قصة الاثاره والغموض منزل ايوب
الجزء الثالث
"اليوم الثاني"
"جريمه جديده"
قررت اني ارجع البيت تاني لما اتخيلت شخص واقف في شباك الدور التاني لكن مصطفي منعني اني اطلع وبدء يقنع فيا ويترجاني ،رجعت معاه وانا متأكد اني هوصل لحل في القضيه الملعبكه دي .
دخلت الاستراحه بتاعتي ورتبت دولابي وقعدت علي السرير ارتب افكاري في ورق وأدون كل حاجه وصلتلها في مذكره صغيره بشيلها معايا، كان الجو برد في اليوم دا وصفير الرياح كان عامل رعب في المكان ومقدرتش اقاوم النوم ، صحيت من النوم الساعه ١ ص مفزوع من كابوس ومعرفش ليه جه في بالي اني أزور بيت ايوب في الوقت دا لبست جاكيت تقيل من عندي واخدت معايا كشاف والموبيل واتجهت للبيت .
لما قربت منه شفت النور الاحمر الغامق اللي طالع منه زي ما مصطفي قالي وسمعت اصوات مرعبه وفعلا كانت قريبه من اصوات التعذيب ،قربت من البيت اكتر والغريبه اني مكنتش خايف كل اللي كان في دماغي اني اعرف ايه اللي بيحصل جوا ، باب البيت مكنش متشمع زي ماشفته الصبح ، فتحت الباب بهدوء وشفت اصعب منظر ممكن تشوفه في حياتك "كلب بأنياب طويله واقف في نص الصاله وبيلتهم احشاءشخص مرمي قدامه بس الشخص دا كان راسه مفصوله عن جسمه " حسيت وقتها ان ضغطي بقي واطي ومبقتش عارف اسيطر على هدوئي وبدئت اتنفس بشكل اسرع ، حاولت ارجع بضهري بهدوء لكن فات الاوان الكلب لاحظ وجودي عينه اللي كلها دم وتكشيره انيابه كانت بتدل علي اني اللي هيحصلي مش كويس وفي الوقت دا محستش بنفسي غير و الامين مصطفي بيصحي فيا ، معقول كل دا كان كابوسبس الكابوس الاكبر لما مصطفي قالي اللي حصل .
" اللحق يا باشا في جثه جديده في البيت الملعون بس المره دي مرميه قدام الباب والدنيا كلها مقلوبه بسببها"
اتفزعت من علي سريري وغيرت هدومي و جريت مع مصطفي علي بيت ايوب .
المنظر كان صعب معظم الاهالي متجمعين حوالين البيت والشرطه محاوطه المكان ، الجثه المره دي كانت بتاعت مأمور المركذ !!! ودا من عيلة السلاموني !!
دي نفس الهيئه اللي شفتها في الكابوس ونفس الموته
الرأس مفصوله عن الجسم والاحشاء كلها بره ، معقول اللي حصل دا ، يعني انا كنت في البيت بجد ! مستحيل.
" محدش عارف المأمور دا ايه اللي جابه هنا دا كان طيب وميستحقش الموته دي خالص ، هو انت مش بتتكلم ليه يا باشا "
" ها ؟ اتكلم ااقول ايه بس دا اللي بيحصل هنا كارثه ، انا هقولك علي سر يامصطفي ، انا قررت اني ابيت في البيت دا بكره ومش هطلع منه غير وانا كاشف الحقيقه ولو مطلعتش ياريت تبقي تعرف اللي هييجي بعدي ان كان فيه ظابط مباحث طيب هنا بيبحث عن الحقيقه لاخرنفس فيه ومتخليهوش ييئس"
" اللي بتقوله يا باشا دا مستحيل وانا مش هوافق علي اللي انت بتفكر فيه "
" انا خلاص قررت يا مصطفي انا عاوز اقعد مع الثلاث عائلات النهارده وهكتبلك شويه حاجات تجيبهوملي من ااقرب مكان "
" تحت امرك يا باشا وربنا يعينك ويقويك "
رجعت علي القسم وطلبت منهم كل التحريات اللي اتعملت عن البيت دا وعن الثلاث عائلات ، مكنش فيه جديد عن اللي مصطفي قاله بس لاحظت ان الثلاث عائلات بينهم مشاكل ووصلت في وقت من الاوقات للدم وبعد التركيذ شويه في التحريات عرفت ان ارض البيت كان عليهامشاكل بين عائله سالم وعائله عوف وكل عيله بتقول ان الارض بتاعتها وهنا ادخلت عيله السلاموني اللي في الاخر حصل بين الثلاث عائلات نزاع قوي جدا وهنا قررت عيله السلاموني انها تاخد الارض وتبني عليها البيت دا بالقوه وطبعا باستخدام نفوذها وسلطتها ، قضيه غريبه بس اللي استنتجته ان الموضوع دا مش هيخرج عن عيله من التلاته ومفيش وجود لاي قوه خفيه في الموضوع ، اتحركت من مكتبي وانا متجه لأول عيله " عيله السلاموني" .
بعد تقديم نفسي والترحيب بيا بدئت اتكلم مع كبير العيله "محمود عبد النبي السلاموني" حاولت افهم منه اكتر وسئلته عن الشباب اللي ماتوا من عيلته ،
" بص يا باشا انا مش عاوز مجيتك لينا تبقي علي الفاضي بس الحقيقيه انا حكيت كل اللي انت جاي تسأل فيه لزميلك قبل كدا ومعنديش استعداد احكي تاني لان الموضوع دا بيتعبلي اعصابي وانا راجل كبير مش حمل اللي بيحصل دا"
" يا حج محمود انا مهمتي هنا اني اظهر الحقيقه وجاي علشان اساعدكوا واساعد البلد اللي كل يوم يتقتل منها واحد "
" انا كلامي خلص يا باشا انا مش هتكلم في موضوع البيت دا تاني وراضي بقضاء ربنا سيبونا في حالنا لان احنا علي الوضع دا بقالناكتير وبصراحه زهقنا من كتر الكلام"
" طيب بالنسبه للخلاف بينك وبين عيله سالم وعوف علي البيت دا والمشاكل اللي حصلت بينكوا قبل كدا ، محتاج اعرف منك تفاصيل اكتر عنها "
" كان خلاف وراح لحاله من ساعه ما العيال ماتوا ولعلمك احنا قررنا اننا هنحرق البيت دا ونهده علي اللي فيه ونرتاح من شره "
" ومعملتوش كدا من الاول ليه ياحج ولا كنتوا مستنين لما نص شبابكوا يموت ؟"
" ومين قالك اننا مجربناش بدل المره الف بس كل مره بتحصل حاجه تبوظ كل اللي بنعمله بس المره دي لازم نجيب عليها واطيها ، مسئله وقت مش اكتر وبعد ادنك بقي يا باشا لاني عاوز انام"
خرجت من عند السلاموني وانا مش قادر افسر كلامه بس الراجل دا بيكدب .
رجعت مكتبي بعد المغرب وبعد ما عديت علي عيله عوف وعيله سالم وللاسف كل كلامهم واحد ومعرفتش اخرج منهم بمعلومه مفيده واتأكدت ان المعلومات كلها هطلعها من جوا البيت .
بعد شويه دخل عليا مصطفي وهو معاه كل الحاجات اللي طلبتها منه وقولتله انت هتدخل معايا بكره الصبح بيت ايوب هحتاجك ساعه واحده وبعدين ليك الحق تفضل معايا او تمشي .
