"ع قيد الوجع"_ الجزء السابع، بقلم ليلى مظلوم
*الـجـزء الـسـابـع.*
.
انا مابدي غير تضل حدي تهتم فيني واهتم فيك نعيش العمر
متل زمان ..انا بحبك زيد بكل مرة بتعصب فيها وبكل مره بتحب فيها انا بحبك ...لما بتنشغل عني ولما بتنضغط .
لما تسهر مع رفقاتك وتتركني ..حتى لما ماتساعدني بالبنات
بضل بحبك وبعشقك بجنون بكل حالاتك .
بعدت عنو وطلعت بعيونو وقالتلو ...أنا بتنفس من حبك من اهتمامك ...لاتخليني موت وانا ناقصة عمر بترجاك .
زيد: بعيد الشر عن قلبك يا عمري
براءة: كيف بتقدر تعمل فيني هيك بعد ماكنت ع شرفة الموت
.
من بعد ما قربت استسلم وكأنو الحياة وقفت وكأنك تخليت
عني وبطل لحياتي معنى دغري قلبي انتعش انا عشت بهاللحظة .
قرب زيد ببطئ وهمس بأذنها حروف يا دوب مسموعة .
لأني بعشقك انا أناني فيكي بدي تكوني الي وحدي .
زيد كان مشتاق ل براءة لدرجة ما شاف العتب بعيونها
ماكان بأيدها تنسى بسرعة خايفة يكون مجرد كلام خايفة يكون متل الوعود يلي وعدها ياهن بليلة عرسهن
بس يلي بحب مابيشوف عيوب مستعد يتحمل أي شي بس يضل جنب يلي بحبو .
رغم كلشي صار بهاللحظة ورغم انها حابة تفتح صفحة
جديدة وحياة جديدة ،، الا إنو قلبها لسا عتبان عليه .
بلحظات قليلة وأجزاء بسيطة من الثواني ارتسمت الأيام الماضية بعقلها كيف بالنوادر ليتذكر ميلادها، ،او اذا ما
ماكانت تصرعو قبل بكم يوم ما يتذكر .
تذكرت كيف لما تنام جنب البنات وتتكشف بالليل تبرد
بس ماكان يفوت يغطيها او يطمن عليها ،، او حتى يصحيها
لتنام جنبو ..جرح صغير بئلبها بس أثرو كبير عليها .
دغري نست حالها بأنها أيام ومضت وهي إلها بالحاضر .
زيد وهو غامرها بصدرو وعم يداعب شعراتها : لساكي زعلانة مني
براءة : مو قصة زعل انا ما بعرف إزعل منك انا عتبانة عليك ومتل ما بيقولو العتاب جزء من المحبة بس انا بقول هو كل المحبة..لاني بعرف كتير منيح قد ما بعدنا عن بعض بيضل
ملجأي لهون (أشرت ع قلبو وقالت) ماعندي بيت روح عليه إلا قلبك
.
مستعدة انسى كل الأهمال وكل الماضي بس تبقى هيك لاتتغير زيد ..ضلك اهتم فيني أنا مريضة بالتفاصيل الصغيرة .
زيد : بس انا مريض فيكي سدقيني وين مادارت فيني الدنيا ولفت بيضل ملجأي بحضنك ،، قد ما عصبت وانضغطت .
او عليت صوطي عليكي بضلك البنت يلي عشقتا من أول مرة شفتها ماسكة فيو كوب النسكافية وعم تغط أصبعها بئلبو
وتحطا بتمها تماماً متل الأطفال انتي بنت قلبي قبل ماتكوني حبيبتي وام ولادي .
براءة خجلت كتير وخبت عيونها بأيديها الناعمين :ياااا
عنجد كنت تشوفني هيك عم اعمل والله مو أنااا .
.
زيد ابتسم وبانت الغمازة ع خدو: اممم اي صح صح هاد مو انتي...معناها يلي كانت تغط الشوكولا ب النسكافيه
.
وبلحظة تسيح الشوكلاة بقلب الكاسة كنتي تغطي اصبعك مشان تطلعيها موو
.
براءة بعدها خجلانة : لالالا والله مووو أنا
زيد بحركة سريعة قربها كتير لعندو وهمسلها .
معناها يلي كانت تجي من باب البلكون وتسرح فيني
وصوت دقات قلبها واصل لعندي هي انتي مو .
براءة :لكك انت تجي تدرس جوري ولا تجي تراقبني
زيد :انا عشقت الدروس لأجل عيونك
.
براءة : اعترفلك بشي
زيد : اي قولي
براءة : كتاب الفيزيا كان دائما ينام حدي مدري ليش ،، هيك اتمنى انك تتصل لعندي بأي لحظة ..ههههه حتى بتعرف شو
انا يلي كنت حد موبايل جوري صامت
.
زيد:يا شقية انتيي اصلا كنت بعرف انك عشقانتيني
براءة :ننننن ع اساس انت ما بأي فرصة تصحلك
تطلع فيني بدل الكتب .
زيد :شيلينا هلأ من هالسيرة وتعي نقطع الكيك
.
قامت براءة وطالعت الكيك من العلبة وحطتو عالطاولة .
وفاتت ع غرفتا بدلت تيابها ولبست فستان قصير مفتوح من الضهر لونو تركواز ولبست كعب أسود وجددت المكياج وطلعت .
كان زيد واقف عم يقلب بالتلفزيون لحتى لاقى القناه
يلي بدو ياها ،، كان طالع موسيقى هادية .
أول ما اجت براءة دغري قرب عليها وغمرها ،، بدون ولا كلمة استسلمت لقلبو ..نيمت راسها ع كتفو وهو بالتالي دفن راسو بشعراتها .
زيد : من ايمت ما رقصنا
براءة :يمكن من ليلة عرسنا
زيد :معقول
براءة : والله عالأغلب معقول
زيد :طيب شو رأيك اليوم يكون ليلة لعرسنا الجديد وبداية لحياة جديدة
.
براءة :ممنونة لقلبك انا
زيد : عمري انتي .
ضلو عَ هالحالة لمدة ربع ساعة يمكن بدون ما يحسو كيف مرقت الدقايق مستمتعين باللحظة .
زيد: شو صاير بهالدنيا البنات مالهن صوت
براءة: هههه بتعرف شو اليوم لأول مرة بعطيهن منوم
زيد: شوو وبلكي مابصير
براءة : لا اطمن هو كتير خفيف بس انا بقناعتي انو بيأذي
اما من الناحية الطبية مابيأذي فهمت عليي كيف
.
زيد: اي فهمت عليكي ...فهمت كتير عليكي(وغمزها)
.
كان بعدو غامرها وعم يتمايلو ع ألحان الموسيقى الهادية .
أما الأجواء فكانت رومانسية ورايقة بامتياز من الأضواء الخافتة للسفرة الممدودة بكل أناقة ..ريحة عطر الياسمين معشمق بكل شقفة من البيت بكل بلاطة وبكل حيط .
.
مرر بأيدو ع سحاب فستان براءة وصار يفكو بهدوء .
وهو غرقان بكتلة الحب يلي قدامو .
براءة: شوو
زيد: شو شو
براءة: مابدك تاكل
زيد: مبلى بدي آكل جوعان كتير .
بحركة سريعة بعدت عنو : يلا لكن قبل ما يبرد الأكل
.
بس دغري زيد سحبها بأيدو لعندو وماسمحلها تروح
.
بدي ياكي أنتي
براءة: خايفة يجي بكرا وكون عم احلم
زيد : هههه لو كان حلم منعملو حقيقة
براءة : ياعمري أناا
زيد : يادقة هالقلب أنتي .
قرب عليها زيد ب شوق وطبع بوسة دافية ع خدها .
غمرتو براءة بكل حب واشتياق بكل أمل انو يرجع كل شي متل ماكان..دقايق وكانت أنفاسهن مختلطة ببعضها هدوء تام .
صوط بسيط جدا للموسيقى يلي مشغلينها ،، اندمجو ببعض
وبعشقهن لبعض ،، غرقو ببعض وكأنو مافي حدا بالدنيا غيرهن .
بعد تقريباً ساعة كانت براءة متسطحة ع صدر زيد التنين مكتفين بالصمت ومستمتعين بالهدوء .
لوقت ما قطع عليهن رنة الموبايل، ، كان موبايل زيد عم يرن .
براءة : زيدد أمانة خلي التلفون لاااترد
زيد : يلا بس لشوف مين بلكي حدا مهم
.
براءة :هفففف .
قام زيد من مكانو وطلع عالموبايل ورد اطلع ب براءة وهمس .
زيد : أمي بهالوقت
براءة : غريب بتكون نايمة بالعادة
.
دغري زيد فتح الخط .
زيد :الو....اي أمي ....ولا شي كنت رح نام ....مابصير لبكرا
خير من شو تعبانة ....لالا مسافة الطريق وبكون عندك
.
براءة : شوفي زيد
زيد :مابعرف امي قال تعبانة شوي
براءة :استناني بروح معك
زيد :لا خليكي مشان البنات
براءة :متل ما بدك ...بس لا تتأخر ناطرتك وشلفتلو بوسة .
زيد : جاييكي (وغمزها)
.
طلع من البيت ودغري ع بيت أمو طلعان عالدرج وسمعان اصوات غريبة بالبيت قلبو دق بسرعة وكأنو عرف شو الطبخة يلي طابخينا عليه .
دق الباب بقوة ودمعتو بعيونو...والمفاجأة الأكبر لما فتحتلو
زينة أختو ..رفيقة دربو
.
زينة :بووووووم زيدددددد نطت عليه وغمرتو
.
زيد لسا متفاجئ وع شوي رح يبكي من الصدمة لا ما اتفقنا هيك لي ماخبرتوني زينة هي انتي .
عم يلامس ع وجها ويتأكد انها فعلا موجودة ،، خطفها بسرعة لقلبو بقوة كبيرة .
عم يمسح ع شعراتها بقوة وكأنو خايف حدا ياخدا منو .
متل الأب يلي شاف بنتو بعد غياب علاقتن كانت بتجنن ولو يطلع بأيد زيد ما يوافق ع جازتها من سامر ما كان وافق .
لك شتقتلك يا دبة حيوانة غبية انتي .
زينة استسلمت وسمحت لدموعها تنزل بكيت كتير بهاللحظة .
تراكمات كتيرة وضغوطات اكتر كانت بقلبها خوف كبير مزروع جواتها واخيرا لاقت الحضن يلي بيتحمل اوجاعها ،، الأمان يلي بحضن أخوها وسندها ما حدا قدر يعوضها عنو .
#
.
و الحنان يلي بحضن امها ما قدرت تلاقي منو غير عند امها
.
زيد : يعمري انتي لي عم تبكي صاير خاطرك من أزاز
زينة ضربتو بخفة : عم ابكي لااني اشتقتلك .
زيد : ليش ما جيتي معي لما جينا لهوون ولافي حدا اغلى
.
زينة : لا ترمينا بحجارك زيد أفندي
.
سهى: الحب اعمى ياااازيد
.
سرحت زينة ل أجزاء من الثواني الماضي كلو رجعلها بلحظة
. __فلاش باك______
.
قبل أربع سنين من هاللحظة باليوم يلي انحسم الأمر وتأكدت سفرتهن ل أم زيد وزينة
.
كانت زينة بغرفتها عم تروح وتجي وتقضم بأضافرها من شدة التوتر ،،فاتت أمها لعندها وهي عارفة انو رح تلاقيها بهالحالة
.
ام زيد : لك عما بقلبك شبك تنحتي عم قلك كرمال اخوكي
زينة : امي مو كرمال حدا بترجاكي مو كرمال حدا .
قلتلك وبرجع بقلك انا من البلد مابطلع
ام زيد: كرمال سامي
حولت نظرها عالأرض وسكتت وأوحت لأمها بأنو كلامها صح
.
ام زيد : قلتلك انا بنتي مابعطيها لعسكري يا اختي انا هيك مخي
زينة:سامي مالو علاقة أمي لاتبلشي هلأ
ام زيد: الله يطولك ياروح انشالله يكون سامي ما خصو ،، ضبي تيابك بسرعة بلكي منلحق نطلع بكير .
طلعت ام زيد من غرفة زينة وقلبها واجعها هموم الدنيا تراكمت جواتها ،، عم تطلع بكل انحاء البيت بقهرر وحسرة .
ويلها تترك البيت الذكرى الوحيدة من زوجها ويلها يلي عم يصير مع زيد وويلها بنت قلبها عصفورة البيت متل ماكانت دائما تقلها .
شلفت حالها عالكنباي وجواتها الف تنهيدة ،، سرحت شوي
وصارت تراودها ذكريات من الماضي .
_ عصفورة البيت هي يا أم زيد لو شو ما صار ما بتسمحي
لجناحاتها تنكسر ديري بالك عليها وعلمي زيد يكون أب لألها بغيابي .
هي كانت الكلمات الأخيرة ل أبو زيد قبل ما الله اخد أمانتو
.
فتحت عيونها من ذكرياتها وماعرفت شو تعمل ،، ايديها
مربطين تماماً وماعم تقدر تعمل شي .
رمت كل الأفكار من عقلها وتوجهت ع غرفتها ،، بس قبل ما تفوت استوقفها صوت طالع من غرفة زينة كانت شهقات بكا
مع شي من العناد والتحدي .
زينة : سامي بترجاك اعميل اي شي عم قلك بدنا نسافر .
سامي:لك مو ع اساس امك رفضت كيف هيك
زينة :ااااه ...مابعرف ابصر زيد شو مخبص لحتى مستعجلين
.
سامي :انا رح احكي مع امك لا تاكلي هم
زينة :لك ماعم تفهمني ماعاد ينفع الحكي امي مصرة
ماتزوجني ل عسكري .
سامي : قولك مامعها حق ،، زينة انا من فترة بدي فاتحك
بالموضوع بس كنت عم كذب ع حالي وقول بجوز أتسرح
من هالعسكرية بس مو الهيئة ،، حتى عم يطالعو اشاعات .
بدهن ياخدو احتياط ،، حتى يلي مخلص عسكريتو بدهن يسحبو .
.
زينة : شو يعني هلأ يعني سافر مع اهلي واتركك هون لحالك
.
سامي : الي الله انا .
زينة : تعا خدني بهرب معك وبعيش معك وين ماكان
المهم كون جنبك ودير بالي عليك .
سامي تنهد وحكا بئلبو : لا اله إلا الله ...زينة عمري فهميني .
انا مالي ضمنان عيش ل بكرا حتى علقك معي بترجاكي فهميني ،، هيك هيك امك كرهانتني مابدي ياها تشيل بئلبها مني
.
زينة :امي ما بتكرهك وحياة الله ...هي بشكل عام مابدها تزوجني لعسكري .
سامي : الله معك زينة ،، موفقة بحياتك
زينة : استنى سامي لاتسكر أمانة سامي لاتتركني .
سامي : ما بتركك لو بترك روحي بس القدر شو مخبيلي مابعرف ،،الك عليي وعد تكوني انتي أم ولادي بس حاليا
.
شيلي فكرة الهريبة من بالك وتوكلي ع الله وسافري مع امك .
زينة صارت تبكي اكتر : انت وعدتني نتزوج ،، وحجار الشام هي يلي تشهد بهالزواج شو صار هلأ استسلمت .
سامي : حجار الشام اتهدمت.... الشام انطفت يا زينة وسخوها
البشر يلي كانو ياكلو من خيراتها تركيها لربك هو بيحلها .
زينة : انا بحبك سامي اقسم بالله بقتل حالي لاتكون انت وأمي عليي يلي فيني مكفيني .
سامي : ياريت كل همومي متل همومك حسبي الله بس .
بحركة سريعة فتحت الباب ام زيد ع زينة واخدت التلفون من زينة وحكت
.
ام زيد : هيك امك علمتك يا سامي ...توعد البنات بالزواج وتتركهن بنص الطريق .
سامي : مرت خالي هاد انتي
ام زيد : اي نعم انا هي انا يلي كنتو كل هالمدة عم تستغفلوها
وتحاكو بعض بدون علمي .
سامي : اناا والله
ام زيد : لا تحكي شي سامي ،، رح اسألك انت بدك زينة
.
سامي :انا بعشقها مو بس بدي ياها
ام زيد : المسا بحكي مع زيد وبردلك خبر حاول بأقرب وقت تنزل عالبلد وإذا بتنقل وراقك لهون بكون كتر الله خيرك
.
سامي :الله يخليلنا ياكي يا مرت خالي ربي يديمك فوق راسنا .
سكرت الخط ام زيد وطلعت من غرفة زينة وزينة عم تلاحقها بصمت ...صمت دام ل اكتر من نص ساعه .
ام زيد مالها قلب تحكي وكأنو حدا امتلكها وخلاها تحكي مع سامي بدل ما توقف بطريقهن فتحتلهن الطريق .
كانت متأكدة هالغصة رح ترافقها طول عمرها من لما سمعت بنتها يلي حملتها ببطنها بنت قلبها يلي كبرتها كل شبر ب ندر
.
عم تطلب من شب ما الها بتعرفو سنتين تهرب معو .
معقول بهالسهولة بنتي تتخلى لك انا امك يا زينة معقول ما عرفت ربيكي ليش جبرتيني اكسر ع انفي بصلة وزوجك .
عشت وشفت عصفورة بيتي كبرو جناحاتها وبدها تطير .
ياربي صبر قلبي واهديها ل بنتي ماعم تستوعب وين بدها ترمي حالها .
زينة كسرت الصمت وحكت :أمي
ام زيد: نعم
.
زينة:زعلانة مني
.
.
ام زيد: مابعرف بس غالباً زعلانة ع حالي ماعرفت ربي هالولدين .
زينة :امي لاتحكي هيك انا تربايتك بحياتي ماغلطت
ام زيد : اذا انتي تربايتي معناها تفي ع هيك ترباية .
كنت شوف بالمسلسلات والأفلام كيف هالعرايس والعشاق بيروحو خطيفة الحمدالله هلأ اكدتيلي انهن مسلسلات واقعية .
ماكنت بتخيلك هيك زينة عالأقل عقلك توقعتو يكون اكبر من هيك
زينة صارت تبكي بهاللحظة :امي والله موبأيدي بترجاكي الله من عندو عما ع ئلبي من لما عمتي كانت تحكي بدها ياني لأبنها .
وشي جواتي تحرك امي انا من لما خلقت وانا بحبو ل سامي يمكن لو مو هالموبايل ماكنت اصلا حاكيتو او تواصلت معو .
بس مابعرف كيف هيك صار بترجاكي امي آخر طلب بطلبو بحياتي منك وافقي ع زواجنا .
ام زيد : ههههه فكرت بدك تطلبي مني سامحك ،، زينة انا لآخر مرة بقلك فكري منيح هي مانها خطوة سهلة .
الزواج مو كلو حب.. بعد بكير لحتى حملك هالمسؤولية .
زينة :انا مستعدة احمل هالمسؤولية بس وافقي .
ام زيد : ورب العزة انك مو فهمانة شي من المسؤولية زينة اصحي وين البنت يلي وعدتني بيتي الجديد يكون من هندستها نسيتي احلامك لك زينة فهميني .
زينة سرحت وتذكرت كل احلامها بس تلاشو هالأحلام بلحظة إدام هالحب
.
أمي بهالبلد ما فيني ادرس مانك شايفة كيف عم يستهدفو المدارس والمعاهد والجامعات لك حتى الخطف ماعم يخلى من هالبلد
.
ام زيد : بس انتي خيارك انك تبقي بهالبلد
زينة: حد سامي كل شي بهون امي
ام زيد : لك سامي ماحيكون موجود دائما ولو بدو ينوجد معك كل يوم هاد تمنو غالي بنتي من وين بدو يلحق عملة .
زينة : الله بيبعت ،، مو انتي عطول بتقولي الرزق ع الله وماحدا بموت من الجوع .
طلعت ام زيد ببنتها وشايفة بعيونها انها ماعم تفهم شو عم تقلها، ، فعلا معمي ع قلبها ،، هي بدها تتمسك ب سامي ولو شو ما كلفها الأمر ما حسبت شو ممكن تكون العواقب .
كان ببالها ترفض كل شي وتاخد زينة وتطلع فيها عاللادقية بس دغري رن بمسمعها كلمات زينة .
_وحياة الله بقتل حالي ولا بسافر لا تكون انت وأمي عليي
.
تنهدت بقهر وتوكلت ع الله وسلمت الأمر لَ رب الأمر .
وافقت ام زيد ع هالزواج وخبت غصتها بقلبها .
أما زينة ف كان طاير عقلها من الفرحة لدرجة ناطرة الليلة يلي بدا تجتمع فيها مع سامي بنفس البيت .
رضيت زواجها بدون حفلة عرس حتا بدون بدلتها البيضة يلي كانت بتحلم فيها كان فستانها عادي جدا احوال سامي كان يادوب جايبة همها حتا البيت والأساس كان كلو لأهل سامي مافي شي جديد عليها الا هالزواج وهالحياة الجديدة .
.
بهالفترة طلعت ام زيد عاللاذقية وزوجت زيد ل براءة وردت نزلت لما سامي نقل كل وراقو وبصعوبة قدر يفرز حالو عالشام ع نفس المنطقة يلي رح يسكن فيها وهالشي كلفو كتير وماكان حاسب حساب للأيام الجاي .
نزلت ام زيد عالشام وزوجت زينة وتركتها بالشام وطلعت عاللاذقية لعند ابنها ...وما قدرت ترجع تنزل ولا حتى زيارة .
الطرق كلها تغيرت وصارت اخطر من قبل والبلد تأزمت أوضاعها أكتر ،، لحد هاللحظة هاد كان أول لقاء بعد غياب أربع سنين
.
___باااااااك_______
.
ام زيد :تركوها حبيبة قلبي زنزونتي
سهى : شوو حكيناا شه
ام زيد: اصلا مشان تعرفو بنتي مخلصة ما تركت حب حياتها وطلعت من البلد ،، بنت أمها هي .
زينة دمعت عينها وغمرت أمها بحنية وندم غمضت عيونها ع صدر أمها وبصعوبة مسكت دموعها .
(انتي مابتعرفي تكذبي يا أمي ،، انا كبرت لدرجة صرت افهم كل نظراتك ...عم تحكي هيك لتريحيني ولو بيطلع بأيدك
يرجع فيكي الزمن كنتي خطفتيني لحضنك وماسمحتي بهالزواج ...اخ يا أمي يا تررى بقدر احكيلك اني ندمانة
بخاف تعيريني بالأيام يلي نصحتيني فيها وما قبلت نصيحتك ..ياريتني قبلتها كنت هلأ عم هندسلك بيتك مو عم اشتغل ببيوت العالم لفاية اخ يا أمي والآخ ما بتنفعني )
.
ام زيد : عصفورة بيتي رجعت كان لازم تفرشولها الأرض ورود
زيد : بهي معك حق بيلبقلها والله .
ام زيد: يلا تعو هلأ الأكل جاهز وعم يستناكي زينة خانم
سهى: الله وكيلك ما خلتني اكل فطست من الجوع
وماكانت تسمحلي .
زيد: انا شبعان انتو روحو كلو
ام زيد: كم لقمة لك ابني كرمال اختك .
زينة: لك صحي براءة والبنات وينهن مشتاقتلن خيرات الله
.
زيد : كان بدها تجي بس كرمال البنات بقيت ،، اصلا لو تعرفك هون كان ركدت ركد .
ام زيد: يلا ماصار شي بكرا عشاكن عنا جيبها من الصبح لعنا تقضي نهارها .
__باليوم التاني_____
.
صحيت براءة ع رنة الموبايل هالمرة كتير عالية الرنة .
وخلتها تفز بأربعتها وصحت البنات كمان
براءة: ولي شبو هاد فلتان من الصبح لي هيك صوطو
.
طلعت ع شاشة الموبايل كان المتصل زيد
لكك زيد ما اجا مبارح ...دغري فتحتلو الخط .
زيد: فقتي حبيبي
براءة: عطيتي طاسة الرعبة كمان لك اديش عالي صوطو هالموبايل
زيد : هههه اي لكن هاد من الحديثات غير الفصعون يلي كنتي شايلتيه
.
براءة: زيد طمني عن امك ليش ما رجعت عالبيت كمان
.
زيد : لك غفيت عند امي ونسيت حالي ...حزري شي
براءة: شو شو صاير
زيد : لك زينة امبارح وصلت كانو عاملينلي مفاجئة
براءة : بربكك زيد لي انا مالي خبر
زيد :لك ماحدا بيعرف ونسيت اتصل فيكي مبارح خفت تكوني نمتي وصحيلك البنات
.
.
براءة :يئبرني أكال همي
زيد :بعيدوو
.
براءة :هلأ شوو وينك انت
زيد : ناطر اميرتي تصحى مشان اخدها عند امي
براءة : يموو يئبرني هالزوج الصالح لكن رح صحي البنات
و... ها هي صوتن مافي داعي صحيهن يلا بلبسن وبلبس وبتصل فيك
.
زيد : ناطرك ئلبي .
قامت من تختها بدلت تيابها وتياب البنات ونزلت عند زيد
.
براءة: هااي
زيد: هايات
براءة : خلينا نعدي ع محل الحلويات
زيد : لي بقه
براءة التفتت ع بنتها : شامة شو بدك قلبي
شام : هاالوو
براءة : ياسو وانتي ماما شو بدك
ياسمين: تيييف
.
زيد فرط من الضحك : ههههه لكك شوو مافهمت
براءة :هممممم انت مطر تسمع الترجمة مني لذلك رح قلك
شام بدها كاتو وياسمين بدها كيك والمعنى واحد يعني .
زيد : يعممري أنااا لك بعثقكن
براءة : بلله وانا
زيد :انتي بموت فيكي .
توجهو ع محل الكيك وراحو ع بيت ام زيد ،، وطبعا بلشت السلامات الحارة بين زينة وبراءة ،، وانتهى فيهن المطاف وهنن عم ياكلو آخر قطعة من الكيك كانت زينة بتعشق شي اسمو كيك .
براءة: زنزون ميار وينها
زينة : نايمة تئبر ئلبي اناا
براءة :يموو بدي قوم عضاا مابقة فيني
.
زينة :لا دخيلك لاتزعجينا اذا حدا جبرها تصحا طول النهار بتضل معكرة
.
براءة :اي هو منيح بتتأخرلك بالنومة انا بفيقوني بناتي من السبعة الصبح الله وكيلك .
سهى : ولي براءة مغيرة موبايلك
براءة : زيد يئبر ئلبي هداني ياه بعيد ميلادي
.
للحظات بسيطة غصت سهى بس دغري اخدت نفس ورجعت لطبيعتها
.
سهى : تعلمتي علي
براءة : الله وكيلك ما عم اعرفلو بس بستلم منو مكالمات
سهى :لك دبة تعي علمك عليه
براءة:ياريت ولله لاني مالي مراق اقرأ شي واتعلم منو
.
ام زيد : بلله ومين بدو يساعدني هلأ
سهى:هههه لك خاالتي استني شوووي
.
بمكان تاني تحديداً عند جوري .
كانت بهاللحظات عم تصحى وتسترجع قواتها لتسمع صوط مفاتيح البيت .
جوري :مين ،، قامت من مكانها طلعت عالصالون هي بتعرف انو جواد اجا مع ذلك خافت يكون شي حدا .
جوري : شو أيمتا جيت
جواد آعد عالكنباي وبأيدو موبايلو وغير مبالي لكل يلي عم يسمعو .
جوري :جواد عم احكي معك
جواد :اي نعم
جوري :لك شي مرة بس احكيك رد علي متل العالم والخلق .
جواد :بس تكوني انتي متل العالم والخلق برد عليكي متلن
جوري : جواد شو قصدك
جواد: والله يلي فيو مسلة بتنخزو
جوري :ليش ما بتطلقني وبتخلص مني هيك هيك انا مو متل باقي النسوان شقفة ولد مابقدر جبلك
.
جواد :لا اله الا الله بس شو بدك من الآخر
جوري :بدي اعرف شبك لي بتضل قالب خلقتك
جواد :هففف هيك من الله ،، مو لشوف بالأول وجه حلو بهالبيت افرد خلقتي مشانو
.
.
جوري تنهدت وفتلت حالها وراحت عالمطبخ تعمل قهوة
.
حقير مو بأيدك ،، شو يعني اني ما عم احمل وجيب ولاد
.
ما بنحسب من النسوان ،، اذا ما صرت ام ما بكون إمرأه كاملة انا بنظرك ناقصة يا جواد لك يلعن الساعة يلي شفتك فيها متحضر ومثقف ريتن ينعمو عيوني
.
قطع شرودها إيدين التفت ع خصرها بشراسة
.
غمضت عيونها وحكت بقلبها : ياريت لو كنت حنون يا جواد لو بقلبك بس شوية رحمة
.
جواد : ما اشتقتيلي
جوري بدون نفس : مبلا اشتقتلك
قرب جواد ع رقبتها وطبع بوسة قويةلدرجة توجعت
منها جوري
.
كان مشتاق لجسمها شكلو ما بيوحي أبدا انها زوجتو متل الفريسة قدامو عم ينقض عليها
.
كل مرة كان يعاملها بنفس هالمعاملة ،، تحركت بهدوء جوري لتحط ايدها مكان ركوة القهوة دفشتو عنها من المها
.
بعدت عنو بعصبية وقرف :خلص بقااا
جواد :شبك شو صابك
.
جوري : ولا شي انحرقت ايدي
جواد : غمزها ...أي يلا يلا لحقيني مشتقلك خير الله
.
جوري : مو جاي عبالي ماني مشتاقتلك منيح هيك
.
جواد :شو أمرتي ياخانوم ،، حمدي ربك جيت عالبيت اصلا
لعما انتي كل ما بتكبري اكتر بصير لسانك بدو قص
.
جوري : مين انت لتقص لساني شقفة حشرة شهوتك غالبة
ع رحمتك مابتهمك المشاعر ولا بتهمك مرتك يلي من جنونها
صارت تحاكي الحيطان ،، لعما بقلبك اذا ما قرفت الدنيا
.
وكرهت حياتي لأجلك ،، لك بترجاك طلقني وخلصني
.
جواد : تعي لهون يا واطية عم ترفعي صوطك بوش جوزك كسير راسك ...قرب بسرعة ومسكها من شعراتها وشحطها ع غرفة النوم
.
رماها عالتخت بلئم وغل بعدم احساس نظراتو إلها كانت مقرفة
عم يطلع فيها ويفك بزرار قميصو
.
معقول ماشافها عم تترجاه بعيونها كيف فيو الأنسان يكون حامل بقلبو حجر بدال القلب ..كيف الكره والحقد بيمشي بالعروق بدل الدم كل هالعمل لأنو ما بتجيب ولاد اذا الله
هيك أمر رب العالمين هو يلي اختارها من بين كل نسوان الدنيا
.
ليمتحنها بهالوجع يمتحن صبرها وإيمانها بس للأسف نحنا منجي منعطيها فوق جرحها جرح ،، ومنعيرها كمان بأنها ما بتحمل ..مع الأسف وبكل صراحة هاد هو المجتمع الفاشل يلي ربينا فيو ،،كثرة الجاهلين المتظاهرين بأنهن متحضرين ،، هدول اكتر الناس يلي مخبية جواتها الحقد والغل هدول هنن يلي بيستنو الناس ع نكشة صغيرة ليحكو من ورا ضهرن
.
بعد ماخلص شغلو معها لبس تيابو وطلع من البيت
تارك جوري غرقانة بدموعها ،، البنت يلي بيوم من الأيام كان مسميها جوريتي ..هالجورية هلأ ذبلت بطل حدا يسئيها من اهتمامو اوراقها تيبست و ارتمت عالأرض وصارت فتات
.
.
قامت من مكانها ودموعها ع خدا ما لاقت شي تفش قهرا فيه ،، صار تكسر وترمي كلشي بيطلع بوجها كانت موجوعة لدرجة
.
لو حدا بيشعر فيها كان عطاها دزينة صحون وقلها اكسري
اكسري وفرغي كل الحزن جواتك بس للأسف طلعت جملة
أمي وامك صحيحة
.
كانت دائما تقلي امي مابحدا بيشعر بالوجع إلا صاحبو
.
وهي هيك أنا عايشة بألمي ووجعي والكل عايش مكفي حياتو لا أمي ولا أختي عم يقدرو يخففو عني
.
لك تعبتتتت ياااااربي لك اااااااااه،،اوووووووف
لك بككرهككككن ...بكره الكل أناااا
.
حطت ايديهاوع وجها بقوة وكأنها بدا تقطع حالا وارتمت عالأرض جاسية ع ركبا ،، عم تحاول تطلع من الدوامة يلي دخلت فيها بأرادتها ...عم تتذكر ذكريات من الماضي
.
_فلاش باك_____
كانت اول طلعتهن عاللاذقية وبعدهن اعدين ببيت ابو جواد
.
.
بيومها كانت جوري طالعة من الحمام بالبورنص وشعراتها متناثرين ع ووجها بعفوية وخدودها حمر بلون الورد
.
حد علمها ماكان في حدا بالبيت ،، بس لما اندق الباب اطرت تفتح
.
جوري: مين
جواد وقبل ما يقلها شو بدو انسحر بتفاصيلها ..بهاللحظة
قلبو صار يغلي كان عبالو يغمرها ليطفي النار بقلبو
.
سحرتو وكأنها المرة الأولى يلي بشوف فيها بنت
.
جوري: ليش جيت بهالوقت
جواد : نسيت وراق السيارة واطريت ارجع
جوري: اممم اي فوت خدهن
جواد : يلا
.
فات ع غرفتو ليجيب وراقو و جوري ضلت ناطرتو برا
مشان لما يطلع تسكر وراه الباب
.
جواد : لعمى هي كل ماعم تكبر عم تحلا اكتر خطفت قلبي هالفصعونة
.
طلع جواد من غرفتو وشي جواتو خلاه يوقف ويحاكيها
.
جواد : انتي لي ما بتتحجبي متل اختك
جوري: انا ماحدا بيجبرني ع شي لما الله بيهديني بتحجب
أما اختي بيت حماها هنن يلي طلبو تتحجب
.
جواد : حلو قوية كمان
جوري :غصب عن الكل
جواد : وحلوة كمان
ابتسمت جوري : لاهي مو غصب عن الكل انا حلوة بعيون الحلوين ..حكت هالكلمة بعفوية بس جواد اعتبرها مغازلة
.
من هون اتأكد انو عنجد بحبها وقرر يخطبها بس لما يركزو أمورن اهلها ويلاقو بيت يأعدو فيه
.
طبعا براءة كان إلها دور كبير بأنو جوري توافق عهالزواج
.
كانت علاقتها الحلوة ب زيد مأثرة عليها ومفكرة كل العلاقات ممكن تنجح
.
لذلك صارت تقنع اختها بالزواج وبالذات بهاليوم
كانت جوري جاييتها موجة اكتئاب وكرهانة أم الرياضيات والمسائل والفيزيا والكيميا لانو بطل حدا يدرسها ياهون
.
فينا نقول براءة ب اللاشعور استغلت ضعف جوري وأعدت تقنعها الزواج حلو الزواج مليان حب وشوفي احلا من انك تلبسي البدلة البيضة يلي اغلب البنات بيتمنو يلبسوها
.يتبع..
