الروح السوداء الفصل الثاني عشر والاخيررر
الروح السوداء
الفصل الثاني عشر(الاخير)
ابتدا الشيخ انور يمسك الحديدة قصاد نظرات قلق وتوتر من اللى موجودين، وقبل ما يعمل بيها اي حاجة قاللي:
- مش عايزك تخافي، لو السحر ممكن نخلص منه دلوقتي يبقى هيحضر ويقول طلباته.
طبعا كلمة هيحضر دي فى حد ذاتها كفيلة ترعب اي حد، لكن اليأس كان اقوى سبب فى اننا نقبل اي حاجة، وبس لاختي وقالها:
- انزلي اقعدى جنبها وامسكي رجليها بحيث متحركهاش.
فعلا نزلت اختي قعدت جنبي وهي قلقانة ومتوترة، مسك هو الحديدة وحط طرف منها عند بطني من تحت وابتدا يقرأ ايات، وابتدا يقول:
- لو انت سبب فى التعب اللى هي فيه ده احضر....احضر احضر احضر.
ويحرك الحديدة لفوق شوية ناحية المعدة ويكرر ويقول:
- لو انت سبب وقف حالها احضر...احضر احضر احضر.
ويكرر يقرأ ايات ويرجع يقوله تاني:
- لو انت سبب الاذى اللى هي فيه احضر...احضر..احضررر.
كل مرة بيقولها فى مكان مختلف عن بطني، من اول معدتي لحد اخر جزء فى بطني من تحت وفجأة قاللي:
- ضمي رجليكي الاتنين على بعض، خلي صوابع رجليكي الكبيرة تلمس بعضها...وغمضي عنيكي، وخليكي ثابتة واوعي تتحركي.
عملت اللى طلبه واختي ضغطت على رجلي وقالها وهو بيمد الخرطوم السليكون ليها:
- امسكي طرف الخرطوم ده وحطيه تحت بطنها واضغطي عليه.
فعلا عملت كده وانا حاسة اني اعصابي كلها سايبة وجسمي متلج من الخوف والقلق، وابتدا يحط بوئه فى طرف الخرطوم التاني من فوق ويردد ايات وبعد كده اتكلم وقال:
- لو انت موجود معانا دلوقتي ابعد رجليها عن بعض....ابعدهم...ابعدهم...ابعدهم.
كرر الجملة دي اكتر من مرة وفجأة ومن غير ارادتي وانا مغمضة عيني وجسمي سايب حسيت بتنميل رجليا والم فيها وهي بتتحرك بعيد عن بعض...وسمعت صوت الشيخ وهو بيقول:
- اثبت...متأذيهاش، متخافش مش هأذيك...مش هضربك، مش هعذبك، لو انت سبب اللى هي فيه ده كله رجع رأسها لورا...لورا..لورا.
وابتدا يكرر الجملة دى اكتر من مرة وتاني ومن غير ارادي ابتديت رأسي ترجع لورا، علشان يرجع الشيخ ويسأله:
- لو اللى سلطتك عليها واحدة رجع رأسها لقدام...ولو اللى سلطك عليها واحد رجع رأسها لورا.
كل جملة بيقولها كان بيكررها اكتر من مرة وبيذكر ربنا فى نص الجملة وصوته بيعلى، لحد ما رأسي رجعت لقدام لواحدها وهنا سأله الشيخ بصوت عالي:
- لو انت مسلم وموحد بالله ارفع ايديها اليمين، ولو مش مسلم ارفع ايديها الشمال.
واترفعت ايدي الشمال وسمعت الشيخ بيقوله:
- اخرج والا حرقتك، ابعد عنها والا حرقتك، اخرج مش هأذيك لو خرجت، مش هضربك، مش هحرقك.
فى الوقت ده جسمي بدأ يتنفض ودموعي نازلة، مش عارفة كنت بتنفض بسبب خوفي ولا هو السبب، مش عارفة اذا كان الشيخ سبب فى جسمي اللى بيرجف ده ولا هو بيعاقبني علشان بحاول اخلص منه وهنا اتكلم الشيخ وقال بعد ما يأس من استسلامه:
- ده سفلي يا بنتي...اعوذ بالله من الشيطان الرجيم...ومش مسلم.
ماما بخوف:
- يعني ايه يا شيخ انور؟
الشيخ:
- يعني ده نجس، اتسلط عليها علشان يوقف حالها فعجبته، واخدها زوجة له، وعلشان كده بقى وقف الحال من كل النواحي، مينفعش عريس يوصل معاها لاخر مرحلة، يا هي بتتقفل منه يا هو اللى بيتقفل منها.
ماما بخوف:
- يعني ايه الحل؟ وليه بيعمل كده؟
الشيخ:
- بيعمل كده لأنها بقيت بتاعته، قاعد جوة بطنها، اتنفخت بالشكل ده لأنه عايش على النجاسة، الدم الفاسد اللى المفروض بيخرج من جسمها كل شهر هو بيحتفظ لنفسه بجزء منه علشان يتغذى عليه، حتى الفضلات اللى جسمها المفروض بيتخلص منها هو بيستخبى جواها عند معدتها بالظبط.
طبعا هو كان بيقول كده وانا بعيط وامي كمان بتعيط، انا لسه قاعدة على الارض زى ما انا واختي جنبي ومصدومين من اللى بيتقال، كمل هو وقال:
- جن حرامي، بيسرق الفلوس ويتهموكي فيها وانتي حتى مش فاكرة اللى بيتقال.
طبعا هنا كلنا اتصدمنا، يعني هند وداليا مش بيكدبوا، انا فعلا الفلوس دى ضاعت بسببي، ضاعت بسبب الشر اللى انا فيه، كمل وقال:
- بيعاشرك معاشرة الازواج ولو وافقتي على عريس او وافق عليكي بيخليه يشوفك قبيحة وابشع منه حتى لو مش وانتي قاعدة قدامه بيروحله فى منامه، او يعمل معاكي انتي كده ويجيلك فى منامك ويتصورلك فى صورة العريس ويوريلك اقبح ما فيه...اتعمل بنجاسة، وعايش على النجاسة، والتسليط غير المس يابنتي.
مروة:
- يعني ايه يا شيخ؟
الشيخ بحزن:
- يعني التسليط ده جن اتبعت ليها هي مخصوص، علشان كده عارف ان هي مكانه، مش هيسمح بأنها تبعده عنها، لكن المس بيبقى جن مش محدد الشخص اللى هيأذيه علشان كده سهل تتفاوض معاه او حتى بالضرب تخرجه من جسمها وبالقرأن لو مسلم، لكن ده متسلط ومتحضر بطريقة مينفعش ينصرف غير بيها والطريقة مفيش حد يعرف ربنا هيقبل يتبعها.
هنا بصيت امي ليا ولمروة وعرفت ان الشيخ عفيف كان كلامه صح، هو كمان قال كده واحنا كدبناه، صعبنا على الشيخ وسألنا:
- كل حاجة بأمر الله بتتحل، اه موضوعك صعب، فراقه ليكي مش هيكون بسيط ولا هنعرف نخرجه منك ببساطة، يمكن لو كان حضر كان الموضوع بقى بسيط، كان هيتكلم ويقول طلباته، لكن ده رفض يحضر ومش هيتفاوض، هو مش عايز يبعد عنك، بس احنا ممكن نلاقى حل نقدر نبعده عن معاشرتك بيه، مش هينزل السحر منك لكن هيتحبس جوة النجاسة اللى محافظ عليها جوة جوفك.
وليد:
- طيب ازاي يا شيخ يعني هى السحر ده جواها؟ جالها منين؟
الشيخ:
- ده مأكول يابني، ومأكول من سنين، وكل ما تنتهى سنة بيتجدد من تاني.
وليد:
- يعني كل سنة بيتجدد عن طريق انها تاكل سحر جديد؟ طيب ازاي يا شيخ؟ اصل الناس اللى هي شاكة فيهم مش بتتعامل معاهم، ولا حتى ليهم علاقة ببعض نهائي من سنين.
الشيخ هنا رد وقال حاجة من ابعد ما يكون عن الخيال:
- سمعت يابني عن اطعام الجن؟ اطعام المنام.
وليد بأستغراب بص لينا كلنا:
- لاء الحقيقة! يعني ايه؟
الشيخ:
- ده الساحر اللى عمل السحر ده لما سلط الجن، سلطه انه يروح لمي فى المنام ويأكلها السحر، ده اسمه اطعام الجن، وفعلا بتصحى من نومها حاسة بأن اللى حصل فى الحلم نتايجه معاها مستمرة فى اليقظة، يعني حاسة بالشبع، حاسة بريحة الاكل العفن اللى و قدمهالها لأن السحر سؤ ونجاسة بالطبع ريحته قذرة، حاسة ان بطنها منفوخة من كل الاكل وكأنها حامل...
رديت وانا بعيط:
- صح...صح انا شوفت كل ده طول السنين اللى فاتت، حصل، ولسه بيحصل.
حطيت ايدي على بطني وابتديت اعيط اكتر وامي تعيط اكتر، اتكلم الشيخ وقال:
- شوفي يابنتي ده ابتلاء، وابتلاء صعب، والتسليط لجن المنام واكلك للسحر بالطريقة دي مبينفعش حد يمنعه، ربك القادر والشافي، لكن كل اللى هقولهولك انك هتبدأئي تحصني فرجك باللي هقولهولك ده.
ركزنا كلنا معاه بعد ما كل حاجة وضحت قدام عنينا، سحب ورقة من صندوق جنبه ومد ايديه بيها ليا وقاللي:
- الكلام اللى مكتوب فى الورقة ده هيتقرأ على كمية كبيرة من المياه، واي اية قرأنية فيه تتقرأ من غير بسملة، مش انتي اللى تعملي كده...ممكن اختك او حضرتك يا استاذ.
قالها وهو بيبص لوليد اللى هز رأسه بالموافقة وهو مصدوم من اللى سمعه، كمل الشيخ وقال:
- المياه دي هتقعدي فيها كل يوم ساعة قبل النوم، وهتحطي منها فى بخاخة وبعد كل صلاة هترشي جسمك كله بيها...كل جسمك، فاهماني طبعا، وتعملي من نفس المياه دى كمية تشربي منها طول الوقت، وقبل النوم ملابسك الداخليه تكون مرشوشة بنفس المياه....ومش انتي اللى تقلبي المياه اللى تقعدي فيها.
مروة:
- وده علاج يا شيخ؟
الشيخ:
- لاء..ده بس علشان يتحبس فى مكانه، اه وجوده فى معدتها هيتعبها، هتحس بنار دايما في معدتها، هتحس بريحة وحشة خارجة مع نفسها، لكن هيبعد عن معاشرتها، لأنها هتبقى محصنة مناطق العورة، وخلي بالك يابنتي هيضعف عزيمتك بكل قوته علشان يحبطك ويخليكي تيأسي، حاولي تقاومي بأيمانك بالله وتستمري، احنا كده بنحجمه، لكن السحر مش هيخرج من جسمك غير عن طريق العلاج...اه هو غالي لكن اللى انتي فيه ده من اصعب ما يكون، مش هقدر اقولك افك السحر بنفس الطريقة لأني والعياذ بالله مش بشتغل فى الشرك بالله، لكن العلاج بفلوس...وفلوس كتير لان الحاجات اللى بيتم استخدامها فى التخلص من النوع ده من السحر مش رخيصة ابدا، سحر فكه من المستحيلات علشان كده طرق علاجه مش هينة.
ماما:
- كام يعني يا شيخ؟
الشيخ بأحراج لان ماما كانت قايلاله ان ظروفنا متسمحش حتى بتمن الجلسة كامل، اتكلم وقال:
- ممكن يوصل ل10 او 15 الف جنيه يا حاجة.
المبلغ صدمنا طبعا وردت ماما:
- كتيرررر اوووووي، كتير والله وربنا العالم بالحال.
الشيخ:
- اللى هتعمله ده يمكن يحميها منه شوية، هي هتحصن جسمها بأيات الله، لكن السحر مش هيخرج من جسمها بسهولة تحصينها، اللى عملته عديت بيه بحور، وعلشان كده العقد بتاعته صعب تتحل، فيه مواد لازم تنزل جوفها تحرقه...لكن تحصينها هيستمر مع استخدامها للمياه دي، مجرد ما يجيلها العذر الشهري هتوقف استخدام المياه، وفى الايام دي وارد انه يستغل ده....هو نجس ووجود الدم مش هيمنعه من نجاسته.
ده كان اخر كلام عند الشيخ، هو يعتبر قال كل حاجة بتحصل، قال ان سبب ديوني اللى مالهاش سبب دى هو...هو النجس، بقيت حرامية وانا عمري فى حياتي ما مديت ايدي ع لى حاجة مش بتاعتي، بقيت زوجة للجن من غير ارادة ولا رغبة ولا قبول مني، بقيت حياتي واقفة علشان غل وحقد جوة قلوب ناس مش قادرة اعرف انا اذيتهم بأيه، قهرت ابويا على حالي، او يمكن هو اللى وصل ابويا لشدة التعب علشان يعطل موضوع الجواز اللى كان هيحصل لحد ما مات من كتر التعب، بيعت امي واخواتي بيتنا علشان يسددوا ديون لا انا ولا هما ولا حد له يد فى وجودها...متخيلين بقينا تقريبا فى الشارع ومالناش بيت بسبب عفريت!! كل اللى حواليا تقريبا عايشين مهمومين بسبب حالي وتعبي وديوني اللى مش بتخلص وبقى معندهمش حتى مصادر تانية يقدروا يساعدوني بيها، دهب واتباع وبيت واتباع وقروض واتاخدت واقساط لأجهزة اتجابت واتباعت علشان اعرف اسدد حاجات تانية وحصل، بقى فاضل ايه تاني اعاني منه؟ رجعنا البيت وكل واحد فينا بيحاول يهون الموضوع عليا ويبسطه لكن انا جوايا نار من العذاب اللى عايشاه ومعيشة اللى حواليا فيه، عمل وليد اللى الشيخ قاله بالحرف وقرأ على المياه كل الورقة اللى عطهالنا بأعداد الايات زى ما مكتوب، وابتديت من الليلة دي اعمل اللي طلبه، يمكن حسيت بهدوء شوية مش عارفة ده حقيقي ولا انا بريح نفسي وخلاص...لحد ما للأسف جالي العذر الشهري ومنعت استخدام المياه ورجعت تاني للألم اضعاف من اللى ارتحت منه وفى اول ليلة بطلت اعمل فيها اللى طلبه الشيخ جالي زى ما بيجيلي كل مرة، مش فاكرة كنت صاحية ولا نايمة، بس فحيح صوته المؤذي رن فى ودني وهو بيقولي:
- كل ما هتحاولي تبعدي نفسك عني، هرجعلك تاني، وهعذبك اكتر، كل ما هتحاولي ترتاحي هتعبك اكتر، كل ما هتحاولي تخفي هأذيكي اكتر...انا جيت ليكي ومش هينفع تخلصي مني.
فعلا انا من وقتها والنزيف مش بيخلص، بتعذب وجسمي كله بيموتني، كل الاماكن اللى كنت برش فيها المياه على جسمي بتأكلني وكأن فيه نار ماسكة فيا، حتى لما كنت بقعد فى المياه وبعدها بنام وانا جسمي هادي على عكس ما اتعودت...بقيت بحس وكأن فيه حشرات بتاكل فيا وطول الوقت محتاجة اقطع جسمي من الهرش علشان الاكلان ده يهدا، الم..مش متعة ولا شهوة...انا بتألم وبس، بتعذب وبس، بحاول احصن نفسي زى ما قاللي الشيخ، لكن لا عارفة امسك مصحف، ولا عارفة اصلي، ولا حتى عارفة استخدم المياه اللى عليها القرأن، وكأنه مصمم يفضل يعذبني...اليأس خلاني قولت لماما:
- هلاقي فين حد يفك السحر ده زى ما اتعمل؟
ماما بخضة:
- انتي مش سمعتيه قالك ايه يا مي؟ نفس اللى قاله عفيف وانا كدبته، ربنا يسامحني، هو احنا يابنتي بتوع شرك بالله؟ ناقصين احنا يا مي غضب ربنا علينا؟!
مي:
- تعبانة ياماما، ومبقاش فيه مجال لوجود اي فلوس، مفيش سبيل للعلاج، حتى التحصين هييجي عليه ايام ومقدرش احافظ على نفسي بيه منه، ايام زى اللى انا فيها ده هو عارف يستغلها بكل الطرق، وده تعبني اكتر من الاول، وقاللي يا ماما..قاللي فى كل مرة هتحاول كل ما هتتأذي اكتر...عايزاني اعمل ايه؟
سكتت ماما وحضنتني وهي عارفة ان احنا مفيش حاجة هنقدر نعملها، لا هنفك بنفس الطريقة اللى اتعقد بيها السحر، ولا معانا فلوس للعلاج، وهفضل احصن جسمي منه لكن مع كل شهر وفى ميعاد معين هيرجعلي تاني، وهيرجع ينتقم مني بطريقة ابشع من اللى قبلها بسبب محاولاتي فى اني ابعد نفسي عنه، تعبت ويأست، محبطة اقصى درجات الاحباط، حاسة بالفشل والضياع والعذاب، وبدعي ربنا يهون عليا، عارفة انه قادر على خلاصي، يمكن بيخفف عني ذنب حد عملته من غير تفكير، يمكن بيشوف قوة صبري ومدى قدرتي على عدم الاستسلام للشرك بيه، يمكن حاجات كتير اوي...............واخرها انه اكيد هيرحمني من كل ده لكن مش عارفة امتى، كل اللى ب تمناه اني اعيش بس فترة مرتاحة، اعرف افرح زي اي بنت فى سني، وأدي فرصة للى حواليا يفرحوا هما كمان، بقالنا سنين عايشين بنتعذب بس، مكتئبين بس، زعلانين ومديونين ومش قادرين نستغل اي فرصة للفرحة، لحد دلوقتي مفيش نهاية لحكايتي، هي اتجوزت وعاشت فى البيت اللى كان هيكون بيتي، عملت فرح ولبست الفستان الابيض، خلفت وربيت...وانا واقفة اتفرج وبس، علشان عملتلها ايه؟؟؟ مش عارفة، مش لاقية حاجة اروح اواجهها بيها لانها حتى لو قررت تفك السحر اللى مستحيل تفكه لازم تسافر من تاني تفكه بنفس الطريقة اللى عملته بيها، لازم تعدي بيه البحور اللى عديت عليها بيه وهي جايالي، وهي مش هتعمل ده، مستحيل تسيب هنا بعد ما استقرت خاصة انها تخاف تبعد عن بيتها لفترة وتسيب فرصة لأسلام يكون فى البيت لواحده، هي مش ضامنة ممكن ترجع تلاقيه اتجوز فى البيت، لجوئي ليها مش هيكون اكتر من كسرة نفس واذلال لنفسي قدامها، لكن لو اضمن انها هتساعدني فعلا كنت عملت ده، لكن هي حتى نفسها مش بتحبها، علشان كده موكلة عليها ربنا، وقررت كتب حكايتي علشان محتاجة اللى يدعيلي ويساعدني بجد... ادعوووووووووووووولي...ادعولي ربنا يشفيني، ادعوووولي ربنا يفتح ابواب الرزق ليا وللي حواليا يمكن اعرف فعلا اتعالج لو العلاج هيجيب نتيجة، ادعولي اني اخلص من الشر ده، ادعولي افرح شوية...انا نفسي افرح شوية بس.
تمت
النهاية حقيقية جدااااااااااااااااا، وبعيد عن السرد اللى ممكن اكون اضافت عليه شوية حاجات بسيطة لكن للأسف اللى حصل واتحكى حصل بالفعل، اسرة كاملة عايشة فى عذاب مش بيخلص بسبب غل وحقد مالهمش تفسير، حتى لو هي حياتها فعلا مش مرتاحة فيها، لكن فى النهاية هي اللى اتجوزت وخلفت وبقى ليها بيت....ومي واللى حواليها مهمومين وفى كرب وبس...الحمد لله
