العصفور اللي عرف سر النجاح
كان فيه عصفور صغير اسمه "نور"، عايش مع عيلته في شجرة كبيرة في غابة جميلة، نور كان دايمًا يشوف العصافير الكبيرة بتطير في السماء بكل سهولة، وتلف فوق الغابة بدون خوف.
بس هو؟ كان لسه بيتعلم الطيران، وكل ما يحاول يطير، يرجع يقع على الأرض مرة يتعب، ومرة يتخبط في فروع الشجر.
نور بدأ يحس باليأس وبدأت تتردد اصوات في دماغه "ليه كلهم بيقدروا وأنا لأ؟"
قال لنفسه وهو واقف على حافة العش وشايف السماء الزرقا قدامه كان نفسه يحلق زيهُم بس كل مرة يحاول يفشل، والدته شافته زعلان فجات جنبه
وقالتله: “ما تستعجلش يا نور، كل حاجة بتيجي مع التدريب والصبر.”
لكن نور اللي كان صغير وعايز يحقق كل حاجة بسرعة، مكانش قادر يستوعب الكلام ده و كان عايز يكون زي العصافير التانية فورًا.
في يوم من الأيام، نور شاف طير عجوز قاعد على غصن شجرة بعيدة بيبصله بابتسامة، الطير ده كان اسمه "عزيز"، وكان معروف في الغابة إنه حكيم، وبيساعد كل اللي يجي يسأله، نور قرر يروح لعزيز ويسأله عن السر اللي يخلي العصافير تعرف تطير من غير ما تقع.
نور وصل لعزيز وقاله: “أنا كل ما أحاول أطير بفشل، إيه السر اللي يخلي العصافير الكبيرة تطير كده بسهولة؟”
عزيز ضحك ضحكة صغيرة وقاله: “السر مش إنك تطير بسهولة، السر هو إنك تتعلم من كل محاولة تفشل فيها.”
نور بصله بحيرة: “إزاي يعني؟”
عزيز قاله: “شوف يا نور، كل عصفور حاول يطير زيك، وكلهم فشلوا في الأول، لأن مفيش حد اتولد وهو بيعرف يطير على طول، كل مرة بتقع فيها بتتعلم حاجة جديدة و لما تفهم إن الفشل مش نهاية الطريق بس هو خطوة في الرحلة ساعتها هتعرف السر.”
نور قعد يفكر في الكلام ده و كان دايمًا بيحس إن الفشل معناه إنه مش هيقدر يطير أبدًا، بس دلوقتي فهم إن الفشل جزء من التجربة.
عزيز كمل: “كل مرة تقع، ركز في اللي حصل، إنت وقعت ليه؟ كانت سرعة جناحاتك قليلة؟ ولا مكنتش مركز في اتجاه الرياح؟ تعلم من غلطك وحاول تاني.”
بعد ما نور سمع النصيحة دي، رجع لعشه وقرر إنه يحاول مرة تانية و طلع على طرف الغصن بص للسماء وبعد ما أخذ نفس عميق و فرد جناحاته وقفز في الهواء.
في البداية حس إنه هايقع زي كل مرة، بس افتكر كلام عزيز. ركز في حركة جناحاته، وحس إنه محتاج يرفعهم أكتر وفعلاً جناحاته بدأت تتحرك بانسيابية وشوية بشوية بدأ يحس إنه مستقر في الجو.
المرة دي، رغم إنه كان قريب من الأرض، لكنه مقدرش يقع نور كان طاير!
فرحة كبيرة مليت قلبه، وفضل يحلق في الهواء بحماس بس فجأة هبت ريح قوية وبدأ يترنح ويقع تاني.
لكنه مازعلش بالعكس، كان مبتسم ليه؟
لأنه عرف إن الفشل مش النهاية، وإنه ممكن يحاول تاني ويكون أفضل.
اليوم اللي بعده، نور فضل يتدرب من غير ما يتضايق لما يقع، وكل مرة يتعلم حاجة جديدة و شوية شوية قدر يطير لمسافات أطول، ولما جات الريح تاني، عرف يوازن نفسه وما يقعش.
وفي يوم، نور بقى من أحسن العصافير اللي بتطير في الغابة و العصافير الصغيرة كانت تبصله بإعجاب
وتسأله: "إزاي اتعلمت تطير كده؟"
وهو كان دايمًا يقولهم: “السر هو إني مابخافش من الفشل، كل مرة فشلت فيها، كانت خطوة تقربني من النجاح.”
وبكده نور عرف سر النجاح وهو : الصبر، والإصرار، والتعلم من كل محاولة.
و في النهاية الفشل مش نهاية الطريق، لكن هو اللي بيفتح لك أبواب النجاح لما تقع تقوم من تاني وتتعلم، لأن النجاح مش بيجي غير بعد محاولات كتير.
