"ع قيد الوجع" _الجزء السادس ، بقلم ليلى مظلوم

*الـجـزء الـسـادس.*

براءة : انا هي هي ماتغيرت انا عندي مسؤوليات وانشغالات
.
من ايمتى بطلت تحس فيني ،، مو شايف بعينك البنات اديش بدهن اهتمام واديش اخدين من وقتي .
زيد :  خلص بوس ايدك خلص انا بعتزر منك ماكان قصدي 
بس لفيلي هالسيرة وبكفي نكد ،، تعي لجنبي مشتقلك .
براءة : بقلبها (انت مو مشتقلي يازيد انت مشتاق ل جسدي .
مشتاق للحظات الرومانسية المفعمة بالحب بش بوقت الحزن انت ما بتعرفي ،، بوقت الأنشغالات انت بتنساني
.
بالوقت يلي بكون فيه بحاجتك وبحاجة حدا يكسر علي فجأة بلاقيك اختفيت ،، ماعم اقدر حبك والهفلك
.
ولا عم اقدر اكرهك مابقدر بعد عنك ولا بقدر ابقى ،، بترجاك رجاع زيد القديم بأسرع وقت قلبي ما بيتحمل بعدك )
.
ماحبت تعمل مشكلة بدها تقصر الشر وشايفتو كيف 
عقلو جمدان وماعم يستوعب اي كلمة عم تقولها .
رسمت ابتسامة مزيفة ع وجهها وبلعت النار وتركتها شاعلة 
بقلبها .
قربت لناحو تسطحت جنبو غمرت راسها بقلبو .
وحاولت تنسى كلشي صار قبل شوي ،، حاولت تنسا النقاشات .
تنسا المشاعر المنسية ،، حاولت تشعر بأنها مالكة الدنيا
وهي حد زيد متل كل مرة .
بس ما قدرت الغصة كانت مرافقتها بشكل دموعها عم ينزلو 
كل ما يقرب عليها زيد اكتر .
بهاللحظة كرهت حالها وكرهت زيد وكرهت الزواج وكرهت 
البنات .
بس لا مو براءة يلي بتضعف ماهي كانت قوية للحد يلي 
بخليها تكبت مشاعرها بكل سهولة .
بعد نصف ساعة كان زيد طالع من الحمام وعم ينشف شعراتو .
وبراءة متسطحة عالتخت وتقريبا رح تغفل من تعبها
.
زيد : يلا نروح نجيب البنات بلا ما ينامو هنيك
.
براءة بصوط تعبان : زيد أمانة خليهن اليوم قلبي فارط من التعب
.
زيد : طيب متل مابدك بس بكرا بتروحي بتجيبيهن من الصبح 
ما بقدر يبعدو عني هنن شمعة البيت .
براءة : خلص اوك تركني نام هلأ .
وبالفعل غفلة براءة وزيد طلع من الغرفة توجه عالمطبخ 
وعمل ركوة قهوة وطلع عالبلكون
.
اعد عالكنباية وتنهد :  لك الوحدة بتقوم بتقول بدك شي 
يا زوجي اعملك قهوة اعملك مساج لعمى شو صايرة خمخومة 
براءة ...ماكانت هيك شو يلي غيرها .
حط موبايلو اغاني ل كاظم الساهر وتسطح
.
قطع شرودو اتصال ،، حمل الموبايل وكانت المتصلة سهى
.
سهى : زعجتك شي 
زيد :لا ولو كيفك سوس
سهى :  تمامو وانت 
زيد :ع حطة ايدك 
سهى : امانة ما كنت نايم
زيد : لك لا ولوو ،، ولله فايق 
سهى : اي خلص سدقت ،، بس انو خفت كون ازعجتك
زيد : شو بدك من الآخر قليلي حاسس في بتمك حكي
.
.
سهى : انو خجلانة قلك بس هافة ع نفسي بليلة مسلوقة (ذرة مسلوقة)
زيد :امممم يا ويلي وعليها جبنة 
سهى : بتطلع بتشل مووو
زيد :اي وانا هيك عم قول 
سهى: شو رأيك نطلع انا وانت وبراءة واذا البنات صاحيين مناخدهن .
زيد : لا البنات عند جوري زايرين ،، وبراءة نايمة رح فيقها 
جهزي حالك 
سهى : اذا فيها ازعاج امانة بلاها
زيد : لك كم بنت خالة عندي اناا بدنا نتحملك لوقت تسافري
.
سهى: هههه اي انشالله قريباً بتخلصو مني .
زيد :يلا جاييكي جهزي حالك .
وفعلاً عن عفوية زيد قام من مكانو وفات ليصحي براءة 
بس من تعبها ما رضيت تصحى لهيك طلع لحالو مع سهى .
وصل بسيارتو لجنب بيت سهى كانت آعدة مع أم زيد بنفس البيت بحكم انو أهلها سافرو ع تركيا وهي بقيت لتكفي دراستها ماكان بدها تروح سنين الدراسة والتعب عالفاضي
.
بس للأسف لما خلصت دراستها صارت الفوتة ع تركيا بتكلف كتير ،، طلعت تهريب مرتين بس ما قدرت تفوت وبقيت عند خالتها لحد  ما يفرجها الله وتطلع عند اهلها .
صار يزمر ب سيارتو لحتى نزلت
.
سهى :تأخرت عليك 
زيد : نوعا ما
سهى : وين براءة
زيد:مارضيت قال نعسانة
سهى :روحت من أيدها أطيب بليلة
زيد :امي نايمة
سهى :طبعاااا متل عادتها بتنام كتير بكير .
مشي زيد بسيارتو تقريبا عشرين دقيقة لقدر يلاقي حدا فاتح
بنص هالليل .
كان متل بسطة جنب الحديقة ،، نزلو من السيارة واشترو
بليلة وفاتو أعدو بالحديقة .
سهى : يالله ما أحلا الليل
زيد : صح مافي احلا من الليل بتمنى لاقي حدا يفهمني 
بس عبث
سهى :تماما وانا متلك ما بحس الليل موجود حتى ننام فيو
بالعكس الليل موجود لحتى نفضفضلو كلشي جواتنا .
لحتى يحمل كل الهموم يلي جواتنا ليخلينا نقدر نصحا 
بنهار جديد مليان ايجابية .
زيد:ولي سهى من ايمتى انتي شاعرة .
سهى : منذ ان غرقت ببحر عيونك ..منذ أن تهت بابتسامة
ثغريك ..أصبح الشعر والغزل قاموسي ..تاهت حروفي 
وضاعت كلماتي أمام شجن صوتك اللذي كان على مسمعي
ألحان وأنغام مليئةٌ بالهِيام ...فَ ماذا سألتني منذ متى 
أصبحت شاعرة ..اتنتظر مني أجابة اعذرني عزيزي 
ف أبجديتي لن تكفي لوصف الشيء اللذي يتملكني وانا بجانبك .
زيد للوهلة الأولى تأثر بكلام سهى حتا تكركب كيانو .
بس دغري قالتلو :  مقتطف من رواية عم اقرأها اسمها
#على_قيد_الوجع .
زيد : هفففف فكرت عنجد عم تأشعري ،، عن شو بتحكي 
هالرواية حسيتها حلوة
.
اطلعت فيو سهى وحاولت تخترع رواية من عقلها .
لانو الأقتباس يلي حكتو من شوي كان نابع من قلبها ابدا ما قرأتو برواية .
اممم بتحكي عن الحب بس الحب من طرف واحد .
لما تكون مستعد تقدم كلشي عندك مقابل نظرة او كلمة
.
اوحتى لمسة بالغلط ...لما تكون عم تتبع السراب .
بس بتعرف شو بالآخر هالسراب رح يوديك لمكان مظلم 
مافيو حدا الا انت ...وحيد مجرد من كلشي .
اما الطرف التاني فَ مابكون حتى مكترث أو دريان بيلي 
عم يصير .
بالمختصر نهاية هالقصة مأساوية .
زيد : دخيلك لا تكأبيني هلأ خلينا مروقين بهالبليلات .
بلا رواية بلا بطيخ .
سهى : تكرم زيد أفندي .
_باليوم التاني_____
.
باليوم التاني تحديداً ببيت جوري .
صحيت جوري ع صوت ياسمين وشام كانووعم يبكو 
ويصيحو .
جوري : يا ربي ليش الجيران ماعم يسكتو ولادهن .
بعد تلت دقايق :افففففففف
.
بعد خمس دقايق :لك سكتوووووو
.
بالدقيقة الخامسة فزت جوري بأربعتها:لك ياسمين وشاام 
كيف نسيتكن ..تعو ياروح خالتو ياعمري انتي .
ولله مو متعودة عالضجة الصبح .
جوري كان بالها طويل أو يمكن لأنها محرومة من الأطفال 
ما كانت تنزعج من ضجة الولاد رغم انو نزعجت نومتها 
من بكير ،، بس بنظرها كان احلا يوم .
قامت من سريرها وعملتلن حليب وقطعتلن فواكة متل ما خبرتها براءة ،، وعملت الها فنجان قهوة
.
طالعتهن وطلعت عالبلكون حطتهن عالطاولة مشان ياكلو 
وأعدت حدهن تراقبهن بكل حنية وحب .
جوري :شام يا شام قلبي انتي ،، شو مشتاقة للشام 
وانتي ياسمين ..ياسمين الشام امكن عرفت بأنو هالأسماء
نقطة ضعفي مشان هيك سمتكن بهالأسماء .
بس مابرضى وحياتكن وما بسكتلها ،، هي اختارتلكن اسمائكن
وانا رح اخترلكن المهنة يلي رح تفوتو فيها تمام
.
شام : مام (تمام)
.
جوري: ياسو وانتي شو بتقولي بتوافقي اخترلك مهنتك .
ياسمين : وافي(بتوافقي)
.
جوري: هههه لك انا عم اسألك بتوافقي قولي بوافق
.
ياسمين :وافت (بوافق)
.
جوري دمعو عيونها : ياعمري انتو اي هيك تمام خليكن قوايا 
وكملو دراستكن لا تكونو متلي .
بتعرفو شو انا بأول مطب استسلمت ،، حطو ببالكن تحققو
كل احلامكن لا تتراجعو مافي شي مستحيل .
انا كانت احلامي كتير كبيرة بس شوفو وين انتهى فيني المطاف
.
(اخدت رشفة قهوة وكملت كلامها)
.
انتهى فيني ببيت زوجي ،، انا يلي كنت اتمسخر ع رفقاتي 
يلي يتركو دراستهن مشان الزواج طلعت اضرب منهن
.
بتعرفو شو كانت احلامي او حلم واحد كان كل يوم يراودني
.

.
كنت احلم بأني فايتة عالمشفى بس مو كَ مريضة كَ طبيبة 
كَ أكبر جراحة بالبلد كنت شوف حالي فايتة عالمشفى
.
وعيون الكل عليي .. بتعرفو شو كانو يقولو لما فوت .
ليكو هي الجراحة جوري القاسم ،، كلن عم يتهامسو ع العمليات الصعبة يلي أجريتها ،، عن الحلم الكبير يلي وصلتلو .
كنت رافعة راسي بشموخ ..الغرور باين بعيوني بفوتي هي
لفتت نظر كل الدكاترة
.
بس بوووووم بصحى من الحلم بلاقي حالي ع سرير زوجي .
عم يغتصبني بالحلال ،، ما ذنبو هو بس انا ماقدرت حبو .
بتعرفو شو أحيانا بحط الحق على أمكن ،، يلي عملتلي البحر طحينة ،، بس بعدين بقول يلي ببالو يوصل لشي بيوصلو
لو كل الدنيا قنعتو يغير فكرو ،، بضل ع وجهة نظرو وحلمو
.
الحق علي انا ،، تخليت عن حلمي وبذات اللحظة حلمي تخلى عني ،، بتعرفو لي ..كنت مفكرة جواد يسمحلي كمل دراسة .
ونحنا متزوجين بس مدري لي ما سمحلي وانا تماشيت مع الوضع ،، فجأة شفت حالي بعالم همي الوحيد فيو 
ارضي زوجي متل ماخبرتني امي .
كلما رضي عليكي اكتر بحبك اكتر ،، مو معقولة كمية الجهل 
بهالجملة ،،يلي بتخلي أغلب نسوان البشرية .
راكدين ورا رضا زواجهن وحاملين بأيدهن حقهن الضايع
.
تحت مسمى ما بدي اخرب بيتي وصير مطلقة"
.
شو ذنبي أنا هلأ حتى ولاد الله ماطعمني مشان ينكسر راسي أكتر ،، ياريت لو العذر منك ياجواد .
دائما بمنني أني عايشة عندو عم آكل وأشرب ونام .
معقول الولاد كلشي بهالدنيا وبدونهم مابتكمل العلاقة
.
صار يضربني بعد زواجنا ،، بكره حالي لاني بسكتلو .
أنا ضعيفة للحد يلي عم اكل فيه قتلة وحط ع جرحي ملح .
انجرحت كتير من جواد ،، بس ما بلومو اذا امي يلي هي 
امي جرحتني بأبشع كلام حتى ما شعرت ولا شافت الندبة
يلي علمت بقلبي بسببها .
بتعرفو شو قالتلي امي ...منيح منو حاويكي غيرو واحد
كان تزوج عليكي من زمان،، شو بيضمنلي اصلاً
.
ما يكون متزوج عليي هففففف بكرههكككككككن كلكن .
بهاللحظة جوري طالعت كلشي ضعف جواتها بكيت كتير 
دموعها نشفو وشهقاتها زادت .
بس صحيت ع حالها لما سمعت بكا شام وياسمين .
دغري مسحت دموعها وحملتهن وفاتو لجوا .
اما عند براءة كانت صحيانة من جديد ودغري ركدت ع غرفة  البنات
.
ييي لك صحي مانن هون ،، ياربي هي احلا نومة بنامها 
بحياتي .
دغري عملت كاسة نسكافيه وفاتت عالصالون تشربو عَ رواق
.
يعني اليوم رح اشرب نسكافيه بدون ما تنكب نص الكاسة 
عالأرض .
اعدت تشرب وتشرد ب  ذكرياتها  وبيلي صار معها امبارح .
قررت تشفي قلبها من طرف زيد وتسامحو وتعطيه فرصة جديدة
.
.
(انا مضطرة اعطيك فرصة جديدة يا زيد ،، ما بدي اخسرك
.
واخسر حبك، ، اهمالك عم يولد شعور مؤقت جواتي بيشبه
.
الكره ..انا ما بدي اكرهك بدي رجع المحبة بيناتنا لو شو ماصار)
.
شربت اخر رشفة من النسكافيه وقامت بسرعة جهزت حالها
.
وطلعت من البيت ودغري عند جوري .
بعد دقايق وصلت عندها .
فتحتلها جوري وركدو بالبنات عند امهن
.
جوري: لك ليييش جيتي نحنا كنا مبسوطين كتير بلاكي
ومافقنا بالليل ولا فيقنا خالتو من بكير ،، ارجعي عبيتك بسرعة
.
براءة :بلله يعني ما اشتقتولي يلا رح روح
.
صرخو شام وياسمين وصارو يبكو
براءة : ياعمري انتو انشالله بتئبروني ئبر اييي
جوري :بعيد الشر فوتي فوتي بيت فستق
.
براءة : هههه بيني وبينك ارتحت منهن شوي 
جوري : تفوووو حقيرة 
براءة :يعني هاد الواقع الله وكيلك سلختها نومة طول هالليل .
جوري:دبة كنتي استغلي الفرصة وقضي هالوقت مع زيد 
براءة : هههه عيفيها عَ ربك
جوري: فوتي فوتي لشوف .
براءة :اتصلي بسهى تجي مشتاقتلا .
قطع كلامهن صوت رنة الجرس .
جوري :هااا ليكها حبيبة قلبك شرفت 
براءة : ولي عم تتفقو من وراي
.
فتحت الباب براءة وغمرتها لسهى بحب وباستها بقوة من خدها
.
اشتقتلك بقرتي 
سهى:هههه وانا اكترر بس شبعرفني قولي لحالك .
براءة : بلله لي ماعم تجي مع حماتي تشكل آسي
جوري : يا مكولكة انتي ،، تشكل آسك موو اي انشالله
.
سهى ضربتها بخفة :تفي من تمك ولي .
جوري :  تراني غرت هااا
.
براءة:هههه اي حرام مافي منها حماتي بس لو ما هال99 علة
فيها .
جوري :لك خررررسي هلأ سهى بتفضحك وبتخبر خالتها .
براءة : لا حبيبتي اطمني انا بأمن سهى ع روحي ومستعدة أثق فيها وانا مغمضة .
سهى اطلعت ببراءة بأبتسامة مليانة حب بس من جواتها 
قلبها كان عم ينكوى وشعور غريب متملكها .
جوري : لا حبيبتي قال مين بشد مع الماشطة 
سهى : أمها وأخواتهاا ....ماشي يا جوري ،، عم توقعي بيني 
وبين براءتي ،، اصلا نحنا ما حدا بيقدر يعلم ع صداقتنا
.
جوري :ولو كان رجال .
بهاللحظة سهى تكركبت وفاتت ببعضها : شو اصدك جوري
.
جوري :ههههه لي وجهك صار احمر ،، انو بقصد بلكي زوجك 
المستقبلي منعك عنها .
سهى : ولا ممكن ..بحاول يكون شرط الزواج براءة تضل معي
.

فاتو كلن عالصالون والبنات عم يلعبو بالغرفة التانية .
سهى :اي ست براءة ليش القمرات هون .
جوري :قال يابعدي بدها تظبط جو رومانسي ومالاقت 
غير اختها تتسائل عليها ،، وشكلو هالجو فكس ..ياخوفي 
تقلي عيفيهن كمان الليلة
.
.
براءة :لعما بقلبك شو بتعلقي عالكلام ،، بالعكس مبارح طول الليل عم نحتفل انا وزيد بهاليوم العظيم يلي مرق علينا بسلام .
جوري : لك دبة عم امزح اصلا وجود البنات هون متل العسل عَ قلبي
.
سهى : لحظة لحظة ...عن أي جو عم تحكي وزيد مبارح كان معي
.
براءة وجوري : معككك
سهى :لك اي رحنا اكلنا بليلة مسلوقة  وقال صحاكي بس انتي مارضيتي
.
جوات براءة شعرت بالغيرة بس حاولت ما تبين لانها فعلياً
.
كانت واثقة كل الثقة ب سهى وعارفة انها ما ممكن تخذلها أو تأذيها
.
اطلعت براءة وباين انها استسلمت ادام سهى وجوري :مدري بس ماحسيت انو صحاني
.
سهى : براءة اطلعي فيني ،، شو صاير معكن حتى زيد باين مو طبيعي
.
جوري ماعجبها الوضع عم تطلع بزيئ عينها وتتمعن ب سهى 
وبراءة .
براءة : حكالك شي 
سهى : لا أبدا 
براءة :بربك 
سهى:يعني بربك شو بدو يحكيلي بس حسيت فيو انو مو عبعضو
.
براءة :نعم
سهى تلبكت،، بقصد بشكل عام كان باين توتر بعيونو
.
براءة :احكي ولا أبلعها
جوري : بلعيها احسن
سهى : لا أحكي .
براءة : مدري يعني بس بدي تنصحوني ،، شو اعمل لرجع علاقتنا متل قبل 
سهى :ليش شبها هلأ علاقتكن
.
براءة : بحسها باردة ومتلجة كمان أمانة ساعدوني حاسة القشة يلي متعلقة فيها عم تفلت .
جوري :روقي براءة أمانة .
براءة صارت تبكي بهاللحظة : مابعرف مربطة وماعم يطلع 
معي شي ،، زيد عم يطلب مني وقت وانا ماعندي وقت اعطيه يا .
كل وقتي مكرستو للبيت والبنات واذا ماكان للبنات للطبخ 
للحوسة والتعزيل .
مسؤولية كتير كبيرة واقعة عَ كتافي وزيد ما عم يفهمني 
ماعم يحس فيني كيف بدي خليه يحس،، معقول انا السبب بيلي صار ..انا مذنبة اذا عاطية وقتي كلو لولادي شو أعمل .
سهى:انا ما بفهم بهيك أمور صراحة ،، شو رأيك جوري
.
جوري :برأيي يلعن ابو الزواج ع ابو الرجال كلهن ولك تفوو
.
سهى :بسم الله عليكي جوري ... رفعت ايديها سهى وصارت تدعي
اللهم اذا كان هذا سحر فَأبطله ،، لبسك جني يمكن
.
جوري :هذا الواقع ...جميعهم خائنون منافقون ..يريدون أنفسهم فقط....فليحترق العالم من أجل سعادتهم لن يكترثو فمن أنتي
.
أيها الأنثى ليكترث بكِ رجلُ أحمق ،، تباً لهم أشباه الرجال اللذين وأن رأو تقصير صغير يبيعو يخونو لن أقل كلاب خوفاً مني ان أظلم وفاءَ الكلب سأكتفي بكلمة #حمقى #أشباه_الرجال
.
براءة وسهى مصدومين من قوة جوري وعم يتساألو بعقلهن
ليش هيك عم تحكي .
فاتحين عيونهن ع ملاتها وحكو : شو عم تخبصي .
جوري: عم احكي شي واقعي قلت بلكي مافهمتو وجهة نظري
فَ قلت بتفلسف عليكن شوي .
.
سهى :انا ما بوافقك جوري ، موكل أصابيعك متل بعضها .
جوري: لك كلهن أكالين هوا عند أول نكشة الك بيخونوكي
.
براءة: دمعو عيونها حطت ايدها عَ تمها ...ولي معقول زيد عم يخوني .
سهى:مستحيل زيد مابيعملها
جوري :شو عرفك ،، قال يا مآمنة بالرجال .
براءة :خلص خلص هسس سكتو مخي رح ينفجر .
سهى :ليكي بيبو لاتهتمي لكلام جوري مفكرة الكل متل زوجها
.
جوري حست بقلبها انكوى وماعرفت شو تجاوب هي فعلا مفكرة الكل متل زوجها : خلص قومو انقلعو حلو عني .
براءة غمزتها ل سهى وأومأتلها بأنو تعتذر .
سهى : خلص بعتذر انفعلت كأنو
جوري : كأنو كتير مو شوي .
براءة :هففففف مابعرف خلوني قوم ع بيتي يادوب
ضبلي ضبة وشوف شوبدي اطبخ لبينما يجي زيد .
سهى :اي وابقي طبخيلو ملوخية بحبها هالأكلة
.
جوري:شو عرفك
سهى: شبك انتي معلقتيلي عالكلمة ليش في حدا ما بيعشق الملوخية
.
براءة : شااامووو ياااسوو يلا رايحين عالبيت ،، سهى بدك تنزلي
سهى : اي نازلة معك خليني روح احسن الي من 
أحاديثكن المعتة
.
وفعلا براءة اخدت بناتها وراحت عالبيت وسهى توجهت عبيتها
وعقلها مشلوش ومتوتره
.
فااتت سهى عالبيت ،، كانت أم زيد بالمطبخ وشكلها معجوئة 
بشي أكلة .
سهى :خاالتوو شو عم تعملي لمين كل هالأكل
أم زيد : يعني لمين ألناو
سهى : لاا مستحيل شو نحنا ضباع لناكل كل هالأكل
ام زيد ضحكت من قلبها ع سهى: لك تئبري قلبي شو مهضمومة
.
سهى :من بعدك ست الكل (غمزتها) اي احكيلي شو القصة مين جايينا .
ام زيد: حزري لحالك .
سهى : زيد ومرتو 
ام زيد :لااا اطلعي بالأكلة بتعرفي مين
سهى اطلعت بالأكل كان كبة مقلية وفروج بالفرن ومحاشي
.
سهى : وليييي كل هدووول لاتقليلي زينة هدول الأكلات عشقها لزينة لااا ماعم سدق
.
ام زيد : أي سدقي وأخيرا زنزونتي جاي لحضني 
سهى: يالله شو مشتاقتلا خبرتي شي زيد والله ليكيف
ام زيد: لاا دخيلك تركيها مفاجئة لسا مطولة لتوصل .
سهى :اي شو القصة حتى واخيرا قررت تطلع لعنا 
ام زيد :والله علمي علمك ع حسب مافهمت منا زوجها فجأة نفرز ع غير المنطقة يلي كان عم يخدم فيها .
سهى : ييي بس ما يكون فيها مشاكل 
ام زيد :الحامي الله يا بنتي بقوم وبأعد وبدعيلها ،، الله يحميلها زوجها ولا يضرو .
سهى :  ولله معك حق يا خالتي ما بتخيل حالي محلك 
ام زيد : القسمة بتسكت أكبر بني آدم تقولي حدا لبسني وخلاني وافق عهالجازة .
سهى :يلا المهم سامي مافي منو وابن حلال 
ام زيد :ماختلفنا لك سهى ،، بس لحد هاللحظة مو عارفين شو مصيرو .
سهى :انشالله كل خير ،، بأذن الله رح تنتهي هالأزمة ويسرحو كل هالعساكر .
.
ام زيد رفعت ايديها وصارت تدعي ودموعها وقفت بطرف عينها
.
دخيلك يارب تلطف فيو ولا تضرو يا رب لاتخلي بنتي تشوف فيو نهار مو منيح
.
سهى: اللهم آمين ياااارب...اي خالتي هلأ ضحكي ووديني 
عَ قسم الحلويات بعرف زينة بتعشق الحلويات وهالقصص .
ومو واردة ماتعمليلها كل شي بتحبو بعد فراق أربع سنين
.
أم زيد : سهى روحي انضبي بغرفتك ولاتفرجيني وجهك للمسا .
اذا ع كل شغلة بدي اعملا بدي فرجيكي ياها مابضل شي لحبيبة قلبي زنزونتي
.
سهى : هلأ هيك والله رح اشكيكي لأمي وخبرها انك ما عم 
تهتمي فيني .
ام زيد: ههه أعلى ما بخيلك اركبيه .
فجأة ضربت سهى بأيدها ع راسها وكأنها اتذكرت شي مهم .
لك خالة اديش اليوم بالشهر .
ام زيد : ١٣ ليش
.
سهى:لك عيد ميلاد ماما اليوم كيف نسيت عايد عليها
.
ام زيد: دخيلكن انتو وهالقصص شو يعني ميلادها 
سهى:يعني متل اليوم ولدت احلا ام بالدنيا كلها ...يلا خالتو فايتة عايد عليها
.
ودغري فاتت سهى ع غرفتها واتصلت ع أمها وعايدتها بميلادها
.
وفتحت صوط وصورة وشبعت بكا من شوقها  وعيلتها 
وبالذات امها
.
سكرت الخط وحطت رقم براءة عالقائمة لتتصل فيو .
سهى : لككك كيف ماعايدت ع براءة اليوم شو صايبو مخي .
بس قبل ما تتصل ببراءة وتحكيها خطرتلها فكرة جهنمية واتصلت ب زيد .
سهى:زيد كيفك 
زيد: تمام وانتي
سهى: تمامو ..شو عامل .
زيد : اخد استراحة من الحصة وعم اشرب قهوتي 
سهى: صحة وعافية ..شو مشاريعك اليوم 
زيد: ولاشي هاد هو الروتين ذاتو
.
سهى :انو ماعندك ولا مناسبات 
زيد : مابعرف لشوو عم تلمحي ماعم افهم عليكي .
سهى: تمام رح احكي ،، اليوم كنت مع براءة وبطريقة ما حاسستها مو مرتاحة ...متل كأنها فاقدة السيطرة من كل شي
.
أيديها مربطين ..حاسة علاقتكن مو متل قبل .
زيد : انا ما طلبت منك تقييم لعلاقاتي سهة 
سهى : ممكن تعتبرني اخت براءة ما تفكر ابدا اني بيوم
منعتك تزوج براءة الا وكنت تحت ضغط نفسي ،، انسى الماضي واسمعني للآخر .
زيد : طيب احكي لشوف .
سهى :براءة اليوم كانت كتير متوترة واكتر شي بدها ياه اليوم
انو تفتح معك صفحة جديدة ...بدي اطلب منك ممكن 
تفتح معها انت كمان هالصفحة..اذا مو كرمالها كرمال هالسنين الحلوة يلي جمعتكن
.
سدقتي براءة حدا كتير مغلوب عَ أمرو هي حدا انفرض عليها
واقع هي ماكانت بدها ياه ،، بالوقت يلي كانت حابة تعيش 
معك العمر عمرين فجأة بتلاقي بحضنها طفلتين .
طفلتين بحاجة لرعاية واهتمام اكتر من أي حدا بكون كذابة 
إذا بقلك مافي حق عليك ..انت ما قدمتلها ولا حتى مساعدة 
معنوية...فكرتك براءة انت واعي وبتقدر ظروفها .
.
لذلك هي مالت لبناتها اكتر اختارت تكبرهن وبعدها تعيش أيام حلوة ..ما بنكر يمكن كمان هاد غلط .
زيد : تماماََ ..هاد الغلط بحد ذاتو ..انو نأجل الأيام الحلوة 
يمكن اول مرة بحكي هيك بس هي السبب بهاد البرود .
وصلتني لفترة صرت اكره البيت لأنها بتهتم فيو اكتر مني 
لك احيانا انقهر من البنات لانو اخدينها مني .
بس تدريجياً شفت حالي صرت بمرحلة اللامبالاة ،، سهى انا هلأ
شخص لا مبالي ماعاد يهمني في شي جواتي فاضي .
سهى : لاتحكي هيك زيد لاتسمح لهالشعور يتملكك ،، رجاع ورجعو الحيوية لهالعلاقة ،، اليوم ميلاد براءة خدلها هدية
بسيطة او أي شي وشوف كيف رح ترجعو متل قبل .
زيد : عنجد ماكنت بعرف منيح ذكرتيني ،، هي حرام بكل ميلاد بيمرئ ميلادي او عيد زواجنا او عيد الحب بيكونو البنات مأنزعين معنا عالطاولة .
سهى غمضت عيونها وحكت بقلبها: يعدمني ياكي يا براءة 
اصلا انتي يلي سامحة للولاد يستغلوكي بدلالن .
خلص زيد لاتاكل هم شي انا رح صير انصح براءة بهيك امور لترجعو متل قبل
.
زيد :مابعرف كيف بدي اشكرك ما كنت بعرف انك انسانة هالقد منيحة وفهمانة الحياة ،، بعتذر اني كنت اخد فكرة انك بتخربي البيوت وحتى يمكن قلتلك هالكلمة ..سهى انا بعتذر
.
سهى :هههه لا تعتذر ولو كنا صغار بوقتها سدقني انا نسيت كلشي 
زيد : اوك ..انا لازم سكر
.
سهى :لحظة قبل ما تسكر بدي ساعدك بشي 
زيد :اي قولي
سهى : اذا بتجبلها ل براءة هدية بيكون بقلبها موبايل من يلي نازلين حديث وطاوشين الدنيا ..هي صرعتني بموديلاتن وبألوان وبحجمهن الكبير ..لهيك قلت بيجوز هالهدية تسعدا
.
زيد :شكرا عكل شي سهى
سهى: ولو العفو ..انا موجودة كل ما احتجت شي .
سكرت الخط سهى وتسطحت بتختها ونزلت من عيونها دمعة .
بكون كذابة اذا بكون نسيانتك ..او اذا نسيت هديك الأيام 
بكون كذابة اذا بقلك مابحبك ...انا بموت فيك وبكره حالي هيك متل الجدبة عم حاول صلح علاقة يلي بحبو مع زوجتو .
ماعم افهم ليش عم اعمل هيك شي مشان عذب حالي اكترر .
أما عند براءة وبعد مرور كم ساعة  كان مخلصة كلشي
.
من تنضيف للبيت وحمام البنات والطبخ وطبعا مانسيت ترتب حالها اليوم تحممت ولبست فستان للبيت أبيض حرير طويل .
وفلتت شعراتها وعملت مكياج خفيف وسريع .
انفتح الباب كالعادة ليعلن جية زيد عالبيت ...طلت من غرفتها 
وهي كلها أمل هاليوم يكون غير كل الأيام مشيت ناح زيد بلهفة
.
براءة : جيت حبيبي 
زيد هالمرة حب يكسر الروتين ويغمرها وفعلا قربها لعندو 
وطبع بوسة ع خدها .
براءة وهي بعدها ع صدرو مو فهمانة شو عم يصير او شو تغير 
كان دائما من فوتو عالبيت يسأل عن البنات والأكل .
زيد استنشق ريحتها كانت متل الياسمين الريحة يلي بيعشقها
.
زيد: تعبان كتير ،، حابب قضي الوقت معك 
شدت الغمرة عليه أكتر وقالتلو : اشتقتلك زيد 
زيد : وأنا كمان مشتقلك كتير وجاي ببالي آكلك هلأ .
دغري بكيو البنات وقطعو عليهن لحظتهن .
براءة عصبت كتير بقلبها : لك يلعن الساعة يلي جبتكن فيها 
حتا بهاللحظة ما حَ تهنوني ...استغفر الله ياربي والله مو قصدي بس انت شايف شو عاملين فيني .
بعد زيد عن براءة :يلله مومشكلة ،، سكتيهن وعطيهن شو بدهن 
انا رايح شوي وراجع .
براءة بنظرات مليانة خيبة : طيب ما حَ تاكل 
زيد بأبتسامة مليانة اطمئنان : بدي آكل بس معك لما ينامو البنات ..عرواق متل ما بتحبي .
براءة بلهفة :أوك .
طلع زيد من البيت وتوجه ع مكان الموبايلات اشترالها الموبايل
وطلع توجه ع مكان الحلويات وشترى قالب كيك خاص 
لبراءة كتب عليه ،، كل لحظة وأنتي حدي....بحبك♡
.
أما براءة فَ كانت مستغربة من التغير بشخصية زيد ومعاملتو
.
بس هاد ما بيعني انها مو مبسوطة كانت طايرة من الفرحة .
لدرجة للمرة الأولى بحياتها قررت تشربهن منوم للبنات يمكن كان فعل مجنون بالنسبة إلها ...رغم انو كان دوا عادي .
بس بالنسبة إلها شي كبير شربتن منو وسطحتهن بتختهن .
وجهزت طاولة الأكل وهي عم تنطر زيد تأخر لأجا لذلك راحت صلت العشا وهي عَ أحر من الجمر ليوصل
.
وفعلا شوي و وصل زيد طلعت من الغرفة وشافتو جاي وبأيدو كيس أحمر باين انو مرتب وبقلبو هدية أما التاني كيس عادي كان بئلبو الكيك .
براءة :تأخرت 
زيد : ااه..اي كنت عم اشتري شوية غراض
براءة :شو اشتريت
زيد تلبك هي أول مرة بعد زمان بدو يقدملها هدية ل براءة
محتار كيف يقدما .
زيد سحبها لبراءة من أيدها وأعدها عالكنبايه ،، مسكلها ايديها
وهو متلبك .
مابعرف كيف الأيام اخدتني لحتى نسيت هيك يوم مهم وحلو
.
اليوم يلي خلقت فيو حبيبة عمري ،، وأم ولادي .
قرب عليها وصار يمرر أيده من بين شعراتها بكل حب .
اليوم يلي خلقت فيو البراءة والطيبة هاد اليوم معناه كبير بقلبي،، بدي اعتزر منك بهاليوم بالذات ع كل شي مضى 
ع كل الأيام يلي كنا فيها قراب من بعض مليات بس بعاد عن بعض كل البعد .
بوعدك نبلش كلشي من جديد ،، اذا مو كرمالنا كرمال بناتنا 
بعرف انك عم تتعذبي ونفسيتك صفر لهيك جبتلك شي ممكن يسليكي عالأقل لما ما كون بالبيت .
براءة ماعاد تتحمل صارت تبكي وتشكر ربها بقلبها انو الحمدالله رجع كل شي متل أول غمرتو بقوة وصارت تبكي ودموعها
تنزل بغزارة..
.يتبع....