دار المسنين الجزء الثالث والاخير
كنت مرعوب جدا !
ازاي اللي انا سامعه ده اي حد مكاني كان هيجيله سكته قلبيه فورا
مسكت تليفوني وشغلت الفلاش علشان اقدر اتحرك من غير ما اخبط ف حاجه
وصوت الخبط عمال يزيد على الباب
حاجه بتقولي افتحله علشان تفهم مهو كده كده انت عايش ف رعب مش هتفرق كتير !
وحاجه تانيه بتقولي اوعى تفتح هتموت
لحد ما سمعت صوته بيقولي بقى كده يا علي انت خايف مني
انت ب ايدك يا علي ضيعت اخر فرصه ليك
مبروك
(عليك وعلينا وعليهم)
متنساش تقرء الكتاب انهارده دي نصيحتي ليك
والصوت بعدها اختفى تماما
بعد ما فضلت حوالي 5 دقايق ف رعب تام من الي سمعته
قررت افتح الباب
لكن مكانش في حد ولا حتى اثر لحد
دخلت تاني الاوضه فورا وقفلت على نفسي كويس وحطيت التليفون ف زاويه بحيث الفلاش يكون منور ليا وانا بقرء الكتاب
منا لازم افهم
واللي فهمته خلاني كنت عايش ف حاله من الهيستريا والشلل الفكري
فتحت الكتاب وأول صفحه كان مكتوب فيها
(مذكرات قتيل)
واللي كان مكتوب فيه ك الاتي :
كان معايا صاحبي واحنا صغيرين كنا بنلعب كتير مع بعض ، كنا اتنين بس
اقصد مكناش شله
وكمان مكناش بنحب الزحمه والاماكن اللي فيها هيصه
دايما كنا بنحب الهدوء ، وكمان كنا بنحب الالعاب الغامضه اللي فيها خوف دي
زي مثلا كنا ف المدرسه بنستناهم لما يخرجو كلهم من المدرسه ونخش اوض مقفوله ونعد نرسم جواها
ولما نيجي نروح ننط من على السور علشان البواب لو شافنا هيعرف اننا كنا جوه ف المدرسه ف هيسال اكيد كنتو بتعملو ايه ؟
او نعدي من جمب المقابر
ولما تجرئنا بقينا ندخل المقابر ونلعب كمان استغمايه فيها !!
لحد هنا واللي كنت بقرئه ده كنت بقول يارب يكون صدفه لان معظم اللي بقرئه ده حصل معايا بظبط
استجمعت شجاعتي وقلبت الصفحه وقولت اكمل ..
لحد ما ف مره صاحبي ده قالي ان في مكان طالع عليه اشاعات ان فيه العاب وان المكان ده كان قصر اصلا بس مهجور جنينه حلوه والعاب لطيفه بس الناس بتحذر ان حد يروح ناحيه هناك وكان وقتها الموضوع زي ما بيقولو جديد وتريند
خصوصا ان اي حد كان بيروح هناك مكانش حد بيسمع عنه تاني ولما الحكومه كانت تروح مكانوش بيلاقو اي حد
حاجه واحده اللي كانو بيلاقوها وهي بتكون حاجه من قطر الضحيه
زي ساعه او خاتم او موبايل مثلا
انما الضحيه نفسها مبتبقاش موجوده
لحد ما المكان اتقفل ومبقاش حد بيروح هناك نهائي ..
المهم اكلمك يا صديقي صاحبي ده اخدني ف مره واقنعني اننا نروح هناك وانا ب الفعل سمعت كلامه
ورحنا ونطينا من على سور القصر ودخلنا
قعدنا نلعب ف الجنينه ونتفرج على شكل القصر اللي كان حاجه خرافيه بس بردو مرعبه …
بعد ما خلصنا لعب قررنا اننا هنِشبِع الفضول اللي جوانا وندخل القصر من جوه
ودخلنا ب الفعل لكن انا كنت ملاحظ ان بمجرد ما دخلنا ان في حد بيراقبنا طلبت فورا من صاحبي اننا نمشي من المكان ده
لكنه قالي لا وعلى ضمانتي وبعدين منا معاك اهو وطمني يعني ف الحقيقه
وقالي بعدها انه هيدخل الحمام وجاي
قولتله وماله روح ونا هتفصح القصر العجيب ده
وبمجرد ما دخل صاحبي الحمام ظهر طيف ل كائن غريب وبعد كده اتحول ل كائن او راجل عجوز
وبدء يجري ورايا
باب القصر ساعتها كان مقفول ومش راضي يفتح
كنت شايف ساعتها وانا عمال اصرخ صاحبي بيتفرج عليا ومش قادر يلحقني
لحد ما الراجل ده اتملك مني وشالني على كتفه ودخل بيا اوضه
كانت عيني ف عين صاحبي اللي كان واقف وشايفني ومش بيعمل حاجه علشاني ب الرغم اني مكنتش عايز اجي وجيت علشانه
بمجرد ما دخلت الاوضه الراجل كان مجهز منشار كهربائي وصله وشغله وكان بيتوجه ليا وانا كنت عمال اصرخ
واخر حاجه قالها ليا متخافش انا هقتلك وحقك هييجي متزعلش بقى
كنت شايف شكله وهو بيبتسم ابتسامه مرعبه ف كل حرف بينطقه
لكنه قالي بعدها ان في مُختارين
واني حظي وحش علشان انا مش منهم
قولتله وانا ببكي والنبي يا عمو عايز اروح والنبي عايز امشي من هنا
مهو بردو لك ان تتخيل ان طفل عنده 12 سنه يشوف كل الكلام ده
الراجل اتكلم وقالي :
في ناس بنختارهم يكونو معانا بمقابل اننا نكون ف ضهرهم ونكشفلهم ناس على حقيقتهم ولو عايزين يكونو اغنياء كمان ونكشفلهم اماكن فيها اثار بس طبعا لازم يقدمو حاجه اسمها قربان واتنين وتلاته
وفي ناس بيكونو ضحايا ميقدروش يقدمو اي حاجه بخلاف انهم ميفهموش الكلام ده اصلا !
انت بقى من الضحايا دول علشان كده حقك هيجي موت وانت متطمن وقالي اخر جمله
( مبروك عليك وعلينا وعليهم )
الراجل شغل المنشار الكهربائي وصوت صراخي زاد الى ابعد درجه
لحد ما الراجل شال رقبتي من مكانها
وصاحبي طبعا قدر انه يهرب
لحد هنا وهوقف وهرجع اكمل تاني
_____________________
الكلام ده كله حصل معايا انا وصاحبي زين
انا فاكر كل حرف من الي قرئته ده كأنه امبارح
وقتها انا هربت من القصر وقعدت اسبوع مرعوب ف البيت من اللي شوفته
وبعد ما نزلت بدئت اسأل اهله عليه
لكنهم قالولي انه مختفي بقاله اسبوع واهله حرفيا كانو وقتها في حاله انهيار تام
ومع الايام حاولت انسى الموقف لحد ما كنت تقريبا نسيته بس افتكرته تاني اهو بسبب الكلام اللي بقرئه ده .…
كنت ف حاله ذُعر
ازاي الكلام ده ؟
ومين يعرف كل ده غيري انا وزين ؟
وايه علاقه عم طاهر بكل الكلام ده ؟
بدئت اني اكمل قرايه ف الكتاب علشان افهم اكتر
لكن الصفحات كانت بيضه فضلت اقلب لحد ما لقيت صفحه فيها كلام ومكتوب فيها ك الاتي :
انهارده وانت معانا هنا
قدر يجيبك صاحبك زي ما انت زمان جبت صاحبك
انت طبعا فاكر ان ده دار مسنين !
ومتعرفش ان ده القصر اللي انت سلمت فيه صاحبك للموت ب ايدك
ده انت حتى متكلمتش عنه ولا قولت اللي حصل يا راجل مع انك كنت طفل واي حد كان هيصدقك بس هنقول ايه
الخوف قتلك مره زمان
ومره حاليا
قدرنا نخلي صاحبك يجيبك هنا ف نفس القصر اللي طبعا انت بحكم سنك اللي زاد وانك كنت صغير ساعت اللي حصل ف نسيت شكل القصر
وحتى لو مكنتش نسيته في تطورات حصلت هنا تخلي شكل القصر يتغير
الشخص اللي جابك هنا جابك ك اخر قربان يقدمه لينا علشان نفتحله مقبره اثريه
طبعا كان رافض وبيقول انك صاحبه بس انا حكيتله على اللي انت عملته ف صاحبك زمان وده اداله حافز كبير انه يسلمك ليا ك اخر قربان
علشان تموت بنفس طريقه صاحبك
ومحدش يسمع عنك ولا حتى يفتكرك
ب المناسبه المكان هنا فاضي مفهوش ولا فرد امن ولا مديره ولا اي بني ادم
وحاولت اتكلم معاك واديك فرصه انك تكون مختار وتقدم لينا قرابين علشان تعيش
لكن انت مرضتش تفتح ليا الباب
ايوا يا علي انا عمك طاهر الراجل العجوز اللي قتل صاحبك وحكالك عن طريقه موته
واللي هقتلك حالا
وهحكي للناس بعدها على طريقه موتك …
#تمت.
اصدقائي متبخلوش ب رأيكم ف القصه لان ده بيخليني اتطور من نفسي واعمل حاجه تليق دايما ب اذوء وعقول حضراتكم ❤️
