دار المسنين المستوحاة من أحداث حقيقية
الحكاية بدأت بعد ما خلصت الجامعه مكانش قدامي غير اني اشتغل ب شهادتي او اني اسافر خصوصا اني وحيد ومليش جيش
والدتي متوفيه من وانا عندي 9 سنين ووالدي متوفي من وانا عندي 19 سنه وانا حاليا بسبب اني كنت بسقط ف الكليه كتير بسبب الفلوس وكده عندي 28 سنه عارف اني متخرج كبير ف السن بس ده أمر الله وانا مليش اي دخل فيه
كنت بشتغل جمب الجامعه ب اليوميه علشان اجيب مصاريفي ب العافيه وبسبب كده كنت بسقط
ولو معملتش كده مكنتش هلاقي اكل وكان زماني نايم ف الشارع
ابويا معمليش اي حاجه اتسند عليها ومسابش ليا غير شويه كتب مش بفهم فيهم اي حاجه
كان بيحب القرايه جدا هو وأمي لدرجه مرعبه
لدرجه انه لما مات كان لابس النظاره وبيقرء
وقالي كمان ان امي ماتت وهي قاعده بتقرء ، كنت عايز اقوله بدل القرايه اعمل ليا اي حاجه لكن بردو القدر كان ليه رأي تاني ومات
افتكر دي معلومات كفايه عني على الاقل لحد دلوقتي
المهم بعد ما خلصت الجامعه بدئت ادور على شغل بس يكون شغل بجد حاجه الواحد يعمل منها فلوس مش يدوبك اكل واشرب ب العافيه
انا اصلا خريج كليه زراعه
المهم وب الصدفه كان ليا واحد صاحبي اسمه عامر كان مختفي بقاله فتره مش قليله قابلني صدفه
وحسيته فرح انه شافني مش زي عادته !!
سألته كان مختفي فين ؟
قالي انه كان مسافر ولسه جاي
ف سألته لو قدامه شغلانه تكون فلوسها مُجزيه
قالي ان فيه شغلانه هي غريبه شويه لكن فلوسها حلوه وليك 3 وجبات ف اليوم ومتاح سُلف اسبوعيه
سألته على الراتب قالي 7500 جنيه
قولتله وديني فورا
بعتلي اللوكيشن بتاع المكان على موبايلي ورحت لدرجه اني نسيت اسأله ايه تفاصيل الشغل
هو كان قالي ان الشغل ليه علاقه ب اللي اتعلمته ف الكليه ف ب النسبالي كان عادي
لكن اللي مش عادي اني لما رحت المكان لقيته
( دار مُسنين )
بصيت للوكيشن علشان اتأكد لقيته هو المكان
رنيت على عامر واول ما رد قولتله انت بتهزر جايبني اشتغل ف دار مسنين
قالي هو انت اديتني فرصه اقولك حاجه انت تقريبا سبتني وجريت وعموما يا سيدي متخافش انت اصلا مش هتتعامل معاهم
انت يدوبك هتسقي الزرع كل يوم
تقص الشجر كده حاجات كلها انت متعلمها ف الجامعه واصلا مش محتاجه علام دي اي عيل صغير يعملها بس هي نصيبك
قفلت معاه وقولت وليه لا ؟
انا ليه مش بشتغل جنايني ب 7500 جنيه ؟
ايه يعني لما اشتغل هنا على الاقل مش زي الوحوش اللي بره !!
هنا ناس غلابه ف حالهم خارج نطاق العالم
او نقدر نقول عليهم ف عالم اخر
دخلت من البوابه كان قدامها فرد امن قولتله انا جاي بخصوص الشغل
ابتسم ابتسامه صفرا كده وقالي اهلا وسهلا انت اللي باعتك استاذ عامر
قولتله اه انتو تعرفوه ؟
قالي طبعا اتفضل اتفضل مكانك
دخلت وهو جه معايا لحد المكتب بتاع ال HR تقريبا
لقيت ست اربيعنيه كده ف العمر
واتكلم فرد الامن وقالها : ده العامل الجديد اللي هيمسك قسم الزراعه اللي باعته استاذ عامر
ابتسمت ابتسامه تكاد تكون مرعبه وهي بتخلع النضاره بتاعتها وسابت الورق اللي كانت بتقرئه وقالتلي :
بصوت خافت وواطي :
(مبروك عليك وعلينا وعليهم) !!!
قولتلها الله يبارك ف حضرتك بس مش لما نتفق الاول
قالتلي هو مش عامر فهمك على كل حاجه ؟
قولتلها بمناسبه عامر هو حضراتكم تعرفوه منين
قالتلي والده خيره علينا وكل سنه بيدفع فلوس للدار لله يعني علشان نجيب لبس واكل نضيف لكل اللي هنا ف الدار
قولتلها تمام ومحطتش ف دماغي
بصراحه انا مش متدخل اوي ف عامر يعني مش صاحبي صاحبي
وده لان انا اصلا مليش صحاب بسبب حالتي اللي زي الزفت انا كانت حياتي عباره عن شغل عند الناس ب اليوميه والكليه فقط
قولتلها طيب الله المستعان الراتب 7500 مظبوط؟
قالتلي مظبوط في اي اعتراض ؟
قولتلها لا بأكد بس !!
طيب مواعيد العمل من كام ل كام ؟
قالتلي انت شغلك بيدء من 7 صباحا ل 7 مساءً
قولتلها تمام بس لو ينفع اخلص شغل بدري عن كده لان وانا جاي المفروض اني جاي ف عز النهار ووصلت بصعوبه جدا + صاحب التاكسي مكانش راضي يدخل لحد هنا ف انا كملت المشوار مشي
مبالك بقى 7 بليل المكان تقريبا مهجور هيكون في صعوبه اني اروح
قالتلي : اولا المكان مش مهجور ب الطريقه اللي تخوف ده طبيعي اننا نكون بعيد عن الناس علشان لو حد من كبار المسنين الي عندنا قدر يخرج نقدر نجيبه وميتوهش مننا + حتى لو خرج وتاه مننا هيرجع تاني لان مفيش حته يروحها + مين قالك انك هتروح اصلا ؟
قولتلها بخوف : افندم امال ايه ؟
ضحكت وهي بتقول مقصدش
اقصد ان هنا في سكن ليك مش هتحتاج تروح واهو توفر الايجار اللي بتدفعه وياسيدي كل شهر ابقى انزل وسط البلد اشتري كل اللي نفسك فيه ويكفيك هنا لحد الشهر اللي بعده
الموضوع كان مخيف ب النسبه ليا وتجربه جديده وفريده من نوعها واللي ذود الخوف موضوع اني ابات هنا ده لكن مكانش قدامي اي اختيار دي فرصه ومش هلاقي زيها وشغلانه نضيفه ومش متعبه
قولتلها طيب الله المستعان هروح اجيب حاجتي من الشقه اللي انا قاعد فيها واجي تاني
قالتلي ملوش لزوم لان هنا في لبس للعمل مش هتحتاج لبسك
وكمان فيه لبس للنوم
كل حاجه هنا بنظام فاهم ؟
استغربت اكتر بس قولت خليني وراهم اجرب شهر مش هخسر حاجه !
ندهت لفرد الامن وقالتله يوصلني الاوضه بتاعتي ويعرفني على المسنين
قولتلها ولازمتها ايه اتعرف عليهم انا مالي ومالهم
قالتلي ان احنا هنا عيله واحده
وان دول مش مجانين دول بس كبار ف السن وأولادهم مش مستحملينهم بس فجابوهم هنا
قولتلها تمام وبردو محطتش ف دماغي لاني اول مره اشوف مكان زي ده اصلا ومعرفش ايه قوانينه وقواعده .
اخدني مغاوري فرد الامن وبدء يوديني للمسنين علشان نتعرف على بعض
لكن كان في شئ غريب
كلهم كانو قاعدين وكأنهم منتظرني لدرجه ترعب اي حد ف مكاني
اول واحده مدت ايديها وقالتلي انا ستك ماجده
واحد تاني مد ايده ب السلام وقالي وانا جدك حسين
واحد تاني مد ايده ب السلام وقالي وانا بقى عمك عزيز
واحده تانيه قالتلي وانا عمتك ناهد
واخر واحد مد ايده وقالي وهو بيضحك بصوت عالي ومستفز وانا جدك طاهر يا ولا
قولت بس ده اكيد مجنون هو بيضحك ليه كده
قولتلهم اهلا وسهلا وانا علي اسمي علي
لكن عم طاهر قالي جمله خلت شعري كان هيبيض اول ما سمعتها
قالي :
(مبروك عليك وعلينا وعليهم) !!
دي نفس الجمله اللي اللي قالتهالي المديره HR اللي كنت لسه معاها ..
اتخضيت طبعا من الجمله وخصوصا الابتسامه اللي كانت على وشوشهم كلهم دي اللي ملهاش داعي او مناسبه …
سبتهم ومشيت ومعايا فرد الامن مغاوري اللي وداني اوضتي واللي اتفاجئت انها جمب اوضه عم طاهر
قولت الله اكبر بدايه عنب
اخدت دش ولبست الترينج بتاع النوم اللي كان شكله غريب لكنه مريح ترينج قديم كده تحسه من ايام التسعينات
وفي صفاره صفرت خوفت جدا وجريت على بره علشان اشوف فيه اي
لقيتهم بيتجمعوا علشان العشاء
قولت وبعدين بقى ف العالم المجانين دول وانا كل لقمه هاكلها هتزغف قبلها كده
انا ب الطريقه دي مش هعيش لحد الغداء بتاع بكره هيكون جالي سكته !
مصيبه ليكون الصحيان كده بردو !
المهم قعدنا على سفره طويله جدا
واكتشفت ان كل اللي موجود في الدار ده انا وال 5 المسنين وفرد الامن مغاوري
والاستاذه عفاف المديره
عرفت ان ممنوع الكلام على الاكل لاي سبب ودي ب النسبالي كانت حاجه تخوف بردو
اصل اشمعنا يعني ؟
وكمان وهما بياكلو شكلهم يخوف
عاملين زي الانسان الالي او الروبوتات كده
قولت مش هاكل وقومت علشان ادخل اوضتي لكن بحركه قويه على رجلي ضغط عليها مغاوري فرد الامن خلاني ارجع اعد تاني على السفره !
اللي هو يعني ممنوع اسيب الاكل واقوم !!!
قولت بردو ماشي خليني وراكم لما اشوف اخرتها ايه
طلع ان مش مسموح تقوم غير لما اكلك يخلص ب الكامل …
(نظام غريب جدا)
اكلت ودخلت اوضتي وقبل ما ادخل مغاوري فرد الامن قالي بص بقى علشان متخافش نص ساعه بظبط والنور بينطفي ف المكان ب الكامل علشان متخافش ..
قولتله وده ليه ؟
قالي علشان كبار المسنين ميهربوش وينامو وميلاقوش مكان يروحوه
قولتله امال انت لازمتك ايه هنا ؟
وبعدين ما تقفلوا عليهم الابواب!!
قالي ولو حد فيهم حب يدخل الحمام يعملها على نفسه ؟
وبعدين ميخصكش انا عليا عرفتك ويلا يدوبك تخش تنام علشان شغلك الصبح
وسابني ومش
وب الفعل دخلت علشان انام وفضلت سرحان بفكر ف حياتي اللي اتغيرت ف اقل من يوم دي.
وف ظل سرحاني
النور قطع ب الكامل
قولت هي كملت
سمعت صوت غريب جاي من اوضه عم طاهر ، صوته كأنه بيطلع ف الروح
وبعدين بقى ف اليوم اللي مش هيعدي ده انا كان مالي ومال الشغلانه اللي تجيب شلل دي
انا حرفيا هموت وانام
والصوت عمال يزيد قومت من على سريري ونورت فلاش الموبايل علشان اتوجه للاوضه اللي قاعد فيها عم طاهر
الصوت كان اختفى تماما
خبطت على الباب قبل ما ادخل لكن مردش عليا
كان لازم ادخل اشوف ايه بيحصل ويارتني ما دخلت :
لاني اول ما دخلت لقيت عم طاهر مشنوق وعنيه مبرقه ولسانه طالع ل بره
ملحقتش اعمل اي رد فعل خصوصا بعد الخبطه الشديده اللي اخدتها على دماغي ......…
#يتبع
