قصة الاثاره والغموض منزل أيوب
الجزء الثاني
" اليوم الاول "
" الموضوع مطلعش هزار"
وصلت البلد واول حاجه عملتها خدت معايا امين شرطه اسمه " مصطفي " عايش في البلد واكيد يعرف عن البيت دا حكايات كتير وانا محتاج اسمع عنه اكتر ، بدئت ادردش مع مصطفي وسائلته عن البيت .
" بص يا باشا كل اللي اعرفه ان البيت دا ملعون وكل المصايب اللي بتحصل في البلد بسببه ومن يوم ما ايوب مات و الحوادث بدئت ،والرعب مالي قلوب الناس يا باشا وأول مالليل بيدخل وتقريبا الساعة ١:٣٠ ص البيت كله بينور بنور احمر غامق زي لون الدم وبتطلع منها اصوات مرعبه بيقولوا ان دي اصوات الشباب اللي ماتوا ، بيتعذبوا والميعاد دا تحديدا اللي البيت اتحرق فيه زمان"
انا سمعت ان الشباب اللي بتموت من عائلات كبيره في البلد ، ايه هي اسامي العائلات دي وايه علاقتها بالبيت اصلا ؟؟
" اول عيله " عيله عوف" ودي تقريبا بتملك ربع بيوت البلد ومعظم الاراضي الزراعيه بتاعتها وناسها محترمين اوي يا باشا وملهومش في الاذيه ، العيله التانيه " عيله سالم" ودي بقي عيله عايشه بالبلطجه ومش بيتفاهموا غير بالسلاح والبلد بتخاف منهم ، اخر عيله بقي " عيلة السلاموني " ودي معظمها نواب مجلس شعب وظباط شرطه عيله واصله يعني ياباشا ، و كل عيله من دول مات من عندها حوالي ١٠ شباب ومحدش برده يعرف ايه اللي بينهم وبين البيت دا "
وبالنسبه لظباط المباحث اللي اشتغلوا في القضيه دي قبل كدا موصلوش لحاجه ليه ؟
" لا مؤخذه في الكلمه يعني يا باشا كل اللي مسك القضيه دي شخصيته ضعيفه ومحدش فيهم فكر يدخل البيت وكانوا بيعتمدوا على التحريات اللي بتجبها المخبرين وامناء الشرطه اللي هي حكاوي الناس ومكنوش بيعرفوا ياخدوا اي حاجه من عائلات الشباب اللي ماتوا ،تقرييا كدا بيخافوا يتكلموا "
وققنا قدام البيت ، شاورلي عليه مصطفي وهو مرعوب ، هو البيت شكله مرعب فعلا بس دا مش بيت دا قصر وكميه الحرق اللي في وجهته من برا بيدل انه من جوا كوم تراب ، طبعا متحاوط بشريط الشرطه الاصفر المكتوب عليه ممنوع الدخول ، قررت اني ادخل استكشف الوضع من جوا واستغل ضوء النهار وخصوصا اننا كنا لسه قبل العصر ، نصحني مصطفي اني مدخلش بس انا فاجئته انه هيدخل معايا ،حسيت برعشه الرعب اللي جريت في جسمه اول ماقولتله كدا بس في الاخر اقنعته ، عدينا الشريط الاصفر بس الباب كان متشمع بالشمع الاحمر فبدئت ادور علي اي مدخل تاني للبيت ف طلع لينا غفير الشرطه معيناه حراسه علي البيت ورفض اننا ندخل ، لكن مصطفي ادخلوقاله اني ظابط المباحث الجديد المسؤال عن القضيه ودا جزء من شغلي ، دخلنا البيت من شباك مفتوح و الغريب ان مفيش اي ضوء داخل البيت برغم ان معظم الشبابيك مفتوحه ، فتحنا كشافات الموبيلات علشان نقدر نشوف البيت دا في ايه .
" البيت مكون من دورين ، الدور الاول فيه ٦ اوض بيفصل بينهم سلم خارج من نص الصاله موصل للدور الثاني ، دم متجمد مالي ارضية الصاله ورائحه كريهه بتطلع مع كل باب اوضه بيتفتح ، الغريب في الموضوع ودا اللي قلقني ان مفيش اي اثر حريق جوا البيت كل حاجه مظبوطه تقريبا كدا مفيش ولا غلطه ، لفت انتباهي اوضه مكتب فيها مكتبه كبيره ومرصوص فيها كتب كتير ومنظمه بطريقه فظيعه ، طلعت الدور التاني درجات السلالم كانت بتطلع صوت مرعب ودا نتيجه انها خشب قديم جدا ، اربع اوض بينهم طرقه طويله في اخرها باب حديد!!!!! الباب شكله قديم وعليه ترباس مقفول بقفلين تقريبا محدش قرب من الباب دا من يوم ما اتقفل ، الاوض كلها نفس التصميم سريرنحاس طويل ودواليب خشب متأكل منها بعض القطع ودا بسبب السنين اللي مرت عليها ، الحاجه الوحيده المختلفه هي اوضه المكتب وداالشيء الوحيد اللي لفت انتباهي "
خرجني من تركيذي صوت الامين مصطفي وهو بيقولي " ياله بينا يا باشا الليل قرب يدخل علينا "
استغربت ان الوقت فات اربع ساعات فاتوا بسرعه ربع ساعه ، خرجنا من مكان ما دخلنا بس ملقناش الغفير تقريبا كدا بيمشي اول ما الليل يدخل ، كنت مقرر اني اجي البيت دا تاني لان في حاجات كتير قدامها علامات استفهام ولازم احل لغزها ، بس قبل ما ابعد عن محيط البيت سمعت صوت بينادي علي اسمي ولمحت شخص واقف في شباك الدور التاني في الوقت دا بصيت لمصطفي وقولتله انا لازم ارجع البيت دا حالا ......
