قصص الجن و العفاريت في الوطن العربي
مين هي نورة الطقاقة؟...
أشهر المطربات الشعبيات في الكويت. وكلمة "طقاقة" في الخليج معناها المطربة اللي بتحيي الأعراس والمناسبات هي وفرقتها وبيعتمدوا أساساً على الإيقاع والدفوف. نورة وفرقتها كانوا تريند وقتها، ومفيش فرح كبير في الكويت بيعدي من غير ما تكون هي اللي مولعة الجو فيه، وصوتها وإيجابيتها كانت مكسرة الدنيا…
الليلة اللي غيرت كل حاجة في حياة نورة و فرقتها…
القصة بتبدأ في ليلة عادية جداً، نورة جيلها اتصال من ست بتطلب منها تحيي فرح بنتها في منطقة اسمها "الصباحية". نورة وفرقتها كانوا تعبانين جداً ومحتاجين إجازة، بس الست عرضت مبلغ مالي كبير جداً يغري أي حد، فـ نورة وافقت ولمت فرقتها وطلعوا على العنوان، ول ما وصلوا، لقوا قصر فخم جداً، الإضاءة والزينة والديكورات حاجة في قمة الشياكة والثراء، دخلوا وبدأوا يعزفوا ويغنوا والناس بدأت ترقص وتتفاعل.. لحد هنا كل حاجة تمام، بس بعد شوية، البؤرة بدأت تتقلب لرعب!
تفاصيل الليلة المشئومة...
نورة والبنات اللي معاها بدأوا يلاحظوا حاجات مش طبيعية خالص في الصالة:حركة المعازيم كانت سريعة جداً بشكل مريب، ووجوههم باردة وشفاههم مفيهاش أي تعابير بشرية، دي كانت الصدمة! واحدة من الفرقة وهي بتعزف وبتبص على الأرض، لمحت فساتين الحريم مرفوعة شوية، ولقيت أقدامهم مش رجين بني آدمين خالص.. كانت شبه حوافر الحيوانات!القاعة كانت حرارتها بتزيد بشكل تخوف، والرقص كان فيه هيستريا مش طبيعية.
نورة بذكائها فهمت فوراً إنهم مش في فرح بني آدمين، وأنهم وسط جمع من "الجن"! وحذرت فرقتها بصوت واطي جداً إن محدش يصرخ ولا يوقف عزف، لأن لو الموسيقى وقفت ممكن يتاكلوا صح. واستمروا يغنوا ويعزفوا وأيديهم بترتعش من الخوف والعرَق مغرقهم، لحد ما أخيراً صوت أذان الفجر انطلق.
الهروب و الصدمة الكبرى...
أول ما الأذان أذن، النور قطع فجأة، والمكان كله سكت في ثانية. نورة وفرقتها جريوا بأقصى سرعة عندهم بره البيت، ولما طلعوا للشارع وبصوا وراهم كانت المفاجأة اللي تطير العقل.. القصر الفخم المضيء اختفى، ولقوا مكانة بيت مهدوم ومهجور من سنين طويلة ومظلم تماماً ومفيش فيه أي روح!
ايه اللي حصل مع نورة الطقاقة و فرقتها بعد الليلة دي؟؟
بعد الليلة دي، نورة اعتزلت الغناء تماماً وفرقتها اتفككت، ومحدش سمع عنها حاجة تاني. في ناس بتأكد إن القصة حقيقية بنسبة 100% وإن دي كانت السبب في اعتزالها، وناس تانية بتقول إن القصة مجرد إشاعة وتضخمت مع الوقت، وأن اعتزال نورة كان طبيعي بسبب السن أو الرغبة في الابتعاد عن الفن.
مهما كانت الحقيقة، هتفضل قصة "نورة الطقاقة" من أكتر الحكايات اللي تحبس الأنفاس وتخليك تفكر ألف مرة قبل ما تدخل بيت من غير ما تعرف معلومات كافية عنه عشان متتغفلش زي نورة الطقاقة!!!
الرجاء تسجيل الدخول لتتمكن من التعليق