يحدث ليلا بعد النوم الجزء التني
كان لازم افهم انها مش هتكون مرا من اول مرا
المرا دي سمعت بوضوح نفس الصوت دا صوت الست اللي قابلتها بتقولي اوعي تبصي تحت السرير
بصراحة مش هكدب عليكو اول حاجة جت ف دماغي اني ابص تحت السرير
بس معرفش ليه ….. خوفت
غمضت عيني وفضل اقراء قرأن لحد ما نمت الحمد لله
الصبح قومت بصراحة قولت لنفسي اكيد دا كان حلم
لبست وشربت القهوه بتاعتي وجهزت نفسي علشان ابدأ اول يوم شغل
بس وانا خارجة من باب الشقة لمحت ورقة على الارض
مسكت الورقة فتحتها لقيت مكتوب فيها
“كويس انك مبصتيش تحت السرير”
يبقى مكانش حلم
هنا انا بدأت اخاف بجد
انا مقولتش لحد على اللي بسمعه او اللي بيحصل مين اللي كتب الورقة دي
نزلت روحت شغلي وبقيت بحاول اشغل دماغي في اي حاجة بس علشان مفكرش ف اللي بيحصل وقولت لما ارجع اسأل حارس العمارة لو شاف حد طالع بجواب او ورقة
خلصت شغلي ورجعت على البيت واول لما شوفت الحارس سألته هو محدش جابلي جوابات او سلمك جواب ليا وانت حطيته قدام باب الشقة
طبعا قالي لا وهو لسا في حد بيبعت لحد جوابات يا انسة النت مخلاش اللي عايز يقولك حاجة هيبعتهالك على النت
طبعا مدخلتش معاه في جدالات
لانه صح الى حد ما
طلعت وبصراحة مكانش في اي حاجة تقلق ف الشقة كانت هادية وشقة عادية جدا
العيب شكله فيا انا يمكن علشان المكان جديد ف بحلم الاحلام دي وانا اللي بوهم نفسي
دخلت غيرت هدومي وقعدت اخلص شوية شغل على اللاب وكلمت اهلى اتغديت خلصت كل حاجة ف يومي يعني
وروحت لسرير الاحلام المرعبة انا خلاص سميته كدا
اهلا بيك يا سيدي لما نشوف هتخليني احلم ب ايه تاني
بس المرا دي انا محلمتش ولا صحيت في نص الليل
بس لما صحيت الصبح لقيت الدولاب اللي قدام السرير مفتوح
قولت عادي ممكن اكون نسيته
ويومي مشي عادي هو هو مفيش اي جديد من البيت للشغل للبيت تاني
مفيش حاجة كانت بتهون عليا غير بابا وماما ونادر
وسريري المسلي اللي بيدخلني افلام رعب عمري ما شوفتها ف حياتي
بس شكله كان واخد اجازة امبارح
دخلت نمت وقولت لسرير يلا يا سفينة الاحلام عايزة حلم كوميدي بقى النهاردة
ونمت
صحيت الصبح ببص ف الساعة لقيتها 8 يااااالهوي اتأخرت لازم اقوم انزل بسرعة
وانا بقوم من على السرير خدت بالي ان مكان الكرسي متغير ودا بقى كرسي تقيل ولو حركته من مكانه هكون فاكرة مش باب دولاب هو هنساه
مكانش قدامي غير اني اقوم انزل بسرعة واجيب كاميرا اركبها ف البيت لما ارجع لان كدا شكل في حد بيدخل الشقة وانا نايمة وبيلاعبني علشان اخاف وامشي
روحت شغلي وفضلت سرحانة طول اليوم بفكر طب لو فعلا حد بيدخل وانا نايمة هو كدا عارف انه لوحدي ولو روحت بلغت الشرطة هيقولو عليا مجنونة لان مفيش حاجة اتسرقت هقولهم ايه صحيت لقيت الدولاب مفتوح ومكان الكرسي اتغير لا مش هينفع
قطع حبل تفكيري زميلي الياس
مالك يا بنتي سرحانة كدا ليه
لا مفيش اصل
اصل ايه بس المدير واقف باصص عليكي من بدري بصي انا هقوم اخد اذن بريك بدري ليا انا وانتي نشرب قهوه علشان تفوقي شوية
هزيت دماغي اني موافقة
راح للمدير وفعلا اخدلنا اذن
نزلنا نشرب قهوه ونتمشى
الياس قطع السكوت وقال بصي انا مش هكون فضولي واسألك لو عندك مشكلة او لا بس عايزك تعرفي اني اول واحد هسمعك لو فيكي حاجة
رديت وقولتله لا انا تمام بس مش متعودة على البيت الجديد ومش بعرف انام في كويس علشان كدا هتلاقيني مرهقة شوية
كان كل اللي ف دماغي اني مش هينفع اقوله على اي حاجة بتحصل لاني مش عايزاه يفتكرني مجنونة
ولاني مش فاهمة ايه اصلا اللي بيحصل
هو رد عليا وقالي تمام بس انا بردو دايما هكون موجود
شكرته ورجعنا المكتب
خلصت شغلي وعديت وانا مروحة على محل الكترونيات جبت كاميرات
طلعت البيت حطيت واحدة ف الاوضة وكاميرا ف الصالة وكاميرا على باب الشقة
علشان حتى لو حد بيدخل يخاف لما يشوف الكاميرا
ووصلت الكاميرات بالموبايل واللابتوب
ونمت من التعب
صحيت تاني يوم الصبح
واول حاجة جت ف دماغي الكاميرات
لازم ابص عليها
فتحت الكاميرا مفيش اي حاجة انا نايمة والدنيا هادية من حواليا
بس اول لما الساعة جت 3:33 الفجر
لقيت ………………يتبع
