اللي تخصك عايزة تفتحي تشوفيها شوفيها بس متفتحيهاش اكتر من مره
الحقيقه انا خفت حتي اني امسكها وحسيت ان الراجل دة فاهم في الحاجات دي اوي خاصتاً انه قالي انا بلاقي من الحاجات دي كتير في البحر قولتله طب حضرتك متعرفش مين اللي عملهولي والحقيقه قالي اسم انا معرفهوش قالي مني سليمان ؟؟؟؟؟
قالي انا هفكهولك ومسكه وبدأ يحطه في مايه بملح ويقرأ عليه قرآن
بعد كدة صحيت مفزوعه وصوت وقعدت كدة بسرعه اختي اتخضت قالتلي في ايه؟
قولتلها انا عرفت مين اللي عاملي السحر
قالتلي مين قولتلها الراجل قالي في الحلم علي واحدة اسمها مني سليمان !!!!!
قالتلي ايه؟
قولتلها انا معرفش الاسم دة
قالتلي دي بنت عمتك .............
استغربت جدا وقتها قولتلها ازاي بنت عمتي اسمها مني محمد
قالتلي اسم ابوها الحقيقي في البطاقه سليمااااااااااااااان
ودي الصدمه ال ١٠٠ تقريباً من اللي بيحصل معايا
ازاي احلم ب اسمها حقيقي اللي ف البطاقه مش الشهره اللي انا اعرفها بيه
يعني حتي لو عقلي الباطن بيفكر فيها هيجيلي بأسمها اللي انا اعرفه مش اسمها اللي معرفوش
استغربت جدا وبدأت اسأل نفسي طب ليه يا مني تعمليلي سحر دة انا آخر مره شفتك فيها كنت طفلة بالنسبالك !!!!!
وانا صغيرة كنت بروح ابات انا واختي عند عمتي اللي مني تبقي بنتها اللي عملالي السحر
كنت طفلة صغيرة لسه بلعب العرايس وهي كانت عروسة كبيرة علي وش جواز بس من وانا صغيرة كانت بتفضل تقرصني كأنها بتهزر معايا وكانت بتخلي اختي كمان تعمل كدة معاها وكانت بتغلس عليا جدا كأنها كانت بتطفشني وكانت بتفضل تقولي انتي وحشه وشكلك وحش مع اني كنت جميلة جدا ومحبوبة جدا
بدأت اجمع كل حاجة كانت بتعملها
يوميها كانت امي في الشغل اتصلت بيها وقولتلها علي الرؤيا اللي ربنا بعتهالي عشان اعرف مين اللي آذيني
امي ردت عليا رد استغربته جدا قالتلي انا كنت عارفه هي من زمان وهي مش بتحبك وكنت بكذب نفسي وبفضل اقول ليه هتكره طفلة صغيرة
الحقيقه معرفش ليه هي كانت بتكرهني لحد دلوقتي بس اللي حصل بعد كدة
اني محكتلهاش ولا حتي واجهتها وشفتها صدفه مرتين في تجمعات العيلة النادرة جدا وكانت مكشره جامد في وشي وغضبانه وكأني قتلتلها قتيل وكانت بتحتقرني وكانت بتدايق كل ما تشوفني بضحك
فضلت مواظبه علي الصلاه والحمدلله وقف الحال اتفك وجالي صاحب النصيب واول مره حد يجيلي واحس اني مرتاحه وفي قبول مع انه مكنش احسن من اللي قبله خالص بس حقيقي المرادي كانت نظرتي مختلفه وبقيت حاسه بتفائل حتي الكوابيس مبقتش بتجيلي
وفي مره كنت قاعدة دعيت ربنا ييسرلي أموري لاقيت بعدها ب ٥ دقايق صديقه ليا بتكلمني وقالتلي في شغل ليكي كويس وعرفت تفاصيله ورحت اشتغلت وارتحت جدا في شغلي وساعتها بس حسيت ان فعلاً انا كان موقوف حالي وان اللي كان بيحصل معايا مش طبيعي
وسبحان الله مش هتصدقوا حياة بنت عمتي اللي آذتني حالياً هي اللي واقف حالها في دنيتها كلها وفي عيالها وكما يقال السحر ينقلب علي صاحبه . اتطلقت من جوزها وعيالها دايما تعبانين وهي وضعها الصحي والنفسي مش كويس خالص عرفت ان ربنا جابلي حقي منها وان دعوتي ليلة القدر ان ربنا يبطل السحر اتحققت بس الحقيقه ان كل يوم معين في السنه لما القمر بيكتمل تماماً غالباً في شهر ٨ السحر بيتجدد من جديد عليا وبرجع يتوقف حالي تاني واشوف الدنيا باللون الاسود لكن انا بجاهد نفسي دايما وبقربي من ربنا وبتحصيني لنفسي كل حاجة بتبقي كويسه
الدعاوي ليلة القدر تستجاب
الدعوة من المظلوم تستجاب
الدعوة من القلب بألحاح تستجاب
تمت
#الكاتبة_آية_الياباني
